الخميس 12:00 بالليل
انا :عايزه اتفرج ع الجزيره
بابا:اشمعنى؟
(متستغربوش ف الوقت ده من السنه-قبل امتحانات الثانويه العامه بشهر تصبح الفرجه على التليفزيون بأذن مسبق ومفيش مفر غير انى اتفرج ع التليفزيون اللى ف اوده بابا مع انى مبحبش اشوف حاجه عنده ,هه يلا)
-هشوف "تحت المجهر"
-ليه؟
واخدين بالكو م التحقيق ده
-حلقه عن "المدونات"
-مين؟
-ناشطى الانترنت
-احنا موش قولنا مالناش دعوه بيهم
"دى بقى من ماما"
المهم تم المراد من رب العباد وخدت تصريح فرجه لمده ساعه
بعد ربع ساعه من الحلقه,
لاقيت بابا راشق فيها -هو على الرغم من معارضاته الظاهريه على اختيارتى الا انى متاكده انه يثق فيها-,ليسألنى السؤال اللى انا مستنياه -يعنى ايه "مدونه"
بعد ان سمع الكلمه تتردد كثيرا
ارد ف اقتضاب:موقع شخصى
يبصلى من تحت لتحت وانا ابتسم وانا اشاهد لقطات الفيديو او كل مايظهر علاء او اى من الوجوه المالوفه على الشاشه
يسأل تانى:هما سايبنهم عادى؟
لا والله ابويا راجل مثقف جدا بس خوااااااااااااااااااف
-ربنا يفك حبسهم
ييرمى سؤال اعرف مغزاه تمام:هو ممكن ان تتعرف شخصايتهم الحقيقه
-الموضوع موش سهل غير لو كانوا هما اللى عايزين يوروا نفسهم للناس
الحلقه خلصت,ابويا مازال منبهر باللى شافه ,اه ومش بعيد كمان تكون وجهه نظره اتغيرت وعرف ان لسه فيه رجاله ف البلد
يسألنى ف ملاوعه:وانتى المدونه بتاعتك اسمها ايه؟
ابتسم ف استعباط:يعنى ايه "مدونه"؟
21 comments:
(">) (">)
اوعي..اوعي تقوليلهم مدونتك اسمها إيه..
نصيحة من أخوكي الكبير..قولي لأمن الدوشة على مدونتك ومتقوليش لبابا أو ماما..بابا وماما رقابتهم بستين أمن دوشة!!
أنا قلتلهم وندمت!..بالمنايسبة مدونين كتار جدا ندموا قبل كده..اوعي تغلطي غلطتنا!
كلام يحيى سليم جدا
اوعي تقولي لأهلك على المدونة بتاعتك
اذا كان احنا لجأنا للمدونات عشان مش عارفين نقول حاجة في الواقع نقوم نخليهم يراقبونا تاني
لا يا ستي يفتح الله :)
ستعاد الحلقة الساعة 14:00 يوم السبت 27 مايو.
لالا انتوا اكيد بتهزروا
الغباء ميوصلش للدرجه دى بردو
بقى حد يعمل ف نفسه كده ياجماعه,طب ليه
ياستي أنا كان عندي أمل فابويا على اعتبار انه كان مناضل برضو لما كان قدي..
انما نقول إيه؟..يادوب اتجوز ودخل دنيا المتزوجون وخلاص..راح راح راح راح..
اسمعيها مني نصيحة..أبدا متعرفيش أهلك بمدونتك..جدو طبيعي هينحاز لولاده..إنما من جيلك وعايز مصلحتك يا بنتي ومنحاز ليكي..
مش أهلك واثقين فيكي؟
خلاص..شغال..إشطات..كله في اللذيذ!!
بابا خوااااف؟؟؟
خايف على مين؟؟؟
طبعا خايف على ثروته
هع ههع
عجبتني إجابتك الأخيرة:
يعني إيه مدونة..؟
;)
يا بنتي إنتي كده ميتخافش عليكي
أنا برضه كان أما يجى امتحاناتى أتلهى فى حاجه تانيه
انا ما شوفتش البرنامج
لكن سمعت عنه
المدنه سر الاسرار
تفتكرى لو عرفوا إيه اللى ممكن يحصل؟
الله عليك
ممتاز
هع هع انت جيت
ههههههه
طول عمرك ذكية و بتعرفى تطلعى منها يا ثروة
ده الواحد لو بايده يخفى عن اهله انه بيعرف ان فى حاجه اسمها الكمبيوتر اصلا
كانت الحياه بقت بمبى و الوان و من غير تايد للغسيل كمان
عموما ان هافتن عليكي وهاقوله على الواد انطونيو باندريس ( مش عارف أكتب إسمه ) والواد بتاع حفلة منير وكمان على اللي قاعد في قصره
هافضحك ياثروة
طب أفرض أفرض يعني
اكتشفوا المدونة بتاعتك بالصدفة
أو عصفورة شريرة فتنت عليكي
حيحصل إيه يعني ؟
والله يا امورة انتي كلامك حلو وفكرني بالبيت والأسرة واللئم .. وحشني جو الأسرة بجد مش عارف اكتب غير كلامي ده عشان ليا اخت زييك كده ... مش هاقول طبعا ازاي .. لكن اللي اعرف اكتبة هو شكري ليكي انك خلتيني اتخيل بيتنا للحظات صغيره هي عندي بالدنيا .. ممكن بقى اسرق منك كوباية الشاي اللي انتي عاملاها لنفسك .. من باب المشاكل يعني ؟؟
والله يا امورة انتي كلامك حلو وفكرني بالبيت والأسرة واللئم .. وحشني جو الأسرة بجد مش عارف اكتب غير كلامي ده عشان ليا اخت زييك كده ... مش هاقول طبعا ازاي .. لكن اللي اعرف اكتبة هو شكري ليكي انك خلتيني اتخيل بيتنا للحظات صغيره هي عندي بالدنيا .. ممكن بقى اسرق منك كوباية الشاي اللي انتي عاملاها لنفسك .. من باب المشاكل يعني ؟؟
مينفعش لا بابا ولا ماما ولا تيته او اى حد ليه سلطه من اى نوع يعرف او حتى يشم خبر عن المدونه
ده سر واكبر سر والا هتفد قيمتها و مصدقيتها كأعظم وسيله للفضفضه وهتضطر للنفاق او المواربه او على اقل تقدير تزويق الكلام,انا موش برضى ادى اللينك لأصحابى يمكن بعد كده احب اشتمهم ملاقيش حته اشتمهم فيها غير المدونه
كلكم بعتونى وعايزين تبلغوا عنى
بابا هيعرف هيلسوعنى بالنار -عشان هو قايلى مقولش كلام عيب- ويقفل البتاعه دى
وشوفوا هتعرفوا تعيشوا من غيرى ازاى
we 7ata law 2olty...u can always later on change the url without getting anything from the archives deleted ;)
bas that was really funny :D
i mean it really shows ezay mo3zam el beyoot el masrya ba2et 3amla
عايشة وخلاص..
دمك شربات وكتابتك رااااااائعة..
عجبتني لقطة إنك مش بتقولي لأصحابك عشان لو حبيتي تشتميهم يمكن متلاقيش غير المدونة
لووووول
ربنا يسعدك يارب :))
mesh u're 22... omal sanaweya 3amma eh ?
ana bardo mn fatra la2et 7'altee bet2olee eh 7war el modawnat di.. oltelha y3nee eh :D
Post a Comment