كتابه ملهاش طعم

تدوينات ملهاش طعم من غير امن دوله يراقبها

امن الدوله اللى مصصم يبضن علينا حتى بعد رحيله

امن الدوله اللى كانت اسراره المستخبيه ف قدس الاقداس ان مصر مختارتش شيبسى بطعم الجمبرى ولاحاجه مصر اختارت شيبسى بطعم الطعميه البيتى وهما بحكم العاده ليس اكثر زوروا النتيجه او ربما لان جمال مبارك هو اللى ماسك توكيل طعم الجمبرى ف بر مصر

امن الدوله اللى كل من له باسورد اميل ناسيه لاقاه هناك

ناس تافهه اوى كانوا بيراقبولى تليفون عيل عندو 18 سنه,دوله ايه اللى تبقى مرعوبه من عيل عندوا 18 سنه والنبى!!!

تدوينات ملهاش طعم من غير حزب وطنى نمسخره ,ده انا كنت بستنى المؤتمر السنوى م السنه للسنه زى مابستنى وقفه العيد,كان موسم كتابات وكومنتات وفيدوهات وتبقى ليله بقا ياعمده

ملهاش طعم لان مفيش غير موضوع واحد مفتوح اجبارى للمناقشه ,الاستفتاء على الدستور

اللى هيقول نعم ليه واللى هيقول لا ليه .... اكتب ايه وانا عارفه ان النتيجه ف الحالتين واحده

هكتب ليه فى واحنا ماشاءالله بقا عندنا80 مليون محلل سياسى واعيين ماشاءالله عليهم عارفين كل حاجه ف البلد وكانوا عارفين اللى هيحصل ده من زمان اصلا

اه ماهم محللين سياسين وخيراء دستوريين وفقهاء ف القانون الدولى ومحشى ورق العنب كمان

الوعى السياسى مطلوب وكنا بنادى بيه من زمان موش كل واحد اتفرجلى على موجز للجزيره بقا مستشار قانونى ولا كل واحد قال "تحيا مصر" بقا جيفارا

لماذا ثار المصريون

بالطبع العنوان مقتبس عن لد.علاد الاسوانى "لماذا لايثور المصريون" انا مقريتوش واكيد موش هقراه لأن السؤال اللى بيعكف على اجابته دلوقتى معظم اساتذه علم النفس السياسى والمنشغلين بصنع القرار وأغلب العاملين بالمطبخ السياسى ابتدءا من الولايات المتحده اللى كانت مستاءه جدا ازاى انها مقدرتش تتنبأ بثوره المصريين قبل قيامها و طبعا كل قاده المنطقه العربيه اللى بقوا قاعدين على عروش بتتمايل بهم ذات اليسار وذات اليمين,ولكن اذا كانو فعلا انشغلوا باسباب ثوره المصريين ليه ماشيين على نفس النهج الديكتاتورى العتييييييييييييييييييييييق ,ده موش التاريخ بس اللى بيعيد نفسو الدكتاتور بيستنسخ نفسو ومصمم يستفزشعبو وبيكرر نفس اخطاء اخيه الدكتاتور ببراعه منقطعه النظير ,موش فاهمه مستنى ايه غير انو هيلاقى نفس المصير ؟؟؟

نسيب دكتاريو المنطقه كلا ياخد اللى فيه القسمه ونرجع لمرجوعنا "لما لا يثور المصريون"

عندما سال وحيد حامد كان رده: المصريين ريحوا خلاص

و د.احمد عكاشه:رغى كتير ف كلام من نوعيه ان المصرى جذوره مرتبطه بالنيل فخد منو الثبات والانتماء للارض ومعرفش ابصر ايه ايه كده المهم الراجل قالها صريحه ان المصرى لم ولن يثور

ردى انا بقا ع السؤال ده كان:المصريين بيعتبروا الحكومه زى الحر والزلازل والبراكين ,قضاء وقدر

ممكن تغير القدر؟؟ ,وكذلك الحكومه

ممكن حتى تعترض ع القدر؟؟

مع الخلطه الوهابيه اللى كان لاقت هوى فى نفس كل من الشعب لمرجعيته الدينيه والحكومه لانها تروج الى "واطيعوا الله ورسوله واولى الامر منكم" وان الشعب اللى يقول للحاكم لأ تبيت الملائكه تلعنه حتى طلوع الشمس وان حرام اخر حاجه الخروج على الحاكم حتى لو كان ظالم ,فاسد, غير مقيم للصلاه !!!

اسمحلى , انت لو طول عمرك عايش ف خرابه هتعرف النضافه منين؟؟ هتبقا فاكر ان خرابتك دى احسن مكان ف الدنيا وان كلو كده

من هذا المنطلق-التصريح العنترى من د.أحمد عكاشه و التعود على تأهليه الحاكم وان المصرى بحكم نشأته يبحث عن فرعون يعبده- النظام حط ف بطنو بطيخه صيفى وعاث ف الأرض الفساد

لكنو نسى حقيقه بسيطه اوى:الضغط يولد الانفجار

اه م الضغط اه

ثار المصريون لما مطالب بتوع السياسيه والحريات والديموقراطيه وحقوق الانسان -ايوه العيال بتوع الفيس بوك اللى هما احنا- اتحدت مع البروليتاريا والمطالبين بحد ادنى للأجور1200 جنيه

خلطه ذات نتائج مبهره فهى نفس الخلطه التى اودت بحياه بالسادات فى 81,السادات اعتقل جميع التيارات اتحدت جميع قوى الشعب على كرهه والاطاحه به

لن ننسى طبعا العوامل اللى قتلت كلاما من

الحاشيه الفاسده,صحاب البيه الصغير والسيناريو الفج للتوريث

خالد سعيد الذى اسقط الداخليه سقوط مدوى وهى تحاول بكل ثقلها الدفاع عن 2 مخبرين اذا كان التعذيب -كما تدعى عمل فردى وليس سياسه منظمه- لماذا لا تغسل يديك من عار المعذبين وتقدمهم ككبش فداء!!!

وتزوير الانتخابات الذى وصف بانه تجاوز الذوق العام للاهانه

النظام تعمد اهانه المواطن قولا وفعلا ووضع كل المستفزين ف مقدمه الصفوف عملا بمبدأ ان كان عاجبك

وطبعا القشه التى قصمت ظهر البعير ,اللى هو ميفرقش كتير عن النظام

"تونس"

تونس لم تكن المحرض على ثوره انها فقط بمثابه العامل الحفاز فى التفاعل الكيميائى الهدف منه ليس الا اسراع الطبخه

تونس اثبتت ان الثوره ليست بالصعوبه اللى فى مخيلتنا

تونس فقط جعلتنا نخجل من انفسنا,اصبح الواحد منا يخجل من النظر فى وجه اخيه بل أصبح يخجل من النظر فى مراه الحمام صدفه

اسوأ انواع الخجل هو الممزوج بالعار واى عار على من ضيع وطنا؟؟؟ ماذا سأقول لابنى!!! عندما يسألنى كيف صرنا هكذا؟؟؟

تونس علمتنا الدرس الأغلى -سيبك من انهم ف الاخر خدوا خازووق ومشوا بنى على قام جالهم الغنوشى,ادعوا الله ان نسفيد من هذا الخازووق -الدرس الأغلى "الحلم" رفع سقف المطالب ,لماذا نقبل ب1200 جنيه لماذا تلقوا لنا بالفتات لماذا لا يكون مطالبنا اسقاط النظام

بلغه الحرب تعلمنا ان نكسب ارضا , كل انتصار يليه انتصار جديد, كل خطاب رئاسى لن يكون الا مجموعه من التنازلات

اذكر الرابع عشر من يناير واذكر اننا ابدلنا صورنا الشخصيه على كتاب الوجه بالعلم التونسى واذكر اننى لم اكتب فى خانه الحاله اى شعارات سياسيه فقط مطلع اغنيه الرائعه فيروز الاخيره

"ايّه ... فيه أمل"

تحيه للورد اللى فتح ف جناين مصر

لحد دلوقتى موش مصدقه

الشمس تشرق من الشرق, وحسنى مبارك رئيس مصر

حقيقتان كان بيتتهىءلى انهم متلازمتان ولهم ذات الرسوخ والمصداقيه

من فرط رسوخها كانت طالت حقيقه اكبر منها,هو فين ربنا؟ناسيه ليه؟؟,على اعتبار ان الخلاص الوحيد هيكون بموته محدش طبعا كان يستجرى يحلم بثوره تطيح بيه

"الجبلاوى"

كنت كل مااسمع الاسم ده ميجيش ف بالى غير حسنى مبارك اللى لو فكروا يعملو اولاد حارتنا فيلم موش هيلاقوا انسب منو للدور ده

بس بعد الذل اللى شافو ف ال18 يوم بتوع الثوره اتضحت الحكمه الالهيه اللى ربنا كان سايبو عشانها

ليله 25 وانا على الجروبات الداعيه ل"تظاهرات ضخمه غدا" لقيت شباب كتير بيقولوا احنا اتشاهدنا على روحنا ونازلين بكره لأننا عاملين حسابنا اننا موش راجعين بس انا بفهمى القاصر ماأدركتش اللى ممكن يحصل بكره

فهمى القاصر اللى مبطلش يسأل ف السنين الاخيره "هو لو مصر دخلت حرب ممكن تلاقى حد يحارب عشانها

ليه؟

حد هيحارب عشانها ليه وهو عارف انو موش واخد حقو فيها؟؟

لما قامت ثوره الياسمسن التونسيه -غصبن عنى مقدرتش امنع نفسى من احساس خافت لذيذ اوى اوى بالأمل- لقيت حد بيسأل ع الفيس بوك بردو,ثوره تونس نجحت عشان فيه ناس كان عندها استعداد تضحى بنفسها ياترى كام واحد عندوا الاستعداد ده هنا

كتير جابوا وقالوا انا

انا كنت شايفه ان اى حد كبيرو يموت مولع ف نفسو بجاز وسخ او شانق نفسو فوق كوبرى او يموت شهيد ف "عباره,طياره,قطر,انهيار صخرى"

لكن الشباب اللى ماتوا انا متاكده ان كتير منهم كانو مرتاحين بحيث انهم ابعد من انهم يولعوا ف نفسهم بجاز او يكونوا شهدا بالاجبار ف اى كارثه من كوارث مبارك وماأكثرها

انا موش بقدر امنع نفسى م العياط على الشباب دول ,شباب زى الورد

دول اللى فعلا الورد اللى فتح ف جناين مصر

بتفحم م العياط لمجرد انى اشوف صورهم من غير اى كلام لأن اى كلام مهما كان اكيد هيكون ساذج-بما فيه التدوينه دى ولاتزعلوا- جنب انك فجاءه تلاقى نفسك اتاخدت غدر وانت واقف وسط صحابك واتحولت لجثه ف مشرحه ويكون تقرير الوفاه 3 رصاصات ف انحاء متفرقه من الجسد او كسر ف الجمجمه نتيجه الدهس بسياره

ممكن كمان موش بس تبقا جثه لا مشوهه كمان بحيث لما يطلع كشف الشهدا محدش يتعرف عليك ويكتبوا جنب صورتك,قصدى جنب صوره جثتك

"شهيد مجهول الهويه"

ياريت يبقا من توصيات شباب الثوره -موش هقول عليهم مجلس قياده الثوره زى مالبعض اطلق عليه مؤخرا لما يثيره الأسم من ذكريات مهببه لا تخفى على احد- اطلاق اسماء شهداء 25 يناير على مدارس مبارك وسوزان , وتغيير اسم محطه مترو رمسيس لمحطه الشهداء

وياريت من هنا ورايح نبطل العاده الوسخه بتاعت اطلاق اسامى الرؤساء -مهما كانو ملايكه- على مشروعات قوميه

لان مفيش ف الدول المحترمه حاجه اسما معاش كينيدى ولا اكاديميه كلتنون ولامحطه رفع ساركوزى

ولا حد فيهم بيتهبل ويحط صورتو ف كل المصالح الحكوميه ابتداء من مجلس الوزرا لاصغر فصل ف ابتدائيه كفر ابو طشت

انسلاخ

المتابع لحال الدراما المصريه عموما لازم يحس بالفرق الرهيب ,الفرق الشاااااااااسع الساجق بين اللى بيشوفو ع الشاشه والريال لايف اى حد هيلاحظوا -ماعدا طبعا صناع الدراما دى والمشاركين فيها- اللى موش عارفه هما هيفضلوا مستعبطين فيها ومستعريين منا لأمتى !!!!

ليه مصممين يعقدونا ؟؟؟ هما موش هيعيشول عيشه اهاليهم بقا!!!

وايه الهدف من اللاواقعيه دى بالقصور والفلل والعربيات اللى المنتج بيدفع فيهم دم قلبو ,حتى النسوان بذمتك ياشيخ انت بتشوف الاشكال دى ف الشارع!!!! الشارع اللى بقيت بالاسبوع متشوفش فيه دارع واحده

هما فاكرينا منعرفش شكل الست وهيه صاحيه م النوم بيبقا عامل ازاى!!!!

اذكر انو من فتره ليست بالقليله كانت الحياه عادى ومفيش التناقض اللى موش مفهوم ده

الدراما المفروض انها انعكاس للواقع وبيتهىءلى ان ده السبب ان الناس اتجهت بقوه للدراما التركى الافلام القصيره وغيرو ماهو كده كده مفيش واقعيه وكده كده انت موش هتشوف وشك ولا وش يشبهلك يبقا اروح اتفرج على فيلم اجنبى انضف بقا

لحد دلوقتى ده التأثير السلبى اللى ظاهر لسه محدش قتل مراتو عشان موش شبه غاده عبدالرازق ولا واحده طفشت من بيت جوزها عشان موش ساكنين فى فيلا الدالى

حتى الاغانى كلها الحب والعيون والرموش والضنى والهجر بس

كأن الدنيا مفيهاش غير كده,وانت اصلا بتغنى على واحد موش لاقى ياكل موش يحب

والموجه المعاكسه بقت عشوائيات واطفال شوارع

ايوه الطبقه الوسطى بتتاكل بالتدريج بس موش ياابيض يااسود كده

انا بتكلم عن الشريحه الغالبه ,عنى وعنك

اللى بتقرا كلامى من لاب توب نص عمر فضل حلمك فتره م الزمن قبل ماتشتريه

وقدامك كبايه الشاى -اللى موش هبالغ واقول انو شاى تموين لان التموين بطل يوزع شاى من زمان- شاى ليبتون خرز يلاااااا ياعم بس اكيد موش بتشرب لاتيه ولا اوليه ,ساكن ف شقه ريسبشن واوضتين نوم لأنك لو ساكن ف فيلا ف القطاميه اكيد موش هتدخل اصلا ع البلوج بتاعى وكذلك لو ساكن ف اصطبل عنتر او شق التعبان

الاسبوع اللى فات اتعرض ع الجزيره الوثائقيه حلقه من برنامج "دماغنا الغامض" عنوانها رفض اعضاء الجسد

انا بتعجبنى اوى وثائقيات الجزيره اكتر من جعجعه وعك القناه الاخباريه نفسها,افكار البرامج مبتكره جدا دى اكتر حاجه بتشدنى الصراحه

عنوان الحلقه

"رفض اعضاء الجسد"

اتكلموا فيه عن 3 امثله

الحاله الاولى

Alien hand syndrome

متلازمه اليد الغريبه

ده عباره عن ان الايد بتتصرف لوحدها من دماغها يعنى بعيد عن باقى الجسم يعنى مثلا تبقا مولع سيجاره تلاقى الايد الغريبه راحت مولعه واحد تانيه او تفك زراير الهدوم ; ) انامتابعتش الحلقه من اولها فافتكرت ان الايد دى بتبقا مزروعه للجسد بعد عمليه بترللايد الاصليه لانى كنت عارفه قبل كده ان الجسم موش بيتأقلم 100% مع العضو المزروع لكن كانو بتكلمو ع الايد الاصليه واستضافو دكاتو الهد ومحدش لاقى تفسير للحاله

الحاله التانيه كانت

Foreign accent syndrome

متلازمه اللكنه الغريبه

والحاله دى ناس عاديين خالص فجاءه بيصحوا م النوع يلاقو نفسهم بتكلموا لغتهم الاصليه بطريقه مكسره جدا كانو جايبين واحده المفروض انها بتتكلم انجليزى تقولش صينى ياجدع ولا كلمه مفهومه!!!!!!!!!!!

بتقول ان جالها صداع شديد وبعدين بقت كده

الدكاتره قالوا ان ده بيبقا خلل ف مراكز الكلام ف المخ ناتج عن صداع نصفى شديد او جلطه وطبعا لسه موش لاقيين لو علاج

الحاله التالته

Apotemnophilia

اضطراب هويه التكامل الجسدى

ده عسل اوى بقا تخيل انك موش طايق حته ف جسمك,فيه تعارض مثلا بين دماغك ورجلك منفسنين من بعض جدا,الراجل اللى كانو جايبنو من وهو عندو 16 سنه وكل امنيته ف الحياه يقطع رجلو موش طايقها لأ ومعلم على رجله ع الحته اللى عايز يقطعها بالظبط لف نص العالم عشان دكاتره للموضوع ده ومحدش عارف يعلاجو ومحدش برضو راضى يقطعها ويريحو كل اللى قدروا عليه بقو يحطولو ميه متلجه ف ودنو عشان الودن قريبه من مركز الاحساس بتاع الرجل دى اللى لقو من خلال الاشعه خلل فيه ويجيبولو مرايه توريلو النص اللى هو منفسن منو عشان تقنعو ان دى رجلك ياحبيبى اهيه تبعك موش بتاعت حد تانى يمكن يحاول يحبها بدل ماهو بيعاملها معامله الكلب اللآجرب كده ,انا كنت حاسه ان الراجل بياخدهم على اد عقلهم وعمال يقولهم اه انا اقتنعت شويه ورغبتى ف بترها قلت لأنو نيمهم وخد منهم عنوان راجل كان عندو نفس حالتو وراح زاروا بس المعلم الجديد بقا اتصرف وكان قطع رجلو خلاص وعايش مستكينص خالص وقالو ده أسعد يوم ف حياتى يوم ماقطعتها ياعم أسعد من يوم زواجى ويوم ماخلفت ابنى!!! قالو طب ماتشور عليا يامعلم اعمل ايه, البوب الكبير قالوا اعمل زى منا عملت يابنى عشان ترتاح من رجلك بنت الكلب دى حطها ف تلج مجروش تقوم تتخدر وتموت بعد كده غصبن عنهم هيقطعوهالك الراجل مكدبش خبر الصراحه وقالو ف نهايه البرنامج انو عمل الوصفه وقطعها فعلا متكلمش ع الموضوع بس انا تخيلتو بعدها ماقطعها وهو بيقول لنفسو "انا الرجل اللى تضايقنى معاجلعهاش,اجطعها" واكيد قال لدماغو-بنت الكلب- اللى كانت بتحرضو ضد رجلو "ارتحتى دلوقتى"

:)

بس لحد هناوحدوته ابله فضليه خلصت السؤال بقا لو الحالات دى كانت عندنا هنا كان هيبقا شكل التعامل معاهم ايه:الست بتاعت اليد الغريبه دى اكيد ملبوسه وعايزالها حفله زار تمام,والوليه بتاعت اللكنه الصينى دى اكيد دلقت ميه المكرونه وهيه بتغلى ف عين الكنيف فركبها عفريت صينى والراجل بتاع اضطراب هويه التكامل ده تفسير حالتو سهل جدا جن كافر استحوذ على رجلو وهيقعدوا ياعينى يضربو فيه لحد مايبانلو صاحب

محدش هيجرؤ يروح لدكتور يقولوا انا موش طايق رجلى يادكتور غير ان الدكتور ده موش موجود هنا اصلا ده دكتور نفسى اختصاصو الحاله دى بس,حاجه كده زى دكتور فى "حتى" كرس كل حياتو لحاله نادره

طبيعى الفرق الشاسع ف طريقه التفكير يوصلنا لفروق شاسعه برضو ف حاجات تانيه كتير

دلوقتى فيه مشكلتين انى موش لاقيه عنوان للتدوينه,انى لسه حالا وانا بدور على مقالات متعلقه وفيديوهات للموضوع لقيت ده

http://www.youtube.com/watch?v=f1rC43dvbws&feature=player_embedded

حذروا فزروا ده ايه؟؟؟؟

اللى يقول ليه حاجه حلوه والله

ده لينك للحلقه الأصليه بتاعت الجزيره بالنص برنامج اجنبى حتى نفس الاسم كتير خيرهم ترجموه

دلوقتى انا عرفت سبب الافكار المبتكره اللى كنت بقولكم عليها,فعلا احنا لسه كتير علينا اوووووووووووووى

فروقات الأسعار

هنتكلم النهرده عن موضوع يهم ست البيت المصريه , ف الفتره الاخيره لاحظت بشده فروقات الاسعار من مكان لمكان فروقات ضخمه جدا وتصل لاضعاف الأضعاف

هيبان اوى لو قسمنا اى منطقه شرايح واخدنا عينات عشوائيه سعر المنتج مش هيتكرر مرتين واكيد الساده البائعين واثقين ان زبون سيتى ستارز عمرو ماهينزل العتبه,مع وضع نسبه م الفرق ده للمكان اكيد الشياكه ف الحاله دى ليها تمنها يظل ارتفاع السعر بردو مبالغ فيه اوى

انا بتكلم على منتجات بعينها موش شبيه ولا بديل,منتجات عاديه جدا موجوده ف كل المحلات موش المنتجات الرفاهيه اللى بتتباع على جروبات الفيس بوك اللى ممكن تضحى وتشتريها وانت عارف ومتأكد انك لامؤخذه بتتخيط بس بتضطر تضحى لان مفيش ادامك البديل,غالبا المنتجات اللى بتكلم عليها دى بتبقا حاجات تافهه جدا جدا بس فكرتها مبتكره واللى بتدفعه بيقا تمن الفكره

الموضوع خلانى أدور على النسبه الربح الحلال المسموح بيها ف البيع والشرا وزى مالاقيت اختلاف ف الاسعار لقيت اختلاف ف الفتاوى البعض افتى بجواز ان الربح يبقا مساوى لتمن السلعه نفسها -بس والله اللى انا بشوفه بيبقا اكتر من تمن السلعه- مستشهدين بحديث الرسول (ص) ان تسعه اعشار الرزق ف التجاره

انا شخصيا بكره الاستغلال وبحاول مسكتش لأى حد يحاول يستغلنى ولو اشتريت حاجه ولقيتها ف محل تانى أرخص ممكن جدا اروحلو وافضحوا وغالبا باخد حقى وأعرف ناس كتير بتعمل كده

انا كنت أعرف واحده بنت ناس كان جسمها مليان فكانت مضطره تتعامل مع توكيل معين ولا ليه مانقول اسمه ,محلات "بيلادونا" جابت بلوفر لبستو وغلسو وبعد كام غسله معرفش جرالو ايه فراحت المحل وطلبت انها تبدلو على اساس انها مش شاريه البلوفر من ع الرصيف ومينفعش يحصلو كده ,انا عايزه اقولكو انها وصلت لانها كانت بتبعت اميلات يوميه لمدير الفروع بتاعتهم بره والراجل رد عليها وقالها روحى المحل وخدى بدالو الموديل اللى يعجبك تقوم ترد عليه تقوله الكلام ده كان ف الأول دلوقتى انا موش عايزه حاجه منكو ولاهتعامل معاكو تانى انا عايزه فلوسى وفعلا البنت خدت فلوسها

الهدف م الحدوته دى ان "لايضيع حق وراءه مطالب"

الموضوع من رؤيه اخرى بيبن ان كل واحد -على قد ماربنا يقدرو- بيحط ايدو ف جيب التانى واكيد بيبرر لنفسو ان مفيش حل تانى يااما هشحت انا والعيال,المفروض يبقا فيه رقابه م الدوله -من ضمن المفروضات الكتير اللى المفروض الدوله تشوف حل فيها- ولكنها اكتفت بتأمين الكراسى للى قاعدين عليها

بس

2835

اصطبغ ظفر الابهام الايسر بلون فوشيا فاقع لايسر الناظرين حتى اليوم لايكف عن تذكيرى بيوم الجريمه

يوم سافرت من مدينتى الى مدينتى الام لاشارك ف المهزله,ف الطريق الى اللجنه الانتخابيه لاحظت الجناس بين كلمتى "انتخاب" و"انتصاب"

الغريب ف الامر انه ف الانجليزيه ايضا election و erection

صرفت تفكيرى الى شىء يحمل قدر اكبر من الجديه,انا لا أعرف من سأنتخب بل من لن انتخب,ثبتت نيتى ع ان ابطل صوتى

ولكنى فعليا بعد ان استلمت ورقه الاجابه وجدتنى اختار تجمعيا واخوانيا -لم اجد غيره للفئات- وهو المرشح السابق للدائره وانا ابحث بين الاسماء المجهوله تذكرت انه حضر عزاء جدتى

ومسيحيتين احداهما وفديه

كل اختياراتى فشلت على الرغم من تعدديه اتجاهاتها فهذا هو الامر الذى اجتعموا عليه وكأنى جلبت النحس لهم جميعا

لن اتكلم عن الانتخابات المزوره فهذا حكى ف المحكى,هم يعرفون ان الانتخابات مزوره هم يعرفون اننى سأكتب هذه التدوينه,هم يعرفون انى -على الارجح- سأنسى كل هذا عند أول معركه حقيقه تمسنى اكثر مع الحياه,اذن فلتكن سريعه

فلأنشغل اكثر بسعر اللحم والسكر وكيف سأدفع الايجار الشهر القادم

انا فقط أكتب لأجل هذا الرقم 2835

رقمى الانتخابى رجاء احفظوه بعنايه ربما عندما تجد ف الامر امور وعندما يصبح له قيمه اعيد استخدامه اصلى اتذليت ادام اللجنه وانا بطلعوا من وسط الكشوفات مع انى قمت بهذه العلقه سابقا ولكن انسانيا الله

فقط ... جدد دعوتك

لم اكن ابدا ضيفه غير مرغوبه فى حياتك...جئتك بعد امنياتك وصلواتك ودعوه ملحه منك بأن اكون لك

لم احاول الى اليوم ان اقحم نفسى رغما عنك,عندما تتركنى وترحل لا اطالبك ابدا بالعوده ... فقط أظل فى انتظارك

أرضى بأقل القليل الذى تمنحه عن طيب خاطر بدلا من اى اعباء اضافيه اطالب بها, لا أذكر اين قرأت مقوله قصيره عبقريه بالفعل تكمن عبقريتها فى قصرها "السعاده ألا تطلب"

وانا لاأنكر انك تجعلنى سعيده لانك لا تضطرنى لأطلب

انت الان مرهق-اعلم ذلك- وأنا ايضا

ولأنك عودتنى الا اطلب,سأختفى قليلا

واكتفى بطيف الذكريات فى هذه الليالى البارده التى كانت رساله "الدنيا برد أوى,خدنى ف حضنك" تشعل قلبينا نارا تستمر حتى يأتى دفء الصبح,اذكرها الان وحيده ولااجد حتى صوتك فى هذا البرد

لن أعود الا لآمنحك كل حبى ... عندما تحتاج له

.....

هل تذكر مذاق ايس كريم شيكولاته فى غروب شارع مزدحم ويوم عشوائى,هل تذكر انك لطخت ملابسك كما لم تفعل وانت طفل؟ هل اخبرتك انى لم اعد أقرب الايس كريم قط الا معك؟؟

هل تذكر حينما ذهبنا الى الملاهى يوم عيد الحب واخبرتنى انك لم تركب مراجيح منذ مده فشلت انت شخصيا فى ان تحددها؟

هل تذكر اول مره احضتنى فيها فى مكان لا اذكره تحديدا على شاطىء البحر بالأسكندريه؟

هل تذكر قطارات ليليه بارده وشلالات دموع ساخنه لحظه الوداع؟

هل تذكر ذكريات اكثر حميميه لا اريد ان اشرك بها احدا الان؟

هل تذكر

....

بالله غليك اخبرنى من سينتزع هذا من داخلنا

؟؟

اتفوووو علينا

ليه بنشتغل الولاد الصغيرين ونفهمهم ان اى شغلانه شريفه موش عيب ونفضل نلح على ده من غير اى مناسبه واول مايصدقو ويكبرو يعرفو انها كانت اشتغاله كبيره اوى وان فيه مهن رفيعه ومهن وضيعه ومهن شريفه بس عيب ومهن تكسف ومهن موش من مستواك ياحبيبى

يستطيع الشخص البالغ فهم ان الاخر ممكن ان يكون بيخدعه لكن عقليه الطفل لاتعمل بمثل هذه الكيفيه وتاخذ مايقوله الأخرون -خصوصا لو كانو كبارا- بكل جديه ومايقال هو نص مقدس لايحتمل التحريف مع اننا غير جديرون بالمره بكل هذه القدسيه لكلماتنا

كان من الممكن الا نخبرهم بأى شىء ونتركهم ليكتشفو بنفسهم حقائقنا العنصريه ولكننا ابينا الا نلعب دور المثاليه مع طرف ضعيف لا يسمح له سنه القانونى باللعب القذر