لعن الله من ايقظها

المطلوب ايه دلوقتى يعنى؟؟؟؟؟؟

ده السؤال اللى بسألو لنفسى من فتره فى ظل الفوضى اللى الله يخربيت ابوه وعدنا بيها وغياب الشرطه والبلطجه اللى طالت الكل -انا شخصيا موبايلى اتسرق ياولاد وفضلت عامله عزا اسبوع :((((-والاحداث الطائفيه,المطلوب نعرف قيمتهم مثلا ونرجع نطلب العفو والسماح يااسيادنا ونقول ولايوم من ايامك ياحسنى واننا شعب همج مينفعش معانا الا واحد زى العادلى!!!!

الفلول,كلمه السر الفلول ... الفلول دى بقا بيقولك احمد عز عندو عدد 21 الف فلول برتبه بلطجى مسرحهم ولسه بيقبضهم لحد دلوقتى كل مهمتهم يعيثوا الفساد ف الارض غير طبعا اللى شغالين مع نفسهم حر كده مده العصر الذهبى للبلطجه وان مبلطجناش دلوقتى هنبلطج امتى!!!كان الحزب الوطنى مستولى على عافيتهم وموظفهم لحاسبهم دلوقتى فرصتهم انهم يشتغلوا لحسابهم واهو نكون نفسنا بقا محدش ضامن الدنيا بكره فيها ايه

الدوله الرخوه ,رخوه او متواطئه بقا الله أعلم بس النتيجه واحده ده مفتاح القمع اللى بتقوم على اساه الفاشستيه والديكتاتوريه الناس قبل الحرب العالميه التانيه كانت عايشه ف فوضى لدرجه لنهل بجد رحبت بهتلر عشان هيشكمهم وموسولينى عشان بس هيخلى القطارات تيجى ف مواعيدها!!!!

ماهو انت ادامك حلين ياعم الامور يافوضى وفتنه طائفيه,راجع ملف العراق

يا دوله قمع وكأنك يابو زيد ماغزيت

انا موش عارفه مين كلب ابن كلب جاهل دلوقتى -على افتراض انو موش فلول ده واحد كل مشكلتو انو جاهل وبيلعب بالنار ف الوقت الغلط جدا- بينفخ ف ملف الفتنه!!!

الاشكال السلفيه الضاله دى اتطلقت علينا منين,امى امبارح بتسألنى يعنى ايه سلفيه؟وكانو موجودين قبل كده ولا لأ؟؟

كانو فين صحيح قبل كده بشويه,ايه مكانوش يعرفوا ان أعظم الجهاد كلمه حق لدى سلطان جائر!!! موش اعظم الجهاد انا عايز اختى زفته البرك مهما كان اسمها

لأن واضح ان الاسامى هتهل علينا كتير بعد خازوق كاميليا,سنه يامؤمن مكفرين اللى جابو اهلينا عايزين كاميليا ,عايزين كاميليا لحد ماطلعت ادتهم ال..... التمام وانها مسيحيه وطول عمرها مسيحيه وهتموت مسيحيه!!!

طبعا هنجيب العيب ع الكنيسه وهيه ليه مطلعتهاش تقول كده م الاول وخلصنا,مطلعتهاش عشان انت ياسلفى ياجاهل يامتخلف تثبت للعالم كله اد ايه انت جاهل ومتخلف وبتقاوح العالم كله بالباطل كل الوقت ده

واحد دلوقتى هيسألنى نعمل ايه ياساسو؟؟

الحل هيبقا على تلات محاور هيجيبوا معانا م الاخر انشاءالله, اى كائن كان يطلع يعمل اى فتنه او ينشر اى غسيل بميته يكون هينقط على غسيل المسيحى اللى تحتيه - او العكس مسيحى هينقط على مسلم- يطلع دين ابوه على حق بقا والكلام ف الموضوع ده يتقفل,جزره وقطمها جحش

انا مؤمنه ان ملعون ابو الديموقراطيه اللى ف الحاجات دى

تانى حاجه:الاشكال اللى ف طره دى يتعدموا موش اعدام م العادى بتاعنا ده لا بيتكرولهم وسيله تليق بيهم,صعق,حرق بجاز وسخ وبعدين بعد مانعدمهم بقا نبقا نحاكمهم براحتنا و هيه دى قمه العداله الشاعريه مع الناس دى

تالت حاجه:نبطل موضوع الاعتصامات الفئويه ده خالص بقا لان الجيش ساعتها بيستهيفهم وبيقول عليهم عايزين يعطلوا عجله الانتاج وساعات بيدور فيهم الضرب وبيقول عليهم بلطجيه ونديها مليونيات ف التحرير,للأسف واضح ان الجيش مبيفهمش الا بالمليونيات وثبت ان اى مطلب موش بيتحقق الا بالطريقه دى ولازم لازم الجيش طول الوقت يحس بالضغط الشعبى لان زى ماقولت اى مطلب موش هيتحقق غير كده يااما بينامو ف الخط ويقولك مصلحه مهم ساكتين اهوه!!!

انتو موش سألتونى نعمل ايه ده اللى عندى

المجلس العسكرى

ده رأيى عن اللى بيحصل من الجيش حاليا انا موش بحب أتكلم ف الحاجه وقت المعمعه بس انا حاسه ان الكلام ده لو متقالش دلوقتى موش هيبقا ليه معنى بعد كده

المؤسسه العسكريه زيها زى اى منظومه كانت موجوده ايام العصر البائد طالها الفساد ويمكن اكتر بكتير من مؤسسات تانيه بس اللى مخليها تتمتع بالشعبيه والمصداقيه الحاليه حاجتين

اولهم ان الناس ايام الثوره استغاثت بالجيش من الداخليه وكانوا بيطالبوا ان قوات الجيش تنزل الشارع وانا كنت بقول ياخوفى لنكون كالمستجير بالرمضاء من النار وفعلا الجيش اثبت ان "الجيش والشعب ايد واحده" وان رصاص الجيش عمروا ماهيكون موجهه ضد الشعب واحنا بطبعنا شعب عاطفى عشان كده اسهم الجيش ضربت عندنا ف العالى اوى وبقا رجل الشارع استحاله يظن فيه الظن البطال,الناس رفضت الاوامر العسكريه بضرب المتظاهرين بالرصاص وباركت الثوره فيه امله اكتر من كده

مع شويه توابل من نوع التحيه العسكريه للشهداء والعفو عن احمد شومان واى حد متضايق من مديره بيطلبلوا الحاكم العسكرى يطلع ميتنو

الجيش م الاخر ثبتنا جامد اوى ياجماعه بصرف النظر عن اى بقا اللى حصل ده حصل لمصلحه الشعب او لمصلحه شخصيه او بالاتفاق مع النظام السابق او ان ده أهون الحلول بس حصل فعلا

تانى سبب لثقه الشعب ف الجيش هو ان من 52 وانتقاد الجيش خط احمر جدا جدا جدا احنا طول عمرنا بنشتم حسنى مبارك انا شخصيا من ساعه مافتحت المدونه وانا مبقولش عليه غير الحمار الكبير وابنو بالتبعيه بقا الجحش الصغير انا بعترف ادامكوا اهو انى خايفه وانا بهاجم الجيش ده ف حال اصلا لو توفرت ليا معلومات تسمحلى بمهاجمته تعتيم تام ياجماعه عن فساد المجلس العسكرى والمشير طب الاعلام هينشر ايه؟؟؟

غير ان اللى كان بيهاجم حسنى اه ساعات بيتحبس ف قضايا نشر ساعات بيترمى بلبوص ف الصحرا ساعات كتير بيروح ورا الشمس بس كانت مؤسسات حقوق الانسان بتعمل الجرسه التمام وتفضح الدنيا,لكن لما تهاجم الجيش انت فعلا ملكش ديه

باين اوى اوى دلوقتى ان ياعينى الاعلام الرسمى ضارب لخمه زى لما حسنى اتنحى ومانو عاملين زى العيل اليتيم موش عارفين يقفوا مع مين ويقولوا ايه لحد ماخدوا الموقف اللى خدوه مع الثوره والاهرام اعلنها

"الشعب اسقط النظام"

بصرف النظر عن انهم بيستعبطونا وان حسنى مبارك عمرو ماكان النظام ده قمه جبل الفساد زى قمه جبل الجليد اللى مستخبى تحت الميه وموش باين منو غير 5% بس من حجمه

الاعلام دلوقتى ضارب لخمه وموش عارف يقول ايه؟؟

الشع ثاير ضد الجيش

الجيش بيضرب ف الشعب

ضباط يتهمون المشير بالخيانه

؟؟؟؟؟؟؟؟؟؟؟؟؟

خايفين وموش عارفين يقولوا للناس الخبر ازاى ولا الناس اللى ف التحرير دى قاعده هناك دلوقتى ليه؟؟؟؟

الثوره عمرها ماكانت اسقاط حسنى مبارك وكده بجد الناس اللى ماتت دى زيها بالظبط زى اللى ماتو ف العباره او قطر الصعيد ماتوا قضاء وقدر ومسلسل الفساد لسه شغال بس مع تصعيد وجه الصف التانى مكان الوجوه اللى الناس كشفتها

بقالكوا شهرين يامجلس ياعسكرى بتعملوا ايه ياعسل؟؟؟؟

بذمه ابوكوا ياشيخ منك ليه لو كان الجيش هو اللى عمل الثوره دى كنتوا هتصبروا على رموز النظام السابق لحد دلوقتى؟؟؟؟

يعنى ايه اللى بيتمسك ف الميدان بيتحاكم محاكمه عسكريه والاشكال اللى .... الشعب 30 سنه هيتحاكمو مدنى وياريت عارفين تحاكموهم وكل شويه بتأجلو واصلا بتستعبطوا وبتحاكمهم بتهم عره اقل محامى يطلعم منا براءه

غسيل اموال!!!!! مقتل السادات!!!!!

بجد اقل محامى يطلعهم براءه

يعنى ايه البلطجى اللى بيقتل واحد دلوقتى بياخد اعدام تانى يوم واللى اغتال شعب بحالو ف الفيلا 212 ع البحر صف اول!!!!

واللى قتل 700 شهيد ف المظاهرات

واللى عمل موقعه الجمل

واللى سرطن الشعب

واللى افسد مصر كلها!!!!

ايه اللى اتنفذ من مطالب الثوره؟؟؟

محاكمه رؤوس الفساد ....

استراد الاموال المنهوبه..

دستور جديد .....

تسليم السلطه لمجلس مدنى .....

الغاء قانون الطوارىء

"موش هقعد احط نفط ورا كل مطلب كلو متنفذش"

فساد المحليات اللى للركب والمحافظين

عوده الشرطه اللى ناقص نبوس رجلهم والنبى انزلوا بقا,دول لازم يتحاكموا على اللى هما بيهببوه دلوقتى ده

حد ادنى للأجور

وطبعا المطالب الفئويه حدث ولا حرج

شهرين بتعملوا ايه؟؟؟؟

فلوس بتتهرب وملفات بتتفرم ف ثوانى وانتوا سلاحف

تحديث بعد التسجيل الصوتى

العلوقيه مسئوليه وانتوا موش اد المسئوليه دى ,الراجل خفى الفلوس تماما وبيحلف برحمه الغاليين ان محيلتوش غير اللباس وقاعد يحرق ف دم اللى خلفونا ويقلب البلد وقابلوا بقا يابتوع التحرير اشى عدم استقرار واشى تعطيل مصالح

لا وكمان موش هيسيب حقو القانونى ...هيسجننا احنا ابن الجزمه

انا لسه الصبح قاريه نقلا عن الواشنطون بوست ان ثرواته واسرته 700 مليار

مين السبب ف ضياع الملايين دى

منك لله ياطنطاوى هتضيعنا

تحديث2

صدر اليوم الحكم على المدون المصرى مايكل نبيل سند بالسجن 3سنوات لادانته الؤسسه العسكريه فى مقال كتبه يتهم فيه الشرطه العسكريه بتعذيب متظاهرين ومتظاهرات ف التحرير

انتم السابقون ونحن اللاحقون وربنا مايجعل للبوست ده تحديثات تانى,كفايه بقا

الرئيس الباهت

"الله يرحمو عبد الناصر كان لما يبقى فيه مشكله ف البلد ويطلع يخطب المشكله بتخلص,السادات مكنش يبقا فيه مشكله ف البلد يخطب يعمل مشكله"

أحمد فؤاد نجم

بصرف النظر عن اتفاقك او اختلافك مع مقولته واعجابك من عدمه بالرئيسي السابق ذكرهما متقدرتش تنكر ان الخطاب الرئاسى وقتها كان ليه تأثير وكارزميه وبعض الاقتباسات مازالت متداوله منها حتى الان وبنستخدمها حتى مع الاعتراض عليها يعنى مثلا وانت رافع ايدك كده لا هتدور ف جوجل ولايوتيوب هتفتكر خطاب التأميم "تؤمم الشركه العالميه لقناه السويس شركه مساهمه مصريه"

و حادثه المنشيه "وان مات ناصر فكلنا ناصر"

ولحظه الشجن اللى تلت "ولقد اتخذت قرارا ارديكم ان تعينونى عليه:لقد قررت ان اتنحى تماما ونهائيا عن اى منصب رسمى و أى دور سياسى واعود لصفوف الجماهير اأودى واجبى"

و لا المصيبه التانى انا لحد دلوقتى دايما بستخدم تعبير:الديموقراطيه لها انيا ومخالب

و أكيد أكيد أكيد خطاب العبور

"ولست اتجاوز اذا قلت ان التاريخ العسكرى سيتوقف طويلا امام عمليه يوم السادس من اكتوبر1973

حين تمكنت القوات المسحله المصريه من عبور مانع قناه السويس الصعب واحتيجاح خط بارليف المنيع واقامه رؤوس جسور لها على الضفه الشرقيه من القناه بعد ان أفقدت العدو توازنه فى ست ساعات"

وطريقتو العسل وهو بيقول ست ساعات

ولما قلب الدنيا علينا واعلن"بل ستدهش اسرائيل حينما تسمعنى الان أقول امامكم اننى مستعد ان أذهب لبيتهم نفسه الى الكينست الاسرائيلى ذاته فى سبيل الا يقتل او يجرح اى من ابنائى الجنود والضباط"

- ابنائى الجنود والضباط موش شهدا متقتلين ومدى الامر ببقصفهم بالطيران ومهانش عليه يعبرهم يعبرهم بكلمه عزا,انا بجيب سيره امه ليه دلوقتى لسه الدور جايلو دلوقت-

الاخير بقا بتاع الكينست ذاته وده تفوق فيه على نفسه ,كان كاراكتر الله يرحمو

المقطع ده حفظاه عن ظهر قلب وعندى ام بى ثرى ع الموبايل

"بشروا ابناءكم ان مامضى هو اخر الحروب ونهايه الالام وان ماهو قادم هو البدايه الجديده للحياه الجديده

حياه الحب والخير والحريه والسلام

ويا أيتها الأم الثكلى

ويا أيتها الزوجه المترمله

ويا أيها الأبن الذى فقد الأب والأخ

يا كل ضحايا الحروب

املؤا الصدور والقلوب باامال السلام,اجعلو الانشوده حقيقه تعيش وتثمر ,اجعلو الأمل دستور عمل ونضال

واراده الشعوب هى من اراده الله"

ايه الجمال ده .... شعر ,عالمى والله

انا معتقدش ان بأى حال م الاحوال ممكن احتفظ على موبايلى بمقطع لأى خطبه من خطب المخفى على عينه الاخرانى بقا طب بذمتك هتحتفظ بايه ؟؟

بمؤتمر الحزب وهو بيرد ع العمال :كبر مخك,هو انا هقعد افر كل ورقه!!!

ولا بظرف امو وهو بيسأل الفلاح :"عباره م اللى بتغرق دى!!!" البعيد مبيحسش!!!!!

ولا المقوله العبقريه ف اخر طلعه بهيه ليه ادام المجلس لما قال ع البرلمان الموازى:خليهم يتسلوا

طب ادينا احنا اللى اتسلينا بيك ياروح امك

انا بجد موش عارفه اذا كان ده غباء وعند وتعمد استفزاز ولا تقل دم منقطع النظير؟؟؟

ده حتى خطاب التنحى اللى الناس مستنياه موش هو اللى طلع قالو

مين الكفتجى اللى كان بيضحك الناس عليه ويكتبلوا الخطابات!!!ولا اللى وداه ف داهيه واتحفنا وحرق دم 80 مليون باخر خطاب اللى جابو معانا م الاخر الصراحه؟؟؟

انا سمعت اشاعات عن انو كان مكرم محمد احمد ,يعنى عيان بيكتب لميت

انا موش بتكلم عن القفشات اعلاه دى اكيد مبتكراته وليده اللحظه ,والله ساعات كنت بحس انه هيقول بعدها:ها ها ها هاااا قفشات افلام :)

انا اعرف الواحد يضحك مجامله على كلام ذوى الحيثيه والشأن حد بقا انت بتحترمه اوى لدرجه انو لو قال ريان يافجل هتبقا بردو مبهور

اكيد موش البعيد ده خالص

أحمد فؤاد نجم بردو قالها ان كتر القعود ع الكراسى بيعمل امراض احنا موش على درايه بيها أظن ده واحد منها

كتابه ملهاش طعم

تدوينات ملهاش طعم من غير امن دوله يراقبها

امن الدوله اللى مصصم يبضن علينا حتى بعد رحيله

امن الدوله اللى كانت اسراره المستخبيه ف قدس الاقداس ان مصر مختارتش شيبسى بطعم الجمبرى ولاحاجه مصر اختارت شيبسى بطعم الطعميه البيتى وهما بحكم العاده ليس اكثر زوروا النتيجه او ربما لان جمال مبارك هو اللى ماسك توكيل طعم الجمبرى ف بر مصر

امن الدوله اللى كل من له باسورد اميل ناسيه لاقاه هناك

ناس تافهه اوى كانوا بيراقبولى تليفون عيل عندو 18 سنه,دوله ايه اللى تبقى مرعوبه من عيل عندوا 18 سنه والنبى!!!

تدوينات ملهاش طعم من غير حزب وطنى نمسخره ,ده انا كنت بستنى المؤتمر السنوى م السنه للسنه زى مابستنى وقفه العيد,كان موسم كتابات وكومنتات وفيدوهات وتبقى ليله بقا ياعمده

ملهاش طعم لان مفيش غير موضوع واحد مفتوح اجبارى للمناقشه ,الاستفتاء على الدستور

اللى هيقول نعم ليه واللى هيقول لا ليه .... اكتب ايه وانا عارفه ان النتيجه ف الحالتين واحده

هكتب ليه فى واحنا ماشاءالله بقا عندنا80 مليون محلل سياسى واعيين ماشاءالله عليهم عارفين كل حاجه ف البلد وكانوا عارفين اللى هيحصل ده من زمان اصلا

اه ماهم محللين سياسين وخيراء دستوريين وفقهاء ف القانون الدولى ومحشى ورق العنب كمان

الوعى السياسى مطلوب وكنا بنادى بيه من زمان موش كل واحد اتفرجلى على موجز للجزيره بقا مستشار قانونى ولا كل واحد قال "تحيا مصر" بقا جيفارا

لماذا ثار المصريون

بالطبع العنوان مقتبس عن لد.علاد الاسوانى "لماذا لايثور المصريون" انا مقريتوش واكيد موش هقراه لأن السؤال اللى بيعكف على اجابته دلوقتى معظم اساتذه علم النفس السياسى والمنشغلين بصنع القرار وأغلب العاملين بالمطبخ السياسى ابتدءا من الولايات المتحده اللى كانت مستاءه جدا ازاى انها مقدرتش تتنبأ بثوره المصريين قبل قيامها و طبعا كل قاده المنطقه العربيه اللى بقوا قاعدين على عروش بتتمايل بهم ذات اليسار وذات اليمين,ولكن اذا كانو فعلا انشغلوا باسباب ثوره المصريين ليه ماشيين على نفس النهج الديكتاتورى العتييييييييييييييييييييييق ,ده موش التاريخ بس اللى بيعيد نفسو الدكتاتور بيستنسخ نفسو ومصمم يستفزشعبو وبيكرر نفس اخطاء اخيه الدكتاتور ببراعه منقطعه النظير ,موش فاهمه مستنى ايه غير انو هيلاقى نفس المصير ؟؟؟

نسيب دكتاريو المنطقه كلا ياخد اللى فيه القسمه ونرجع لمرجوعنا "لما لا يثور المصريون"

عندما سال وحيد حامد كان رده: المصريين ريحوا خلاص

و د.احمد عكاشه:رغى كتير ف كلام من نوعيه ان المصرى جذوره مرتبطه بالنيل فخد منو الثبات والانتماء للارض ومعرفش ابصر ايه ايه كده المهم الراجل قالها صريحه ان المصرى لم ولن يثور

ردى انا بقا ع السؤال ده كان:المصريين بيعتبروا الحكومه زى الحر والزلازل والبراكين ,قضاء وقدر

ممكن تغير القدر؟؟ ,وكذلك الحكومه

ممكن حتى تعترض ع القدر؟؟

مع الخلطه الوهابيه اللى كان لاقت هوى فى نفس كل من الشعب لمرجعيته الدينيه والحكومه لانها تروج الى "واطيعوا الله ورسوله واولى الامر منكم" وان الشعب اللى يقول للحاكم لأ تبيت الملائكه تلعنه حتى طلوع الشمس وان حرام اخر حاجه الخروج على الحاكم حتى لو كان ظالم ,فاسد, غير مقيم للصلاه !!!

اسمحلى , انت لو طول عمرك عايش ف خرابه هتعرف النضافه منين؟؟ هتبقا فاكر ان خرابتك دى احسن مكان ف الدنيا وان كلو كده

من هذا المنطلق-التصريح العنترى من د.أحمد عكاشه و التعود على تأهليه الحاكم وان المصرى بحكم نشأته يبحث عن فرعون يعبده- النظام حط ف بطنو بطيخه صيفى وعاث ف الأرض الفساد

لكنو نسى حقيقه بسيطه اوى:الضغط يولد الانفجار

اه م الضغط اه

ثار المصريون لما مطالب بتوع السياسيه والحريات والديموقراطيه وحقوق الانسان -ايوه العيال بتوع الفيس بوك اللى هما احنا- اتحدت مع البروليتاريا والمطالبين بحد ادنى للأجور1200 جنيه

خلطه ذات نتائج مبهره فهى نفس الخلطه التى اودت بحياه بالسادات فى 81,السادات اعتقل جميع التيارات اتحدت جميع قوى الشعب على كرهه والاطاحه به

لن ننسى طبعا العوامل اللى قتلت كلاما من

الحاشيه الفاسده,صحاب البيه الصغير والسيناريو الفج للتوريث

خالد سعيد الذى اسقط الداخليه سقوط مدوى وهى تحاول بكل ثقلها الدفاع عن 2 مخبرين اذا كان التعذيب -كما تدعى عمل فردى وليس سياسه منظمه- لماذا لا تغسل يديك من عار المعذبين وتقدمهم ككبش فداء!!!

وتزوير الانتخابات الذى وصف بانه تجاوز الذوق العام للاهانه

النظام تعمد اهانه المواطن قولا وفعلا ووضع كل المستفزين ف مقدمه الصفوف عملا بمبدأ ان كان عاجبك

وطبعا القشه التى قصمت ظهر البعير ,اللى هو ميفرقش كتير عن النظام

"تونس"

تونس لم تكن المحرض على ثوره انها فقط بمثابه العامل الحفاز فى التفاعل الكيميائى الهدف منه ليس الا اسراع الطبخه

تونس اثبتت ان الثوره ليست بالصعوبه اللى فى مخيلتنا

تونس فقط جعلتنا نخجل من انفسنا,اصبح الواحد منا يخجل من النظر فى وجه اخيه بل أصبح يخجل من النظر فى مراه الحمام صدفه

اسوأ انواع الخجل هو الممزوج بالعار واى عار على من ضيع وطنا؟؟؟ ماذا سأقول لابنى!!! عندما يسألنى كيف صرنا هكذا؟؟؟

تونس علمتنا الدرس الأغلى -سيبك من انهم ف الاخر خدوا خازووق ومشوا بنى على قام جالهم الغنوشى,ادعوا الله ان نسفيد من هذا الخازووق -الدرس الأغلى "الحلم" رفع سقف المطالب ,لماذا نقبل ب1200 جنيه لماذا تلقوا لنا بالفتات لماذا لا يكون مطالبنا اسقاط النظام

بلغه الحرب تعلمنا ان نكسب ارضا , كل انتصار يليه انتصار جديد, كل خطاب رئاسى لن يكون الا مجموعه من التنازلات

اذكر الرابع عشر من يناير واذكر اننا ابدلنا صورنا الشخصيه على كتاب الوجه بالعلم التونسى واذكر اننى لم اكتب فى خانه الحاله اى شعارات سياسيه فقط مطلع اغنيه الرائعه فيروز الاخيره

"ايّه ... فيه أمل"

تحيه للورد اللى فتح ف جناين مصر

لحد دلوقتى موش مصدقه

الشمس تشرق من الشرق, وحسنى مبارك رئيس مصر

حقيقتان كان بيتتهىءلى انهم متلازمتان ولهم ذات الرسوخ والمصداقيه

من فرط رسوخها كانت طالت حقيقه اكبر منها,هو فين ربنا؟ناسيه ليه؟؟,على اعتبار ان الخلاص الوحيد هيكون بموته محدش طبعا كان يستجرى يحلم بثوره تطيح بيه

"الجبلاوى"

كنت كل مااسمع الاسم ده ميجيش ف بالى غير حسنى مبارك اللى لو فكروا يعملو اولاد حارتنا فيلم موش هيلاقوا انسب منو للدور ده

بس بعد الذل اللى شافو ف ال18 يوم بتوع الثوره اتضحت الحكمه الالهيه اللى ربنا كان سايبو عشانها

ليله 25 وانا على الجروبات الداعيه ل"تظاهرات ضخمه غدا" لقيت شباب كتير بيقولوا احنا اتشاهدنا على روحنا ونازلين بكره لأننا عاملين حسابنا اننا موش راجعين بس انا بفهمى القاصر ماأدركتش اللى ممكن يحصل بكره

فهمى القاصر اللى مبطلش يسأل ف السنين الاخيره "هو لو مصر دخلت حرب ممكن تلاقى حد يحارب عشانها

ليه؟

حد هيحارب عشانها ليه وهو عارف انو موش واخد حقو فيها؟؟

لما قامت ثوره الياسمسن التونسيه -غصبن عنى مقدرتش امنع نفسى من احساس خافت لذيذ اوى اوى بالأمل- لقيت حد بيسأل ع الفيس بوك بردو,ثوره تونس نجحت عشان فيه ناس كان عندها استعداد تضحى بنفسها ياترى كام واحد عندوا الاستعداد ده هنا

كتير جابوا وقالوا انا

انا كنت شايفه ان اى حد كبيرو يموت مولع ف نفسو بجاز وسخ او شانق نفسو فوق كوبرى او يموت شهيد ف "عباره,طياره,قطر,انهيار صخرى"

لكن الشباب اللى ماتوا انا متاكده ان كتير منهم كانو مرتاحين بحيث انهم ابعد من انهم يولعوا ف نفسهم بجاز او يكونوا شهدا بالاجبار ف اى كارثه من كوارث مبارك وماأكثرها

انا موش بقدر امنع نفسى م العياط على الشباب دول ,شباب زى الورد

دول اللى فعلا الورد اللى فتح ف جناين مصر

بتفحم م العياط لمجرد انى اشوف صورهم من غير اى كلام لأن اى كلام مهما كان اكيد هيكون ساذج-بما فيه التدوينه دى ولاتزعلوا- جنب انك فجاءه تلاقى نفسك اتاخدت غدر وانت واقف وسط صحابك واتحولت لجثه ف مشرحه ويكون تقرير الوفاه 3 رصاصات ف انحاء متفرقه من الجسد او كسر ف الجمجمه نتيجه الدهس بسياره

ممكن كمان موش بس تبقا جثه لا مشوهه كمان بحيث لما يطلع كشف الشهدا محدش يتعرف عليك ويكتبوا جنب صورتك,قصدى جنب صوره جثتك

"شهيد مجهول الهويه"

ياريت يبقا من توصيات شباب الثوره -موش هقول عليهم مجلس قياده الثوره زى مالبعض اطلق عليه مؤخرا لما يثيره الأسم من ذكريات مهببه لا تخفى على احد- اطلاق اسماء شهداء 25 يناير على مدارس مبارك وسوزان , وتغيير اسم محطه مترو رمسيس لمحطه الشهداء

وياريت من هنا ورايح نبطل العاده الوسخه بتاعت اطلاق اسامى الرؤساء -مهما كانو ملايكه- على مشروعات قوميه

لان مفيش ف الدول المحترمه حاجه اسما معاش كينيدى ولا اكاديميه كلتنون ولامحطه رفع ساركوزى

ولا حد فيهم بيتهبل ويحط صورتو ف كل المصالح الحكوميه ابتداء من مجلس الوزرا لاصغر فصل ف ابتدائيه كفر ابو طشت

انسلاخ

المتابع لحال الدراما المصريه عموما لازم يحس بالفرق الرهيب ,الفرق الشاااااااااسع الساجق بين اللى بيشوفو ع الشاشه والريال لايف اى حد هيلاحظوا -ماعدا طبعا صناع الدراما دى والمشاركين فيها- اللى موش عارفه هما هيفضلوا مستعبطين فيها ومستعريين منا لأمتى !!!!

ليه مصممين يعقدونا ؟؟؟ هما موش هيعيشول عيشه اهاليهم بقا!!!

وايه الهدف من اللاواقعيه دى بالقصور والفلل والعربيات اللى المنتج بيدفع فيهم دم قلبو ,حتى النسوان بذمتك ياشيخ انت بتشوف الاشكال دى ف الشارع!!!! الشارع اللى بقيت بالاسبوع متشوفش فيه دارع واحده

هما فاكرينا منعرفش شكل الست وهيه صاحيه م النوم بيبقا عامل ازاى!!!!

اذكر انو من فتره ليست بالقليله كانت الحياه عادى ومفيش التناقض اللى موش مفهوم ده

الدراما المفروض انها انعكاس للواقع وبيتهىءلى ان ده السبب ان الناس اتجهت بقوه للدراما التركى الافلام القصيره وغيرو ماهو كده كده مفيش واقعيه وكده كده انت موش هتشوف وشك ولا وش يشبهلك يبقا اروح اتفرج على فيلم اجنبى انضف بقا

لحد دلوقتى ده التأثير السلبى اللى ظاهر لسه محدش قتل مراتو عشان موش شبه غاده عبدالرازق ولا واحده طفشت من بيت جوزها عشان موش ساكنين فى فيلا الدالى

حتى الاغانى كلها الحب والعيون والرموش والضنى والهجر بس

كأن الدنيا مفيهاش غير كده,وانت اصلا بتغنى على واحد موش لاقى ياكل موش يحب

والموجه المعاكسه بقت عشوائيات واطفال شوارع

ايوه الطبقه الوسطى بتتاكل بالتدريج بس موش ياابيض يااسود كده

انا بتكلم عن الشريحه الغالبه ,عنى وعنك

اللى بتقرا كلامى من لاب توب نص عمر فضل حلمك فتره م الزمن قبل ماتشتريه

وقدامك كبايه الشاى -اللى موش هبالغ واقول انو شاى تموين لان التموين بطل يوزع شاى من زمان- شاى ليبتون خرز يلاااااا ياعم بس اكيد موش بتشرب لاتيه ولا اوليه ,ساكن ف شقه ريسبشن واوضتين نوم لأنك لو ساكن ف فيلا ف القطاميه اكيد موش هتدخل اصلا ع البلوج بتاعى وكذلك لو ساكن ف اصطبل عنتر او شق التعبان