Wednesday, February 20, 2008

مدى الحياة..والخل الوفى

مدى الحياه ده برنامج بيجى ع الام بى سى,فكرته تعتمد زى برامج كتير على نفس القناه دى ع المراهنه للحصول على مبلغ كبير ف الاخر
لايعتمد الا ع الحظ وشريك معاك بياخد قرار انك تتوقف عند مبلغ معين
الشريك ده طبعا لازم تكون بتثق فيه جدا جدااااااااا موش مجرد ثقه ف قراره لا بتثق فيه شخصيا وانه مخلص ليك على طول الخط وان استحاله استحاله فيه اى نسبه "غيره" من ناحيه,لان مجرد الفكره دى هتبوظ الليله كلها
أكتر حاجه شدتنى ف فكره البرنامج كانت اختيار المتسابق للشريك اللى معاه
اللى جاب مراته واللى جاب اخوه والاكتر اللى جاب معاه حد صاحبه
موش ده بردو بتعارض مع "الخل الوفى" اللى اعتبر من قديم الازل من المستحيلات التلاته؟
بيتهىءلى القرار الاصعب من التفكير ف الفلوس اللى هكسبها ف البرنامج ده هيبقى اخد مين معايا ويبقى "الخل الوفى"
هو الناس كلها وحشه ولا انا اللى بقيت مبثقش ف حد فبقيت وحشه؟

16 comments:

AHMED SAMIR said...

انتي اللي اكيد موسوسة وبتشكي في صوابع ايديكي كمان
مش كل الناس وحشة
اكيد في كدة وفي كدة
يعني معقول الناس المخلصة الوفية خلصت من الحياة؟
بطلوا ينتجوا النوع دة ولا ايه؟
تحياتي

The Alien said...

موضوع صعب
بس أنا شخصيا عندي اتنين
ودي حاجة تخليني سعيد
متهيألي إنه أكيد فيه حد علي اﻷقل ممكن تثقي فيه للدرجة دي .. دوري كويس

تحياتي

وجهة نظري said...

لأ الناس أغلبها بقي وحش بيجروا ورا مصلحتهم الشخصية انشاللة حتي يبيع عيالوا. بس بين كل دا حتلاقي برضوا ناس كتير أوي مش ممكن يخونوا ولو كانوا حيموتوهم. أنا بثق جدا في مراتي، بس مبثقش في أحكامها لأنها كأي ست قلبها سابق مخها

pharma street boys said...

انا بشوف البرنامج ده برده بس ما شدنيش فيه اى حاجه لانى حسيت انه رخم
والراجل اللى كل شويه يعيد ويزيد فى الكلام ويقول انت ممكن توقف هنا ومش هنا

وفى حكاية الناس اللى لازم الواحد ثق فيه مش شرط يكون واحد احسن من واحد بس هى مسألةحب زيادة
مثلا واحد عايز يختار ابوه او امه
المفروض انه بيثق فيهم هما الاتنين وبيحبهم هما الاتنين
بس اللى بيحبه زياده واكتر هو ده اللى هيختاره

وعن نفسى انا لو حبيت حد بثق فيه لكن مسألة الاختيار دى ما بتفرقش لانى بقى بحبهلانى بثق فى اى حد بحبه
gamal

muhammad reyad said...

اخيرا يا ساسو ....وحشتنا كتاباتك الحلوة ...... البرنامج المذكور بكل أسف قائم على القمار بصورة خالصة ...حظ فى حظ يعنى بدون جهد او معلومات او اى نوع من المهارة و يشبه الى حد كبير الاستقسام بالأزلام المنهى عنه نصا فى القرآن الكريم ... اما مقدم البرنامج فليس لديه مقومات المقدم الناجح كما انه شديد الاستظراف ...و ظهر ده فى برنامجه السابق التاكسى ... حتى فى التمثيل : فيلم -كيف الحال- رغم معالجته لقضية مهمة ظهر هشام فيه كنقطة ضعف واضحة .... اما عن الخل الوفى ...فهو اسطورة خيالية خصوصا فى ايامنا دى ...و مفيش حد ممكن يتمنى نكون احسن منه بكل حب و تقبل و بدون اى مصلحة او غرض الا الأب و الأم ...ربنا يسعد كل السامعين بوالديهم ويغفر لآبائنا وأمهاتنا اللى فارقونا
تحياتى و احترامى

t3ban said...

صاحبي دراعي واخويا ارشي
قالها عادل امام في سلام يا صاحبي
مفيش حد وفي ولو 90%متلاقيش يل عنيا
وقت الجد كلو بيقول
نفسي ثم نفس ثم نفسي ثم......الأخارين

Soooo said...

بقالي كتير ما جتش هنا
قلت اجي اشوف ايه الحياه
والحمدلله انك بخير
-----
الحقيقه انا ماعرفش البرنامج ده ولا شفته وتقريبا مش باشوف برامج ولا باشغل التلفزيون دلوقتي غير يادوبك وانا باكل لقمه عالسريع ولا حاجه
بس بالنسبه للصداقه اعتقد والله ان لسه في ناس عندها اصدقاء اوفياء
بس هم مين وفين وازاي لسه في مابينهم صداقه وكده
الله اعلم



سلاموووووووووز

With Myself said...

احنا في زمن الوحوش
الناس مابيرحموش

:D

::. مـــجـرد إنســـان .:: said...

أولا وحشتنى بجد كتاباتك يا ساسو .. و مع إنى أول مرة أرد على بوست ..

موضوع الخل الوفى و أنا من زمان بسأل إزاى دا من المستحيلات ؟؟ ..

حالة ربنا خلقها أكييييد تبقى موجودة .. و أنا الحمد لله ليا واحد وفى ..

و مش العيب فيكى .. لكن الحلو بيتوه فى وسط الوحش الكتييير اللى حواليه ..

محتاج مننا ندور و نتعب شويه . مش نستناه ييجى

و عموما مستنيكى تنورى المدونه بتاعتى ..و مستنى ردودك :)

قبلة الحياة said...

بدايه احييك بتحيه الاسلام " السلام عليكم ورحمة الله وبركاته "
ثانيا :
صدقتي عندما ذكرتي ان اختيار الشخص لزميله كان اصعب من اجتيازة الاختبارات او الاسئله

في الصداقه بالذات ما ينفعشي نجزأ الشخص

لازم نحب الشخص
ككيان متكامل ما ينفعشي نقسمه
( فضائل & أخطاء )
والا في الحاله دي هنكون ظلمنا الصداقه وظلمنا انفسنا وظلمنا الأصدقاء أيضاً
وبكينا زمان لم يعد به اصدقاء

سعيدة بتواجدي اليوم على صفحاتك

واسعدني المرور بين أروقة فكرك الراقي
فلك خالص الاحترام والتقدير

حسن ارابيسك said...

والله زمان ياساسو
وموضوعاتك الجريئة
عجبني انك مسكتي بالخيط الصح من مشاهدتك للبرنامج وكان لكي منظور أخر أكثر عمقاً
ومين سمعك
تحياتي

SomeOne said...

الخل الوفي مش من المستحيل ولا حاجة وموجود والله
بس قليل قوي
ومبجيش بسهولة الا في مراحل متأخرة من العمر غالبا
بعد مرور المراهقة والشباب

أما حكاية انة من المستحيل دي ليها حكاية عربية قديمة
كان احد شعراء العرب تعرض لخيانة من اعز اصدقاءه مش فاكر اتلحكاية بالظبط
بس الشاعر ده قام قال
علمت أن المستحيلات ثلاث ... الغول والعنقاء والخل الوفي
واصبح هذا البيت مثلا يضربة الناس كلما تعرضوا لخيانة الاصدقاء

...
:)

micheal said...

عن نفسي مؤمن بقاعده افترض حسن النيه الي أن يثبت العكس فإذا ظهرت بوادر سوء النيه فمفيش حاجه اسمها اديني فرصه تانيه
تحياتي

simple girl.. ..simple dream said...

اكيد ليكى ولو شخص واحد بس بتثقى فيه
ولد او بنت
انا مش مهم عندى الدنيا تكون حلوة والناس ملايكة
المهم يكون ليا واحد او اتنين ارتاح معاهم واثق فيهم
ودة عندى بالدنيا ومافيها

الشموع البيضاء said...

دى اول زياراتى ليكى بس انا اوافقك الراى تماما الخل الوفى بقى حاجه صعبه ونادره مش وحشه ده واقع يمكن الناس اتغيرت او بتتغير او ظروف الحياه اختلفت
انتظر زيارتك فمدونتى المتواضعه http://www.black-roses-candles.blogspot.com/

dreaming pocky said...

ازيك ياحجه وحشتينى
بس مش بعلق ولا بدخل من فترة عشان الظروف اللى انتى عارفاها وكمان النت معفن عندى وميشجعش
انا عارفه انى برغى معاكى بالليل بس لازم بردو ارد على الموضوع ده لانه جميل
واول مره من فترة اشوفك بالعقل ده
:P
ربنا يدمها عليكى نعمه
بالنسبة لموضوع الصديق هو انا مياله لان مافيش حد هيفضلك على نفسه ويحبك تبقى افضل منه الا الام والاب فعلا لانك الفخر ليهم فكل مابقيتى احسن كل ماهما فرحو وافتخرو بيكى انما انسان عادى صديق او حبيب او زوج صعب ممكن حد يكون طيب اوك وبيحبك بس بنسبة 80 % بالكتير هيتمنالك الخير ولماتكونو فى حاجه مع بعض مثلا دراسة او حاجه هيتمنى من جواه بينه وبين نفسه انه يبقى الافضل دى طبيعة البشر كلهم بس بتختلف بقى حسب درجة حب الذات
يعنى فيه ناس زبالة ومش عايزه حد ينجح او يبقى كويس غيرها ودول عندهم حب الذات واصل اقصاه وفيه الموضوع عنده متساوى وده الانسان الطبيعى اللى متخافيش منه
والدليل على كده حديث سيدنا النبى صلى الله عليه وسلم
"استعينوا على قضاء حوائجكم بالكتمان"
وده طبعا لان النفس البشرية جواها نقص واى نفس كده فكان الحديث ده بيقول الناس انهم يسرو امورهم لحد ما تتم وجه المثل الشعبى
"دارى على شمعتك تقيد " على نفس المعنى
المهم مش عايزاكى تفتكرى ان الدنيا اتقل خيرها لان ده مش حقيقى بس دى طبيعة البشر
سلام ياقمرى