Sunday, November 04, 2007

تاج بايت

التاج ده قديم,كل المدونين عملوه تقريبا وكان متمررلى ساعتها من كذا حد
بعتذر عن التأخير
ـ اسم مدونتك؟
عايشه وخلاص
لماذا اخترته وماهي نيتك من وراء اختياره؟
انا اصلى زعلان شويه
قلقان شويه
زهقان شويه
"ليه كل ماأمسك هيه تسيب"
انا اصلى زى بقيت الناس,ماشى كده عايش وخلاص
ساعات ببقا كده فعلا
ـ هل فكرت في اغلاق مدونتك؟ والسبب؟
تؤ
ـ صورتك في المدونة رمزيتها؟
مين رمزيه دى,دى صورة حديثة ليا
ـ لماذا دخلت عالم التدوين من الأساس؟
عشان كنت عايزه اعمل اكونت عشان اعرف اعمل ريبلاى ف المدونات
ـ أحلى جملة قيلت لك في وصف مدونتك؟
حد قالى مره :انا برتاح اوى لما بجى عندك
و"على سلامه" قالى انتى استحاله تكونى عايشه وخلاص انى صاحيه ووخده بالك من كل حاجه
وبحبه بردو لما يكلمنى لما اكتب حاجه جديده تعجبه ويقولى "مجرمه كالعاده"
ـ التعليقات بالنسبة لك أهميتها؟
والله ماتفرق معانا الحاجات دى
ـ أحلى بوست كتبته مع اللينك ولماذا؟
لسه مكتبتوش
ـ أفضل مدونة قرأتها؟
ـ أفضل بوست قرأته وضع لينكه؟
اقراه وانت هتعرف ليه
ـ لو حد قل أدبه في التعليقات إيه رد فعلك؟
حسب
ـ أسوأ مدونة؟
المدونات النضيفه اللى مغسوله باريال
ـ أسوأ بوست أسوأ مدون؟
احمد ناجى الشهر ب"ابليس"
ـ اسمك المشهور بيه وسط أصحابك؟
ساسوووو
ـ عمرك؟
24
ـ برجك؟
عذراء وميزان
ايوه,مركبه برجين مع بعض يامعلم
ـ مجال دراستك؟
حسابات
ـ شخصيتك نوعها إيه؟
متمرده
ـ السفر بالنسبة لك؟
حاجه حلوه اوى
الصفات اللى خدتها من بابا؟-
حب القرايه
ـ الصفات اللي أخدتها من ماما؟
الجمال
ـ أكتر 6 حاجات بتكرهها؟
النكد
جرح القلب
الهيافه
الغباء
قعدة البيت
المرور لما يبقا واقف
كفتة الرز
ـ أكتر ست حاجات بتحبها؟
الضحك م القلب
اللمة الحلوه
صوت محمد منير
الشيكولاته
شيشه التفاح
فيلم/اغنية/قصيدة/كتاب حلو.دى حاجه بتقتلنى
اسكندريه طبعا
ـ الانترنت بالنسبة لك؟
موش هتقدر تغمض عنيك

19 comments:

Anonymous said...

حمد الله على السلامة يا ساسو ...أخيرا ظهرتى ؟ أنا سعيد جدا برجوعك وكمان بإنى أول مرة أكتب أول تعليق ...يمكن دى تكون بشرة خير بإذن الله ...و تردى عليا ....عموما ..كل اللى بتكتبيه زى العسل و مش غريبة أبدا إنك تكونى بتحبى الشيكولاتة ..باين عليكى

د / محمد

Anonymous said...

حمد لله على السلامة اسلوبك رائع
يابي دايما وعلى فكرة انا باحب على سلامة زيك ومتابعه

Unknown said...

بقرجين يبقى 22 سبتمبر انا كفايه برج العزراء بس برضه حد يحب اسكندرية

Ahmed Shokeir said...

أفضل مدونة قرأتها

أحلامي المبعثرة

صدقتي لما قولتي إن نوع شخصيتك متمردة

سعدت بإشارتك للتدوينتين

:)

Anonymous said...

حلو برج العذراء...لايق عليكى ...تصدقى ان انا كمان اخر يوم فى برج الاسد واول يوم فى برج العذراء ؟

د/ محمد

> said...

حـَـسـِبّ
ولا
حـَـسـَبْ
؟؟

> said...

دوك محمد
انت هنا ؟
منور يا راجل والله

islam yusuf said...

مدونه جميلة جدا
انا كمان بحب شيشة التفاح
بس لسه ماجربتهاش

و بالنسبة لأحمد ناجى اتفق معاكى فى الرأى

تسمحيلى احط اللينك عندى
تحياتى

Anonymous said...

اهلا يا سى زيكا ...هو احنا هانفضل نردح لبعض فى كل حتة كده ...كبر دماغك و نفض وسيب اللى نفسه فى حاجة يقولها ...و بعدين بجد انا شفت المدونة بالصدفة و عجبنى كلامها .فيها حاجة دى ؟ اعجاب برىء يعنى ....ماتقلقش و لا تتحمقش قوى كده ....هى ايه الحكاية بالظبط؟

د/ محمد

SaSo said...

د/محمد
ميرسى ربنا يخليك,المره الجايه ابقى هاتلى شيكولاتياه معاك بقا طالما عرفت

ebnmasr
الله يسلمك,حسستونى انى وحشتكو بجد
على سلامه بعيد عن الشعر كمان شخصيه جميله اوى

Mohamed_sobhy84
:))
مذاكر كويس

Ahmed Shokeir
عاش مين شافك

islam yousef
لينك ايه؟

نداء خاص لأحمد زكريا
اكبر بقا,انت زهقتنى انا شخصيا

Anonymous said...

شيكولاتة بس ؟ دانتى تؤمرى ...بس انا فى السعودية دلوقت لكن ممكن ابعتها بالبريد السريع الدولى او الدى اتش ال ...ههههه حمد الله عالسلامة مرة تانية ...وتعيشى و تكتبى كلامك الجميل و آرائك الجميلة
د/محمد
dmreyad@yahoo.com

dreaming pocky said...

اهلا اهلا اهلا
عودا أحمد ياساسو
فينك انتى اعتزلتى الدنيا ولا ايه؟؟
عموما بغض النظر عن تطنيشك ليا ولايميلى اللى بعتهولك من فتره انا بردو لازم كل شويه اشقر على مدونتك
على فكره فيه هنا حاجه تخصك
http://dinaomer.blogspot.com/2007/11/blog-post.html#links
هتشرفينى والله جربى ادخلى وقولى رأيك
سلاموز

dreaming pocky said...

نسيت اقولك ان اغنية الامكان كانت احلى انا عجبتنى اوى

Soooo said...

ساسووووووووووووووو

ياااااه .. اخيرا رجعتي تدوني وتتكلمي
حمدلله عالسلامه

واضح من كلامك عن نفسك انك شخص بسيط عايش الحياه بتلقائيه
ولعلمك
الحياه ماتتعاش غير كده

اه صحيح .. انتي فعلا .. مش عايشه وخلاص


عقلي الباطن بيقوللي انها مش هترد على تعليقي .. ولا حتى هتعبرني من اصله
وش واحد عمال يهرش في دماغه .. والقمل نازل منها بيجري

سلاموووووووووز

> said...

دوك محمد , إعجاب بريئ يعني ؟
ياخي طمنت قلبي,
بالنسبه لموضوع الشيكولاته ,
احب اقولكم انتو الإتنين إني شايف تقارب كويس جدًا بينكم علي فكرة

SaSo said...

dreaming pocky
لا انا راجعة بقوة
بس ايه حكايه الاميل ونفضت والكلام الكبير ده؟
انا جاوبت التاج من نفسى اهو
وبوست مخصوص -اهداء ليكى-عن الاغنيه اللى انا بقيت محبوسه فيها

سوووو
انا موش عايشه وخلاص وانت موش عجوز

Anonymous said...

نداء عاجل ...المواطن احمد زكريا ..اللى معرفش قاطن فين بالظبط ...لا تشرب الدواء ....قصدى لازم تشرب الدواء ...ده انت حالتك صعبة جدا ....حتى الشيكولاتة معترض عليها ؟ فيه كده ؟ وبعدين تقارب ايه ؟ من بقك لباب السما يابنى ....ربنا يشفيك

محمد رياض

Soooo said...

!!!!
احساسك انك مش عايشه وخلاص دي حاجه ترجعلك
وانا قلت وجهة نظري في انك مش عايشه وخلاص ليه
لكن انتي بقى .. ايه اللي اداكي احساس اني مش عجوز


على فكره .. انا افتكرت الموقف بتاعك لما كنتي في قهوة في وسط البلد وكنتي بتقري الدستور .. عشان برضه كنت باقرا جرنان الدستور .. بس مش في وسط البلد
لأ
في السيده نفيسه على قهوة
والناس كانت مستغربه من حاجه واحده بس
مين اللي جاي على قهوة في السيده نفيسه وبيقرا الدستور .. وبيشرب بيبسي كنز مع حجر شيشه قص


سلامووووووووووز

أحمد said...

يا له من شرف
:-)