Sunday, December 24, 2006

دنيا..نصيحه بلاش




موش عارفه يامنير لحد امتى هتفضل تراهن على جمهورك وانك بتعمل حاجات زى الخره وبردو هتنجح



الفيلم زباله بكل المقاييس



لاقصه



ولا مناظر



ولا سيناريو ولااخراج ولاحتى افيهات



بصراحه الفيلم يستحق -بجداره- جايزه اسوء فيلم ف 2006



قالولنا ان الفيلم عن الختان وموش عارف ايه بيسىء لسمعه مصر,طب ايه اللى جاب الرقص الشرقى,والحب وحريه الستات والجوازوالجنس واللذه والعادات والتقاليد والصوفيه والشعر ف الموضوع؟ايه الوليه اللى ماصدقت عملت فيلم حطت فيه كل اللى تعرفه دى



فيلم مبتور وواضح ان فيه مشاهد ومواقف كامله محذوفه-حتى لو مكنتش اتحذفت بردو الفيلم زباله-كل الممثلين قبل العرض كرهوا الفيلم ماعدا الوليه المجنونه اللى اسمها جوسلين دى"النصر له الف أب والهزيمه يتيمه"



والفيلم نازل ف دور عرض لاتتعدى اصابع اليد الواحده ومن غير دعايه






الموسيقى الصوفيه كانت حلوه وتلقائيه الكاميرا ف الحركه فيماعدا ذلك نيله



حنان ترك طول الفيلم لابسه احمر وبتلف حوالين نفسها ف رقصات دائريه ,وفتحى عبد الوهاب كنت حاسه انه شبهه "سعد الصغير".ازاى معرفش؟



ومحدش فاهم حاجه عن الابطال دول,ناس غريبه عنك وهتفضل غريبه لحد مالفيلم يخلص



المشهد اللى كانت حنان بتتصور فيه على كوبرى قصر النيل بفستان الفرح الورق اللى كانت لابساهولنا ده,افتكرت الفيلم خلص اصل خد



بالك ان الفيلم ده م النوعيه اللى بتخلص كده فجاءه ف اى وقت بدون اى مقدمات



مشهد الختان:اللى كان معمول عليه بالو عشان ميتحطش ف الفيلم,اطمنو اتحط بس محدش هيقدر يشوفه فضلت مدوره وشى لحد ماالعمليه خلصت



كانت امنيتى انى اشوف منير على شاشه السينما بدلا منها صدمت من شكل رجليه المقرف,هو جاى م الصومال؟ على راى محمد ده مينفعش يطلع حافى ابدا ف اى كليبات ولاحتى حفلات,محمد اللى كان تاعبه أوى ان فتحى عبد الوهاب ف الاخر بيطلع مهندس معمارى "زيه" الواد صوت وجاله الهسهس ولم علينا السينما-اللى كانت فاضيه اصلا- ده .ده معمارى؟



لأجدنى ارد عليه باقتباس من الفيلم عن شغلانه الرقاصه "وماله شغلانه شريفه"



____________________________



ملحوزه:اخر مره يامنير,بجد اخر مره

13 comments:

عادل سلامة said...

المشكلة يا ساسو ان منير نفسه مايعرفش يعنى ايه محمد منير
عشاقه مقدرينه اكتر من تقديره هو لنفسه

مثلا منير اللى بيغنى لفؤاد حداد وجاهين وبيرم ونجم والابنودى وعبد الرحيم منصور وحسن رياض ومجدى نجيب .. دا بنى ادم تانى غير منير اللى غنى لمصطفى كامل وأمير طعيمة وعبد المنعم طه

وبيزعل قوى لو حد قاله انك اخترت كلام سطحى وساذج

حتى منير بيتلخبط بين البساطة والسطحية

ومنير اللى غنى بلح ابريم .. وعنقود العنب .. دلوقتى ممكن اتوقع منه يغنى العنب العنب العنب .. والبلح البلح البلح ..
حتى اللزمة بتاعة (وووه وووه ووه ) اللى بيقولها سعد الصغير .. هتبقى لايقة على منير اللى اخترع حكاية (ووه ) فى الغنا اصلا

Ahmed Shokeir said...

ده إنتي شرّكتي أم الفيلم وطلعتيه مايساويش بصلة ، ولو إن البصل باه له تمن

محمد عبد الغفار said...

الأخ عادل اوجز فانجز صح فى فرق فعلاً وواضح اوى اوى اوى ، انا شايف ان منير ميغنيش جديد ويفضل يعيد ويزيد فى قديمه افضل له ولنا

زمان كنت اجيب شريط منير وزمان ده يعنى من شبابيك وبرئ وبنتلود وعلمونى (حكم انا قديم حبتين) يعجبنى الشريط كله الا اغنيه ولا حاجه ، دلوقتى اجيب الشريط ان عجبنى فيه اغنيه بعتبر نفسى محظوظ وحتى اليتيمة اللى عجبتنى مبتبقاش على مستوى القديم أبداً

اما الفلم انا مشفتوش ومش هشوفه قرات قصته ولقيت انه زباله ولا يمكن ادخله فى الغالب انت عندك حق واكتر كمان

bagabigo said...

صحابى دخلوه و بيقول بردوا انه وحش قوى و كلهم زعلانين من منير بس للأسف لسه بردوا بنحبه

أحمد said...

ليه وطالبة من الصعيد عايشة في شقة لوحدها في وسط البلد ... شفت الديكورات بتاعت الشقة

حاجة مغتوها

Anonymous said...

يا جماعة انا مختلف معاكم فى بعض النقاط.
اولا : فيلم دنيا القصة مش على الختان وبس القصة عن ختان الفكر بمعنى الرقابة على الثقافات الاخرى اللى فيها شىء من الفلسفة التى قد تصل الى حد الكفر او التى بها عادات وتقاليد لا تتناسب مع عاداتنا والتعامل معها بفهمها بالجوانب السلبية
ولكن ممكن تتاخد من النواحى الايجابية لانها فكرة من ارض الواقع
والفيلم بيتكلم عن نقطة ((الاختلاف فى الرأى لا يفسد للود قضية )) اننا مبنعملش بالجملة دى مبنعرفش نتحاور ونتفق وبقينا كمان مش عارفين نختلف
وبيتكلم عن الذاتية ان الانسان لازم يكون عارف هو عايز اية بغض النظر عن كلام الناس او ما يتعارض مع افكار الاخرين بدام مبيضرش
وبيتكلم عن فكرة الختان
....
اللى دخل الفيلم فاكر ان الفيلم عن الختان بس وقاعد مستنى المشهد
ثانيا : الفكرة حلوة لكن الوحش فى الفيلم الحوار والاخراج
الحوار كنت سمعت ان القصة والنص كان مكتوب بالفرنسية والترجمة للعربية ضيعت تناسق الحوار كانت فية جمل مبهمة فى الفيلم
الاخراج واضح ان المخرجة مبتدئة
من الاخر الفيلم مهرجنات مش للمتلقى العادى
ثالثا وهى نقطة ان منير مش عارف قيمة نفسة زينا فدا صحيح بس لو فكرت شوية كمان حتلاقى ان انت ظالم منير شوية
مفيش بدائل مختلفة انت لو بصيت على الوسط دلوقتى حتلاقى ان عبد المنعم طه واشرف سالم ومحمد مصطفى والناس دى هيا الناس اللى على القمة دجلوقتى والاسماء المعروفة بالذات مع منير مش موجودة على الساحة اساسا فمنير بيقدر يعمل اللى علية انو يحاول يجيب من الناس اللى كانت معاة بس مش حيقومو بشريط كامل فبيستعين للناس اللى لا عاجبينا ولا عاجبينو بس هما يعتبرو احسن اسامى موجودة على الساحة
لو انت كاتب لو انت ملحن لو انت موزعوفكرك كويس حتتعامل مع مين ؟؟.
كلاب طالعة جديد
دا كل شىء

change destiny said...

kont 3arfa enoh mysaweesh bs kont 3ayza ad5oloh mn bab 7ob elestetla3

bs elreview bta3k mofasal w lazez

shady said...

طيب ما يمكن هو حذف بعض أجزاء الفيلم هو اللى شوهه
على العموم منير دايماً ما بيشتغلش غير فى الافلام الصعبة مالوش هو فى حكاية هما حبوا بعض هما مشيوا مع بعض هما اتجوزوا
التيمه الخالدة للسينما العربية
على العموم ما اعرفش اقول غير لما اشوف

Amenhotep®© said...

kol sana wenty tayeba

micheal mohsen said...

انا كنت من القليلين اللي قرروا يدخلوا الفيلم دة و كنت فاكرة فيلم هادف و فيى فكر مش زي كتكوت و رفاقة بس الصراحة أنا جبت جاز من الفيلم دة لاني حسيت أن الست المخرجة عاوزة تدخل عشرين موضوع في فيلم واحد و تحشرهم في دماغنا بالعافية..يا ريتها كانت ركزت علي حاجة واحدة بس ..طبعا أكيد غير رجل منير
كل سنة و أنتي طيبة

SaSo said...

عادل

"حتى منير بيتلخبط بين البساطة والسطحية"
معتقدش خالص يعنى
حلو افيه العنب والبلح ده:)

أحمد باشا شوقير
وحش وحش اوى ,موش مصدق ابقى شوفوه موش فيلم هادف ولاللمثقفين ولا اى هبل م العبط ده

Mohamed a.ghaffar
اعتقد انه بيفكر انه خلاص عمل تاريخ ومبقاش وقت الكلام ده دلوقتى,احنا نعمل اللى بيجيب فلوس وبيوزع بقى


sherif nagib
اها شوفتها عند عماد وبيعانى تقريبا من نفسك النقاط


a.
لا انا عاجبنى ال"فيو" اللى كانت الشقه بتبص عليه,جامد الصراحه


mounirmarg
موش عارفه يمكن دى وجهه نظرك,اصل انا مبحبش الناس اللى كل مايشوفو او يسمعوا حاجه لمنير يقولك "دى جامد اوى
"
" الفكرة حلوة لكن الوحش فى الفيلم الحوار والاخراج
الحوار كنت سمعت ان القصة "
اومال ايه اللى حلو بقى؟

فيه ناس طالعه جديد -ومش معروفه- بيكتبوا احسن من بهاء محمد والناس الزباله اللى منير بتعامل معاهم دلوقتى ب100 مره,بعدين هو شعر صلاح جاهين وفؤاد حداد اتغنى كله وخلص ولاايه؟
بس هو اللى مستغرب ان فيه حد من الجمهور الروش ممكن يسمع دول دلوقتى



change distny
انا كمان كنت عارفه,بس متخيلتش انه للدرجه دى من السوء


shady
انت حر بس افتكر ان انا نصحتك,وعموما امتى منير عمل فيلم عدل اصلا؟


pharaoh
وانت طيب


micheal mohsen
اهو لا طلع هادف ولا اى حاجه

daktara said...

ازيك ياسوسه من زمان مدخلتش هنا بس انت لسه لذيذه زي ما انت
اما بالنسبه للفيلم انا الصراحة باستغربلك وباستغرب لكل اللي معلقين فعلا
ازاي حتي الان لسه في ناس ماقتنعتش ان احنا في زمن الهيافه
الهيافه....... الهيافه....... الهيافه
ورغم كده كل واحد عمال يحلل الفيلم
ده بيتكلم عن الختان لأ ختان الفكر لأ ختان معرفش ايه
خالد يوسف يساري وافكاره يساريه
مش عارف مين تفكيره ايه وفيلمه بيهدف لأيه
يجماعه اصحوا احنا في زمن الهيافه مش مهم قصه ولا مناظر ولا هدف ولا فيلم اصلا
المهم تعبي الشرايط افلام اغاني كليبات اي حاجه والسلام
ماهو اصل البلد اليومين دول مش عايزه مهندسين ولا معماريين
البلد عايزه صيع وحراميه ........ ولا ايه

Dananeer said...

فرحوتونى و انا اللى كنت زعلانه انى مدخلتش