عمرو اديب والاستظراف...زياده عن اللزوم

عمرو اديب,مذيع اوربت اللامع(بصلعته ليس الا) المسنود (بأخوه طبعا),المذيع الذى استحق عن جداره لقب "صاحب اروش كرافتات ف مصر"
عمرو اديب اللى هو بالمناسبه لا معارض ولا حاجه,وبيفجر قضايا معينه ف اوقات محسوبه للتنفيس عن الجماهير ليس الا,وهو شاطر اوى ف الموضوع ده الصراحه..ينفع اوى ف نظام ولعها ولعها ..شعللها شعلها,مذيع م الاخرهوبا هوبا

امبارح كان بيناقش موضوع تافهه"وسيله منع الحمل للرجاله" فعلا موضوع تافهه
حيث انه ثبت ان حبوب منع الحمل الحريمى اعراضها الجانبيه كتير زى زياده الوزن ووتساقط الشعر والاكتئاب وصولا للسرطان
وان الاعراض الجانيه ف حاله الراجل هتكون نسبتها اقل بكتير-وده اللى خلاهم يفكروا فيها اصلا- وهتبقى بالمناسبه عباره عن حقنه بتتاخد كل 3 شهور
يقوم المذيع الظريف بقى يقولك ايه,لاااااااااااااا انا مخدش حبوب منع حمل,انا مالى موش هيه اللى بتحبل
بكره يدونا حبوب تخلينا نرضع
بطريقه سمجه,وحواجبه قالبها 77 بطريقته الشهيره
واستمر طول الفقره:لاااااااااااااا انا مخدش حبوب منع حمل,لاااااااااااا انا مغسلش مواعين
ماخلاص يابن الظريفه,انت عارف كام راجل بيتفرجو عليك دلوقتى.زانت نقلتهم فكرتك الخره دى.وهو موش ناقصين اساسا افكارك المتخلفه دى
يعنى الموضوع كان عادى ويتعدى الراجل هياخد الحبايه من سكات ,قصدى النيله الحقنه دى.لكن بعد الجرسه ام حناجل دى ابقى قابلنى لو راجل فكر فيها,هيقولك لييييييييييييه انتى موش شايفانى راجل ولاايه؟؟؟


ملحوظه:ربنا يستر عليا البوست ده واللى قبله هيخلو الرجاله يطالبو باعدامى على الخازوق ف ميدان التحرير,صدفه (موش مقصوده) موش اكتر,وان شئت سمها "حاله نفسيه" ,حاله نفسيه محدش ياخد على كلامها بقى يااخوانا

تحديث:

-شوفت يادودو موش اخترعو حبوب منع الحمل بس لرجاله

-نعم ياختى؟

-اه بجد موش اقراص عباره عن حقن بتت........

-بااااااااس متكمليش عشان انا استحاله هفكر ف الفكره دى اساسا

-ليه بقى انشالله

-هو ايه اللى ليه,موش جايز تمنع الحمل وتمنع كل حاجه تانيه معاه

.......

عجز جنسى

نفسى اصحى الصبح الاقى الرجاله كلها بقى عندها عجز جنسى

حاله حدااااااااااااااد

صحيت امبارح على جريمه قتل,الناس هنا بتحب الاخبار دى اوى بتعتبر وسيله للترفيهه واضافه المتعه لحياتهم المعفنه اساسا.ولذلك كان الخبر المحور الرئيسى -هو واخبار الشركه التالته للاتصالات للامانه- لاى حديث ف اى حته

-الو

فتكون الاجابه الطبيعيه:سمعتى عن البت اللى اتقتلت؟

-ازيك؟

-شوفتى موضوع البت اللى اتقلت؟

وعند ماما ف الشغل كان الموضوع بيتطور بطريقه تانيه

-سمعتوا ياجماعه موضوع البنت اللى اتقلت ده؟

-بنت اتقلت؟اكيد اكيييييييييد كانت ماشيه مشى بطال

وهكذا احبائى الكرام تجدو من يفتى بأن من بين ايدى ربها,واصفا اياها بانها "مشيها مشى بطال" وهو لسه معرفش اسمها ايه اصلا.طبعا زى محنا عارفين دى احدى العادات التى بيثتأثر بها الشعب المصرى ويحرص كل الحرص على توريها للاجيال

الاخبار م الاخر -بعد التاكد من صحتها بعيد عن الفتى المذكور اعلاه-,عشان عارفه انكو زهقتو.البنت-الله يرحمها- دكتوره صيدلانيه 23 سنه انسه,لن اذكر اسمها وجدت مذبوحه ومرميه ف منور احدى العمارات المهجوره.لم يعتدى عليها.ذهبها وموبايلها و فلوسها لم تمس

غريبه دى موش كده؟

لا غريبه ولا حاجه لو عرفنا ان البنت كانت شغاله ف صيدليه مستشفى الجامعه-وما ادراك مامستشفى الجامعه ياسيدى عندا سبووووووووووووبه جامده اوى- وكانت ف الفتره الاخيره دائمه الشكوى لأمها- البنت لا المستشفى طبعا-,عن اختلاسات بملايين من صيدليه المستشفى وانها عايزه تبلغ

والباقى يمكن استناجه بالطبع

انا لا اكتب بهدف فضح الفساد,اللى كلنا عارفين انه ف كل حته طبعا بس الحادثه سايبه عندى اثر نفسى مدمر لما تقرا عن الفساد والرشاوى والاختلاسات دى حاجه ولما تحس انه اقرب اليك من حبل الوريد وممكن يطولك ف اى لحظه ده احساس تانى,انا طول عمرى حاسه بالفساد بس كلام بس اول مره ,اول مره احس كده.

انا لا ادعى معرفتى بالقتيله -وهو شرف يحلو للجميع ادعائه ,اذ يصبح البنى ادم اللى ولا يسوى بعد (قتله-خطفه-اغتصابه) شخصيه شهيره جداوالجميع يتسابق لاعلان انه كانو اصحاب الروح بالروووووح- وهو كما ترون ايضا احد سلوكيات المصريين الجدير بالدراسه

اكيد بنت عاديه اهلها كان نفسهم يفرحو بيها ويجوزها,طول عمرها بتذاكر عشان تبقى دكتوره واتوسطوا لها عشان تتشغل ف الحكومه.وتلاقى فساد ومتقدرش تسكت فتتقتل,ببساااااااااااااااطه

تخيلت لحظاتها الاخيره وهى مخطوفه,خطفوها ازاى.؟

قالولها ايه؟

كانت حاسه بايه وهيه لوحدها؟

ساعه مالسكينه لمست رقبتها؟

حسيتى بايه ياحبيبتى,لا استطيع مغالبه دموعى وادعو لاهلها ان يلهمهم الصبر على مصيبتهم,والنبى متسيبسبو حق بنتكووووووو

هوايدا طه...ورا الشمس

قضت محكمة جنح النزهة بمعاقبة معدة برامج قناة الجزيرة هويدا طه بالحبس 6 أشهر مع الشغل والنفاذ وكفالة 10 الاف جنيه وغرامة 20 الف جنيه لاتهامها بمباشرة نشاط من شأنه الإضرار بالمصالح القومية للبلاد، وكان ذلك بطريق تسجيل وتصوير مواد اخبارية ووثائقية غير مرخص بها و حيازة ونقل صور من شأنها الإساءة إلى سمعة البلاد ، وذلك بمخالفة الحقيقة وإعطاء وصف غير صحيح وإبراز مظاهر غير لائقة .
كانت أجهزة الامن قد ألقت القبض على المتهمة فى 8 يناير 2007 أثناء تواجدها بمطار القاهرة إلى مدينة الدوحة بقطر وقامت جمارك المطار بتفتيش أمتعتها فوجدت فيها عدد خمسين شريط فيديو كاسيت وجهاز كمبيوتر محمول وبسؤالها عنها أفادت بأنها مواد اخبارية خاصة بقناة الجزيرة الاخباريةوابرزت لهم تصريح بتصدير عدد خمسين شريط صادر عن المركز الصحفى لشئون المراسلين الأجانب فقامت الجمارك بالتحفظ على المضبوطات لفحصها فنيا بمعرفة الرقابة على المصنفات مما ترتب عليه عدم سفرها.
تم ضبط مع المتهمه خمسين شريط فيديو كاسيت منها 34 شريط خام غير مستخدم، وعدد 16 شريط تحتوى على مواد وثائقية مسجلة عن وقائع تعذيب ومقابلات مع ضحايا وشخصيات عامة ومشاهد تمثيلية لوقائع تعذيب و جهاز كمبيوتر محمول.
تضمنت أوراق الدعوى محضر تحريات مباحث أمن الدولة افادت باضطلاع هويدا طه متولى المنتجة بقناة الجزيرة بإعداد مشاهد تمثيلية مفبركة تصور حالات تعذيب غير حقيقية على أنها واقعة على غير الحقيقة بأماكن ومواقع شرطية بالبلاد لتضمينها مادة إعلامية تعتزم بثها على قناة الجزيرة باعتبارها تمثل حالات تعذيب حقيقية بهدف إثارة الرأى العام والإضرار بسمعة البلاد سياسيا واجتماعيا.
واجهت النيابة المتهمة بما تحتوى عليه الشرائط متهمة ايها بانها قامت بتلفيق مشاهد تمثيلية لوقائع تعذيب وتصويرها فى صورة وقائع حقيقة.
أوضحت المحكمة فى حيثيات الحكم أن المتهمة باشرت نشاط من شأنه الاضرار بالمصالح القومية للبلاد بأن صورت وسجلت مواد إعلامية دون موافقة الجهات المختصة وأن هذه المواد مخالفة للحقيقة.
وأشارت المحكمة الى ان ما تم ضبطه مع المتهمة يحتوى على لقاءات وأحاديث مع أشخاص استرسلوا فى حوارات تتضمن تعريضا بأجهزة الامن والسلطة فى البلاد.
كما أكدت التحريات بأن المتهمه باشرت وأشرفت على أعمال تصوير وتسجيل محتوى تلك الاشرطة وإجراء الاحاديث لاذاعنها فى محطة فضائية أجنبية وأنها لم تحصل على تصريحات من اجهزة الامن بمصرلاذاعتها

وقالت منظمات حقوقيه فى بيان ان الحكم يعد هدية الحكومة المصرية ورسالتها للصحفيين عشية اليوم العالمي لحرية الصحافة.

وأضافت: إن المحاكمة التي استغرقت ما يزيد عن ثلاثة أشهر وشابها العديد من التجاوزات.
وقال جمال عيد المدير التنفيذي للشبكة العربية لمعلومات حقوق الإنسان: لم نندهش من صدور هذا الحكم ، فعبر العديد من مسار الجلسات أصبحنا نتوقعه ، لكننا نشعر بالغضب، لأنه يؤكد إصرار الحكومة المصرية على معاداة حرية الصحافة والإعلام في مصر.
وقال أحمد سيف الإسلام حمد المدير التنفيذي لمركز هشام مبارك للقانون: واجهنا تعسفا منذ بالبداية من النيابة والمحكمة ، تم رفض كل طلباتنا كهيئة دفاع ، شهادة ضابط أمن الدولة الذي قدمته النيابة كانت متناقضة تماما وتكفي وحدها لتبرئة هويدا طه، لكننا نعلم أننا حرية التعبير غير مرغوب فيها في مصر ، لكننا سوف نستمر في الدفاع عنها.
وأشار البيان إلى أن نسخة الشرائط التي صادرتها أجهزة الشرطة من هويدا طه في مطار القاهرة قد تم تسريبها الى برنامج البيت بيتك الذي يذاع على التليفزيون المصري وعرضها بشكل يسيء لأي قيم مهنية بهدف الإساءة لهويدا طه.
وقد تقدم أحمد حلمي المحامي ومدير مركز الحرية للحقوق السياسية ودعم الديمقراطية ببلاغ للنيابة العامة حول كيفية تسريب هذه الشرائط وعرضها والاعتداء على حقوق الملكية الفكرية لقناة الجزيرة، وكان رد مذيع هذا البرنامج "أنها وصلته من مجهول .. فقام بعرضها.

لمشاهده الحلقات على اليوتيوب

الحلقه الاولى

1

2

3

4

5

اجزاء من الحلقه التانيه

1

2

"كل سنه وانت طيب ياريس ياقمرنا انت ياسكره,وتعيشلنا للممات"

اتك عليها للتكبير

ده انت ف الطراوه خالص

موش عارفه مين التحفه ده,بس بيتحاكم دلوقتى بتهمه سب الذات الالهيه ولو انه موش محتاج محاكمه عشان هيطلع مختل عقليا,لا مختل فعلا موش من بتوع الداخليه الفشنك

الحمدلله ان "أحمد ضياء الدين" مطلعش قال عليه مدون

بعد دخله مصر يوم26,عقد قران جمال يوم28..ربنا يكتر افراحهم

أكدت مصادر مطلعة أن عقد قران جمال مبارك على خطيبته خديجة محمود الجمال سوف يعقد بالقاهرة يوم 28 أبريل الجاري وسط حضور عائلي.
ومن المقرر أن يقام حفل الزفاف يوم 4 مايو المقبل-يوم عيد ميلاد الحمار الكبيريعنى- في مدينة شرم الشيخ في حفل عائلي محدود، لن يحضره سوي أفراد العائلتين، وبعض الأصدقاء المقربين-اللهى تولع بيكو شرم انتو والحفل والعائلتين والاصدقاء المقربين,اميييييييييييييييين-، حسبما ذكرت جريدة المصري اليوم-معزمنيش الواطى-.

وتمت خطبة جمال مبارك (43 عاما) وخديجة الجمال (24عاما)-موش صغيره عليك حبتين ياجيمى- في أوائل العام الماضي.
وجمال عضو قيادي في الحزب الوطني الديمقراطي الحاكم حيث يشغل منصبي الأمين العام المساعد للحزب الوطني الديمقراطي وأمين السياسات بالحزب.
أما خديجة فهي ابنة مقاول مصري ثري.

الف الف مبرووك وعقبال الانجال,واللى يحبنا ميضربش نار

حدث فى احد مدارس وزراه التربيه والتعليم

-أبله..أبله

-؟..؟

-العيال بتوع سنه سادسه ادونى الجنيه ده وكانو عايزين يعملو معايا قله ادب

-وانتى خدتى الجنيه ياحبيبتى؟

-اه

-شاطره

........

بصراحه يامصر انا كده جبت اخرى

بعد صراع طويل مع نفسى,اروح,ماأروحش

بصراحه عبرت عنه بااقتدار نواره نجم,وقفلت المجال على اى حد يتكلم ف الموضوع ده تانى

كنت خايفه اوى وبرر الخوف ده لنفسى بأنى بنت وهو يعنى احنا عدمنا الرجاله وبأنى موش من القاهره وهسافر عشان مظاهره والكلام ده.بس ده طلع عشان الاقى مبرر لنفسى ادام نفسى موش اكتر

خايفه,لو حصل حاجه يالهوىىىىىىى... ابويا وامى واخواتى والمجتمع والناس؟

بس خلاص هنفجر,انفجر يعنى...لا وعلى ايه روحى يابت انفجرى فيهم ,ايه اللى هيجرى يعنى هو الصحفيات بتوع الاستفتاء احسن منك؟جميله بوحريد رفيقه النضال تزيد عنك ف ايه؟سناء محديلى؟(موش واسعه حبتين موضوع سناء محيدلى ده)

ايه اللى هيحصل يعنى هيضربوكى,يتحرشوا بيكى,يعتقلوكى؟

ابوكى هيتشل لما يعرف وبقيت اهلك يتبرو منك؟

كله يهون ف سبيل مصر يارأفت

وهكذا عقدت النيه والعزم على الثبات وخلاص هروح وهاخدها جد بقى-عشان انا ليه سابقه وحيده ف موضوع المظاهرات ده ف مظاهره يوم الخميس 15-3 والحمدلله طلعت مظاهره فاشله اصلا وأدت قبل ان تولد والناس ملحقتش تعمل حاجه والامن ظبط الدنيا صراحه كانو بجد عاملين شغل ميه ميه-

المهم,وصلت التحرير الحمدلله ولقيتلك ايه الامن واقف ف تشيكلات بديعه اللهم صلى ع النبى.شكلهم يلقى الرعب ف قلوب اعتى الرجال بين كل عسكرى وعسكرى عسكرى,انا متأكده ان عددهم كان اكتر من عدد القوات اللى عبرت الجبهه ف 73.

واقفه جنب عسكرى امن مركزى قولت استعبط واسأله:هو فيه ايه يادفعه مصر دخلت الحرب ولاايه؟

-لا دصطووور

والله قالها كده

-دصطووور ايه,فيه انتخابات النهرده يعنى ولاايه؟

-موش عارف بس انا كان اجازتى النهرده ومنزلتش بسبب

.......

كلمت الناس بعد معاناه-موبايلى فصل اصله فحطيت الشريحه ف السنترال واتكلمت-لازم تحسو بالمعاناه

وطبعا مسمعتش منهم غير "كنتاكى التحريييييييييير"

ماشى نروح كنتاكى التحرير هو احنا بنخاف

خلاص هوصل اهوه كنتاكى لقيت اللى بينده عليا بأسمى طبعا انا رد فعل منعكس طبيعى جدا بصيت,الاقى مين ف وشى (ملاكى الحارس)"عمى" عمى اخو بابا لزم

-انت ايه اللى جابك هنا؟قصدى اى رياح طيبه القت بك؟

-انا جاى المستشفى اجيب تحاليل مصطفى,انت بتعملى ايه

-هه؟

-..........................

...........

............... ........... ............ .

ماسبق كان اشتغاله محترمه طبعا

-طب انتى موش مروحه ولاايه؟

-لامروحه طبعا,ده انا اصلا اصلا جايه عشان اروح

-هو ايه الامن الكتير ده ؟

-معرفش تقريبا مظاهره

ادام كنتاكى على طول بنات بتصوت وبيجروهم على عربيه الترحيلات,ومراسلين اجانب بيصورو ووحده زعلانه اوى كل اللى طالع عليها

I cant speak 3arabic.

-هو فيه بنات بيطلعو ف مظاهرات اليومين دول؟

-قله حيا ياعمو بعيد عنك

-موش فاهم موش عايزين يعدلو ليه,كووووووووول الناس دى هتعدل موش معقوله احنا اللى بنفهم يعنى

محنا ف وسط المعمه بتاعت الامن بقى,عايزينه يقول ايه

بس الراجل مسابنيش غير وهو بيسلمنى لأبويا,اللى موش عايزه اقولكو عمل فيا ايه.كل ده وهو معرفش طبعا اى حاجه عن موضوع المظاهرات ده لان دى الحاجه الوحيده اللى ابويا عمره ماهيتقبلها ف حياته اصلا ده كل مايكلمنى يقولى"عملالى ثورجيه يابنت الكلب"

بس انا -لأول مره ف حياتى- حمدت ربنا ع البهدله اللى ابويا بهدلهالى دى وقولت اهو مهما كان ابويا,ياعالم كان مين ممكن يبقى بيبهدل فيا دلوقتى؟

بس حبيت اقول يامصر اديكى شوفتى انا كده عملت اللى عليا وعدانى العيب وأزح,اقطع نفسى يعنى.الحمدلله الواحد ضميره ارتاح من ناحيه البلد

بحبك يا حمار

كل البلوجات بتتكلم عن تعديل الدستور..بس انا لقيت ده أظرف كتير

تستضيف القاهرة مؤتمرا دوليا حول الاهتمام بالحيوانات وخاصة الحمار ،والذى تنظمة الجمعية الخيرية لرعاية الدواب.
يركز المشاركون خلال المؤتمر من المختصين بصحة الحيوانات علي توفير ضمانات اكثر انسانية ، للحيوانات في شتي بقاع الارض .
المؤتمر الذي يعد "الحمار" ابرز الموضوعات المطروحة عليه ، يستمر لمدة خمسة أيام، بمشاركة ممثلي جمعيات من بريطانيا والمكسيك والهند وبلدان أخري في أفريقيا وأوروبا الشرقية، فضلاً عن الدولة المضيفة مصر.
الدكتور عادل كشك، رئيس الجمعية الخيرية لرعاية الدواب، والراعية لهذا المؤتمر أكد أنه سيناقش طرق رعاية الحيوان والإجراءات البيطرية، للحفاظ علي حياته ومنها مصر، مشيرًا إلي أن المؤتمر يناقش حماية حقوق مليونين و500 ألف حمار و50 ألف بغل مصري-طب وبقيت الحمير,ينفع كده؟-، والإجراءات التي تتخذها الجمعية لحماية هذه الحيوانات.

مشيرًا إلي أنه يجري التنسيق مع وزارة التعليم، لنشر ثقافة الرفق بالحيوان بين تلاميذ المدارس، وأصحاب الدواب والعاملين في مجال الخدمات البيطرية.