Friday, November 07, 2008

عن الست ام شخصيه قويه واشياء اخرى نتحدث

قريت عند برايد ف "بيت العرايس والعرسان" قصه البنت ام شخصيه "كويه" اللى متقدملهاش عرسان نهائى خايفين من قوه شخصيتها,الوضع رغم انه مهين انسانيا اوى وجارح بس منطقى وحده شخصيه قويه=العرسان بتهرب منها
عايز تشوف اللى موش منطقى بقا تعالالى تعالى وانا احكيلك عليه,مبدئيا كده انا عارفه انى هكتب بوست مقندل وملخبط وهنط من حاجه ل100 حاجه عشان دماغى ملخبطه وانا شخصيا موش عارفه هقول ايه
كفرشه ومقدمه للكلام هحكيلكو حكايه من حكاياتى اللى افتكرتها لما قريت القصه بتاعت البنت ام شخصيه كويه
لايخفى عليكم انى والحمدلله اتخطبت مؤخرا بعد قصه حب طويييييييييييييله,قبل مااتخطب كان فيه بيننا-بينى وبين خطيبى يعنى قبل مايبقا خطيبى طبعا- قطيعه للعلاقات وسحب للسفير وبلاوى زرقه ترتب على اثرها الانفصال-اه الايام الغبره اللى كنت بجى اقعد اسح بيها ف المدونه هنا دى,طبعا ملحقتوش تنسو- المهم كل واحد مننا راح لحاله فأنا قولت ايه بقا بدل البكا ع الاطلال اللى مننهوش فايده ده الواحد بشوف مصلحته احسن والزمن بيجرى يابنتى والقطر بيفوت ومقلقوش بقا الون ع الودان امر م السحر
وكأن امى جاهزه بالعريس-معرفش كانت عاينه ف انهى داهيه ده ومصدقت طلعته- وقالتلى جربى,انتى عمرك سمعتى كلامى ومكسبتيش,الصراحه الصراحه يعنى انا اصلا عمرى ماسمعت كلامها وكسبت ف اى حاجه ولا حتى ف سحب بسكوت الشمعدان,فعشان كده توكلت على الله ودخلت بقلب جامد مع انه لايلدغ المؤمن من جحر مرتين بس هنعمل ايه بقا ساعه القدر يعمى البصر
المهم بدون الخوض كتير ف التفاصيل -دى اعراض ناس بردو- طبعا الموضوع فشل فشل ذريع
وانتو عارفين بقا القيل والقال والكلام اللى بيتقال بعد مالمواضيع دى بتتفركش -بتبقا حاجه مسليه جدا على فكره- ده ابن امه وعيل وملوش كلمه,على اعتبار ان محدش ياعينى كان واخد باله خاااااااااالص قبل كده وفجاءه كل شىء انكشفن وبان
من ضمن الكلام اللى اتقال ساعتها ايه بقا ياولاد ان انا -ال ايه- شخصيتى قويه,دى طلعت عيب اوى اوى على فكره
ولجل حظه السعيد الكلام ده متقاليش انا انما اتقال لاهلى -اللى معرفوش يربو بنتهم وطلعوها بت شخصيتها قويه- وطبعا اهلى ساعتها ولاجابولى سيره بالكلام ده لما اتقال ف ساعتها ف سبيل ان الجوازه تمشى,العجيب بقا ايه ان وهما بيبلغونى فيه ف كلامهم تلميحات انى فعلا غلطانه وانى مكنش لازم ابينله كده
!!!
ساعتها بردو افتكرت حلقه لعمرو اديب كن بيحكى فيها لعزت ابو عوف عن واحد صاحبه راح اتقدم لعروسه وبعد مارجع بيسأله ها عملت ايه؟ قاله لا مينفعش لقيت شخصيتها قويه
عزت رد عليه اتوماتيك وقاله يبقا دى مشكلته هو موش مشكلتها هيه
بردو الوضع ده طبيعى واحد لقى واحده شخصيتها موش هتناسبه فانسحب
اللى موش طبيعى بقا ان واحد يبقا عارف كل الكلام ده ويقاوح متفهمش بيجرب نفسه ولا ايه ولا لاقها لعبه جديده فشبط فيها
وبعدين هو انا يااهبل لو كنت زى مابتقول كده كنت سيبتك تعك العك اللى عكيته ده,بصراحه هو موش عشان انا مليش شخصيه نفضتلك خالص وسيبت اهلى هما اللى يتصرفو,لآ عشان الموضوع مكنش فارق معايا خالص
هو اللى كان حلو اوى انى عمرى ماسئلت على حاجه وعرفت ترد عليا فيها؟ ولا انك عمرك ماقريت كتاب م اللى انا قريتهم؟ ولا بتروح حفلات؟ ولاتعرف يعنى ايه ساقيه الصاوى؟ولا عمرك حضرت ماتش ف الاستاد
و لاحتى روحت دريم بارك
انا دلوقتى عمر ماخطيبى حسسنى انى ست مستقويه ولا اى حاجه م الكلام الاهبل ده لان كون شخصيتى قويه يبقا دى ميزه موش عيب ومعنى كده ان موش كلمه تودينى وكلمه تجيبنى ومش سهل ابقا شخشيخه فايد حد ولا حتى ف ايده هو,هو حابب ان شريكه حياته تبقا كده وبيتعامل معايا الند بالند,ولا عمره اتدخل ف لبسى ولا انى اشتغل ولا اقعد ف البيت ولا علاقتى بصحابى ولااهلى ولاحتى اهله
وحتى لما اكتشف البلوج بالصدفه كانت تعليقاته ليا مشجعه
بل بالعكس انا فيه حاجات كتير مكنش عندى الجرأه انى اعملها لوحدى بقيت دلوقتى بعملها معاه
ولا عمره بصلى بصه موش اللى هيه ولا الماوس لعب ف عبه
وانا ولاعمرى حسيت انه راجل مستبد ولا ملوش شخصيه ولا اى حاجه من الهسهس ده,شخصيات سويه فاهمه بعض كويس وبتتعامل مع بعض ومعندهاش كلاكيع ولا ازدواجيات
نسيب المواضيع الشخصيه دى بقا ونتكلم ف العموم,الرجاله عموما عمرهم مابيعترفو ان هما غلطانين سيبك من اخوكى اللى بيرمى هدومه ع السرير وانتى تشيلها وجوزك اللى بتخانق ويتعصب على ع الفاضيه والمليانه على اعتبار انك ست ومهما حصل انتى اللى هتطلعى غلطانه على طول الخط
لا انا بتكلم على قضايا عامه زى مثلا موضوع التحرش,انا كعادتى مبحبش اتكلم على حاجه ف البلوج ف وقت الهوجه ومبحبش اهتف مع الهتيفه ,الفتره اللى فاتت كان فيه شبهه عرف اجبارى على كل المدونين انهم يكتبو موضوع تعبير قصدى بوست عن التحرش,لدرجه انك استحاله تفتكر مين كتب ايه...انا قولت الهوجه تخلص بعدين هبقا ادلى بدلوى,احنا كنا بنقول ايه.اه التحرش من وجه نظر الراجل بيطبق نفس المنطق البسيط اللى ماشى بيه ف حياته الشخصيه على اى قضيه عامه يكون فيه الطرف الاخر ست,يعنى يامزه لازم هتطلعى غلطانه على طول الخط
لبسك موش عارف,حركاتك ابصر ايه,راجعه متأخر اى كلام.المستفز بقا ان كتير اوى حسو انهن متهمات وسابو القضيه الاساسيه وفضلو يدافعو عن انفسهم وطبعا الجدل المفرغ ده المطلوب
مع ان الامر بغض البصر فرض قبل الامر بالحجاب,و لاان كونى ماشيه سافره -على حد قولهم- موش مبرر لانتهاك جسدى بل هو مبرر ليك عشان تحترم نفسك اكتر وتبتث وقت الشدائد.موش انت عاوز تدجل الجنه,هو دخول الجنه سهل ياراجل؟
الست مشكله الراجل الازليه موش لاقيلها حل قام ربنا فتح على بعض الوهابين السلفين انهم يلبسوها خيمه سوووووووده بعين واحده ويقولها اعترضى بقا على امره,اللى هو امر الهى وماهو الا -ياحبه عين امه- اداه بينفذ اوامر مفروضه من فوق سبع سموات
!!!
ستات كتير اوى كرهو الاسلام-وان كن لم يجهرن بهذا- عشان طريقه تعامل الاسلام-اللى هو اساسا لااسلام ولايحزنون- مع المراه,الست حست ان الاسلام سبب وكسها وانه مبيديهاش اى حقوق تذكر مهو اى قمع بيحصلها بيتقال عليها اسلام
ده ياحاجه انتى وهيه اسمه تخلف,ايوه تخلف جاى من بلاد كانت الست فيها مطيه لاحقوق لها ف حين كان الستات عندنا بيشتغلو ويروحو الجامعه ويمشو ف الشارع بحريتهم,وهو ده السبب فى التخلف العربى اللى احنا فيه دلوقتى ان بدل مالاعلى ثقافه ينتقل لبلاد الجهل اللى حصل العكس الجهل هو اللى جالنا باسدلاته ونقاباته وحجابته على البناطيل الجينز
ازاى وامتى بقينا كده,نسخ مشوهه لفكر ماانزل الله به من سلطان؟!!
ايه روحنا الخليج نشتغل ونجيب ريالات ونفتح مدارس ومستشفيات رجعنا تائبات الى الله؟!!
الست اللى حررتنا دى ووقفت ف ميدان التحرير -من هنا جاء سبب تسميه الميدان على فكره- وقلعت الحجاب محدش قال عليها سافله فاجره وانما اتقال عليها محرره المرأه بس انا نسيت اسمها دلوقتى ياولاد,المهم ان التاريخ بيذكرها بكل خير,انا بيتهىءلى ان الكلام ده لو حصل دلوقتى كان بقا مهدور دمها على طول
تحرير المرأه موش قلع حجاب لاقلع الافكار اللى اتكلمنا عليها فوق ممثله فى الحجاب
فيه ايه هو احنا نتقدم ولا بنرجع لعصور الظلام؟
لما عملو مساواه ف امريكا كلنا شوفنا انه موش بس كلام,لكن احنا عندنا المساواه فشنك,المجلس الاعلى لحقوق المرأه وقانونين الاسره والخلع
كل ده يفيد بايه واحنا لسه بنبص للست على انها حته لحمه موش انسانه زيها زيك حدث ان ولدت انثى وانت ولدت دكر
جزء كبير من التصرفات العنصريه دى بيقع وزه على المراه ف حد ذاتها اللى حاسه بينها وبين نفسها انها فعلا كائن أدنى,لما بتتعرض لاى قمع او تفرقه او تحرش مبتتكلمش لانها عارفه السبب انها تحمل وصمه كونها انثى
وقاعده حاطه ايدها على خدها مستنيه حد يجي يجيبلها حقها,لا ياماما الحقوق لاتوهب ولكنها تنتزع انتزاعا
مشكله المرأه قبل ماتكون مع اى حد فهى مع نفسها
نرجع للراجل,لحد امتى هيفضل يلوى عنق الاسلام الى مافيه مصلحته هو وف اول موقف هيتعارض الاسلام مع مصلحته هيلوى عنقه ويطوعه ليحقق اهدافه هو بردو
الاسلام بيتطبق ع الواقع وليس الواقع بيدور على اسلام يكسبه شرعيته وده اللى احنا بنعمله.كل حاجه تفضل على حالها وندورلها على اسلام تفصيل محاولين لى عنق الايات وتطويعيها لاغراض ماانزل الله بها من سلطان
وسيله قذره ورخيصه جدا
انا شكلى همشى مع العالم بتوع ليلى دول-بس نفسى افهم هما عايزين ايه الاول-,عشان بجد دى بقت حاجه لا تطاق

22 comments:

Lasto-adri *Blue* said...

هدى شعراوى
:) :)))

SaSo said...

اسم الله عليكى
لحقيتنى
بس انتى لحقتى تردى امتى ده انا لسه بكتب اصلا:)))

متخيلتش النجده تجى فوريه كده
عموما منوره بجد

عـلا - من غـزة said...

هههههههه

ده انتي دخلتي موضوع التحرش بحملة ليلى بنقطة الست الكوية .. لغاية ما البوست بقى سلطة خالص :p

شوفي هو كلامك جميل جمال ملوش مثال .. لدرجة مش عارفة على ايش اعلق الاول

يعني في موضوع الشخصية القوية .. انتي رأيك ان فيه رجال عندهم مخ بيفهم .. وممكن عادي جدا يتقبل الارتباط لببنت شخصيتها قوية بردو

عال .. اوحييكي بشدة

في موضوع التحرش .. حسيتك جايبة الحق على ليلى لأنها بتسكت على حقها

اعتقد ان بعد قضية نهى رشدي الستات هايكون عندهم جرأة اكتر في هادا المجال .. لسه حالا قرأت عند نوارة ان فيه قضية جديدة على وشك الظهور

كفاية رغي .. انا حاسة ان التعليق كمان شوية وهيصير بوست لوحده :p

مبروك على الخطوبة :)

هانى رزق عبد الدايم said...

انا هقول انى متفق معاكى انى غض البصر واحب لكنى لما تكون واحدة او اتنين مش مليون مستهترة ماشية فى الشارع دا واولا ثانيا فى سورة فى القران يعنى لو تعرفوها اسمها سورة النور لو قرايتها انتى وكل واحدة هتعرفى الدنيا الاسلامى ازاى بيحافظ على المراءة جدا
وبعدين دا حتى المسيحين اللى هما المسحين لما رسموا السيدة مريم رسموها محجبة لااله الا الله ودول مسيحين ثالثا هى العملية مش ناقصى انى لما اتجوز اتجوز رجل زاى ويكون ليا الند بالند فى الراى مع الاحترام انى ممكن يكون رايها صح بس مش عادة وطقس شرقى لكن هى دى مكتسبات طويلة من ايام سيدنا ادام وبعدين تانى فى قضية التحرش حتى الانسة اللى انتم استشهدتوا بالقضيه بتاعتها
طلعت يهودية من اسرائيل ودا على لسان المحامية بتعتها اللى انقلبت ضدها واثبت انها ليها كام واقعة زاى دى فى فرنسا وانها واخدها عملية ابتزاز وبعدين انا هو كما كان فى حديث وان كنت مش متزكرة او انى مش متاكد من صحتها انما كان بيقول ان اكثر اهل النار هم من النساء على العموم انا لية داوش نفسى بالرد ما نا كنت مريح نفسى من كل الهرش دا عموما حاول تفكير انتى بنظرة عامة اكتر وبلاش نبرة التلسط وبعدين اية يعنى ساقية الصاوى مالها يعنى اللى مش من القاهرة ومرحش الساقية يبقة مش مثقف

ragel keber said...

على فكرة لما يكون فيه حب واحترام وعقلية متفتحة وتكافؤ بين الاثنين الدنيا بتبقى حلوة وناعمة والست بشخصيتها الواعية بتفهم الراجل ومتدخلش معاه في تحديات ملهاش لازمة لان فيه حاجات اجمل واهم بكتير في الحياة ، اما عن التحرش فالمعقول في الملابس مقبول ، اما عن تسلط الرجال وتطويعهم للدين فأنا معاكي على طول

محمد ياسر said...

كل ده كتابة ايه يا بنتي ده
طبعا بعد كل اللى قريته ده لازم ارد ولو رد باني قريت بس :)

بوست حلو

SaSo said...

علا
"البوست بقى سلطة خالص :p"
انا اول ماخلصته قولت كده بردو

انا موش جايبه الحق على ليلى ف موضوع التحرش,انا جايبه عليها الحق ف كونها موش مقتنعه ان ليها حقوق ف حاجات كتير اصلا

" لسه حالا قرأت عند نوارة ان فيه قضية جديدة على وشك الظهور "
فيه قواضى كتير كانت على وشك الظهور والحمدلله تم الطرمخه عليها وفيه بنات كتير الجلاله خدتهم وحبو يعملو زيها ويعملو محاضر وبلاغات بس اتبهدلو ف الاقسام لولا وسط نهى وشغلها وعلاقتها بالاعلام كانت حصلتهم


"كفاية رغي .. انا حاسة ان التعليق كمان شوية وهيصير بوست لوحده "
لابراحتك انا بردو البوست ده كان المفروض يبقا تعليق على البوست اللى انا حطاله هايبر لينك ف بيت العرايس بي لقيت الكلام هيبقى كتير قولت اكتبه عندى
وميرسى اوى والله يبارك فيكى


هانى رزق عبد الدايم
مبدأيا كلامك كله عك,وواضح كمان انك من نوعيه الرجاله اللى انا كاتبه البوست عشانهم اصلا
اللى انا مبقتش طايقاهم اساسا

مليون مستهتره يبقا مليوم متحرش كده الحسبه تبقا مظبوطه وطريقه فعاله فعلا اننا نعلم المليون دول الادب
وبعدين نبقا ننقل على مليون تانين بعدهم...وهكذا دواليب دواليب

وسوه النور اللى انت بتقول عليها اكيد قريتها ومكنتش مستنياك تيجى تلفت نظرى ليها ومقلتش فيها الحجاب بتاعنا ده,اظن يعنى ابسط الامر لو كان الحجاب بالاهميه دى كان اتأمر بيه صراحه ف القران زى "واقيمو الصلاه وأتو الزكاه" واساسا الحجاب بقا اهم كتير من الصلاه و الزكاه ف الايام دى فلو هو فعلا بالاهميه دى مكنش ربنا هيسيبنا نخمن ونحتار كان هيأمر بالحجاب وخلصنا

"وبعدين دا حتى المسيحين اللى هما المسحين لما رسموا السيدة مريم رسموها محجبة "
اه وماقبل الاسلام كانن فيه حجاب بردو,موش فاهمه ايه علاقه كلامك ده باى حاجه ف اى حاجه


"انى ممكن يكون رايها صح بس مش عادة وطقس شرقى لكن هى دى مكتسبات طويلة من ايام سيدنا ادام "
مفهوم مفهوم طبعا.انا وجدنا اباءنا يفعلون

"فى قضية التحرش حتى الانسة اللى انتم استشهدتوا بالقضيه بتاعتها
طلعت يهودية من اسرائيل"
حتى لو طلعت نازيه هندوسيه ده ميخليش جسمها ملوش حرمه,ولا ايه؟


"وبعدين انا هو كما كان فى حديث وان كنت مش متزكرة او انى مش متاكد من صحتها انما كان بيقول ان اكثر اهل النار هم من النساء"

والمطلوب؟


"وبعدين اية يعنى ساقية الصاوى مالها يعنى اللى مش من القاهرة ومرحش الساقية يبقة مش مثقف"
لا سيادتك موش شرط يبقا موش مثقف هو ممكن يبقا بقف

وحاول تحسن مستواك ف الاملا شويه كلامك مليان غلطات ميغلطش فيها عيل ف اعداديه

راجل كبير
بصرف النظر عن اسمك المستفز يعنى وكونك ملقتش ف نفسك صفه توصف نفسك بيها غير انك راجل وكبير كمان,الواحد موش ناقص يخبط ف حد تانى كفايه الاخ اللى فوقك
المهم واضح ان مفيش اختلاف ف وجه النظر

محمد ياسر
طبعا من غير ماتتكلم على عارفه رايك ف القصص الفاشله دى ايه
ونورت الشويه الصغيرين دول

هانى رزق عبد الدايم said...

مبدأيا كلامك كله عك,وواضح كمان انك من نوعيه الرجاله اللى انا كاتبه البوست عشانهم اصلا
اللى انا مبقتش طايقاهم اساسا انا معاكى انى كلامى ملبخط بس دا مش معنه انى متسلط وانما بحاول اشوف راى من وجهت نظرى وبعدين الكره متبااادل لانى اتقتلت كتير اوى
مليون مستهتره يبقا مليوم متحرش كده الحسبه تبقا مظبوطه وطريقه فعاله فعلا اننا نعلم المليون دول الادب
بالنسبة للنقطة دى هو صح انه مليون مستفزة المقابل مليون متحرش وعلشان زكرت المستهترات فى الاولى لانه لو التزموا بالزوق العا م على الاقل النسبة هتخف جدا ومنكريش انه هتختفى لان فى مرضى نفسين كتير
وبعدين دا حتى المسيحين اللى هما المسحين لما رسموا السيدة مريم رسموها محجبة "
اه وماقبل الاسلام كانن فيه حجاب بردو,موش فاهمه ايه علاقه كلامك ده باى حاجه ف اى حاجه

انا استشهدت بالنقطة دى وكان المفروض اوضح اكتر انا عاوز اقول اية بس انا قصدت انى حتى المسيحين و الامم اللى قبل الاسلام كانوا محجبين وكانت نسبة التحرش لاتزكر فى التاريخ دا الا حالة بسيطة ودى تانى علشان فى مرضى نفسين وحاليل صعوبات الحياة
ممكن يكون رايها صح بس مش عادة وطقس شرقى لكن هى دى مكتسبات طويلة من ايام سيدنا ادام "
مفهوم مفهوم طبعا.انا وجدنا اباءنا يفعلون
معاكى انى اخترت اسلوب خطاء فى التعبير ولكن هقولك انى مش مسير وانما مخير وبعرف اختار طريقى ومش زاى السالف او زاى مقصدتى امم زمان انما انا قصدت وبالتحديد انه لازم يبقة فيه معرفة انه مهما كان الرجل رجل والمراءة مراءة ولان اول الخلق كان ادم وتالته حواء
وانا معاكى مش معنى كلامى انه حتى لو ماكانش لية دينة انه جسمها يكون مباح ولكنى اقصد انه اللى نشات على دينة تاينة زاى ما سمعت ودا لازم يكون لية رد الفعل دا وان كان كمان انا اقصد بالتحديد انها واخدها قضايا ابتزاز واستهلك للشهرة
وبعدين اية يعنى ساقية الصاوى مالها يعنى اللى مش من القاهرة ومرحش الساقية يبقة مش مثقف"
لا سيادتك موش شرط يبقا موش مثقف هو ممكن يبقا بقف
معاكى حق انه بيفهم وانا مقدرش احكم انك انتى كدا طبعا ودا ردى على السخرية
قصدة بيها انى شتى مجالات الحياة ثقافة وخصوصا مدرسة الحياة
وحاول تحسن مستواك ف الاملا شويه كلامك مليان غلطات ميغلطش فيها عيل ف اعداديه
فى دا انا متاكد انك معاكى الف حق ودا ميعبش منى فى حاجة لكنى على الاقل بحاول اتعلم لغة النبى لانى معرفهاش الا قريب ويكفينى فخررر انى قدرت اكتب كل دااااااا

SaSo said...

معلش بس حاول مع الاملا تتعلم طريقه تركيب الجمل بصوره صحيحه عشان موش فاهمه اى حاجه م الكلام الكتير اللى فوق
و شكرا

هانى رزق عبد الدايم said...

هههههههههههههههههههههههه
كدا مش زمبى انا لانى ولله الحمد بحاول تعلم العربية من فترة قصيرة وان كنتى مش فاهمة يبقة المشكلة عندى لانى مرتب ردودى على نقاط اللى انتى اتضمنتها فى الرد عليا

هانى رزق عبد الدايم said...

هههههههههههه انا برضوا اعرف حالة زاى كدا طلع ليه مخك ماتت فيه ربنا يسترررر عليكى

هانى رزق عبد الدايم said...

First, I am so sorry very very sorry, but because I already suffocating, and I feel under pressure, rigid Uwe sorry for my behavior both with you and indeed and I was lessons from the truth about my view, but I was talked about the way of deviant in expression of the pressure I which was imposed I foster the feelings of others and another time, I am sorry Leakey to either conduct already I feel very embarrassed by myself,please regret

هانى رزق عبد الدايم said...

You regret of both at and deviant with you and that it was unintentional me at all for myself from the pain and a severe crisis and the lack of full confidence in the other and I and I said I was still suffer, but what should I deal with others in this behaviour and that they accept me very for apology and remorse بس دا ميمنعش انى برضوا لسة متمسك بواجهت نظرى اوكية وفى نقطة كمان اننا المفروض الاختلاف وان وجد لابد انه يكون فى وجهات النظر وبس مش فى الشخصيات

الموجى said...

زمن الحب خلص من زمااااااااااااان
http://www.dmostafamahmoud.blogspot.com/

fluent said...

ميه ميه...

koko said...

مش اوى كده .. يمكن انتى بتحكى تجربه شخصية .. لكن الدنيا فيها من ده و من ده على اختلاف الاديان .. الى اقدر اقوله ان عندك حسن نيه .. بلاش تاخدى بالظاهر

AzaziilE said...

مافيش حاجة اسمها ست شخصيتها قويه في راجل شخصيته ضعيفة
ترونجة بنت لارنجة

ABDELRHMAN said...

كنت عاوز اتكلم على لسان البأف والاهبل وابن امه المسكين ده اللى بقى ملطشة يمكن حد يقدر وجهة نظره
اولا مش معنى انه حب خطيبته وضعف قدامها واستجاب لطلبهامرة ثم افاق بعد كده عائدا الى مبادئه التى تنازل عنها سهوا وضعفاوخوفا من فقد محبوبته السابقة طبعا بعد ما اصبحت الان من الد اعدائه رغم انه يا ولداه من يوم سابها عمره ما نطق كلمة وحشه فى حقها ولا سمح لحد بكده وما زال يكن لها كل الاحترام والتقدير مش معنى ان لحق نفسه انه ضعيف الشخصية او ابن امه اذ امه فى نهاية الامر تركت له حرية الاختيار تماما هو ممكن يكون متردد قليل الخبرة طيب لدرجة الهبل اول مرة يحب وكان معتز بالاحساس الجميل ده ومش عايز يضيعه من ايده مش معنى انه كان خريج كلية عملية سم منقوع وخرج منها (من الدار للنار) للشغل عدل وكانت كل حياته ارقام وحسابات من ما لم يتيح له انه يقرا كتير للكتاب المبدعين اللى عرفهم وحبهم على كبر عن طريق خطيبته من باب انه حب كل اللى هى بتحبه كان واحد بيتولد مخصوص عشان حد تانى ومش معنى انه ما كانش بيلاقى وقت يروح الحفلات فى ساقية الصاوى والاوبرا(واللى بقى يروحها حالياعلى حسب ما يتاح له من الوقت حتى اذا لم ينام ليلتها عشان يلحق شغله) انه جاهل وشنف وفلاح ممكن ناس تعيش حياتها من غير ما تشوف حاجات جميلة غصب عنهاوممكن واحد يكون ساكن قدام الستاد مدة اكتر من عشر سنين وعمره ما دخله عشان هو ما لوش فى الكورة طب يتبهدل ليه مع الجماهير ما يقعد فى بيته ويحترم نفسه وكفاية هو لما بيسمع صوت الهتاف الشتائمى بابشع الالفاظ وهو جوه بيته
وممكن واحد يكون عمره ما راح دريم بارك من باب ان ماجتش فرصة يروح يتمرجح هناك فى اوقات فراغه الشاسعة
وممكن واحد يبان انه ابن امه وعيل ومتردد وابن ستين كلب مجرد انه بس رجع للحق وداس على قلبه وضحى بحبه من باب ان الرجوع للحق فضيلة وهل الحجاب والعفة اصبح تخلف وراجعية وسلفية وهل لما واحدة من اى ديانة تلبس لبس اوفر من باب الحرية ويجى واحد صايع جاهل بلطجى من بتوع العشوائيات ويتحرش بها كما الحيوان وهو فعلا اقرب ما يكون للحيوان دى غلطة مين؟اعتقد غلطتهم هما الاتنين

SaSo said...

"ألد اعداءه"
ليه كده ده انا بحبك



عموما التغيير ده كويس,استمر
الحمدلله ان الواحد بيحس انه بيغير ف الناس اللى عرفهم


للأحسن

ABDELRHMAN said...

وانا كمان حبيتك وباحبك وهاحبك لغاية اخر يوم فى عمرى ومش حازعل منك مهما عملتى زى ما وعدتدك قبل كده لو تفتكرى
اى نعم باتغير واتغيرت من يوم ما عرفتك
باروح حفلات وباقرأ كتير خصوصا الكتاب اللى انا ضربت عليه عوافى منك
اه باستمتع بده كله يوم بس ده مش بيعوض حزنى اللى بيزيد كل يوم عشان سيبتك

أمير القلوب said...

عزيزت ي حينما يكون الكلام عن المرأة ذات الشخصية القوية فمن لايحترم شخصية الاخرين لا يحق له ان يطلب احترام الاخرين الشخصية القوية يجب ان تجد شخصية ذات نديه ولكن في كل الاحوال اذا كان الحب موجود تخلصنا من كل افكار الندية بل تكون الشخصية القوية اداة لحياة سوية وعيشة متلائمة
اما بالنسبه لتدخلك في حق الاسلام فليس لك االحق في هذا التدخل بتلك الصورة لست اعلم نوع ديانتك لكن الاسلام فرض للرجل حقوقة واثبت عليه التزاماته كما فرض للمرأة حقها وكانت عليها التزاماتها واذا كانت معرفة بالدين الاسلامي ضعيفة فارجو منك مراجعة سورة التوبة وتبر أة أشرف نساء الارض علي لسان رب الارض والسموات اما بالنسبة للسيدة التي لا تتذكرين اسمها وللكتب التي قرأتيها ارجو منك مراجعة بعض الاجزاء فيها
واسف للتدخل بدون سابق تعريف

arab girlscool said...

This is such a nice addition thanks!!!

شات صوتي
كول
عرب كول
شات مغربي
انحراف كام
شات عربي
عرب كول

غلا الروح
شات الغلا
غلا روحي
شات صوتي
شات الغلا
الغلا
شوق كام
شات صوتي شوق

شات صوتي
شات عذاب
عذاب كول
عذاب كام
شات كام
شوق كام
شات صوتي شوق
شات كول
شات صوتي