Friday, February 02, 2007

فى حمام السيدات




"يوزع البلاشر باستخدام فرشاه عريضه على عضمه الخد متجهه الى الخارج ولأعلى"
فى قمه الانسجام النفسى ممكسه بالفرشاه العريضه وعامله احط ف بلاشر,يقف خلفى من يرمقنى بتركيز-شايفاها ف المرايه ولسان حاله يقول شوفى عامله ايه ف نفسها- بكرهه اوى النظره دى موش "شوفى عامله ايه ف نفسها" بكرهه اصلا ان اى حد يركز معايا وانا بعمل ميكب اب
"حددى شفتيك بمحدد الشفتين واملأى الداخل بنفس اللون,وضعى الملمع السائل"
تسألنى:لو سمحتى هو ده الروج السايل؟
ارد دون عناء الالتفات اليها مخاطبها صورها ف المراءه عوضا عن ذلك:اه هو
"فيه حد ف الزمن ده لسه ميعرفش شكل الروج السايل!!!"
"اسفل الحاجب مباشره استخدمى اى شادو ابيض,لاضفاء لمعه محببه"
تسأل:وايه ده؟
-زى منتى شايفه كده,اى شادو ابيض
"لاواضح انها فعلا متعرفش"
-انتى بتحطى ميكياج حلو اوى
-ميرسى ربنا يخليكى
-تعرفى تحطيلى زيك كده
نعم ياختى؟
-لا اصلى مبعرفش احط لحد
-ياخساره بس بجد انتى شاطره اوى
-متشكره عقبال مايحطولك يوم فرحك
تبص للأرض:لا منا متجوزه



ونزلت النقاب على وشها وبتاعه كمان حطتها على عنيها ومشيت....

8 comments:

Anonymous said...

على فكرة انا كمان مش بعرف احط مع ان عندي 24 سنة و بحب ابص عالي بيحطوا مع اني عارفة انه احساس
غتت

Anonymous said...

على فكرة انا كمان مش بعرف احط مع ان عندي 24 سنة و بحب ابص عالي بيحطوا مع اني عارفة انه احساس
غتت بس حتعلم منين

محمد عبد الغفار said...

للأسف احنا محدش بيعلمنا اصول اى شئ

iRamy said...

هو معنى إنها منقبه إنها متتجملش ؟

أول مرة said...

و بتاعه كمان ..........شوف يا راجل طبعاً نستفيد من ذلك أن السادات مات في حادثة قطر و طبعاً أن البتاعه إللي حضرتك ذكرتيها هي اللي لعبت في جزرة القطر ....... بس أنتي نسيتي تقوللينا الخبرة العظيمه عن البتاعه حضرتك شوفتيها في الحمام كان فييين ....

Anonymous said...

فعلا احسن اختيار لأسم البلوج عايشة وخلاص ازاي تكتبي الكلام ده من غير ما توضحي الحكمة العظمية منه عموما حنا لازم نوضح اللى انتي مش عشتي وخلاص ومش قلتيه سعادتك قاعدة في امتحان مادة اللغة الميكابيه سنة 2050 وبتحلي امتحان صح وغلط والبنت اللى وراكي بتحاول تغش منك وانتي بتقطمي في الكلام عشان البنت مش مذاكرة او انك خايفة حد يقفشك ويسحبو الفرشة ويدبسوها في ورقة الأجابة والحكمة اللى انتي عاوزة تقوليها انه مهما حاولت وسائل الأعلام والدولة من تسطيح وتهبيل المجتمع وبوظوا التعليم للدرجة دي انه برضه المعارضة والأتجاهات الأسلامية هتدنها موجودة .... برافو عليكي

Anonymous said...

nice blog I enjoyed reading it rreally ..
you my add your blog at the new egyptian bloggers community at http://www,egybloggers.org

sporeforminghuman said...

hey...the link to ur blog has a spelling mistake...