Sunday, March 25, 2007

بصراحه يامصر انا كده جبت اخرى

بعد صراع طويل مع نفسى,اروح,ماأروحش
بصراحه عبرت عنه بااقتدار نواره نجم,وقفلت المجال على اى حد يتكلم ف الموضوع ده تانى


كنت خايفه اوى وبرر الخوف ده لنفسى بأنى بنت وهو يعنى احنا عدمنا الرجاله وبأنى موش من القاهره وهسافر عشان مظاهره والكلام ده.بس ده طلع عشان الاقى مبرر لنفسى ادام نفسى موش اكتر


خايفه,لو حصل حاجه يالهوىىىىىىى... ابويا وامى واخواتى والمجتمع والناس؟

بس خلاص هنفجر,انفجر يعنى...لا وعلى ايه روحى يابت انفجرى فيهم ,ايه اللى هيجرى يعنى هو الصحفيات بتوع الاستفتاء احسن منك؟جميله بوحريد رفيقه النضال تزيد عنك ف ايه؟سناء محديلى؟(موش واسعه حبتين موضوع سناء محيدلى ده)

ايه اللى هيحصل يعنى هيضربوكى,يتحرشوا بيكى,يعتقلوكى؟

ابوكى هيتشل لما يعرف وبقيت اهلك يتبرو منك؟
كله يهون ف سبيل مصر يارأفت
وهكذا عقدت النيه والعزم على الثبات وخلاص هروح وهاخدها جد بقى-عشان انا ليه سابقه وحيده ف موضوع المظاهرات ده ف مظاهره يوم الخميس 15-3 والحمدلله طلعت مظاهره فاشله اصلا وأدت قبل ان تولد والناس ملحقتش تعمل حاجه والامن ظبط الدنيا صراحه كانو بجد عاملين شغل ميه ميه-

المهم,وصلت التحرير الحمدلله ولقيتلك ايه الامن واقف ف تشيكلات بديعه اللهم صلى ع النبى.شكلهم يلقى الرعب ف قلوب اعتى الرجال بين كل عسكرى وعسكرى عسكرى,انا متأكده ان عددهم كان اكتر من عدد القوات اللى عبرت الجبهه ف 73.
واقفه جنب عسكرى امن مركزى قولت استعبط واسأله:هو فيه ايه يادفعه مصر دخلت الحرب ولاايه؟
-لا دصطووور
والله قالها كده
-دصطووور ايه,فيه انتخابات النهرده يعنى ولاايه؟
-موش عارف بس انا كان اجازتى النهرده ومنزلتش بسبب
.......
كلمت الناس بعد معاناه-موبايلى فصل اصله فحطيت الشريحه ف السنترال واتكلمت-لازم تحسو بالمعاناه
وطبعا مسمعتش منهم غير "كنتاكى التحريييييييييير"
ماشى نروح كنتاكى التحرير هو احنا بنخاف
خلاص هوصل اهوه كنتاكى لقيت اللى بينده عليا بأسمى طبعا انا رد فعل منعكس طبيعى جدا بصيت,الاقى مين ف وشى (ملاكى الحارس)"عمى" عمى اخو بابا لزم
-انت ايه اللى جابك هنا؟قصدى اى رياح طيبه القت بك؟
-انا جاى المستشفى اجيب تحاليل مصطفى,انت بتعملى ايه
-هه؟
-..........................
...........
............... ........... ............ .
ماسبق كان اشتغاله محترمه طبعا
-طب انتى موش مروحه ولاايه؟
-لامروحه طبعا,ده انا اصلا اصلا جايه عشان اروح
-هو ايه الامن الكتير ده ؟
-معرفش تقريبا مظاهره
ادام كنتاكى على طول بنات بتصوت وبيجروهم على عربيه الترحيلات,ومراسلين اجانب بيصورو ووحده زعلانه اوى كل اللى طالع عليها
I cant speak 3arabic.
-هو فيه بنات بيطلعو ف مظاهرات اليومين دول؟
-قله حيا ياعمو بعيد عنك
-موش فاهم موش عايزين يعدلو ليه,كووووووووول الناس دى هتعدل موش معقوله احنا اللى بنفهم يعنى
محنا ف وسط المعمه بتاعت الامن بقى,عايزينه يقول ايه

بس الراجل مسابنيش غير وهو بيسلمنى لأبويا,اللى موش عايزه اقولكو عمل فيا ايه.كل ده وهو معرفش طبعا اى حاجه عن موضوع المظاهرات ده لان دى الحاجه الوحيده اللى ابويا عمره ماهيتقبلها ف حياته اصلا ده كل مايكلمنى يقولى"عملالى ثورجيه يابنت الكلب"

بس انا -لأول مره ف حياتى- حمدت ربنا ع البهدله اللى ابويا بهدلهالى دى وقولت اهو مهما كان ابويا,ياعالم كان مين ممكن يبقى بيبهدل فيا دلوقتى؟

بس حبيت اقول يامصر اديكى شوفتى انا كده عملت اللى عليا وعدانى العيب وأزح,اقطع نفسى يعنى.الحمدلله الواحد ضميره ارتاح من ناحيه البلد

Friday, March 23, 2007

بحبك يا حمار



كل البلوجات بتتكلم عن تعديل الدستور..بس انا لقيت ده أظرف كتير


تستضيف القاهرة مؤتمرا دوليا حول الاهتمام بالحيوانات وخاصة الحمار ،والذى تنظمة الجمعية الخيرية لرعاية الدواب.
يركز المشاركون خلال المؤتمر من المختصين بصحة الحيوانات علي توفير ضمانات اكثر انسانية ، للحيوانات في شتي بقاع الارض .
المؤتمر الذي يعد "الحمار" ابرز الموضوعات المطروحة عليه ، يستمر لمدة خمسة أيام، بمشاركة ممثلي جمعيات من بريطانيا والمكسيك والهند وبلدان أخري في أفريقيا وأوروبا الشرقية، فضلاً عن الدولة المضيفة مصر.
الدكتور عادل كشك، رئيس الجمعية الخيرية لرعاية الدواب، والراعية لهذا المؤتمر أكد أنه سيناقش طرق رعاية الحيوان والإجراءات البيطرية، للحفاظ علي حياته ومنها مصر، مشيرًا إلي أن المؤتمر يناقش حماية حقوق مليونين و500 ألف حمار و50 ألف بغل مصري-طب وبقيت الحمير,ينفع كده؟-، والإجراءات التي تتخذها الجمعية لحماية هذه الحيوانات.

مشيرًا إلي أنه يجري التنسيق مع وزارة التعليم، لنشر ثقافة الرفق بالحيوان بين تلاميذ المدارس، وأصحاب الدواب والعاملين في مجال الخدمات البيطرية.

Tuesday, March 20, 2007

5 حاجات,تاج رخم

بجد تاج رخم اوى-يعنى يارب يوم ماحد يفتكرنى ف تاج ميلاقيش غير ده-,بس انا وعدت محمد انى هرد عليه وسورى انى اتأخرت وعشان التأخير ده انا هقول 5 حاجات قويه.يعنى 5 قنابل,موش زى ماحد جاوب ع التاج ده وقال "انا مبحبش السبانخ",مال امى انا تحبها ولامتحبهاش,استفدت انا ايه.
بسم الله نبدأ
اول حاجه:انى واثقه من نفسى....اوى
تانى حاجه:كدابه محترفه
اه والله.موش على طول طبعا بس لما بتطلب بألف كدب تتدرس واستحاله تحس مجرد احساس ان البراءه دى بتكدب اصلا.لا مقنعه مقنعه يعنى
اقول ايه تانى,افضح نفسى بيه؟
اه:شعبيه جدا
بحب الحياه الشعبيه واكره كل مايمت لل"فرفره" بصله,واحب لما ابقى مع حد يعاملى معامله واحد صاحبه موش بنت ونرسم الدور وبتاع.لاياسيدى اكلنى على عربيه ع الرصيف وركبنى ميكروباص.مع انى بنت ناس والله وخريجه مدارس لغات
4:بأجرب اى حاجه تطلع ف دماغى
اى حاجه,وكل حاجه
اخر حاجه بقى خلينا نخلص:بتخنق من ام قعده البيت
خصوصا بقى لو ابويا ف البيت,اصل بابا بيشع توتر ف مكان تواجده يستمر ف دائره قطرها 300 متر حواليه
بس خلاص
مين بقى يعمل التاج الرذل ده؟
عادل سلامه"قول حاجه غير ايه بقا,ولاخالص.دول انا عارفاهم"