Wednesday, August 22, 2007

شاى والمسا Vs لمون والدستور

امبارح بعد الشغل كنت ارفانه اوى,ارفانه جدا
وبما انى ارفانه فميصحش أأرف حد معايا,فبعد ماخلصت شغلى طلعت على وسط البلد-لوحدى- ضربت فول بالزيت الحار من عند قزاز واشتريت الدستور وقعدت ف البورصه
وطلبت شيشه تفاح ولمون
وقعدت اقرا ف الجورنان
اللى رايح واللى جاى مسابنيش ف حالى سيبت الجورنان وبصيت حواليا لقيت الراجل اللى جمبى قاعد لوحده بردو,بيقرا المسا وبيشرب شاى وشيشه تفاح
ومحدش بيبص عليه
كل ده عشان انا بشرب لمون وبقرا الدستور!!!

26 comments:

فارس عبدالفتاح said...

أحم أحم أحم

هما اللي كانوا بيبصوا كانوا بيبصوا فأنهي حته بالضبط ..

وكم كان يتراوح اعمارهم ؟

اختيارات :

1. بيبصوا على الشيشة .
2. بيبصوا على اللمون .
2. بيبصوا على الجرنال .

اختيارات السؤال الثاني :

1. من الاربعين إلى الستين .
2. من الخمسين إلى السبعين .
3. أم من جميع الأعمار .

ننتظر الإجابات الصحيحة حتى نعلن عن الفائز .

والجائزة هي قضاء الويك اند في مصيف مرينا بالساحل الشمالي مع الجرنال واللمون والشيشة التفاح ..

مع تمنياتنا القلبية لكم بالفوز بهذه الرحلة

Masry said...

لوحدك يا ثروة ؟؟؟؟
هقولك ايه بس

Masry said...

ليكي تاج عندي و بعدين نبقي نتفاهم في الموضوع دة

With Myself said...

كنتي قلتيلي ، انا كمان كنت قرفان جداً!

بس الشيء العجيب لكون مع شيشة تفاح!
ماتركبش ياساسو؟

SaSo said...

فارس

بسم الله الرحمن الرحيم
السؤال الاول
الاجابه:بيبصو عليا

السؤال التانى
من جميع الاعمار...والفئات
رجاله وحريم

اخر
لوحدى اه,كفرت

مع نفسى
لمون مع تفاح متركبش
تفتكر كانو بيبصو عشان كده؟

فارس عبدالفتاح said...

برافو برافو

الفائزة بالجائزة هي ساسو ..

ونطلب منها ان تدير مؤشر التلفزيون على قناة مولدي هيتس الذي يزاع من خلالها تغطية الصيف من مرينا الساحل الشمالي ..

من جميع الاعمال وبالاخص الشباب الروش والبنات اللى تودي في داهيه وتخليك تعتكف شهر متكلمش حد ..

نتمنا لساسو قضاء وقت ممتع على قناة مولدي هيتس

With Myself said...

هو سبب لا بأس به صراحةً!

يعني اللمون المفروض لترويق الدم وساقع ، اما الشيشة فجزئياً للنفخ بدل من نفخ الهوا وكمان سخنة..

Anonymous said...

هي هي هي

حسن ارابيسك said...

واضح انك ما كنتيش مركزه مع الشيشه والجرنال لا انتي كنتي عامله فتحتين في الجرنال وبتشوفي اللي بيبص واللي ما بيبصش
لكن خلينا في المهم الجو ده كله نفس من الشيشه التفاح بالليمون وسطر من موضوع شدك
يا ترى انتهى على ايه الكوكتيل ده كله
وبعدين تاني مره تعزمينا معاكي

boshra mohamed said...

الناس ديه شعارها
زى ماانت حرة انك تعملى اللى انتى عايزاه انا حر ابص زى ماانا عايز
وسلميلى على الحرية الشخصية

Anonymous said...

هو انت بنت؟؟؟
ممكن تكون انسانه كويس, بس الظاهر انك فقدتي كثير من حياء
البنت المسلمه ومش هقول المصريه

والله اعلم بالباطن
انت بتصلي ,وسبحان الله
ربنا يهديكي ويهدينا يارب

Anonymous said...

ومتزعليش من كلامي
بس قربي من دينك ,هتلقي حاجات احلي كتير من الجلس في الطرقات

Anonymous said...

ومش هقولك انتي كنت لبسه ايه ولا وضعي مكياج اد ايه
لان لوا اجابتك انك لبسه حجاب يبقي ده سبب اكبر لستعجاب الناس منك

ولوا انت متبرجه يبقي ربنا يهديكي ويهدي كل من نظر اليكي ويرزقه ربنا غض البصر
معلش سمحيني عسي ان يهديني ربي الي اقرب من هذا رشدا
وسمحيني ان كتبت كلامي متفرق

غمض عينيك said...

اكيد كانوا بيبصوا عليكي عشان ماسكة الدستور
عارفة لو كان الاخبار كانوا سابوكي عادي كده

تحياتي لاحلى دماغ عاليه
محمد سمير

أبو أمك said...

هي البارانويا أول أعراضها كده برضه

Anonymous said...

بصى انتى عارفه هما كانو بيبصو ليه اكيد بس حبيتى تعرفى الناس اللى هتدخل على مدونتك انك يعنى بنت سبور وبتقعدى على القهوه بس اسمحيلى دى حاجه متفتخريش بيها وببساطه اللى بيشكر او يمدح فيكى فده لمجرد انك متهمهوش فى حاجه تقعدى على قهوه تشربى شيشه ان شالله حتى تباتى فى الشارع هيقولك ياااه ده انتى من الاخر ودماغك عاليا انما تفتكرى اذا شاف اخته بالصدفه فى موقف زى موقفك كده على القهوه هيقف بردو يسقفلها ويقولها دماغك عاليه ولا هيكسرلها دماغها؟
الصراحه انا مش عارفه ازاى حيائك بيسمحلك انك تعملى كده عموما ربنا يهديكى وتفهمى ان تصرفاتك دى ملهاش اى علاقه بالحريه وتبطلى تعيشى دور الواد الصايع اللى انت عايشاه ده

Anonymous said...

جربي الآتي :
الجريدة تكون انجليش أو فرنسي
والمشروب يكون حاجة غريبة، يعني تين باللبن ولا دوم بالخيار اي حاجة مش طبيعية كده
ثالثا أقعدي في كافتيريا أو كوفي شوب يا إما ملحق تجاري او فندق أو في حتة تانية غير وسط البلد
مدينة نصر او مصرالجديدة، 6 اكتوبر المعادي الخخخخخخخ
ساعتها محدش هيبصلك
عشان انتي كنت قاعدة في حتة واقعة
وقهاوي وسط البلد ساعات بيبقى عليها معلمات من بولاق ابوالعلا زي ما عليها صحفيات وشخصيات تانية

محمد عبد الغفار said...

لا عشان شكلك باين عليه قرفان وريحتك زيت حار

وده مش معتاد من البنات الأمامير فى بلدنا

Alexandrian far away said...

ده أثر الفول على ملامحك يا ساسو
تلاقيهم كانوا بيقولوا أزاي بنوته قموره ومثقفه كده مدياها فول ع الصبح؟
هههههههههههههه
الا هو ايه العيب في أن البنت تقعد على قهوه مثلا؟
مش فاهم
على فكره أول مره اختي قعدت على قهوه أنا الى قعدتها عليها
صباحه فل
الا بتحبي تقري لمين في الدستور؟

أُكتب بالرصاص said...

لا..بس الظاهر كان فيه حاجة مكشوفة في الدستور.. ولفتت نظر الناس

أو ان الليمون كان دخانه فاقع شويه


ما علينا

هي فين البورصة دي ؟

micheal said...

لايقه أوي الشيشه علي قراءه الدستور
:)

Anonymous said...

بنت وبتشربي شيشه ؟؟؟؟؟؟؟

انت راضية عن نفسك؟؟؟؟؟

عارفه العرف والعادات والتقاليد والحلال والحرام ؟؟؟؟؟؟؟؟


تعرفي حاجه اسمها حياء ؟؟؟؟؟؟؟؟

سمعتي عنه ؟؟؟؟؟؟؟؟

ان لم تستح فافعل ما شئت

micheal said...

هي ليه الناس سايبه كل حاجه و مركزه علي شربك للشيشه...ربنا يشفي بجد
تحياتي لكي

EgyMado said...

عادى خالص يا سوسو

زى ما انتى ليكى الحرية انك تقرى الدشتور وتشربى الليمون والشيشة

الناس ليها حرية انها تبص عليكى وانتى قاعدة

وسلملى ع الحريات واليموكراطيه :D

Unknown said...

عادي الدستور = الدستور
الشيشه = الشيشه
الليمون لا يساوي الشاي
الرجل لا ياوي البنت
و هذا هو المطلوب اثباتة

Soooo said...

هو في ايه ؟؟
مش في ايه عليكي انتي يا صاحبة المدونه وانا ماعرفكيش

انا كنت داخل اقول ان دمك خفيف وهطلع
لكن استفزني خمس ست ردود عمالين يقولو انتي بنت وبتشربي شيشه ؟؟
وياللهول ؟؟؟
هو في ايه بالظبط ؟؟؟؟؟؟؟؟؟؟

اولا تشرب او ماتشربش دي حاجه ترجعلها اولا واخيرا واللي شايف انها غلط ممكن مايتكلمش او ينصح بالراحجه مش يقعد يقول كاني وماني ودكانة الزلباني
ثانيا لو هي مش محجبه و- سوري يعني - مش لابسه محتشم وشهعرها ومفاتنها باينين .. ماتغضو انتو البصر .. ده حتى تاخدو ثواب اكتر من ثواب النصيحه
ثالثا بقى ودي هي الاساس في الحوار .. ليه معظم الناس خدو الكلام عن شخص اللي كاتبه الموضوع وماخدوهوش من ناحية تانيه زي انها مثلا عايزه توضح وجهة نظرها في ليه الناس بتستغرب اي بنت بتعمل اي حاجه .. اي حاجه سواءا كانت كويسه ولا وحشه

اخر حاجه بقى .. انتي دمك خفيف ..


وخلاص قلت اللي انا عايز اقوله
سلام