Friday, November 28, 2008

غباء اعلامى

من كام يوم وأنا بقلب ف الدش,محنا جبنا دش عقبال عندطو بدل دوخه الوصله اللى كل شويه تقطع,المهم فرحانه انا بالدش وبقلب ف القنوات لمحت على قناه الحياه الحمرا ف البرنامج بتاع المذيعه الظريفه المحجبه بتاعت اعلانات الشامبو مستضيفه واحده وقاعدين ال2 بروح امهم بيكفنو واحد,اه والله كفن ولافينه على عروسه وبيلفوه ويربطوه ال ايه بيرو الناس يكفنو بعضيهم ازاى!!!
مبدأيا كده عشان اى حد ظريف يجى يقولى الموت عليتا حق ومسيرك هتتكفنى ف يوم م الايام أقوله طبعا وانا الحمدلله مؤمنه ومؤحده ان الموت حق والبعث حق والجنه حق والنار حق بس هل من الطبيعى انى افتح التليفزيون الاقى لكى ياسيدتى كيف تعدين كفنك هذا الصباح بطريقه شريعه؟
موش عايزه اقولكو اد ايه انا اتسرعت وغيرت القناه بسرعه الموضوع كله مخدش ثوانى,بصرف النظر من ان الناس بتتشائم م الموت وسيره الموت بجد دى موش منظر حاجه تتعرض للناس ف البيوت بيتهىءلى كان المفروض اصلا قبل ماتتذاع يتعرض تنويه "احنا هنكفن دلوقتى,خبو عيالكو" حاجه زى كده,خصوصا انها موش قناه دينيه اصلا ومش عارفه مين الصراحه اللى هيبقا قاعد ف بيتهم مستنى يشوف يكفن ازاى!!! كام واحد استفادو م الوصفه الهايله دى؟ على اساس ان لو مات منك حد ف الصحرا ومفيش حد غيرك يكفنه ولا ايه,حاجه بتنزل مع الاسعافات الاوليه ولا ايه؟
انا كنت بفكر احط صوره مع البوست بس احترت هل احط اللوجو بتاع القناه اللى هيه اصلا متستاهلش يتعملها اعلان على مدونتى عابره القارات ذات الانتشار اللوذعى,ولا احطلكو صوره -بعيد عن السامعين- كفن!!!
تخيل انت بتفتح المدونه لقيت كفن ف وشك,والنبى موش حاجه تسرع؟

9 comments:

FOrty said...

الموضوع بقى منتشر انا شفته قبل كده على قناة دريم 2 فى برنامج عما يتسألون و برضه كان صادم و مكملتوش و برضه كان جايب واحده تشرح من باب ان الستات يغسلو بعض و يكفنو بعض بدل ما يخش فى العمليه حانوتى رجل غريب الكلام ده كان من حوالى 3 شهور بس من اسبوع لقيت المذيع فى نفس البرنامج بينوه على اعاده الفقره و استعداده لتلقى الاسئله بناء على رغبه المشاهدين
اعتقد الموضع فيه شبه الفرقعه الاعلاميه اكثر من الواعز الديني و ربنا يهديهم و يغفر لنا جميعا

s.m said...

هو با مانه انا مش شايف مشكلة المفروض انهم حتى لو منو هوش عن دا بطريقة مباشرة بس دا ميمنعش ان فى ناس حابة تتعلم الشريعة الاسلامية فى طريقة تغسيل الميت وتكفينة وعلى العموم ما انتى غيرتى القناة متزعليش هو موضوع يقشر البدن بس لازم برضوا نفكر فية على فترات ويمكن هما حاسين اننا هنعيش فى صحراة وهنرجع للعصر البدائى وعلشان كدا بقالهم كام يوم ماسكين الموضوع دا ولا حد جابها من الكونترول بقة وان فى شخصية مهم اوى اوى اوى هتموت وهما عارفين طبعا ان البلد كلها ناوية تكفانها وبيستعدوا هههههه محدش مخ يروح بعيد الشخصية دى واحد جارنا هههههههه مش حبيب قلبنا طبعا صاحب العبور المهم خلاصت الكلام وخلاص انها ازاوق واكيد انتى متفرجتيش ففيا اكيد غيرك شاف الحلقة وتباعها واكيد فرح بيها بقد التشائم اللى حاصلك لانها تانى مسائل نسبية او زوقية
واخير وليس اخرا لية محدش ساعدنى فى البحث بتاعى يعنى

Unknown said...

انا من حوالى اسبوع كنت ماشى فى الشارع لاقيت اعلان من جمعية اية لجميع المسلمين

دورة لتعليم الكفن وبالطريقة الشرعية

كان الاعلان بالنسبة ليا صدمة

تخيلى بقى اشوفة فى التلفزيون وعلى قناة اسمها الحياة

ragel keber said...

اللي يعيش ياما يشوف ومع الدش يشوف افظع 0

Alkomi said...

مش عارف ايه مدى قابلية المايك هنا لانتقاداتي البوهيمية اللوذعية السارحة في ملكوت الله بين التعبر عن المكنون الاخصائي للمتكلم و المحافظة على مشاعير القارئ

بس عموما انا بتنفخ من امي و اختي و هما قاعدين قدام البت دي و قناة الناس و مسنتحين اكن اللي بيتقال قرىن و من غيره الحياة هتبوظ

t3ban said...

لأ
مش حتسرع
بس عادي يعني
محنا بنفتح التلفزيون نلاقي ناس بتتقتل وصور و بالفديو كمان مش عروسة
وحدووووووووووو
لا الله الا الله
عشتي

s.m said...

كل سنةو الجميع بخير وطيب يااااااااااااااااااااارب عيد سعيد عليكم جميعااااااااااااااااااااااا

صوت من مصر said...

بجد عندك حق ؟

أحمد الجارحي said...

ومشيت وكفني في إيدي .. أدور ع اللي يصونه