Sunday, March 25, 2007

بصراحه يامصر انا كده جبت اخرى

بعد صراع طويل مع نفسى,اروح,ماأروحش
بصراحه عبرت عنه بااقتدار نواره نجم,وقفلت المجال على اى حد يتكلم ف الموضوع ده تانى


كنت خايفه اوى وبرر الخوف ده لنفسى بأنى بنت وهو يعنى احنا عدمنا الرجاله وبأنى موش من القاهره وهسافر عشان مظاهره والكلام ده.بس ده طلع عشان الاقى مبرر لنفسى ادام نفسى موش اكتر


خايفه,لو حصل حاجه يالهوىىىىىىى... ابويا وامى واخواتى والمجتمع والناس؟

بس خلاص هنفجر,انفجر يعنى...لا وعلى ايه روحى يابت انفجرى فيهم ,ايه اللى هيجرى يعنى هو الصحفيات بتوع الاستفتاء احسن منك؟جميله بوحريد رفيقه النضال تزيد عنك ف ايه؟سناء محديلى؟(موش واسعه حبتين موضوع سناء محيدلى ده)

ايه اللى هيحصل يعنى هيضربوكى,يتحرشوا بيكى,يعتقلوكى؟

ابوكى هيتشل لما يعرف وبقيت اهلك يتبرو منك؟
كله يهون ف سبيل مصر يارأفت
وهكذا عقدت النيه والعزم على الثبات وخلاص هروح وهاخدها جد بقى-عشان انا ليه سابقه وحيده ف موضوع المظاهرات ده ف مظاهره يوم الخميس 15-3 والحمدلله طلعت مظاهره فاشله اصلا وأدت قبل ان تولد والناس ملحقتش تعمل حاجه والامن ظبط الدنيا صراحه كانو بجد عاملين شغل ميه ميه-

المهم,وصلت التحرير الحمدلله ولقيتلك ايه الامن واقف ف تشيكلات بديعه اللهم صلى ع النبى.شكلهم يلقى الرعب ف قلوب اعتى الرجال بين كل عسكرى وعسكرى عسكرى,انا متأكده ان عددهم كان اكتر من عدد القوات اللى عبرت الجبهه ف 73.
واقفه جنب عسكرى امن مركزى قولت استعبط واسأله:هو فيه ايه يادفعه مصر دخلت الحرب ولاايه؟
-لا دصطووور
والله قالها كده
-دصطووور ايه,فيه انتخابات النهرده يعنى ولاايه؟
-موش عارف بس انا كان اجازتى النهرده ومنزلتش بسبب
.......
كلمت الناس بعد معاناه-موبايلى فصل اصله فحطيت الشريحه ف السنترال واتكلمت-لازم تحسو بالمعاناه
وطبعا مسمعتش منهم غير "كنتاكى التحريييييييييير"
ماشى نروح كنتاكى التحرير هو احنا بنخاف
خلاص هوصل اهوه كنتاكى لقيت اللى بينده عليا بأسمى طبعا انا رد فعل منعكس طبيعى جدا بصيت,الاقى مين ف وشى (ملاكى الحارس)"عمى" عمى اخو بابا لزم
-انت ايه اللى جابك هنا؟قصدى اى رياح طيبه القت بك؟
-انا جاى المستشفى اجيب تحاليل مصطفى,انت بتعملى ايه
-هه؟
-..........................
...........
............... ........... ............ .
ماسبق كان اشتغاله محترمه طبعا
-طب انتى موش مروحه ولاايه؟
-لامروحه طبعا,ده انا اصلا اصلا جايه عشان اروح
-هو ايه الامن الكتير ده ؟
-معرفش تقريبا مظاهره
ادام كنتاكى على طول بنات بتصوت وبيجروهم على عربيه الترحيلات,ومراسلين اجانب بيصورو ووحده زعلانه اوى كل اللى طالع عليها
I cant speak 3arabic.
-هو فيه بنات بيطلعو ف مظاهرات اليومين دول؟
-قله حيا ياعمو بعيد عنك
-موش فاهم موش عايزين يعدلو ليه,كووووووووول الناس دى هتعدل موش معقوله احنا اللى بنفهم يعنى
محنا ف وسط المعمه بتاعت الامن بقى,عايزينه يقول ايه

بس الراجل مسابنيش غير وهو بيسلمنى لأبويا,اللى موش عايزه اقولكو عمل فيا ايه.كل ده وهو معرفش طبعا اى حاجه عن موضوع المظاهرات ده لان دى الحاجه الوحيده اللى ابويا عمره ماهيتقبلها ف حياته اصلا ده كل مايكلمنى يقولى"عملالى ثورجيه يابنت الكلب"

بس انا -لأول مره ف حياتى- حمدت ربنا ع البهدله اللى ابويا بهدلهالى دى وقولت اهو مهما كان ابويا,ياعالم كان مين ممكن يبقى بيبهدل فيا دلوقتى؟

بس حبيت اقول يامصر اديكى شوفتى انا كده عملت اللى عليا وعدانى العيب وأزح,اقطع نفسى يعنى.الحمدلله الواحد ضميره ارتاح من ناحيه البلد

11 comments:

Tamer Omar said...

لأ بصراحة عديكي العيب وأزح ، وكويس ان في حد لحقك ، يا عالم كنتي هتبقي فين دلوقت
عجبني أوى موضوع العسكري ده أصله بيفكرني بحد أعرفه
ناس لا ليها في الطور ولا في الطحين ولا ناقة لهم ولا جمل وداخلين في الليلة غلط
Tamer Omar

micheal said...

عداكي العيب و دستووووووور يا سيادي..سامحووها سامحووووها...ربنا يكفينا و يكفيكي شر الاسياد و يصرفهم عننا
تحياتي لكي

micheal said...

تلقيت دعوه من يومين من زميل مدون عزيز ..محمد التهامي لحضور ندوه عن المدونيين في مصر بمجله كلمتنا 22 ش سوريا المهندسين..الدور ال8 ..عماره جريده الوسيط بالقرب من جامع مصطقي محمود..و تم تحديد الميعاد يوم 4-4 الساعه الواحده و النصف...الللي ناوي يجي يا ريت يسيبلي تعليق عشان أبقي عارف و عامل حسابي و أقول لمحمد
متخافوش مفيش حد مننا متراقب

Anonymous said...

الحمد لله على سلامتك

محمد عبد الغفار said...

عملتى الى عليكى صحيح

Anonymous said...

أنا المفروض أألك عداكي العيب زي مهو مكتوب وربنا معاكي في طريق الديمقرتية و الحرية السياسية و الخروج من الحضانة البوليسية
مبدءيا كلمة بوليسة ودولة بلوسية دي كلمة جديدة معنهم بيقولو أن مصر دولة بوليسية يعني أسمها من زمان بس نعديها أه أحنا كشعب بنحب نسمع كلام التليفزيون
أنا لغية أمبارح كنت ضد الحكومة والسياسات الأقتصادية و الداخلية ومبسوط بالخارجية
بس أنا ماشي جنب الحيط يعني بسمع و أسكت بس لما أتكلمت مع حد فاهم أكتشفت أكتشاف عظيم
أن في حد من مصلحته أنه يسؤ صورة الحكومة المصرية
متأليليش مين الي سؤ الأصل
علشان الي يعرف يحافظ عليه يمسكها
و أنت الي بتألي ان أبويا و أبوكي مش عارفين يحكمونا مش يحكمو ملاين
منهم أخوان و معارضين وي وي وي
لية تكملة
الأسم:مواطن مصري صريح
علي فكرة أنا أنسان عادي بحترم رأي الناس و أحترم الي يحترمو رأيي

Anonymous said...

كافح السخام

no spam

عمر عاشق القرآن said...

عندك حق فعلا
انتى كأنك حكيتى اللى حصلى
بس انا طلعت مظاهرات كتير بس كلها اخوانية
وقررت اروح مظاهرة التحرير .. فعلا رحت معرفتش ادخل برضه بس وقفونى اشتباه و فتشونى ....

و روحت

Boshnaq said...

مفهمتش يعني انت روحتي الاستفته ولا لأ لو رحتي يبقى عداكي العيب لو لأ يعني معملتيش حاجه,مش اصدي يعني تروحي اتخنئي مع بتاع الامن المركزي

أحمد said...

لا معلش انا فى الحته دى عربى قوى ورجعى لابعد الحدود ,مش من قلة الرجالة يعنى ونفرض ان الرجالة متقاعسين برده مينفعش تعملوا حاجة يا بنات لان انتى عارفة انهم لا يرقبون فى مؤمن الا ولا ذمة ,الحمد لله انك نفدتى متعرفيش انا بحزن اد ايه لما بشوف تعذيب الرجالة ايشحال البنات

abu lara said...

جدعه يا بت