قريت عند برايد ف "بيت العرايس والعرسان" قصه البنت ام شخصيه "كويه" اللى متقدملهاش عرسان نهائى خايفين من قوه شخصيتها,الوضع رغم انه مهين انسانيا اوى وجارح بس منطقى وحده شخصيه قويه=العرسان بتهرب منها
عايز تشوف اللى موش منطقى بقا تعالالى تعالى وانا احكيلك عليه,مبدئيا كده انا عارفه انى هكتب بوست مقندل وملخبط وهنط من حاجه ل100 حاجه عشان دماغى ملخبطه وانا شخصيا موش عارفه هقول ايه
كفرشه ومقدمه للكلام هحكيلكو حكايه من حكاياتى اللى افتكرتها لما قريت القصه بتاعت البنت ام شخصيه كويه
لايخفى عليكم انى والحمدلله اتخطبت مؤخرا بعد قصه حب طويييييييييييييله,قبل مااتخطب كان فيه بيننا-بينى وبين خطيبى يعنى قبل مايبقا خطيبى طبعا- قطيعه للعلاقات وسحب للسفير وبلاوى زرقه ترتب على اثرها الانفصال-اه الايام الغبره اللى كنت بجى اقعد اسح بيها ف المدونه هنا دى,طبعا ملحقتوش تنسو- المهم كل واحد مننا راح لحاله فأنا قولت ايه بقا بدل البكا ع الاطلال اللى مننهوش فايده ده الواحد بشوف مصلحته احسن والزمن بيجرى يابنتى والقطر بيفوت ومقلقوش بقا الون ع الودان امر م السحر
وكأن امى جاهزه بالعريس-معرفش كانت عاينه ف انهى داهيه ده ومصدقت طلعته- وقالتلى جربى,انتى عمرك سمعتى كلامى ومكسبتيش,الصراحه الصراحه يعنى انا اصلا عمرى ماسمعت كلامها وكسبت ف اى حاجه ولا حتى ف سحب بسكوت الشمعدان,فعشان كده توكلت على الله ودخلت بقلب جامد مع انه لايلدغ المؤمن من جحر مرتين بس هنعمل ايه بقا ساعه القدر يعمى البصر
المهم بدون الخوض كتير ف التفاصيل -دى اعراض ناس بردو- طبعا الموضوع فشل فشل ذريع
وانتو عارفين بقا القيل والقال والكلام اللى بيتقال بعد مالمواضيع دى بتتفركش -بتبقا حاجه مسليه جدا على فكره- ده ابن امه وعيل وملوش كلمه,على اعتبار ان محدش ياعينى كان واخد باله خاااااااااالص قبل كده وفجاءه كل شىء انكشفن وبان
من ضمن الكلام اللى اتقال ساعتها ايه بقا ياولاد ان انا -ال ايه- شخصيتى قويه,دى طلعت عيب اوى اوى على فكره
ولجل حظه السعيد الكلام ده متقاليش انا انما اتقال لاهلى -اللى معرفوش يربو بنتهم وطلعوها بت شخصيتها قويه- وطبعا اهلى ساعتها ولاجابولى سيره بالكلام ده لما اتقال ف ساعتها ف سبيل ان الجوازه تمشى,العجيب بقا ايه ان وهما بيبلغونى فيه ف كلامهم تلميحات انى فعلا غلطانه وانى مكنش لازم ابينله كده
!!!
ساعتها بردو افتكرت حلقه لعمرو اديب كن بيحكى فيها لعزت ابو عوف عن واحد صاحبه راح اتقدم لعروسه وبعد مارجع بيسأله ها عملت ايه؟ قاله لا مينفعش لقيت شخصيتها قويه
عزت رد عليه اتوماتيك وقاله يبقا دى مشكلته هو موش مشكلتها هيه
بردو الوضع ده طبيعى واحد لقى واحده شخصيتها موش هتناسبه فانسحب
اللى موش طبيعى بقا ان واحد يبقا عارف كل الكلام ده ويقاوح متفهمش بيجرب نفسه ولا ايه ولا لاقها لعبه جديده فشبط فيها
وبعدين هو انا يااهبل لو كنت زى مابتقول كده كنت سيبتك تعك العك اللى عكيته ده,بصراحه هو موش عشان انا مليش شخصيه نفضتلك خالص وسيبت اهلى هما اللى يتصرفو,لآ عشان الموضوع مكنش فارق معايا خالص
هو اللى كان حلو اوى انى عمرى ماسئلت على حاجه وعرفت ترد عليا فيها؟ ولا انك عمرك ماقريت كتاب م اللى انا قريتهم؟ ولا بتروح حفلات؟ ولاتعرف يعنى ايه ساقيه الصاوى؟ولا عمرك حضرت ماتش ف الاستاد
و لاحتى روحت دريم بارك
انا دلوقتى عمر ماخطيبى حسسنى انى ست مستقويه ولا اى حاجه م الكلام الاهبل ده لان كون شخصيتى قويه يبقا دى ميزه موش عيب ومعنى كده ان موش كلمه تودينى وكلمه تجيبنى ومش سهل ابقا شخشيخه فايد حد ولا حتى ف ايده هو,هو حابب ان شريكه حياته تبقا كده وبيتعامل معايا الند بالند,ولا عمره اتدخل ف لبسى ولا انى اشتغل ولا اقعد ف البيت ولا علاقتى بصحابى ولااهلى ولاحتى اهله
وحتى لما اكتشف البلوج بالصدفه كانت تعليقاته ليا مشجعه
بل بالعكس انا فيه حاجات كتير مكنش عندى الجرأه انى اعملها لوحدى بقيت دلوقتى بعملها معاه
ولا عمره بصلى بصه موش اللى هيه ولا الماوس لعب ف عبه
وانا ولاعمرى حسيت انه راجل مستبد ولا ملوش شخصيه ولا اى حاجه من الهسهس ده,شخصيات سويه فاهمه بعض كويس وبتتعامل مع بعض ومعندهاش كلاكيع ولا ازدواجيات
نسيب المواضيع الشخصيه دى بقا ونتكلم ف العموم,الرجاله عموما عمرهم مابيعترفو ان هما غلطانين سيبك من اخوكى اللى بيرمى هدومه ع السرير وانتى تشيلها وجوزك اللى بتخانق ويتعصب على ع الفاضيه والمليانه على اعتبار انك ست ومهما حصل انتى اللى هتطلعى غلطانه على طول الخط
لا انا بتكلم على قضايا عامه زى مثلا موضوع التحرش,انا كعادتى مبحبش اتكلم على حاجه ف البلوج ف وقت الهوجه ومبحبش اهتف مع الهتيفه ,الفتره اللى فاتت كان فيه شبهه عرف اجبارى على كل المدونين انهم يكتبو موضوع تعبير قصدى بوست عن التحرش,لدرجه انك استحاله تفتكر مين كتب ايه...انا قولت الهوجه تخلص بعدين هبقا ادلى بدلوى,احنا كنا بنقول ايه.اه التحرش من وجه نظر الراجل بيطبق نفس المنطق البسيط اللى ماشى بيه ف حياته الشخصيه على اى قضيه عامه يكون فيه الطرف الاخر ست,يعنى يامزه لازم هتطلعى غلطانه على طول الخط
لبسك موش عارف,حركاتك ابصر ايه,راجعه متأخر اى كلام.المستفز بقا ان كتير اوى حسو انهن متهمات وسابو القضيه الاساسيه وفضلو يدافعو عن انفسهم وطبعا الجدل المفرغ ده المطلوب
مع ان الامر بغض البصر فرض قبل الامر بالحجاب,و لاان كونى ماشيه سافره -على حد قولهم- موش مبرر لانتهاك جسدى بل هو مبرر ليك عشان تحترم نفسك اكتر وتبتث وقت الشدائد.موش انت عاوز تدجل الجنه,هو دخول الجنه سهل ياراجل؟
الست مشكله الراجل الازليه موش لاقيلها حل قام ربنا فتح على بعض الوهابين السلفين انهم يلبسوها خيمه سوووووووده بعين واحده ويقولها اعترضى بقا على امره,اللى هو امر الهى وماهو الا -ياحبه عين امه- اداه بينفذ اوامر مفروضه من فوق سبع سموات
!!!
ستات كتير اوى كرهو الاسلام-وان كن لم يجهرن بهذا- عشان طريقه تعامل الاسلام-اللى هو اساسا لااسلام ولايحزنون- مع المراه,الست حست ان الاسلام سبب وكسها وانه مبيديهاش اى حقوق تذكر مهو اى قمع بيحصلها بيتقال عليها اسلام
ده ياحاجه انتى وهيه اسمه تخلف,ايوه تخلف جاى من بلاد كانت الست فيها مطيه لاحقوق لها ف حين كان الستات عندنا بيشتغلو ويروحو الجامعه ويمشو ف الشارع بحريتهم,وهو ده السبب فى التخلف العربى اللى احنا فيه دلوقتى ان بدل مالاعلى ثقافه ينتقل لبلاد الجهل اللى حصل العكس الجهل هو اللى جالنا باسدلاته ونقاباته وحجابته على البناطيل الجينز
ازاى وامتى بقينا كده,نسخ مشوهه لفكر ماانزل الله به من سلطان؟!!
ايه روحنا الخليج نشتغل ونجيب ريالات ونفتح مدارس ومستشفيات رجعنا تائبات الى الله؟!!
الست اللى حررتنا دى ووقفت ف ميدان التحرير -من هنا جاء سبب تسميه الميدان على فكره- وقلعت الحجاب محدش قال عليها سافله فاجره وانما اتقال عليها محرره المرأه بس انا نسيت اسمها دلوقتى ياولاد,المهم ان التاريخ بيذكرها بكل خير,انا بيتهىءلى ان الكلام ده لو حصل دلوقتى كان بقا مهدور دمها على طول
تحرير المرأه موش قلع حجاب لاقلع الافكار اللى اتكلمنا عليها فوق ممثله فى الحجاب
فيه ايه هو احنا نتقدم ولا بنرجع لعصور الظلام؟
لما عملو مساواه ف امريكا كلنا شوفنا انه موش بس كلام,لكن احنا عندنا المساواه فشنك,المجلس الاعلى لحقوق المرأه وقانونين الاسره والخلع
كل ده يفيد بايه واحنا لسه بنبص للست على انها حته لحمه موش انسانه زيها زيك حدث ان ولدت انثى وانت ولدت دكر
جزء كبير من التصرفات العنصريه دى بيقع وزه على المراه ف حد ذاتها اللى حاسه بينها وبين نفسها انها فعلا كائن أدنى,لما بتتعرض لاى قمع او تفرقه او تحرش مبتتكلمش لانها عارفه السبب انها تحمل وصمه كونها انثى
وقاعده حاطه ايدها على خدها مستنيه حد يجي يجيبلها حقها,لا ياماما الحقوق لاتوهب ولكنها تنتزع انتزاعا
مشكله المرأه قبل ماتكون مع اى حد فهى مع نفسها
نرجع للراجل,لحد امتى هيفضل يلوى عنق الاسلام الى مافيه مصلحته هو وف اول موقف هيتعارض الاسلام مع مصلحته هيلوى عنقه ويطوعه ليحقق اهدافه هو بردو
الاسلام بيتطبق ع الواقع وليس الواقع بيدور على اسلام يكسبه شرعيته وده اللى احنا بنعمله.كل حاجه تفضل على حالها وندورلها على اسلام تفصيل محاولين لى عنق الايات وتطويعيها لاغراض ماانزل الله بها من سلطان
وسيله قذره ورخيصه جدا
انا شكلى همشى مع العالم بتوع ليلى دول-بس نفسى افهم هما عايزين ايه الاول-,عشان بجد دى بقت حاجه لا تطاق
.bmp)
