المجلس العسكرى

ده رأيى عن اللى بيحصل من الجيش حاليا انا موش بحب أتكلم ف الحاجه وقت المعمعه بس انا حاسه ان الكلام ده لو متقالش دلوقتى موش هيبقا ليه معنى بعد كده

المؤسسه العسكريه زيها زى اى منظومه كانت موجوده ايام العصر البائد طالها الفساد ويمكن اكتر بكتير من مؤسسات تانيه بس اللى مخليها تتمتع بالشعبيه والمصداقيه الحاليه حاجتين

اولهم ان الناس ايام الثوره استغاثت بالجيش من الداخليه وكانوا بيطالبوا ان قوات الجيش تنزل الشارع وانا كنت بقول ياخوفى لنكون كالمستجير بالرمضاء من النار وفعلا الجيش اثبت ان "الجيش والشعب ايد واحده" وان رصاص الجيش عمروا ماهيكون موجهه ضد الشعب واحنا بطبعنا شعب عاطفى عشان كده اسهم الجيش ضربت عندنا ف العالى اوى وبقا رجل الشارع استحاله يظن فيه الظن البطال,الناس رفضت الاوامر العسكريه بضرب المتظاهرين بالرصاص وباركت الثوره فيه امله اكتر من كده

مع شويه توابل من نوع التحيه العسكريه للشهداء والعفو عن احمد شومان واى حد متضايق من مديره بيطلبلوا الحاكم العسكرى يطلع ميتنو

الجيش م الاخر ثبتنا جامد اوى ياجماعه بصرف النظر عن اى بقا اللى حصل ده حصل لمصلحه الشعب او لمصلحه شخصيه او بالاتفاق مع النظام السابق او ان ده أهون الحلول بس حصل فعلا

تانى سبب لثقه الشعب ف الجيش هو ان من 52 وانتقاد الجيش خط احمر جدا جدا جدا احنا طول عمرنا بنشتم حسنى مبارك انا شخصيا من ساعه مافتحت المدونه وانا مبقولش عليه غير الحمار الكبير وابنو بالتبعيه بقا الجحش الصغير انا بعترف ادامكوا اهو انى خايفه وانا بهاجم الجيش ده ف حال اصلا لو توفرت ليا معلومات تسمحلى بمهاجمته تعتيم تام ياجماعه عن فساد المجلس العسكرى والمشير طب الاعلام هينشر ايه؟؟؟

غير ان اللى كان بيهاجم حسنى اه ساعات بيتحبس ف قضايا نشر ساعات بيترمى بلبوص ف الصحرا ساعات كتير بيروح ورا الشمس بس كانت مؤسسات حقوق الانسان بتعمل الجرسه التمام وتفضح الدنيا,لكن لما تهاجم الجيش انت فعلا ملكش ديه

باين اوى اوى دلوقتى ان ياعينى الاعلام الرسمى ضارب لخمه زى لما حسنى اتنحى ومانو عاملين زى العيل اليتيم موش عارفين يقفوا مع مين ويقولوا ايه لحد ماخدوا الموقف اللى خدوه مع الثوره والاهرام اعلنها

"الشعب اسقط النظام"

بصرف النظر عن انهم بيستعبطونا وان حسنى مبارك عمرو ماكان النظام ده قمه جبل الفساد زى قمه جبل الجليد اللى مستخبى تحت الميه وموش باين منو غير 5% بس من حجمه

الاعلام دلوقتى ضارب لخمه وموش عارف يقول ايه؟؟

الشع ثاير ضد الجيش

الجيش بيضرب ف الشعب

ضباط يتهمون المشير بالخيانه

؟؟؟؟؟؟؟؟؟؟؟؟؟

خايفين وموش عارفين يقولوا للناس الخبر ازاى ولا الناس اللى ف التحرير دى قاعده هناك دلوقتى ليه؟؟؟؟

الثوره عمرها ماكانت اسقاط حسنى مبارك وكده بجد الناس اللى ماتت دى زيها بالظبط زى اللى ماتو ف العباره او قطر الصعيد ماتوا قضاء وقدر ومسلسل الفساد لسه شغال بس مع تصعيد وجه الصف التانى مكان الوجوه اللى الناس كشفتها

بقالكوا شهرين يامجلس ياعسكرى بتعملوا ايه ياعسل؟؟؟؟

بذمه ابوكوا ياشيخ منك ليه لو كان الجيش هو اللى عمل الثوره دى كنتوا هتصبروا على رموز النظام السابق لحد دلوقتى؟؟؟؟

يعنى ايه اللى بيتمسك ف الميدان بيتحاكم محاكمه عسكريه والاشكال اللى .... الشعب 30 سنه هيتحاكمو مدنى وياريت عارفين تحاكموهم وكل شويه بتأجلو واصلا بتستعبطوا وبتحاكمهم بتهم عره اقل محامى يطلعم منا براءه

غسيل اموال!!!!! مقتل السادات!!!!!

بجد اقل محامى يطلعهم براءه

يعنى ايه البلطجى اللى بيقتل واحد دلوقتى بياخد اعدام تانى يوم واللى اغتال شعب بحالو ف الفيلا 212 ع البحر صف اول!!!!

واللى قتل 700 شهيد ف المظاهرات

واللى عمل موقعه الجمل

واللى سرطن الشعب

واللى افسد مصر كلها!!!!

ايه اللى اتنفذ من مطالب الثوره؟؟؟

محاكمه رؤوس الفساد ....

استراد الاموال المنهوبه..

دستور جديد .....

تسليم السلطه لمجلس مدنى .....

الغاء قانون الطوارىء

"موش هقعد احط نفط ورا كل مطلب كلو متنفذش"

فساد المحليات اللى للركب والمحافظين

عوده الشرطه اللى ناقص نبوس رجلهم والنبى انزلوا بقا,دول لازم يتحاكموا على اللى هما بيهببوه دلوقتى ده

حد ادنى للأجور

وطبعا المطالب الفئويه حدث ولا حرج

شهرين بتعملوا ايه؟؟؟؟

فلوس بتتهرب وملفات بتتفرم ف ثوانى وانتوا سلاحف

تحديث بعد التسجيل الصوتى

العلوقيه مسئوليه وانتوا موش اد المسئوليه دى ,الراجل خفى الفلوس تماما وبيحلف برحمه الغاليين ان محيلتوش غير اللباس وقاعد يحرق ف دم اللى خلفونا ويقلب البلد وقابلوا بقا يابتوع التحرير اشى عدم استقرار واشى تعطيل مصالح

لا وكمان موش هيسيب حقو القانونى ...هيسجننا احنا ابن الجزمه

انا لسه الصبح قاريه نقلا عن الواشنطون بوست ان ثرواته واسرته 700 مليار

مين السبب ف ضياع الملايين دى

منك لله ياطنطاوى هتضيعنا

تحديث2

صدر اليوم الحكم على المدون المصرى مايكل نبيل سند بالسجن 3سنوات لادانته الؤسسه العسكريه فى مقال كتبه يتهم فيه الشرطه العسكريه بتعذيب متظاهرين ومتظاهرات ف التحرير

انتم السابقون ونحن اللاحقون وربنا مايجعل للبوست ده تحديثات تانى,كفايه بقا