Friday, December 30, 2005

To whom may b concerned

نداء شخصى وعاجل
ابعث اليك ياسيدى عبر صفحات البلوج الاثير -اخره صبرى- مستغله قلبك الكبير و ثقافتك العاليه فى استخدام الHTML
أن تظبطلى البلوج كما وعدتنى عشرات المرات ,وكنت فى كل مره -تنفضلى- بعد ان أتى لحد عندك -ف السبير أحسن يفهمونا غلط- وتغرر بى وتتنتهى القعده بعزومه على حاجه ساقعه ,متعللا لى ياسيدى بضيق الوقت وبأن حضرتك مشغول ف الامتحانات
وأديك خلصت الامتحانات وأدى وش الضيف ,وبعدين انا خايفه لنتخانق فتقلب عليه ومطولش منك حاجه
سيدى انت تستغل تعلقى بهذا البتاع -اللى انت أكيد بتقول عليه أنى بكتب فيه العبط بتاعى- ,انا فعلا جد متعلقه بهذا البتاع وهذا العبط ,لايهمنى طلاق أبى وأمى بقدر مايهمنى أن يضمنوا لى جهاز كمبيوتر ووصله DSL - لايهم ابدا ان يكون الجهاز المذكور هو جهاز بنت خالتى (اوجهه لها التحيه هيه الاخرى على حسن استضافتها وسماحها لى بكل كرم أن استلجأ على جهازها مكتفيه هيه بمراقبتى من تحت البطانيه)-تكفل لى ان اكتب عبطى ولا مانع ابدا أن الفى نظره على هطل المعتوهين الاخرين ايضا.
أضع بين يديك سيدى مشكلتى مصحوبه بشكل البلوج الاقرع بلا أى روح ,عل وعسى تحس على دمك
المعذبه
S.E

Saturday, December 10, 2005

Toy story

-يلا ياثروه,هنتأخر
-طيب شويه
-شوفت العروسه دى كان عندى شبهها,والبيت ده كان عند دعاء وداليا جيرنا ف السعوديه وكنت بلعب معاهم بيه
-اممممممممممم
-وكان عندى باربى شعرها كانيش زى دى وفستانها روز بينور ف الضلمه كانت فضلت عندى لحد ثانويه عامه بعدين معرفش راحت فين
-والله
-والعروسه دى كبيره اد اللى بابا جابهالى لما نجحت ف 3 ابتدائى بس بتاعتى كان فستانها بلدى اصل مكنش فيه غيرهاف المحل ساعتها وانا كنت عايزه اروح بيها ف نفس اليوم
-........
-هيه دى مش بتغنى؟اصل اللى عندى كانت بتغنى
كان عندى عرايس كتيييييييييييييير
-مكعبات يع مبحبهاش
-حلوين اوى الدبايب الكتير دول,والبيوت دى كان عندنا زيها ف الحضانه
-والعاب الذكاء دى كانت عندنا ف المدرسه بردو كنت بحبها اوى
-طب يلا عشان نلحق السينما
-هيه اللعب غاليه كده ليه؟تفتكر ليه باباهاتنا كانو بشترولنا لعب ؟ مع انهم اكيد شايفين ان ملهاش لازمه
-انا مكانوش بشترولى كتير
-واضح طبعا
-لعب المطبخ دى بموت فيها,مع انى دلوقتى بكره المطبخ وكل اللى يجى منه كان عندى مطبخ تمام والله حتى كان فيه بوتوجاز و تلاجه
كنا بناخدهم معانا الجنينه ومره وقعوا ف النافوره
-تصدق انى كنت بدخل حوض السمك ده الفرن عشان اعملهم صينيه سمك مشوى ومره نسيناه وساح ف الفرن
-انا فاكره مره بابا رجع البيت وجايبلى بيانو وجايب لاخويا عربيات
-.....
-وعمو مره جابلى عرو.....
-ثروه كفايه كده المحل كله بيبص عليكى
(ياحمار انا مش بحب اتفرج ع اللعب وخلاص بحس احساس عمرك ماهتحسه ,وبحس ان كان ليه اب وام بيحبو يجيبلو لعب)

Tuesday, November 15, 2005

بنات وسط البلد

اول مره اخرج م السينما مطمنه على مستقبل السينما المصريه
لا والاهم من مستقبل السيما
مش حاسه ان ال10 جنيه -تمن التذكره- راح هباء

Saturday, October 29, 2005

Welcome 2 the real world

احدى هواياتى المفضله -لما اكون موش لاقيه حاجه اعملها طبعا- انى امشى ابص ع الناس ف الشارع وانا بسمع اى حاجه -اللى هى غالبا بتكون اذاعه الاف اخس- لانها بتبقى اكتر حاجه ملائمه جلال الموقف
فيما يطلق على الموقف بأكمله نظام
(SES) Self Entertanment System
المهم بقى ايه
بحس ان الوضع طبيعى الناس ارفانه ,المواصلات زحمه,الطريق واقف,مبايعه الشعب المخلص -بضم الميم- لرئيسه المخلص \بفتح الميم بقى المره دى- مغرقه الدنيا
التراب,بلاعات مفتوحه ,طرق مرصوفه من شهر يتم الحفر بها لتركيب خطوط الغاز,
سباب بذىء-حلوه بذىء دى والله- ينطلق من الميكروباصات مختلطا بصوت يتوعد بالويل والتهديد وعظائم الامور للكفره او بنسخه غير اصليه من شريط مصطفى كامل -على احسن تقدير-
المحمول اللى اصبح فعلا ف يد الجميع
غطاء الرأس بانواعه والوانه وانتشاره السرطانى -مع الفارق ف التشبيه طبعا-
خريجين جامعيون يفترشون الطرقات ببضاعه متشابه لا تدرى كنهها
قرويه مصابه بالانيما تنادى بصوت مصاب بالسل على خضرواتها المسرطنه اساسا
وجوووووووووووووووووه باهته ضاعت ملامحها
يبقى انت اكيد اكيد ف مصر
شوف بقى نفس الكادر ده معروض على شاشه التليفزيون
الصوره ملونه ,ادى اول كدبه المشهد الحقيقى off colour
يكتسى كله بألوان رماديه
الصوره جميله ,متأنقه
حتى القذاره تصبح مهندمه على الشاشات
عشان كده بحب القصص اللى تدور احداثها ف شوارع حقيقه وناس حقيقه بترسم صوره أقرب للواقعيه
والافلام التسجيليه
ونفسى امشى بكاميرا اصور الناس ف الشارع لولا انها مناظر لا يصعب رؤيتها وبتتكرر كل يوم

Thursday, October 27, 2005

title ايه انت كمان

ع البلوجر على كرايمز اللى لحست نافوخى ع الروايات ع النت وسنينه,على منير و وجيه ,على فتحى ع الساقيه ,على
الموبيل على الميسدات والنغمات ع البت و الوله و الحب و البوس
ع العشق والمعشقه
ع الفسح و العيال و المزز (تحيا المزز) ع الفطار الجماعى ,والعزومات و موائد الرحمن
على بلو نايل والمينمم شارج
ع الغبااااااااااااااااااااااااااااااااااااااااااااااااااااء
ع الانتخابات,ع اليفط اللى مغرقه ام الاشوارع , كمان مره ع اليفط
ع اليسار ,ع الشيوعيه ع الشيعيه ع العولمه ع العلمانيه لأ بلاش دى
الاخوان، ع المسدس ع الغد ,على مبارك وابنه ,ع الحزب
الف مره الحزب
ع الثقافه
يلعن ابوها الثقافه
على جيفارا
وصوره جيفارا
ع انفلوانزا الطيور ، ع الطيور شخصيا
ع اللحمه, ع الفراخ
ع الشيشه
لابردو بلاش دى
ع البنات اللى بتتخطب,ع العرسااااااااااااااااااااااااااااااااااااااااااااااااان
العرسان كلهم
على اعلانات الوظايف الخاليه ف اهرام الجمعه
على مسلسلات رمضان وهاله سرحان
ع البيت والارف ,ع الشغل والارف بردو
ع الدفاتر ,على الحسابات الختاميه ,على الميزانيه
الله يخربيت امها الميزانيه
تعاطفك لوحده مش كفايه اتبرع ولو بجنيه
طب نص جنيه؟

Saturday, August 27, 2005

اللى عندو صوت محيره



ملأت الدنيا صراخا الفتره الاخيره,عايزه حد يروح معايا القسم يجيب البطاقه الانتخابيه بتاعى - على اعتنبار انى عمرى مادخلت اقسام وكده- ,الحمدلله و بعد عناء جبتها-وبالمناسبه باسم غير اسمى هيبقى اسمى ساعتها "مروه" معرفش مين مروه دى وبمجرد ماتخلص الانتخابات هرجع لحالتى الطبيعيه "ثروه" وسمعنى احلى سلام للحكومه الالكترونيه-.لما روحت البيت ماما سألتنى :ها مبسوطه ياستى ,هنتتخبى مين بقى؟
صحيح هو انا هنتخب مين؟
السؤال كان مفاجاه .تطليع البطاقه عندى كان هو الهدف موش الانتخاب
تنتخبى مين يا ساسو؟ مبدأيا اى حد غير الريس و نعمان و الراجل بتاع الطربوش
ايمن نور؟
والنبى رئيس جمهوريه هيبقى متهم ف قضيه تزوير وبعدين مانتى كنتى بتقولى عليه عميل امريكانى ,بس البرنامج بتاعه كويس وكمان متنسيش ان ده الوحيد اللى عبرنا -جيه(بنها) مدينتى المتواضعه- ودى نقطه مهمه عندى وبعدين بصراحه احسن الوحشين ,عمرك سمعتى مرشح م ال10 دول غير بعد الترشيح موش فالح وهو ف حزبه عايزاه يبقى رئيس جمهوريه؟
وبعدين المساله مساله تجميع اصوات فاحنا ايه نجمع الاصوات كلها على مرشح واحد احسن مايتفرق الدم بين القبائل
ها يابنتى رسيتى على ايه؟

Monday, August 15, 2005

منشورات فدائية على جدران إسرائيليه

1
لن تجعلوا من شعبنا
شعب هنود حمر
فنحن باقون هنا ..
في هذه الأرض التي تلبسن في معصمها
إسوارة من زهر ..
فهذه بلادنا
فيها وجدنا منذ فجر العم
رفيها لعبنا ..
وعشقنا..
وكتبنا الشعر
مشرشون نحن في خلجانها
مثل حشيش البحر
مشرشون نحن في تاريخها
في خبزها المرقوق .. في زيتونها
في قمحها المصفر ..
مشرشون نحن في وجدانها
باقون في آذارها ..باقون في نسيانها ..
.باقون كالحفر على صلبانها
باقون في نبيها الكريم ، في قرانهاوفي الوصايا العشر ..
2
لا تسكروا بالنصر
إذا قتلتم خالدا
فسوف يأتي عمرو
وإن سحقتم وردة
فسوف يبقي العطر ..
3
لأن موسى قطعت يداه
ولم يتقن فن السحر
لأن موسى كسرت عصاه
ولم يعد بوسعه
شق مياه البحر
لأنكم لستم كأمريكا
ولسنا كالهنود الحمر
فسوف تهلكون عن آخركم
فوق صحارى مصر ..
4
المسجد الأقصى ، شهيد جديد
نضيفه إلى الحساب العتيق
وليست النار، وليس الحريق
سوى قناديل تضيء الطريق
5
نخرج كالجن لكم
من قصب الغابات
من رزم البريد، من مقاعد الباصات
من علب الدخان، من صفائح البنزين،
من شواهد الأموات
من الطباشير.. من الألواح..
من ضفائر البنات ..
من خشب الصلبان.. من أوعية البخور..
من أغطية الصلاة..من ورق المصحف، نأتيكم
من السطور والآيات
لن تفلتوا من يدنا..
فنحن مبثوثون في الريح .. وفي الماء .. وفي النبات
ونحن معجونون بالألوان والأصوات
لن تفلتوا..
لن تفلتوا..
فكل بيت فيه بندقية
من ضفة النيل إلى الفرات..
6
لن تستريحوا معنا..
كل قتيل عندنا
يموت آلافا من المرات..
7
انتبهوا
..انتبهوا..
أعمدة النور لها أظافر
وللشبابيك عيون عشر
والموت في انتظاركم
في كل وجه عابر
أو لفتة .. أو خصر .
الموت مخبوء لكم
في مشط كل امرأة
..وخصلة من شعر
8
يا آل إسرائيل، لا يأخذكم الغزور
عقارب الساعة إن تؤقفت
لا بد أن تدور..
إن اغتصاب الأرض لا يخيفنا
فالريش قد يسقط من أجنحة النسور
والعطش الطويل لا يخيفنا
فالماء يبقي دائما في باطن الصخور
هزمتم الجيوش .. إلا أنكم لم تهزموا الشعور
قطعتم الأشجار من رؤوسها
وظلت الجذور..
9
ننصحكم أن تقرؤواما جاء في الزبور ..
ننصحكم أن تحملوا توراتكم
وتتبعوا نبيكم للطور
فما لكم خبز هنا .. ولا لكم حضور
من باب كل جامع
من خلف كل منبر مكسور
سيخرج الحجاج ذات ليلة ..
ويخرج المنصور...
10
انتظرونا دائما..
في كل ما لا ينتظر
فنحن في كل المطارات..
وفي كل بطاقات السفر..
نطلع في روما.. وفي زوريخ..
من تحت الحجرنطلع من خلف التماثيل..
وأحواض الزهر..
رجالنا يأتون دون موعد
في غضب الرعد..
وزخات المطر
يأتون في عباءة الرسول..
أو سيف عمر ..
نساؤنا..
يرسمن أحزان فلسطين على دمع الشجر
يقبرن أطفال فلسطين بوجدان البشرنساؤنا
..يحملن أحجار فلسطين إلى أرض القمر..

نزار قبانى


Sunday, August 14, 2005

"عايز اشتغل ياكبير"

موش حرام بنت زى الفل زيى -خريجه تجاره انجليزى اهلها صرفوا عليها دم قلبهم- تفضل لحد دلوقتى من غير شغل
بجد طهقت
اعمل ايه يعنى اروح افجر نفسى-وانا اعندى استعداد داخلى لكده اصلا- ولا اعمل ايه؟

Wednesday, August 10, 2005

من لا يبايع الملك مات على غير الاسلام

دعا إمام وخطيب المسجد الحرام الشيخ عبد الرحمن السديس اطال الله في عثنونه السعوديين إلى مبايعة العاهل السعودي الملك عبدالله بن عبد العزيز وذلك في خطبة الجمعة بعد انباء عن ضعف الاقبال على مبايعة الملك من قبل السعوديين، وقال الشيخ ... إن الذين لا يبايعون الملك عبدالله سيموتون على غير الإسلام وقال «البيعة الشرعية لولاة الأمر وفقهم الله». وقال مخاطبا الملك عبدالله إن «الذين يبايعونك إنما يبايعون الله.. فمن نكث فإنما ينكث على نفسه ومن أوفى بما عاهد عليه الله فسيؤتيه أجراً عظيماً من مات وليس في عنقه بيعة مات ميتة جاهلية.وكانت الصحف السعودية قد ذكرت ان مليونين تقريبا قد بايعوا الملك مما يعني ان 15 مليون سعودي سيموتون على غير الاسلام ان لم يلحقوا انفسهم ويبايعوا الملك خاصة وان اخر تقديرات للسكان ذكرت ان عدد سكان السعودية 17 مليون نسمة ونظرا لصعوبة المواصلات فقد يفتي الشيخ السديس بجواز المبايعة عبر الانترنت وقد يتم فتح مكاتب للمبايعة في القنصليات السعودية التي قد تمنح كل مبايع وصلا يؤكد انه بايع الملك عن سبق اصرار وترصد خاصة وان الواحد فينا مش ضامن روحه هذه الايام.
منقول

Saturday, July 23, 2005

خايفه عليكى يامصر

بدايه الكلام المكتوب ليس له اى علاقه بالعنوان اعلاه,انا بس عاجبنى العنوان اوى يمكن قريته ف مكان ما المهم انه موجود ف الذاكره وعاجبنى
لأنى لا خايفه ولا متهببه
طبعا عرفتوانى اكيد هعمل فيها العارف بأمر الله واتكلم على تفجيرات شرم الشيخ, تخمينكوا ف محله لازم طبعا مفوتش مناسبه زى دى وادلى بدلوى
افكارى مشتته كنت فرحانه اوى امبارح كأنهم فرقعو بمب موش قنابل وكل شويه اجرى ع الجزيره واشوف عدد الضحايا , ايه ده انا بالدمويه والعنف ده؟ لا انا بس مؤمنه بقوله "العين بالعين ودم بدم وطبعا ليس كل الدم سواء" على اعتبار ان ده دم سواح اجانب بس زعلت اوى لما عرفت انه دم مصرى-طاهر-وزعلت اكتر لما بفتح التليفزيون لاقيت "العادلى" ف وشى، ربنا يخدك انت لسه هنا؟
"الضعط يولد الانفجار" والتفجيرات المقصود بيها الانتقام أى كان سببه ولكنى كنت افضل ان تكون تفجيرات ترهيبه على ان يجرح فيها جندى مصرى
موش يطلعلنا البيان بيقولى
بسم الله الرحمن الرحيم
"قاتلوهم................
موش فاكره باقى الايه
قاتلوهم مين والنبى؟
ــــــــــــــــــــــــــــــــــــــــــــــــــــــــــ
ملحوظه خبيثه: بكره شرم الشيخ -مدينه السلام سابقا- مفيش سايح يعبرها و يقولولك سياحه داخليه ,أصل نفسى اروح شرم اوى

الحصوه الشريفه

موعدنا اليوم مع اعلان النتيجه "فكر معانا"
ولا هيه زتونه ولا غطا حله و لا فطار السيد الريس -اللى ولاد الحرام بيقولوا انه بيفطر جمبرى موش زتونه- ولا هو طبق طاير ولا اى حاجه م الحاجات دى
وطبعا تحجب الجايزه -القلم الرصاص ابو استيكه-
الموضوع ببساطه
"حصوه"
لا اوعى موش اى حصوه
دى حصوه عمرو خالد يعنى حصوه تستبارك بيها منك له
ادخل شوف
الموضوع ومافيه ان الراجل عمل المراره ,فيها حاجه دى؟
والحمدلله ربنا كرمه -عشان خاطر النهضه وعشان خاطرنا احنا الشباب الغلبان اللى هياخد بيده الاستاذ- والعمليه نجحت وطلع الحصوه
انا موش شايفه فيها حاجه لحد هنا
بس والنبى لازمته ايه يصورلنا الحصوه ويتصوره قبل العمليه وبعد العمليه ويتصور جنب الحصوه
انا عرفت الموضوع بالصدفه وانا بعمل شات مع صديق ذو ميول اخوانيه قويه بعد مابعتله الصوره اللى محطوطه ف مدونه
حدوته مصريه واتناقشنا فيها وايه اللى وصلهم الفكره دى عن الاسلام
وبعدين تقريبا حب يحرق دمى زى مانا حرقت دمه

اسمحولى انى انقلكو جزء من المحادثه
انا:
حاضر يازهر
هو: ابو داود
ابو داوود :
http://www.amrkhaled.net
/gallery/gallery167.html
حاضر يازهر,ت: هات مع انى مبحبوش
حاضر يازهر,ت: سورى يعنى ايه الارف ده انا مال اهلى يعمل المراره ولا يعمل اللوز
حاضر يازهر,ت: ايه الهبل اللى هو حاطه ده
ابو داوود: هههههههههههههههههه
حاضر يازهر,ت: لابجد المفروض انى استفيد ايه بقى
ابو داوود: ونزل عريضه بالعنجليزي يدين هجمات لندن
حاضر يازهر,ت: لا ناصح
حاضر يازهر,ت: ومصور الحصوه يمكن حد يحب يتصور جنبها ولا حاجه
ابو داوود: بركاتها
ابو داوود: انتى مش همك حد خالص
حاضر يازهر,ت: انا عايزه اعرف حاجه؟
حاضر يازهر,ت: انت باعتلى اللينك ده ليه؟
حاضر يازهر,ت: اوعى تكون فاكرنى عايزه اتصور جنب الحصوه
ابو داوود:ههههههههههههههههههه
ابو داوود: كنت عايز اوريكي عريضه ادانه هجمات لندن وبعدين قولت اما وريكي مراته
حاضر يازهر,ت:وبعدين قولت لما تورينى الحصوه والله يااخى حاجه تفقع ع المسا
ابو داوود:ثروه انتى رايك ايه ف ابو مصعب الزرقاوى
حاضر يازهر,ت: مش ده بتاع الثوره الاسلاميه الكبرى
ابو داوود : خدى اللينك ده
.............
حاضر يازهر,ت: احمد اوعى تكون حصوه الزرقاوى
ـــــــــــــــــــــــــــــــــــــــــــــــــــــــــــــــــــــ
ملحوظه:واخدين بالكو من دى
عدد المشاهدة:161905
هتشـــــــــــــــــــــــــــــــــــــــــــــــــــل

Saturday, July 16, 2005

فكر معانا

تفتكروا يا اخوانا ده ممكن يكون ايه؟

ملحوظه: ياريت تفكروا ف ابعد الاحتمالات واكثرها لامعقوليه ,تعلن النتيجه واسم الفائز كمان اسبوع...اه الجايزه قلم رصاص باستيكه

Thursday, July 14, 2005

مين دول؟

-مين ده؟
-ده "أحمد العايدى"
- : نعم؟ بتاع "عباس العبد" كنت فاكراه أصيع من كده,ده طلع غلبان مله
- -والتخين ده؟
-تامر ابرهيم
-الدكتور تامر ابراهيم , شكله لا يوحى بأى ذكاء
- وده؟
- ده "محمد فتحى"
-مهو محترم ولابس بدله امال بيكتب مسخره كده ازاى
-والنبى انتى فاكراه جاى بالشورت
-وده بقى؟
- ده "عادل سلامه"
-بس ده اصلع .فيه شاعر اصلع؟

Sunday, July 10, 2005

خلقه ربنا

"اسمى " ثروه
ايوه هيه دى مشكلتى الانطباع الذى يتركه اسمى اول مره. بالنسه لك الامر مجرد اسم لم تعتده اذنك ودعابه سخيفه ستلقيها ,اما انا فبسمع التعليقات دى بقى لى 21 سنه وكل واحد مصمم على انه ظريف وعلى انى لازم اموت على نفسى م الضحك -باعتبار على ان مايقوله مضحك- ولذلك اصبحت عندما يسالنى حد عن اسمى ارد باتسامه عريضه -تحسبا لرد الفعل الظريف-
اول مادخلت المدرسه كنت برجع معيطه واقول لماما "العيال بيتريقوا على اسمى" وكان عندى مشكله كمان ان اسمى مبيطلعش ف الكتاب يعنى زى "هبه" مثلا "هبه تلعب بالكره" ,اما انا ياعينى عليه اسمى لا يتأى الا مقرونا بال"قوميه او السمكيه او الحيوانيه كمان"
مدرس وانا ف ثانوى كان فاكر انى بشتغله مصدقش غير لما طلع الاسم من الكشف
مما زاد المشكله تعقيد انى لحد دلوقتى لما اسالها- ماما- "انتى سميتينى كده ليه؟" تبتسم ومترد ش -يعنى حاجه تغيظ-
لم يحدث فى تاريخى ان حد سمع الاسم ولم يعلق بأى تعليق -اللهم مره واحده -أو بعد مااتحفنى بتعليقاته الظريفه تدارك نفسه وقال"تلاقيكى بتسمعى الكلام ده لحد مازهقتى-اللهم مره واحده بردو- واذا حدث ولم يعلق محدثى فببقى متاكده انه سمع الاسم غلط اساسا
مافيه ناس كتير اساميهم وحشه وشاذه -موضه تقريبا امثال" داليرام و ريسينام"- , على الاقل "ثروه" موش محتاج انك تسأل "يعنى ايه"
انا اهيم عشقا باسمى -وليمت اصحاب التعليقات بغيظهم- ,اعتبره اكبر حسنه مامتى عملتها ,انا فخوره بأنه متفرد وغريب مثلى تماما ويؤكد مقوله "وللمرء من اسمه نصيب"

Saturday, July 09, 2005

اى خدمه ياانسه؟

-اى خدمه ياأنسه
-حضرتك شغال هنا؟
-لا بس ممكن اساعدك لو فيه حاجه
-ابدا انا جايه هنا لخالى بس لقيته نزل يصلى.امال اللى معاك دى استمارات معسكر ايه؟
-معسكر الغردقه
-ياه؟ بس دى مليانه ,هو خلص كله؟
-اه للاسف
-يا خساره انا كنت جايه عشانه
-لو كنت اعرف كنت حجزتلك ,انا والدى شغال هنا وبيظبطنى انا واصحابى فلو خالك منفعش يجيبلك أأمرينى بس
-ميرسى ربنا يخليك
-بجد والله
-بصى انا اسمى "وائل عرابى" خدى رقمى خليه معاكى لو احتاجتى حاجه
ألمح خالى جاى من بعيد
-طيب طيب انشالله
اتوجه بالكلام لبنت خالتى اللى كانت معايا
-شوفتى ياستى احسن تقوللى البسى اى حاجه وبلاش نحط ميكياج .كويس انى مسمعتش كلامك
-حد يحط ميكياج وهو رايح لخاله؟
- الفرصه بتيجى ف اى وقت ياعبيطه

خايفه اتجوز حمار

خايفه اتجوز راجل حمار ميفهمش حاجه عن اى حاجه ف دماغى
قريت "انا كارنينا" وانا ف اعدادى,ونسيت الروايه كلها موش فاكره منها غير ان "انا" كانت بتتخيل جوزها بودانه الطويله كأنه حمار لان المنظر ده بيجسد عقدتى ومخاوفى.

Wednesday, June 29, 2005

وكأنى عصفور متدلع


خلاص شريط منير نازل كمان كام يوم ,مبسوطه اوى حاسه بالظبط كأنى رجعت عيله مستنيه عروسه جديده
هيه لسه فيه حاجه بتفرحنى
بحبك يامنير

Sunday, June 26, 2005

وساخه مصر ..متتنسيش

اعلان قذر ومستفز بطريقه ياباى
كده عينى عينك,المفروض ان الاعلان بيسوق مصر سياحيا بس هو لا بيسوق مصر ولا حاجه ده بيسوق حاجه تانيه اتكسف اقولهالكوا
والله الفكره جميله نعمل اعلانات نسوق لبلدنا وماله مادول كتير بتعمل اعلانات -بعيده كل البعد عن اعلاننا طبعا-
يالهوى يامه ده حتى تركيا عامله اعلان محترم
وعلى راى البت نشوى وتعليقها العفوى اثر الصدمه بعد مشاهده الاعلان على طول
"فعلا.. وساخه مصر ..متتنسيش"

اخويا اللى ف اولى ثانوى

اخويا كان عايش السنه اللى فاتت دى على امل انه يجيب الدرجه النهائيه ف امتحان الالمانى فيقوم ايه يسافر المانيا المنحه بتاعه الحكومه كتر خيرها
وطبعا ده يعتبر هدف لاباس به لعيل ف اولى ثانوى الواد مبيذاكرش غير الالمانى وخد درس عند مدرس المدرسه عشان يضمن اعمال السنه ,المهم الحمدلله ربنا كلل جهده وجاب 30 من 30 ف التيرم الاولانى وادى ياعم دفعه للامام اهيه
يوم النتيجه بقى
_عملتى ايه ياسلومه
(عملت ايه يا اسلام يعنى)
-اهه نجحت
-والالمانى؟
-جبت 21 :((
-ياه ليه
- معرفش والله مع انى راجعت الامتحان كله مع الاستاذ صح وادالى اعمال السنه كامله وكل صحابى اللى كانو جايبين درجات نهائيه التيرم الاولانى نزلوا بردو
القصه دى اهداء لكل مسئول *** ف البلد دى ويقولوا العيل اللى عنده 15 سنه ده هيفكر ف بلده ازاى بعد كده
وعلى راى البتاع "يبقى انت اكيد اكيد ف مصر"

Thursday, June 09, 2005

حسنى بيضرب نفسه بالجزمه

على هامش اللى حصل يوم الاستفتاء
بيتهيلىء اللى حصل ده غلطه كبيره من النظام موش ف وقتها خالص واسقطت ورقه التوت
ياما الداخليه دول اغبيا ياما بتصرفوا تصرفات اعتباطيه,ياما اعصابهم باظت وبيهبلوا
استحاله يكون مبارك راضى عن اللى حصل لانه ببساطه جاب لنفسه مصيبه جديده هو ف غنى عنها ف ازمته دى واعتقد لو انه مكنش مزنوق كان نفذ المطالب التى تنادى باقاله العادلى ككبش فدا وانقاذا لماء الوجه لكن هو موش باقى عليه غير انه استحاله يتم تغير وزير الداخليه ف ازمته دى -اسمو ايه ده اللى قبليه ما اشتال ساعه انفجار الاقصر وبطريقه مهينه- ورغم الانفجارات والمظاهرات بردو العادلى ماسك البلد بقبضه من حديد

Tuesday, June 07, 2005

فى ذكرى الشيخ امام


تمر اليوم 7 مايو 2005 الذكرى العاشره لوفاه الشيخ امام عيسى -رحمه الله-وطبعا الموضوع سكويتى خالص انا لا اتكلم عن التعتيم الاعلامى لان دى حاجه متوقعه طبعا- رغم انه للانصاف اخبرنى صديق ان الاهرام خصصت مقال تذكر فيه محاسن الشيخ-
الموضوع هيمشى كده بقى ؟حتى الساقيه مفيش حس ولا خبر .اللى يحزن بجد ان تونس خصصت اسبوع لاحياء الذكرى!!
كام واحد اصلا يعرف الشيخ امام واللى يعرفه هتلاقيه عرفه صدفه م النت او واحد قاله انا عن نفسى مكنتش اعرف عنه غير انو اعمى وبيغنى اغانى سياسيه ممنوعه مبتديتش اسمعه غير لما شوفت برامج عنه على الجزيره
حتى اغانيه اللى معمولها اعاده تدوير بواسطه مطربين حاليين -زى محمد منير - محدش بيجيب سيرته زى "البحر بيضحك ليه ويااسكندريه ويابلح ابريم و يامه مويل الهوا " مين فينا كان يعرف ان اغنيه فيلم الطريق الى ايلات "مصر يامه يابهيه" بتاعته اصلا
الشيخ اصلا مقرىء قران وحافظ القران كله اتجهه للاغنيه السياسيه وغنى ولحن كتير لاحمد فؤاد نجم .انا بحب اغانيه اوى وبسال فين دلوقتى الاغنيه السياسيه؟ باستثناء محاولات على استحياء لمحمد منير وعلى الحجار مفيش ودى حاجه تستحق وقفه
المهم نرجع تانى للشيخ امام اتسجن واتحكم عليه بمؤبد مع نجم حتى ان ابو عمار الرئيس الفلسطينى كان بيتوسط لجمال عبد الناصر-نظرا لشعبيه الشيخ ف فلسطين- انه يفرج عنه فقاله بالحرف "الاتنين دول -امام ونجم- موش هيشوفوا النور طول منا عايش"
زار بلاد كتير وعمل حفلات ف المغرب العربىو سوريا وفرنسا ومات فقيرف حوش ادم محدش حس بيه
وعلى راى المثل "من مات فى سبيل مصر خلى مصر تنفعه"
ادعوكم لزياره اللينكات التاليه للاطلاع على اغانيه وسيرته الذاتيه
اغنيتى المفضله "اتجمعوا العشاق"
ارجوكم قراءه الفاتحه

Sunday, June 05, 2005

شعبى الحبيب

اما الشعب المصرى ده ليه كاريزما كده مختلف عن اى شعب تانى-ال يعنى البت كانت شافت بقيت الشعوب التانيه- ماعلينا .منافق وطيب وابن نكته وبيعمل حركات قرعه اوى ويحب الهيصه والمهيصه
بس لا املك الا ان اقول -على راى هانى شاكر- بحبكوا اوى

Thursday, June 02, 2005

ان مقدرتش تضحك

. إن ما قدرتش تضحك
. ما تدمّعش ولا تبكيش
وإن ما فضلش معاك غير قلبك
إوعى تخاف !!
مش هاتموت .. هاتعيش
وإن سألوك الناس .. عن ضي جوا عيونك ما بيلمعشي
ما تخبيش ..قولهم العيب مش فيا
ده العيب م الضي !!وأنا مش عاشق ضلمة
ولا زعّلت الضي
مسير الضي لوحده .. هايلمع
ومسير الضحك لوحده هايطلع
ما بيجرحش ولا يئذيش
كلمات:محمد الناصر
غناء:وجيه عزيز

Wednesday, June 01, 2005

دى صناديق الانتخابات ياانسه



وانا ماشيه ف شارع ورا قسم الشرطه لقيت صناديق قذره كتير متكومه بشكل قبيح سالت نفسى ايه ؟ لقيت ادامى عسكرى سالته -وانا ادعو الله فى سرى ان يكون اللى ف بالى ده غلط-
-لو سمحت ايه ده؟
-دى صناديق الانتخابات ياانسه

اااااه صناديق الانتخابات ياانسه لامؤاخذه اصل عمرى مانتخبت ولا اعرف شكلها بس اللى بشوفه ف التليفزيون ف اى انتخابات ان صناديق الانتخابات بتبقى ازاز .حتى ف الدول الفقيره كفلسطين وافغانستان وبعض دول وسط افريقا الصندوق اشبه بباسكت الزباله من الحجم المتوسط من البلاستيك النظيف الشفاف موش خشب جايه مليانه اصلا
.نظره واحده على شكل صناديق الانتخابات وطريقه تخزينها يدل على طبيعه الانتخابات ف بلدنا

Thursday, May 26, 2005

ابتسم انت فى مصر



احم النهارده يوم تاريخى ياجماعه النهارده هنعدل الدستور وانا من هذا المزنق احب .....لا محبش اتكلم ولا حاجه السياسه مهلكه بوجه عام
ملاحظه بس
كل اللى رايحين يصوتوا ميعرفوش هما صوتوا علي ايه اقدر اقول ان 75% من اللى صوتوا فاكرين ان هما صوتوا على استفتاء رئيس الجمهوريه
........................
لا تعليق

*سألونى بتحب مصر

سألونى بتحب مصر
قلت بحبها بس هى مبتحبنيش
*مع الاعتذار لتميم

Thursday, May 19, 2005

أنا تعبان



حوار ع الماسينجر بينى وبين ظابط جرى وانا اضع شعار كفايه مصحوب بنيك نيم"طعن الخناجر ولا حكم الخسيس فيا"


sos: aih al kalam al gamed dah
طعن الخناجر : l2 keber wala 7aga just opinion .its demokratic
sos: aih 3amlah 7amlah dad hosny mobarak wala aih
طعن الخناجر : ya comin ba2a & arrest me
sos: momken namashyha by rashwa
طعن الخناجر : no comin
sos: yalah 2aho tagheer we taro7y amn al dawlah
طعن الخناجر : i think i cant feel afraid
طعن الخناجر : ya y not
sos: ya hatartahy hynak 2wy
sos: khadmah momtazah
طعن الخناجر : sureeeeeeeeeeeeeeeeeeeeeeeeeeeee
طعن الخناجر : no doubt
طعن الخناجر : i heard alot about
sos: man so7abek wala aih:D
طعن الخناجر : :D
sos: rabnah yaostor 3aleky yareet 2ashofek bokrah online
طعن الخناجر : ill try
sos: 3ashan 2atamen anek maro7tesh amn al dawlah mosh aktar
sos: :D
طعن الخناجر : no dun b afraid
طعن الخناجر : they hv things imprtant than dats
sos: 3arfah lamah bayro7o yakhdo 7ad byab2ah fy al wa2t dah
طعن الخناجر : im waittin
sos: yallah ana mastany ta7t aho nakhod tar2eya
sos: we kaman aih al alb al gamed dah:D
طعن الخناجر : nothin 2 lose
sos: dah mosh 2alb gamed dah 2a7bat
طعن الخناجر : may bsos: ya3ny 3lah kadah ya hatatakhdy ya hatanta7ry u r lose:D
طعن الخناجر :y not
sos: 3lah al 3amoum man na7yat amn al dawlah mata7mlesh ham:D 2a7nah fy al khadmah 2a7emmmm
طعن الخناجر : :)
sos: bas anty bygad mosh bat7aby hosny wala dah just for fun?
طعن الخناجر : lets suppose hez a great guy
طعن الخناجر : but enough is enough
طعن الخناجر : right ؟
sos: maho al nas bat2olek dah 3arfeno mana3rafsh al gaded hayab2ah 3amel izay
طعن الخناجر : then lets try
sos: bas anty mosh 7asah by 7agah wala 2ay 7ad 7ases by7agah ya3ny mosh far2ah
طعن الخناجر :ur boss who yold u dats
sos: aked tab3an la2 a al kalam al 3abeet 2ly bat2olaih dah
طعن الخناجر : oh really
sos: aih howa al really shayfah ya3ny any 3abeet wala aih 2asdek
طعن الخناجر : y u r angry
sos: bat2oly kalam 3abeet
طعن الخناجر : let me say is dats make u angry
sos: dah aked 3abeet
طعن الخناجر : ta3ale edrabne a7san
sos: we malo
طعن الخناجر : ^o)
sos: dah anty kalamek ghareeb 2at3almaty izay ta3rafy tatkalmy eng kowayes laken nasaty tat3alemy izay tatkalemy ma3ah al nas
طعن الخناجر : fuck u




طبعا الموضوع خلص ببلوك وتغير النيك نيم الى "كنت سألقن هذا الحيوان درسا لا ينساه ,ولكنى حين علمت بان الاخ من زلم السلطان احجمت"

Sunday, May 15, 2005

شادر السمك



بحب الفيلم ده اوى ,فاكره -وانا صغيره- اول مره اتفرجت عليه سالت"هو حرام قتل واحد زى احمد زكى؟"
ولحد دلوقتى لسه بسأل

Wednesday, May 11, 2005

Spy game



وانا ماشيه ف الشارع اجد ف يدى ورقه دعايه ادهالى عيل صغير واختفى جاء فيها

"سيدتى على انتى متاكده ان اولادك لايدخلون على مواقع جنسيه
نحن نعلملك كيف تتاكدى من ذلك بمعرفه المواقع التى يتتردد عليها اولادك والصور التى يلتقوها عبر المحادثات ومراقبه البريد الالكترونى ومعرفه ما اذا كان جهازك يحتوى على افلام باحيه
فقط 20 جنيه"

-ايه الارف ده؟
-ايه مالك؟
-انتى موش شايفه المسخره؟ ايه التهريج ده
-خلاص موش عاجبك متروحيش دى حريه شخصيه
-لا اى عيل عارف الحريه يعنى بلاطه تضمن لى نفس الوقت التزامك بها وعدم القفز على بلاطات الاخرين دول كده بيتنططوا على كل البلاط
-بلاط ايه وسيراميك ايه وطى صوتك هتفضحينا

مفيش اموشنز هنا صح؟ لو فيه اعتبرنى قد وضعت الاموشن المذبهل
فانا مذبهله-وبشده- منذ ان لامست الورقه يدى الى الان
ايه المهزله دى
فكرت ان اتصل بهم واسالهم اذا جيت ودفعهم ال20 جنيه-هذا لو كنت أم اصلا- هل تضمن لى عدم الوصول الى مصادر اباحيه بطريقه اكتر ابتكارا
صدق فينا قول "الشعب نصه بيتجسس على نصه التانى"
كيف ستصارح هذه الام ولادها -بعد ماتاخد الكورس المذهل- باكتشافتها الخطيره اللى لاقيتها ع الجهاز؟
هتقولهم ايه ؟هاع انا اتجسست عليكوا وكشفت المستخبى .ونقضيها كده بقى؟

أكاد ارى الاعلان التالى
"عزيزى الاب
هل تعلم فيما يستخدم بناتك التليفون بعد نومك؟
الان جهاز تسجيل المكالمات بالاسواق المصريه"

"بشرى لولاياء الامور يكنكم الان مراقبه اولادكم خارج المنزل
كل ماعليك هو زرع المتتبع السحرى ف ملابس اولادكم........................"

ma blogger



اخيرا عملت بلوجر

قرار نفسى اخده بقى لى فتره طويله -بما نه البلوجرى بتاعى- اول حاجه لازم تتقال انى كسلانه جدا خاصه ف موضوع الكتابه
تتدفق الخواطر تتشابك ف نسيج محكم تمر امامى لا ينفص الا صباغتها بالحبر لتصير مرئيه




.................




انتهى
كل شىء تبخر فجاءه مثلما ولد فجاءه
حتى الان لاادرى اذا كان الامر سيصبح منتظما او انه فقط لارضاء رغبه مؤقته