Wednesday, April 23, 2008

انا والكتاب وقفاك

ان يتم اعتقال اسراء عبد الفتاح وسحلها ورا الشمس ومحدش عارفلها مكان
عادى...وحده بتحرض الجماهير ضد النظام,وصلت بيها الجرأه انها تعمل جرووووووووووب ع الفيس بوك وال ايه تدعو للاضراب,اللى هو حاجه عيب اوى يعنى
ان يتم اعتقال اهالى المحله كلهم
عادى...يستاهلو اللى بيحصلهم وزياده,كل يوم اضراب اضراب واحنا ناس موش فاضيين للكلام ده,احنا محتاجين هدوء عشان نركز.مصر بتتقدم بينا ياجماعه
ان يتم القبض على محمد الشرقاوى واغلاق دار النشر المملوكه له
عادى...ده راجل اصبح من معتادى الشغب وبصراحه كده دمه تقيل على قلب النظام
اللى بجد موش فاهماه بقا ان تقوم الداخليه بمصادره "عشان متنضربش على قفاك"
الكتاب-لمن لايعلم- عباره عن تعريف بحقوق المواطن من خلال الدستور وقانون العقوبات,حقوقه ف القسم والشارع وحالات التفتيش والقبض عليه
فيها حاجه دى لاسمح الله؟
يزعل الحكومه ف حاجه انى اكون عارفه حقوقى,اللى ف اوروبا والدول المتقدمه اول ما حد يقوفنى ف الشارع بيقولى حقوقى قبل مايطلب منى هو عايز ايه
لأول وهله تصورت -من عنوان الكتاب- انه بيتكلم عن التعذيب ف الاقسام والسجون,ساعتها كان ممكن افهم اتصادر ليه,لكن الكتاب متعرضش للموضع ده خالص
بيتهىءلى أغبى حاجه ف الكتاب ده اسمه,كأن من الطبيعى انى اتضرب على قفايا,وتطلع دعاوى تطالب بأننا "موش عايز حد يضربنا على قفانا"
لو الراجل قال حاجه غلط ياريت يفهمونا ويردو يقولو لا الماده دى غلط والجزء ده موش من حقك,بس العلميه تجى قفش كده
الا لو كان-لاسمح الله بردو- الدستور وقانون العقوبات دول بقا فيهم حاجه ابيحه ميصحش المواطن يتطلع عليها
عشان كده,عزيز ى المواطن \عزيزتى المواطنه
يسرنى من خلال موقعى هذا محاوله منا ان مفيش حد ينضرب على افاه -حرصا على قفا جميع الاخوه المواطنين فهو جزء غالى من كرامته وكرامه الوطن بالطبع- اقدم لكم
و يمكنكم ايضا قراءته من على موقع التعذيب فى مصر

12 comments:

Ahmed Shokeir said...

مانلاقيش عندك لو سمحتي مترو كوميكس

SaSo said...

ههههههههههههههههههه
ملحقنهاش للاسف

وجهة نظري said...

دي عالم عندها تخلف ولسة عايشين في القرن الماضي، لسة عندهم فكرة المصادرة والمنع سواء للكتب والا الأفلام والا الرأي...... بعد خمس دقايق أي حاجة ممنوعة حتلاقيها علي النت عادي خالص

الكتاب دا بعد المنع قريتة 3 مرات ، مرة علي النت ومرة وورد فايل ومرة عندك بي دي إف فورمات.... واللة حاجة مؤسفة

ما طبعا، ما أقل شنب ماسك الأمن عندة علي الأقل 80 سنة زي المعلم الكبيرن رجل هنا ورجل في الأخرة ولسة متعلموش

Adham said...

شكرا ليكى

abu lara said...

ازيك يا ست ساسو
يعني بالله عليكي لما تلاقي خمسه سته من بتوع مكافحة الشغب مقنعين و هاجمين عليكي بالعصي و الضرب و المسبات و الدعس على الراس في الشارع ... شو بدك تحكيله هاد ؟
شو بدك تفهمي فيه ؟ حقوق مواطن ؟ ولا حقوق زفت . وهو اصلاً مش فاهم شو يعني مواطن.

micheal said...

الله يمسيك بالخير يا ريس ستاموني يا عتره المؤلفين لما قررت تغني للقفا

Soooo said...

اه طبعا لازم يتسحب من السوق ولازم اللي ألفو يهرب بره البلد
انتي اتجننتي
شكلك اتجننتي
احنا في بلد ديكتاتوووووووووري
توووووووري
ركزي في اخر مقطع
التوووور لما حد بيقف قدامه بينطحه

لما عمر عفيفي كتب الكتاب ده كان متخيل انه ماعملش حاجه غلط
لكن الحقيقه انه عمل اكبر غلط
عرّف الناس ازاي لما تلاقي التور هاجم عليها .. تتفاداه
وبالتالي السجون اللي عملها النظام هي ومعتقلات ما وراء الطبيعه والشمس .. هتبقى فاضيه
يرضيكي يعني ان الظباط ومسئولين السجون والمعتقلات مايشتغلوش؟؟
يرضيكي الناس الغلابه دي يتقطع رزقها؟؟؟
يرضيكي يتخرب بيوتهم ويتشردو هم وعيالهم؟؟؟

انتي شكلك من الاعداء





سلاموووووووووووووز

Soooo said...

استدراك
انتي دماغ على فكره .. والدليل على كده الاغنية اللي حاطاها دي





سلامووووووووووووز

Mohamed Gameel said...

اعتقد انك هتنضمي قريبًا لقائمة اللي هيعوزوا عيش وحلاوة في المستقبل القريب يا بنتي
ولا يهمك مصر كلها معاكي " وابقي قابليني لو لاقيتي حد معاكي "

هناك فرق شاسع بالمناسبة ما بين مصادرة مترو ومصادرة عشان متضربش على قفاك
فالثاني رائع بحق ويمكن أن يساعد شعبًا كاملاً في أن يقف في وجه الظلم

وحقيقة فقد استعجبت كثيرًا من أن مصادرة مترو قد حصلت عليها ضجة رهيبة لا تستحقها, بينما الكتاب الأهم في رأيي لا يحصل على نصف البروبجندا اللي حصلت للآخر

عمومًا, أعتقد ان حتى كتاب متضربش على أفاك هيبقى ملوش لازمه قريبًا مع تفعيل قانون الإرهاب, وانا رأيي نبدأ من الوقتي نفكر في كتابة كتاب اسمه "وحياتك لتنضرب على افاك"..

Soooo said...

خبر ايه يابنتي فينك
وايه البار بتاع استر يارب

انتي ناويه تفجري البلوج ولا ايه؟؟؟



ربنا يسعدك ويكرمك ويوفقك دنيا وآخره يارب




سلاموووووووووز

ragel keber said...

ايه الحكاية انتى فين وحشتينا

ibn nasser - ابن ناصر said...

المصري لم يعد له كرامة
خلاص كله انتهي وراح
تحـياتي