Monday, December 29, 2008

بالأمس حلمت ب"نور المالكى"

كان "نور المالكى" على وشك القاء بيان هام وانا انتظره بشغف لأرى اذا كان سيتكلم عن موضوع الحذاء أو عن "غزه"
ربتت عليا لتوقظنى فأخبرتك أننى اود العوده لسماع البيان الهام,أخبرتنى انك ستلقى بيان أهم .بيان قوى له أثره الملموس بعيدا عن كل بياناتهم الشفوية فوضحت لك انى لست فى حاجه الى اى "بيانات" الان ,كمحاوله للتغلب على احراجك سألتنى كيف أحلم برجل غريب وانا نائمه الى جوارك ثم سألتنى انتى تعرفيه منين ؟؟
انا لا أحب المالكى اساسا وهو اخر شخص أريد ان أحلم به فى هذه اللحظه ولكنى أريد بشده العوده الى النوم

Friday, November 28, 2008

غباء اعلامى

من كام يوم وأنا بقلب ف الدش,محنا جبنا دش عقبال عندطو بدل دوخه الوصله اللى كل شويه تقطع,المهم فرحانه انا بالدش وبقلب ف القنوات لمحت على قناه الحياه الحمرا ف البرنامج بتاع المذيعه الظريفه المحجبه بتاعت اعلانات الشامبو مستضيفه واحده وقاعدين ال2 بروح امهم بيكفنو واحد,اه والله كفن ولافينه على عروسه وبيلفوه ويربطوه ال ايه بيرو الناس يكفنو بعضيهم ازاى!!!
مبدأيا كده عشان اى حد ظريف يجى يقولى الموت عليتا حق ومسيرك هتتكفنى ف يوم م الايام أقوله طبعا وانا الحمدلله مؤمنه ومؤحده ان الموت حق والبعث حق والجنه حق والنار حق بس هل من الطبيعى انى افتح التليفزيون الاقى لكى ياسيدتى كيف تعدين كفنك هذا الصباح بطريقه شريعه؟
موش عايزه اقولكو اد ايه انا اتسرعت وغيرت القناه بسرعه الموضوع كله مخدش ثوانى,بصرف النظر من ان الناس بتتشائم م الموت وسيره الموت بجد دى موش منظر حاجه تتعرض للناس ف البيوت بيتهىءلى كان المفروض اصلا قبل ماتتذاع يتعرض تنويه "احنا هنكفن دلوقتى,خبو عيالكو" حاجه زى كده,خصوصا انها موش قناه دينيه اصلا ومش عارفه مين الصراحه اللى هيبقا قاعد ف بيتهم مستنى يشوف يكفن ازاى!!! كام واحد استفادو م الوصفه الهايله دى؟ على اساس ان لو مات منك حد ف الصحرا ومفيش حد غيرك يكفنه ولا ايه,حاجه بتنزل مع الاسعافات الاوليه ولا ايه؟
انا كنت بفكر احط صوره مع البوست بس احترت هل احط اللوجو بتاع القناه اللى هيه اصلا متستاهلش يتعملها اعلان على مدونتى عابره القارات ذات الانتشار اللوذعى,ولا احطلكو صوره -بعيد عن السامعين- كفن!!!
تخيل انت بتفتح المدونه لقيت كفن ف وشك,والنبى موش حاجه تسرع؟

Tuesday, November 18, 2008

أتوجه بالشكر لكل من

*1-دبله جوازى
2-صورى
3-صوت فيروز
*4- كتابات أحمد خالد توفيق و أحلام مستغانمى
5-Etisalat
*6- Sony ericsson mobile Aino & Bluetooth handfree
*7-Face Book
*8- Sony Bravia LCD & دونجل بوكس
9-بن عبد المعبود
10- كابيتشيو D'amore شيكولاته بيضا & بندق
11- Mix جهينه شيكولاته
12- شيكولاته جلاكسى
13- شيكولاته فيرو روشيه
14- زبادى بالفاكهه بيتى كريز
15- ادخنه الورده , النخله
16- Cinnabon
17- Avon للمكياج والبرفانات
18- Tri colour Lincies misty gray
19- شاور جيل لوكس كريمه وفراوله & ورد وعنب
20- Soft & Beautiful لفرد الشعر
21- حنه جلورى احمر
22- Baby oil jel Johnson & johnson كاموميل
23- بخور بنجاوى بنفسج & تفاح اخضر
24-قطارات الدرجه الثانيه المكيفه
25- كوك دوور
*26-فتح الله ماركت
27- Herbal shampoo
28- الورد البلدى ابو ريحه
29- روتيتو ملح , شطه و لمون
30- اسكندريه
31- شهر ابريل
32- Blogger.com
حاجات بحبها وبتخلى حياتى محتمله ,القائمه قابله للزياده
33-كأس العالم لكره القدم وكأس الأمم الاوروبيه
*34-قطتى لولى
*25-شقتى
*تم الزياده والتعديل بتاريخ 18ديسمير2010

Friday, November 07, 2008

عن الست ام شخصيه قويه واشياء اخرى نتحدث

قريت عند برايد ف "بيت العرايس والعرسان" قصه البنت ام شخصيه "كويه" اللى متقدملهاش عرسان نهائى خايفين من قوه شخصيتها,الوضع رغم انه مهين انسانيا اوى وجارح بس منطقى وحده شخصيه قويه=العرسان بتهرب منها
عايز تشوف اللى موش منطقى بقا تعالالى تعالى وانا احكيلك عليه,مبدئيا كده انا عارفه انى هكتب بوست مقندل وملخبط وهنط من حاجه ل100 حاجه عشان دماغى ملخبطه وانا شخصيا موش عارفه هقول ايه
كفرشه ومقدمه للكلام هحكيلكو حكايه من حكاياتى اللى افتكرتها لما قريت القصه بتاعت البنت ام شخصيه كويه
لايخفى عليكم انى والحمدلله اتخطبت مؤخرا بعد قصه حب طويييييييييييييله,قبل مااتخطب كان فيه بيننا-بينى وبين خطيبى يعنى قبل مايبقا خطيبى طبعا- قطيعه للعلاقات وسحب للسفير وبلاوى زرقه ترتب على اثرها الانفصال-اه الايام الغبره اللى كنت بجى اقعد اسح بيها ف المدونه هنا دى,طبعا ملحقتوش تنسو- المهم كل واحد مننا راح لحاله فأنا قولت ايه بقا بدل البكا ع الاطلال اللى مننهوش فايده ده الواحد بشوف مصلحته احسن والزمن بيجرى يابنتى والقطر بيفوت ومقلقوش بقا الون ع الودان امر م السحر
وكأن امى جاهزه بالعريس-معرفش كانت عاينه ف انهى داهيه ده ومصدقت طلعته- وقالتلى جربى,انتى عمرك سمعتى كلامى ومكسبتيش,الصراحه الصراحه يعنى انا اصلا عمرى ماسمعت كلامها وكسبت ف اى حاجه ولا حتى ف سحب بسكوت الشمعدان,فعشان كده توكلت على الله ودخلت بقلب جامد مع انه لايلدغ المؤمن من جحر مرتين بس هنعمل ايه بقا ساعه القدر يعمى البصر
المهم بدون الخوض كتير ف التفاصيل -دى اعراض ناس بردو- طبعا الموضوع فشل فشل ذريع
وانتو عارفين بقا القيل والقال والكلام اللى بيتقال بعد مالمواضيع دى بتتفركش -بتبقا حاجه مسليه جدا على فكره- ده ابن امه وعيل وملوش كلمه,على اعتبار ان محدش ياعينى كان واخد باله خاااااااااالص قبل كده وفجاءه كل شىء انكشفن وبان
من ضمن الكلام اللى اتقال ساعتها ايه بقا ياولاد ان انا -ال ايه- شخصيتى قويه,دى طلعت عيب اوى اوى على فكره
ولجل حظه السعيد الكلام ده متقاليش انا انما اتقال لاهلى -اللى معرفوش يربو بنتهم وطلعوها بت شخصيتها قويه- وطبعا اهلى ساعتها ولاجابولى سيره بالكلام ده لما اتقال ف ساعتها ف سبيل ان الجوازه تمشى,العجيب بقا ايه ان وهما بيبلغونى فيه ف كلامهم تلميحات انى فعلا غلطانه وانى مكنش لازم ابينله كده
!!!
ساعتها بردو افتكرت حلقه لعمرو اديب كن بيحكى فيها لعزت ابو عوف عن واحد صاحبه راح اتقدم لعروسه وبعد مارجع بيسأله ها عملت ايه؟ قاله لا مينفعش لقيت شخصيتها قويه
عزت رد عليه اتوماتيك وقاله يبقا دى مشكلته هو موش مشكلتها هيه
بردو الوضع ده طبيعى واحد لقى واحده شخصيتها موش هتناسبه فانسحب
اللى موش طبيعى بقا ان واحد يبقا عارف كل الكلام ده ويقاوح متفهمش بيجرب نفسه ولا ايه ولا لاقها لعبه جديده فشبط فيها
وبعدين هو انا يااهبل لو كنت زى مابتقول كده كنت سيبتك تعك العك اللى عكيته ده,بصراحه هو موش عشان انا مليش شخصيه نفضتلك خالص وسيبت اهلى هما اللى يتصرفو,لآ عشان الموضوع مكنش فارق معايا خالص
هو اللى كان حلو اوى انى عمرى ماسئلت على حاجه وعرفت ترد عليا فيها؟ ولا انك عمرك ماقريت كتاب م اللى انا قريتهم؟ ولا بتروح حفلات؟ ولاتعرف يعنى ايه ساقيه الصاوى؟ولا عمرك حضرت ماتش ف الاستاد
و لاحتى روحت دريم بارك
انا دلوقتى عمر ماخطيبى حسسنى انى ست مستقويه ولا اى حاجه م الكلام الاهبل ده لان كون شخصيتى قويه يبقا دى ميزه موش عيب ومعنى كده ان موش كلمه تودينى وكلمه تجيبنى ومش سهل ابقا شخشيخه فايد حد ولا حتى ف ايده هو,هو حابب ان شريكه حياته تبقا كده وبيتعامل معايا الند بالند,ولا عمره اتدخل ف لبسى ولا انى اشتغل ولا اقعد ف البيت ولا علاقتى بصحابى ولااهلى ولاحتى اهله
وحتى لما اكتشف البلوج بالصدفه كانت تعليقاته ليا مشجعه
بل بالعكس انا فيه حاجات كتير مكنش عندى الجرأه انى اعملها لوحدى بقيت دلوقتى بعملها معاه
ولا عمره بصلى بصه موش اللى هيه ولا الماوس لعب ف عبه
وانا ولاعمرى حسيت انه راجل مستبد ولا ملوش شخصيه ولا اى حاجه من الهسهس ده,شخصيات سويه فاهمه بعض كويس وبتتعامل مع بعض ومعندهاش كلاكيع ولا ازدواجيات
نسيب المواضيع الشخصيه دى بقا ونتكلم ف العموم,الرجاله عموما عمرهم مابيعترفو ان هما غلطانين سيبك من اخوكى اللى بيرمى هدومه ع السرير وانتى تشيلها وجوزك اللى بتخانق ويتعصب على ع الفاضيه والمليانه على اعتبار انك ست ومهما حصل انتى اللى هتطلعى غلطانه على طول الخط
لا انا بتكلم على قضايا عامه زى مثلا موضوع التحرش,انا كعادتى مبحبش اتكلم على حاجه ف البلوج ف وقت الهوجه ومبحبش اهتف مع الهتيفه ,الفتره اللى فاتت كان فيه شبهه عرف اجبارى على كل المدونين انهم يكتبو موضوع تعبير قصدى بوست عن التحرش,لدرجه انك استحاله تفتكر مين كتب ايه...انا قولت الهوجه تخلص بعدين هبقا ادلى بدلوى,احنا كنا بنقول ايه.اه التحرش من وجه نظر الراجل بيطبق نفس المنطق البسيط اللى ماشى بيه ف حياته الشخصيه على اى قضيه عامه يكون فيه الطرف الاخر ست,يعنى يامزه لازم هتطلعى غلطانه على طول الخط
لبسك موش عارف,حركاتك ابصر ايه,راجعه متأخر اى كلام.المستفز بقا ان كتير اوى حسو انهن متهمات وسابو القضيه الاساسيه وفضلو يدافعو عن انفسهم وطبعا الجدل المفرغ ده المطلوب
مع ان الامر بغض البصر فرض قبل الامر بالحجاب,و لاان كونى ماشيه سافره -على حد قولهم- موش مبرر لانتهاك جسدى بل هو مبرر ليك عشان تحترم نفسك اكتر وتبتث وقت الشدائد.موش انت عاوز تدجل الجنه,هو دخول الجنه سهل ياراجل؟
الست مشكله الراجل الازليه موش لاقيلها حل قام ربنا فتح على بعض الوهابين السلفين انهم يلبسوها خيمه سوووووووده بعين واحده ويقولها اعترضى بقا على امره,اللى هو امر الهى وماهو الا -ياحبه عين امه- اداه بينفذ اوامر مفروضه من فوق سبع سموات
!!!
ستات كتير اوى كرهو الاسلام-وان كن لم يجهرن بهذا- عشان طريقه تعامل الاسلام-اللى هو اساسا لااسلام ولايحزنون- مع المراه,الست حست ان الاسلام سبب وكسها وانه مبيديهاش اى حقوق تذكر مهو اى قمع بيحصلها بيتقال عليها اسلام
ده ياحاجه انتى وهيه اسمه تخلف,ايوه تخلف جاى من بلاد كانت الست فيها مطيه لاحقوق لها ف حين كان الستات عندنا بيشتغلو ويروحو الجامعه ويمشو ف الشارع بحريتهم,وهو ده السبب فى التخلف العربى اللى احنا فيه دلوقتى ان بدل مالاعلى ثقافه ينتقل لبلاد الجهل اللى حصل العكس الجهل هو اللى جالنا باسدلاته ونقاباته وحجابته على البناطيل الجينز
ازاى وامتى بقينا كده,نسخ مشوهه لفكر ماانزل الله به من سلطان؟!!
ايه روحنا الخليج نشتغل ونجيب ريالات ونفتح مدارس ومستشفيات رجعنا تائبات الى الله؟!!
الست اللى حررتنا دى ووقفت ف ميدان التحرير -من هنا جاء سبب تسميه الميدان على فكره- وقلعت الحجاب محدش قال عليها سافله فاجره وانما اتقال عليها محرره المرأه بس انا نسيت اسمها دلوقتى ياولاد,المهم ان التاريخ بيذكرها بكل خير,انا بيتهىءلى ان الكلام ده لو حصل دلوقتى كان بقا مهدور دمها على طول
تحرير المرأه موش قلع حجاب لاقلع الافكار اللى اتكلمنا عليها فوق ممثله فى الحجاب
فيه ايه هو احنا نتقدم ولا بنرجع لعصور الظلام؟
لما عملو مساواه ف امريكا كلنا شوفنا انه موش بس كلام,لكن احنا عندنا المساواه فشنك,المجلس الاعلى لحقوق المرأه وقانونين الاسره والخلع
كل ده يفيد بايه واحنا لسه بنبص للست على انها حته لحمه موش انسانه زيها زيك حدث ان ولدت انثى وانت ولدت دكر
جزء كبير من التصرفات العنصريه دى بيقع وزه على المراه ف حد ذاتها اللى حاسه بينها وبين نفسها انها فعلا كائن أدنى,لما بتتعرض لاى قمع او تفرقه او تحرش مبتتكلمش لانها عارفه السبب انها تحمل وصمه كونها انثى
وقاعده حاطه ايدها على خدها مستنيه حد يجي يجيبلها حقها,لا ياماما الحقوق لاتوهب ولكنها تنتزع انتزاعا
مشكله المرأه قبل ماتكون مع اى حد فهى مع نفسها
نرجع للراجل,لحد امتى هيفضل يلوى عنق الاسلام الى مافيه مصلحته هو وف اول موقف هيتعارض الاسلام مع مصلحته هيلوى عنقه ويطوعه ليحقق اهدافه هو بردو
الاسلام بيتطبق ع الواقع وليس الواقع بيدور على اسلام يكسبه شرعيته وده اللى احنا بنعمله.كل حاجه تفضل على حالها وندورلها على اسلام تفصيل محاولين لى عنق الايات وتطويعيها لاغراض ماانزل الله بها من سلطان
وسيله قذره ورخيصه جدا
انا شكلى همشى مع العالم بتوع ليلى دول-بس نفسى افهم هما عايزين ايه الاول-,عشان بجد دى بقت حاجه لا تطاق

Sunday, October 26, 2008

من فضلك اقرأ نون





اشتريتها من معرض الكتاب بعد ما قرأت عنها لاادرى ماذا قراءت ولا اين ولكن يكفى انها اثارت الجدل,ومع انى لم اقرأ لمؤلفتها من قبل ولكن لابأسا فأنا فى المعرض اشترى الكتب بلا حساب لأقراها على مدار السنه او سنوات

ظلت تنظر دورها فى القراءه الى ان الح عليا صديق اثق فى اختياراته بسرعه قراءتها فهى -كما قال- تشبهنى جدا,سبق وان شبهنى ايضا بقصيده "بنت سايكو" لعمرو طاهر,كما ترون تشبيهاته دائما تبعث على الشك فى اتزانى النفسى


لكننى لم اتوقع ان يكون دقيق الى هذا الحد,لو قررت كتابه روايه ستكون "نون" سأقتبس تلك الروايه ذات ال377 صفحه واضع عليها اسمى,اعرف انه سيكون اقتباس طويل بعض الشىء

لكنها أنا,انا لم اكتبها بل كتبت لى
لا اكف عن الصراخ عقب كل سطر...دى انا,انا دى
ظللت اصرخ الى ان انتهيت منها.ليس دفعه واحده كما اقرأ تلك الروايات اللى لا احنمل ان اتركها قبل ان اصل الى الغلاف الخلفى ولكن رشفه رشفه لااحتمل ان اخذ الجرعه كلها دفعه واحده...فهذا سيكون كثيرا جدا,بالاضافه الى اننى هكذا سأنهى المتعه كلها فى ليله واحده
وانا اريدها أطول وقت ممكن

بعد بضع صفحات عندما ايقنت ان بين يدى روايه غير عاديه اخذت افكر فيك-صراحه هذا هو السبب الخفى الذى جعل مده القراءه أطول مما ينبغى- لم اتمنى ان تكون معى تمنيت فقط ان تقرها,ليته يقرأها
وجدتنى امرر الهاى لايت على بعض السطور,تلك التى ذكرتنى بك او تلك التى اشعر انها كتبت لى وحدى
اول مره اخطط بالهاى لايت فى كتاب اقرأه لكنى لو كنت وجدت نفسى فى روايه قبلها لكنت فعلت
بكيت كثيرا جدا لكى تقرأها


بعد العوده كانت نسختى ذات الهاى لايت هديتى لك فى اول لقاء مع توصيات مشدده انك لازم تقراها -اعلم انك لم تفعل الى الان- ولكنى اشتقت لها,اشتقت لان اجربها باحساس مختلف.عندما قرأتها اولا كنت انت مجرد طيف اما الان فأنت حقيقه ملموسه لن اجتر مراره الذكريات بين السطور بل ان حبك وحنانك سيشع من بين الصفحات
فما كان منك الا ان اشتريت نسخه جديده واهديتنى اياها محتفظا بالنسخه ذات الهاى لايت
وانا الان اقرءها بتمعن اكثر لانها تستحق ان تقرأ مرتين,بحالتين مزاجيتين متضادتين


انها ليست "الأروع" ولكنها تمسنى كثيرا جدا,ليس معنى ذلك انها بلا عيوب بل من الممكن ان نعتبر ان ذلك هو عيبها الجوهرى
فالروايه بلا احداث محوريه بل ان جماله فى مجرد طريقه السرد الساحره وهذا هو مايجذبك بشده ليس احداثها التى من الممكن ان امر بها يوميا انا وصديقاتى,اعشق الادب الواقعى ولكن فى حالتنا هذه هو فعلا واقعى انا

احد ابرز العيوب ايضا الصوره المعلبه التى تقدمها للمثقف فى مجتمعنا بالاخص المرأه المثقفه فهى دائما وابدا مطلقه متحرره منكوشه الشعر,متعدده العلاقات.تدخن وتشرب الخمر وتستمع الى موسيقى غريبه طوال الوقت
أخشى اننا صدقنا تلك الصوره اكثر من اللازم ونسعى اليها دائما حتى نكتسب اللقب

عدم اعتراف مؤلفتها بالهوامش هو ايضا عيب خطير فالكتاب مقسم الى اجزاء واى اقتباسات يتم توضيها فى صفحات منفصله فى نهايه الكتاب وليس على هامش الصفحه ذاتها وهو عيب جد خطير

لجوء المؤلفه الى الفذلكه واستعراض العضلات فى مواقع كثيره هو ايضا شىء سخيف


تعجبت جدا اختيار الاسم ليكمل النظومه غير العاديه للروايه ولكن فيم التعجب الم يقسم رب العزه بنون فى كتابه

ادعوكم جميع محبين الروايات الفيمينست لقراءه "نون" ل سحر الموجى
وارجو ان تتذكرونى وقتها


للروايه طبعتين مع دار الشروق والاخرى دار الهلال

Monday, October 20, 2008

صباحات بعيده

هل اخبرتك يوما عن طقوسى ف الايام التى نقضيها سويا؟
لا لم اخبرك ولكنك خمنت...دعنى اخبرك اذن

مبكره عن العادى اصحو,اصحو بلا نوم تقريبا مع ذلك فى قمه نشاطى
هل تذكر احساسنا ف المرحله الابتدائيه فى تلك الايام التى نذهب فيها الى الرحلات المدرسيه.او ايام الاعياد
عندما تتعجل الصحو لانك تدرك ان فى انتظارك مفجاءه مفرحه بدلا من ايام الدراسه الكئيبه
اشكرك لأنك اعدت لى متعه الرحلات المدرسيه


أغلق منبه الموبايل -الذى رغم ذلك اصر على ان اضبطه مبكرا- عاده اجد ثانى مفجاءتك من خلالك رسائلك التى تصر على ان "تصبح" عليا بها
بدافع من خدر لذيذ وتصور لاحداث يومى المبهجه اقرر انه حان وقت مغادره الفراش,اوزع ابتسامات ف الطريق الى المطبخ
كيف لا يعرفون اننى اليوم بانتظار حادث استثنائى,أأصحو كل يوم بهذا المزاج الرائق!!؟


المطبخ حيث كوب كابتشينو رائع اختار نكهته بعنايه فائقه لتلائم احتفالى الصباحى
ثم فى الحمام أشعر تحت الشلال الساخن ان كل هذه اللذه حقيقه واطرد اثار احلامى الطفوليه اللذيذه
مع صابون سائل رقيق بربع كريم مرطب أو الاختراع الكريمى المنافس الممزوج بحبات الفراوله

ثم اغمرنى فى زيت الافندر واضع عطورا كتيره على شعرى فأنا اعلم كم هو مهم لك,واختار ملابسى الداخليه بعنايه
انا استحق كل هذا الدلال,اذا كانت الدنيا كلها ستدللنى وتجلبك الى,فلا ادلل نفسى!!!


أضطر ان اذهب للمطبخ ثانيه واقضى هناك وقت لابأس به لاافعل شيئا ثم اخرج لأعلن لأمى اننى قد تناولت الفطور والغداء معا لانه من المستحيل انها ستتركنى اذهب بلا طعام.وانت قد اتصلت مرات عديده وايضا اريد ان ناكل سويا


لا اجفف شعرى وامشطه بعجله وفى الخلفيه فيروز تصدح فلا اتصور خلفيه موسيقيه اخرى تبارك مناسبتى الخاصه ,ارتدى مااجده متاح من ثيابى فأنت اخبرتنى مرارا انى جميله فى اى شى سأردتيه
ولمسات ميكياج خفيفه جدا واحرص الا تنتبه لها فأانا اعلم انك-كسائر الرجال- تكرهه
القى كل مااجده امامى فى حقيبه يدى ,انزع الموبايل من الشاحن واضع نظارتى الشمسيه وأحرص الاانسى سلسه مفاتيحى
أنا الان متاهبه للقاء ولخوض تجربتنا الفريده,لفأجأ بأمى وانا افتح باب الشقه تخبرنى الا اتأخر ارد عليها بأننى ربما اتأخر قليلا,وانا أعرف انى لن اتأخر قليلا



بل كثيرا
كثيرا جدااااااااا

Monday, September 29, 2008

بيقولك الشعب الشموبونجى هو اللى طلع خاطف السياح عشان الشبكه معجبتوش وطلعت بايظه وكان مصمم ياخد القرد اللى بيتكلم فديه
ده من وحى اعلانات رمضان
اعلانات رمضان الفقيعه والحمله بتاعت السياحه ومحدش يضايق السياح ومحدش يتحرش بالسياح
غلطانين الصراحه ماهم مقالوش محدش يخطف السياح
بصرف النظر عن فكره الحمله الساذجه وانها مبتخاطبش اى حد تقريبا ولا هتسيب اى اثر انما هيه كتر فلوس وعشان يبقا اسمنا برضك عملنا اللى علينا و خلاص,الاعلانات برؤيه اعلاميه فاشل
ــــــــــــــــــــــــــــــــــــــــــ
كنت قريت من زمان على بلوج موش فاكره ان الحكومه بتتعامل معانا بمنطق "العصابه" يعنى العصابه لما بتسرق سريقه الاول لازم تلخمك ف اى حاجه جانبيه عشان تعرف تسلك الهبره الكبيره,وياريت بما ان ربنا فك الغمه الحمدلله والعادلى دفع ال6 مليون من مصروفه ملوش لازمه بقا تنفيذ الحكم بتاع ابراهيم عيسى
ـــــــــــــــــــــــــــــــــــــــــــ
شيخ الازهر بقا تتوالى مواقفه الزباله ف الموقفين مره طلع الراجل من المفسدين ف الارض ولازمن يتجلد وتقطع اوصاله ومعرفش المره دى طلع الخاطفين خارجين عن المله وكفار ومش هيوردو على جنه,اسكت بقا وارحمنا كفايه فضحتنا على طول مسحوب من لسانك وجايب لنفسك الكلام ليه,النبى ياشيخ تخليك ف كوزك لما نعوزك
"ربنا لا تؤاخذنا بما فعل السفهاء منا"

Friday, September 26, 2008

ابله كريمه

قالت ان عندها 52 سنه وهذه ولعمرى جرأه نادره خصوصا وان شكلها بالكتير يدى اواخر التلاتينات,قالت انها مبتخلفش وان العيب منها و قالت انها سابت جوزها 3 سنين واتجوزت واحد تانى وانه كان هيتجنن يوم فرحها وهيموت نفسه
قالت لما سيبته اتقدملى عرسان كتير اوى بس رجعتله عشان صعب عليا اصله بيحبنى اوى اوى ,ده حتى مسمينه مجنون كريمه
قالت حاجات كتير اوى اوى بس مقالتش ان جوزها متجوز وحده تانيه وعنده بنتين ف الجامعه
...

Sunday, July 27, 2008

فقط أريد ان اخبرك انى اعرف وانا اعيش كل لحظه معك,انها ستظل للأبد جزء من ذكرياتى الغاليه

Sunday, July 20, 2008

تابعت بشغف وانبهار اطلاق سراح "سمير القنطار" ورفاقه بحاول أوصل للاحساس الحريه بعد 30 سنه أسر!!
30 سنه
موش متخيله ازاى واحد قضى كل شبابه ف الأسر وخارج لسه مؤمن بالقضيه والوطن,وعايز يوهب بقيت عمره للجهاد,هو موش كفايه جهاد 30 سنه ولاايه؟هو مفيش حد غيرك بيجاهد
انا شايفه ان ايام القبض على الجماعات الاسلاميه لما كانو بيقولو "لما نطلع من هنا هندق الصليب" فى اشاره على انهم باعو الجهاد والقضيه وربنا كمان,ده كان بالنسبالى رد فعل منطقى
اللى موش منطقى خالص الصدمه بتاعت "ماعدت الا كى أعود لفسطين"فى كلمه قويه كتبها بنفسه,ياترى كتبها امتى؟؟؟
وهو بيحلم بالحريه على سبيل العبث والوهم ليس الا او على سبيل ان طول العمر تبلغ الاملو لالما عرف انه خارج؟
انا أضيع احلى 30 سنه من عمرى فى سبيل....
فى سبيل اى حاجه بصراحه انا موش شايفه حاجه اصلا تستاهل انها تتحط مكان النقط
ولو اضطريت انى اضيع 30 سنه من عمرى اعتقد بعد كده هقضى اللى باقى بعيد عنها عشان أقل واجب يعنى هبقا كرهتها واتعقدت منها
موش هخرج اشكر السيد حسن نصر الله انه وهبلى الحريه
"رجال اذا ارادو اراد اراد,واذا عاهدو الله صدقو الوعد"
ملحوظه مهمه:اى حد ناوى يعلق ويشتم ف حزب الله او نصر الله وان هو اللى جر لبنان للى هو فيه دلوقتى,ياريت يتنيل وميحرقش دمى ويشوف هو يطلع مين "وشو قدم لهذا البلد"

Monday, June 23, 2008

تدوينه لشخص واحد

انا مبسوطه اوى النهرده عشان كده رجعت اكتب تانى
الفتره اللى فاتت دى كانت صعبه اوى,واحداثها كتير اوى
بس النهرده مبسوطه اوى
مبسوطه عشان قابلتك تانى,ياه حاجه كنت مستبعده اوى انها تحصل ع الاقل دلوقتى
...........
انا موش عارفه اقولك ايه,انا عارفه انك عارف..عارف من غير ماأقول
عارف انى هسلم وارمى دنيتى ورا ضهرى واجرى على حضنك اول ماسمعتك من تانى بتقولى "الو"
بحبك,بحبك,بحبك اوى
معرفش الفتره اللى فاتت دى عدت عليا ازاى,عدت عشان عندى امل انك راجع
عدت وانا بتخيل هقولك ايه ساعتها,عدت وانا بفتكر اى حاجه تافهه عملناها مع بعض
حاجات كتير اوى فقدت قيمتها لما مشيت وحاجات كتير مبقتش اعملها اصلا
عارف انا مشيلتش رقمك من ع السيبد دايل ومع انى غيرت نمرتى اصلا بس كنت كتير اوى بيتهىءلى انى سامعه النغمه بتاعتك
كنت عايزه اعرف ايه اكتر اغنيه عجبتك ف شريط منير الجديد اللى كنت واعدنى اول يوم هينزل هتجيبلى السى دى
ومين هيكسب كأس اليورو,ونتراهن زى كل مره وانت اللى تكسب
وتشوف معايا الافلام الجديده ف السينما,عشان كل الافلام اللى دخلتها من غيرك طلعت وحشه اوى
و...وحاجات كتير اوى اوى
عارف انا كنت كل يوم بقرا برج الجدى ف حظك اليوم ولما بلاقى حاجه حلوه ببقا نفسى ابعتهالك ف مسدج زى زمان
وبفتح جوجل ايرث واجيب الشارع بتاعك وافضل سايباه كده
وافتح الفولدر اللى فيه صورنا واتفرج عليها
واقرا مسدجاتك اللى ع الموبايل
وأسمع مكالماتك اللى مسجلاها
والاقينى بلمس السلسه بتاعتك اللى مقلعتهاش من ساعه مالبستهالى عشان فيها ريحتك
واعمل سيرش على جوجل على الاميل بتاعك
وابص عليك من ورا البلوك واشوفك اون لاين ولا لآ وكاتب ايه ف النيكنيم
واعيط
واخد الدبدوب بتاعك ف حضنى واقوله "معقوله انا هونت عليه اوى كده"وانام ع المخده اللى بتاعتك
ولما رجعتنا
لقيتك بتعمل كل الطقوس دى بردو!!!
بس الصدمه اللى كانت فوق مستوى ادراكى "البلوج" انت اكيد وصلتله بنفس طريقتى,عملت سيرش على جوجل بالاميل بتاعى
انا اتصدمت لانك مكنتش تعرف يعنى ايه بلوج اساسا,وانا مجبتلكش سيرته نوهائى -اه لسه فيه حاجات انت متعرفهاش عنى,تخيل!!-
انا مبسوطه انك قريته ومش مبسوطه لانى مبحبش اسيح لنفسى ف موضوع البلوج ده خالص
افرض اتضايقت منك انا دلوقتى,افضض بالكلمتين فين؟
بس شوفت ازاى انت طبيت على فجاءه لقيت كله ف السليم ازاى,شارع بيتكو ..هناك حيت تركت قبسا من روحى
ومريام فارس..اللى انت خلاص اقنعتنى انها شبههى
واغنيه محمد محى..اللى كنا بسمعها مع بعض ف العربيه
حتى روايه خيرى شلبى..اللى خدتها منك اخر مره قابلتك فيها
واهداء خاص ليك تحتها مع انى عارفه ان عمرك ماهتشوفه
ميرسى على انك رجعتلى وخلتنى ارجع فرحانه عشان بقا فيه حاجه حلوه ف حياتى وميرسى للسى دى بتاع منير..اللى كنت حالفه انى موش هشتريه و هفضل طول عمرى مستنياه منك
اه نسيت اقولك حاجه,العد التنازلى اللى محطوط ف اول الصفحه كان علشان الموضوع اياه اللى انت قولتلى انى نفضت وولا اهتميت ,عشان تصدق انى كنت خايفه عليك اكتر منك
بحبــــــــــــــــــــــــــــــــــــــــــــــــــــــــــــــــــــــــــــــك

Wednesday, April 23, 2008

انا والكتاب وقفاك

ان يتم اعتقال اسراء عبد الفتاح وسحلها ورا الشمس ومحدش عارفلها مكان
عادى...وحده بتحرض الجماهير ضد النظام,وصلت بيها الجرأه انها تعمل جرووووووووووب ع الفيس بوك وال ايه تدعو للاضراب,اللى هو حاجه عيب اوى يعنى
ان يتم اعتقال اهالى المحله كلهم
عادى...يستاهلو اللى بيحصلهم وزياده,كل يوم اضراب اضراب واحنا ناس موش فاضيين للكلام ده,احنا محتاجين هدوء عشان نركز.مصر بتتقدم بينا ياجماعه
ان يتم القبض على محمد الشرقاوى واغلاق دار النشر المملوكه له
عادى...ده راجل اصبح من معتادى الشغب وبصراحه كده دمه تقيل على قلب النظام
اللى بجد موش فاهماه بقا ان تقوم الداخليه بمصادره "عشان متنضربش على قفاك"
الكتاب-لمن لايعلم- عباره عن تعريف بحقوق المواطن من خلال الدستور وقانون العقوبات,حقوقه ف القسم والشارع وحالات التفتيش والقبض عليه
فيها حاجه دى لاسمح الله؟
يزعل الحكومه ف حاجه انى اكون عارفه حقوقى,اللى ف اوروبا والدول المتقدمه اول ما حد يقوفنى ف الشارع بيقولى حقوقى قبل مايطلب منى هو عايز ايه
لأول وهله تصورت -من عنوان الكتاب- انه بيتكلم عن التعذيب ف الاقسام والسجون,ساعتها كان ممكن افهم اتصادر ليه,لكن الكتاب متعرضش للموضع ده خالص
بيتهىءلى أغبى حاجه ف الكتاب ده اسمه,كأن من الطبيعى انى اتضرب على قفايا,وتطلع دعاوى تطالب بأننا "موش عايز حد يضربنا على قفانا"
لو الراجل قال حاجه غلط ياريت يفهمونا ويردو يقولو لا الماده دى غلط والجزء ده موش من حقك,بس العلميه تجى قفش كده
الا لو كان-لاسمح الله بردو- الدستور وقانون العقوبات دول بقا فيهم حاجه ابيحه ميصحش المواطن يتطلع عليها
عشان كده,عزيز ى المواطن \عزيزتى المواطنه
يسرنى من خلال موقعى هذا محاوله منا ان مفيش حد ينضرب على افاه -حرصا على قفا جميع الاخوه المواطنين فهو جزء غالى من كرامته وكرامه الوطن بالطبع- اقدم لكم
و يمكنكم ايضا قراءته من على موقع التعذيب فى مصر

Thursday, April 17, 2008

ولحين ميسره...صبرا ياسكره

"أكتر حاجه تحز ف نفسيه الراجل لما يعرف ان نصه التحتانى اتضرب"
خالده الذكر "وفاء عامر"
-طب وياترى ايه اكتر حاجه تحز ف نفسيه الست؟
-انها تعرف ان نص الراجل التحتانى اتضرب

Saturday, April 05, 2008

Wednesday, April 02, 2008

النصب باسم التدوين

وصلنى الاميل ده عن طريق الفيس بوك من واحد اسمه ايمن صلاح
"ستة مدونين مبدعيين 3 ايام تدريب عملى علشان تبقى مدون مشهور انضم الى الأف المدونين فى العالم و عبر عن ارائك و افكارك و احلامك بحرية كاملة للعالم كلة و مش بس كلام لأ ده صوت و صورة وفيديو كمان مش كده وبس كمان حتعرف ازى تسوق المدونة بتاعتك و تطلع منها فلوس بس ابعتلنا على bloggingcoursecairo@gmail.com و احجز مكانك
كل الكلام ده ب300 جنيه ولو انت طالب يبقى 200 جنيه لو خريج كلية اعلام حتاخد 10% خصم يعنى مفيش احسن من كده و كمان فيه مسابقة لأحسن مدونة و فيه جايزة لطيفة كمان الكورس حيبقى من3-5 ابريل 2008 فى كلية اعلام جامعة القاهرة"
نفسى اعرف مين هما ال6 مدونين ال... مبدعين دول؟عشان انا مخمنه كام اسم ف دماغى كده وعلى الله يطلع سوء ظن منى

Tuesday, March 25, 2008

طعم البيوت..حصريا


سيمبلات مبشره "نسبيا" بالخير,ربما سيكون احسن من اخر 3 او 4 شرايط لمنير

مفيش ريحه اغانيه القديمه ولكنه ليس بسوء "احمر شفايف" او "امبارح كان عمرى20"

والحمدلله مفيش اغنيه فى رداءه ولاشعبيه "لما النسيم"

مبشر بالخير موش بس ف الالبوم ده ,بالنسبه للمود العام ف الشغل اللى جاى بعد كده

"طعم البيوت" الهيد كلماتها معبره اوى بس التوزيع معجبنيش خالص,"تحت الياسمينه" عجبتنى اوى

"وداد" اللى معرفش ده اسم الاغنيه فعلا وده ايه..من غير كسوف....

حلوه بردو لا يعيبها الا انها من الاغانى المرشحه بقوه لتكون خليفه "لما النسيم"

و "رحيل" حلوه اوى

حتى الاغنيه النوبى -اللى غالبا مكنتش بسمعها ف الالبومات اللى قبل كده- ظريفه

الالبوم -كشأن البومات منير الاخيره- يغلب عليه الطابع العاتفى

طبعا انا عماله اقول كلام ولا ليه اى لازمه ولامعنى

لان-زى ماكلكو عارفين طبعا- اخر واحده ممكن تلعب دور الناقده الفزيعه,فنجيب م الاخر بقا ولينك التحميل اهوه..واسيبكو تستمتعو ب"بكاره" الاغانى,ايوه بكاره احساس حلو اوى لما تسمع حاجه لسه بكر,مستهلكتش وبقت شعبيه وكل مين هب ودب سمعها وفعص فيها
ملحوظه اخيره قبل التحميل:دى طبعا موش اغانى كامله دى مجرد سيمبلز للشريط
شكر جامد جدا جدا جدااااااااااااا ل"محمد ياسر" حدوته مصريه,الشهير ايضا ب"كبير البصاصين" على اللينك

Friday, March 21, 2008

كل سنه وانت طيبه ياماما

بهذه المناسبه ياماما احب اعتذرلك عشان موش هجيبلك طقم الحلل اللى انتى عايزه وبتتفرجى ع الاعلان بتاعه ف قناه معرفش ايه العقيمه دى,الطقم ابو 300 جنيه ده.عشان انا معيش 300 جنيه
واحب اقولك كمان انى اكتشتفت مدى سفالتى لما بتسألنى عن اى اوبشن ف الموبايل انتى موش فاهمه واقولك"يوووووووه هو احنا لازم نقول الحاجه 100 مره" او ما بتقوليلى "موش هتعلمينى الكمبيوتر بقا"فأرد عليكى واقولك"لا انتى مخك تخين"
امبارح بس افتكرت لما كنتى بتعملينى اكتب حرف الصاد زى البيضه ووالضاد زيها بس عليها نقطه..والهمزات ف(ؤ)اد,مس(ئ)وليه..وان 6*7=42
وامتى الساعه تبقى وتلت وامتى تبقا الا تلت..وامتى تبقا ونص الا خمسه
و امتى تبقى (A) Fish ,و امتى تبقى (An) Apple
واكتب ع السطر والكلام مينزلش يشرب م البحر
علمتينى كل ده بسرعه وطلعت بحب القرايه
مع ان اكيد ساعتها كنت غبيه وكان مخى تخين...

Wednesday, March 19, 2008

سكر يا بنات


فيلم يستحق المشاهده,قبل ماأشوفه كنت عارفه انه هيعجبنى موش بس كده هيكون من افلامى المفضله لانى بعشق الافلام الFemimist
اللى ابطالها بنات,وموش اى بنات.موش البنات بتوع بابى ومامى اللى عندهم عربيات وبيدمنو ويتجوزا عرفى,ولا بنات العشوائيات اللى بيشتغلو ف الدعاره وبردو بيشمو و يتجوزا عرفى
لا بنات الطبقه المتوسطه,اللى شبهنا كده
افلام ك"بنات وسط البلد,احلى الاوقات,شقه مصر الجديده,قص ولزق"
جو الفيلم العام حسيته شبهه بنات وسط البلد فعلا يمكن لاستخدام كلمه "بنات" ف العنوان ونفس جو الكوافير
بردة بوستر الفيلم شبهه اوى بوستر "شقه مصر الجديده" الذى يذكرنى بلوحه "سلفادور دالى" فى نافذته الشهيره
ارائى النقديه لا يعتد بيها ابدا عشان كده موش هحاول خالص العب الدور ده
بس حسيت ان الفيلم فيه تخمه,اول فيلم ل"نادين لبكى" بقا فحطت فيه كل جهدها
علاقات مبتورة,مشاكل امرأه ف سن اليأس,فقدان عذريه,الخوف من العنوسه,علاقات مثليه,وليلى المجنونه المستوحاه من قصه امرأه حقيقه احبت ضابط فرنسى وأخفى اهلها رسائله عنها فاصبها هسهس يخليها تمشى ف الشوراع تلم اى ورقه مرميه على اعتبار انها جواب منه
كتير على فيلم واحد موش كده؟

حاجه اخيره لاحظتها ف الفيلم,حسيت ان العالم بتوع لبنان دول ناس ذوق اوى.يعنى مثلا اللى بيتخانق مع وحده بيقولها "لو سمحتى اسكتى اذا بتريدى" و لما حد بيطلب حاجه من حد"لو سمحت بعذبك تعالى لهون" و لما حد بيدى بقشيش لحد"اسفه بعرف انه مو مقامك بس اتفضلى هدا اليك"



ميرسى لمن أهدانى
C.D الفيلم

Saturday, March 15, 2008

ياريت كل السادة الأفاضل اللى بيألفو الافلام/المسلسلات يعرفو ان حكاية (حشر) أسامى لكتب مشهورة ف افلامهم دى بقت حكاية مملة اوى ورخمة ومبتضيفش لافلامهم اى قيمة ثقافيه خرافيه ولاحاجه
مثال:
فيلم "تيتو" والجملتين الحمضانين بتوع السيميائى
فيلم"واحد من الناس" والبؤين بتوع مائه عام من العزله والواقعيه الخياليه
انه لاشىء الا انتقاص من قدر العمل الأصلى وجعله متاح للعامه أكتر من اللازم
اه....اخص بالذكر الاخوه اللى بيقتبسو عن رباعيات جاهين ف افلامهم التافهه,باستثناء أول مره اتعملت الحكايه دى فى فيلم "ديل السمكة" لأن الفيلم حلو ويحكى عن شاعر ويحتمل اقحام الرباعيات المنتقاه لتناسب السياق

Wednesday, March 12, 2008

لا أنام


طول عمرك بتضايقى اوى لما حد يقولك انك شبهه "فاتن حمامه",طيب ليه حسيتى انها شبهك جدا ف "لا أنام

Saturday, March 08, 2008

لخبطه

بفتح البلوج النهرده,سمعت صوت غريب
سمعت الأغنيه اللى انتو ساميعنها دلوقتى دى
بصيت يمكن اكون فاتحه اى ملف صوتى تانى ولا مشغله أغنيه ملقتش,فتحت البلوج وقفلته بردو نفس الأغنيه
طب أمرى لله اسمعها وخلاص أشوف عايزه تقول ايه؟
لقيتها أغنيه لمحمود العسيلى واضح انها لخبطه من سايت الاغانى اللى انا جايبه الاغنيه من عليه
دى لحد امبارح كانت اغنيه وجيه عزيز"ساعات المطر"
المهم سمعت الأغنيه لاخرها ودخلت ع الSetting بتاعت البلوج عشان اغيرها
الاقى فيه error عمال يتكرر والاغنيه مبتتشالش
!!!!
انا اؤمن بالعلامات-كأى حد بيحب السيميائى لباولو كويلو- تفتكرو دى ممكن تكون علامه؟
أنا كنت لسه بكلمها وقالتلى لو اللى اختارتيه صح يبقى ربنا هيأكدلك اختيارك ده
؟؟
؟

Sunday, March 02, 2008

سؤال كونى اخر

لماذا لا يخضع الحب لنظرية الأوانى المستطرقة
؟؟

Wednesday, February 20, 2008

مدى الحياة..والخل الوفى

مدى الحياه ده برنامج بيجى ع الام بى سى,فكرته تعتمد زى برامج كتير على نفس القناه دى ع المراهنه للحصول على مبلغ كبير ف الاخر
لايعتمد الا ع الحظ وشريك معاك بياخد قرار انك تتوقف عند مبلغ معين
الشريك ده طبعا لازم تكون بتثق فيه جدا جدااااااااا موش مجرد ثقه ف قراره لا بتثق فيه شخصيا وانه مخلص ليك على طول الخط وان استحاله استحاله فيه اى نسبه "غيره" من ناحيه,لان مجرد الفكره دى هتبوظ الليله كلها
أكتر حاجه شدتنى ف فكره البرنامج كانت اختيار المتسابق للشريك اللى معاه
اللى جاب مراته واللى جاب اخوه والاكتر اللى جاب معاه حد صاحبه
موش ده بردو بتعارض مع "الخل الوفى" اللى اعتبر من قديم الازل من المستحيلات التلاته؟
بيتهىءلى القرار الاصعب من التفكير ف الفلوس اللى هكسبها ف البرنامج ده هيبقى اخد مين معايا ويبقى "الخل الوفى"
هو الناس كلها وحشه ولا انا اللى بقيت مبثقش ف حد فبقيت وحشه؟

Monday, February 11, 2008

Tuesday, January 08, 2008

تقمص

تقمصتنى فى تلك الليله روح "سهر","سهر الليالى" كما كانت يسرا تطلق على نفسها ف "دانتيلا"
عرفت احساس الست لما تقول لجوزها
"لا ياحبيبى انت هتقعد تطفح الأكل ده كله وبعدين تشرب الازازه دى,وتدخل تخمد ف الأوده دى
ده انا مولعالك شمعه,ايه موش عجباك الشمعه"

Sunday, January 06, 2008

الأهلى طلع م الكاس
نياهاهاهاهاهاهاااااا
*شيلت الكومنتس ع البوست,طبعا هو انا هبله عشان اسيبها

Friday, January 04, 2008

فاصل كوميدى


سعى رئيس الوزراء الإسرائيلي إيهود أولمرت لتحسين العلاقات مع مصر، حيث أشاد بالرئيس مبارك، مشيراً إلى أنّه يصلي
يومياً من أجله.
وقال أولمرت، في مقابلة مع صحيفة "جيروزاليم بوست"، "عندما أفكر في ما يمكن أن تكون الأمور لو أننا نتعامل مع أشخاص غير مبارك،
أصلي يومياً من أجل سعادته وصحته"-وذلك حسبما ذكرت صحيفة السفير اللبنانية.