Monday, May 07, 2007

حاله حدااااااااااااااد

صحيت امبارح على جريمه قتل,الناس هنا بتحب الاخبار دى اوى بتعتبر وسيله للترفيهه واضافه المتعه لحياتهم المعفنه اساسا.ولذلك كان الخبر المحور الرئيسى -هو واخبار الشركه التالته للاتصالات للامانه- لاى حديث ف اى حته
-الو
فتكون الاجابه الطبيعيه:سمعتى عن البت اللى اتقتلت؟
-ازيك؟
-شوفتى موضوع البت اللى اتقلت؟
وعند ماما ف الشغل كان الموضوع بيتطور بطريقه تانيه
-سمعتوا ياجماعه موضوع البنت اللى اتقلت ده؟
-بنت اتقلت؟اكيد اكيييييييييد كانت ماشيه مشى بطال
وهكذا احبائى الكرام تجدو من يفتى بأن من بين ايدى ربها,واصفا اياها بانها "مشيها مشى بطال" وهو لسه معرفش اسمها ايه اصلا.طبعا زى محنا عارفين دى احدى العادات التى بيثتأثر بها الشعب المصرى ويحرص كل الحرص على توريها للاجيال
الاخبار م الاخر -بعد التاكد من صحتها بعيد عن الفتى المذكور اعلاه-,عشان عارفه انكو زهقتو.البنت-الله يرحمها- دكتوره صيدلانيه 23 سنه انسه,لن اذكر اسمها وجدت مذبوحه ومرميه ف منور احدى العمارات المهجوره.لم يعتدى عليها.ذهبها وموبايلها و فلوسها لم تمس
غريبه دى موش كده؟
لا غريبه ولا حاجه لو عرفنا ان البنت كانت شغاله ف صيدليه مستشفى الجامعه-وما ادراك مامستشفى الجامعه ياسيدى عندا سبووووووووووووبه جامده اوى- وكانت ف الفتره الاخيره دائمه الشكوى لأمها- البنت لا المستشفى طبعا-,عن اختلاسات بملايين من صيدليه المستشفى وانها عايزه تبلغ
والباقى يمكن استناجه بالطبع
انا لا اكتب بهدف فضح الفساد,اللى كلنا عارفين انه ف كل حته طبعا بس الحادثه سايبه عندى اثر نفسى مدمر لما تقرا عن الفساد والرشاوى والاختلاسات دى حاجه ولما تحس انه اقرب اليك من حبل الوريد وممكن يطولك ف اى لحظه ده احساس تانى,انا طول عمرى حاسه بالفساد بس كلام بس اول مره ,اول مره احس كده.
انا لا ادعى معرفتى بالقتيله -وهو شرف يحلو للجميع ادعائه ,اذ يصبح البنى ادم اللى ولا يسوى بعد (قتله-خطفه-اغتصابه) شخصيه شهيره جداوالجميع يتسابق لاعلان انه كانو اصحاب الروح بالروووووح- وهو كما ترون ايضا احد سلوكيات المصريين الجدير بالدراسه
اكيد بنت عاديه اهلها كان نفسهم يفرحو بيها ويجوزها,طول عمرها بتذاكر عشان تبقى دكتوره واتوسطوا لها عشان تتشغل ف الحكومه.وتلاقى فساد ومتقدرش تسكت فتتقتل,ببساااااااااااااااطه
تخيلت لحظاتها الاخيره وهى مخطوفه,خطفوها ازاى.؟
قالولها ايه؟
كانت حاسه بايه وهيه لوحدها؟
ساعه مالسكينه لمست رقبتها؟
حسيتى بايه ياحبيبتى,لا استطيع مغالبه دموعى وادعو لاهلها ان يلهمهم الصبر على مصيبتهم,والنبى متسيبسبو حق بنتكووووووو

21 comments:

محمد عبد الغفار said...

ربنا يجعل معانتها فى ميزان حسناتها

كثيراً ما ننسى قول رسول الله صلى الله عليه وسلم
مفى بالمرأ كذباً ان يحدث بكل ما سمع
او كما قال صلى الله عليه وسلم

Alexandrian far away said...

نعزي أنفسنا أولا على فقدان شابة مصرية ذات ضمير حي في هذا الوطن الذى أصبحت فيه كلمة ضمير كلمة سيئة السمعة ولا يجوز نطقها علنا
لكن إذا ما كانت مصرية نقية الضمير قد سقطت فلا اشك أن الملايين مثلها سيستمرون فى الصراع حتى تسقط أمبراطورية الفساد التي تحكم وطننا
البقية في حياتكم

حدوته مصرية said...

انا اقول برضه حاسك مكتئبة

كونى على يقين بالله انهم هيحاسبوا محاسبة فى الدنيا والاخرة
ربنا موجود

الهى يا رب يشوفوا عذاب دنيا و اخره على كل واحد من السبعين مليون جراله حاجة بسببهم

Masry said...

حداد علي ميين . عليها ولا علينا ولا علي الضمير ولا علي القلب ولا علي الاخلاق ولا علي البلد

البتاع said...

ساسو حبيبتى

اخر الانباء اذيعها عليكى
من مراسلتكم البتاع

البنت 27 سنة
مش 23
اه صيدلانية فى الجامعة
ومكانتش مدبوحة
كانت واخدة مطوتين فى ضهرها واترمت من الدور مش عارفة الكام من عمارة تحت الانشاء
........
ده اللى بلغنى من اخبار وطبعا لانى مش عارفة اتلم عليكى فى الحقيقة
قلت اقولهالك عالنت يوصل اسرع
ههههههههههههههههه

NeRmeeN said...

ربنا يرحمها يا ساسو ...ويخصلنا من الفساد والقرف اللى احنا فيه..حاجة تقرف بجد
تحياتى

الربان said...

تحياتي

رحم الله الفقيدة ... و جعل مثواها الجنة إن شاء الله ، و الحقها بالشهداء.

و الهم آهلها و ذويها الصبر و السلوان.

و تأكدوا من أن من قتل يقتل و لو بعد حين....و أن الله هو الحكم العدل سبحانه لا يترك القاتل لينعم...

قال تعالى: ((وَمَنْ يَقْتُلْ مُؤْمِناً مُتَعَمِّداً فَجَزَاؤُهُ جَهَنَّمُ خَالِداً فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَاباً عَظِيماً)) [النساء (93)]

و يقول النبي صلى الله عليه وسلم: (( اجتنبوا السبع الموبقات قيل يا رسول الله وما هن قال الشرك بالله والسحر وقتل النفس التي حرم الله إلا بالحق..)) الحديث أخرجه البخاري ومسلم
تحياتي

AHMED SAMIR said...

لا اله الا الله
الله يرحمها ويغفر لها ويجعل مثواها الجنة
بس عارفة:
هي الله يرحمها كانت لازم تبلغ فورا لان في حاجات الانتظار فيها بيكون مش مضيعة للوقت انما مضيعة للنفس نفسها
ربنا يصبر اهلها
تحياتي واحتراماتي

SaSo said...

بصراحه حاجه مكئبه اوىىىىىى
وزى ما ماما بتقول "شوفتى عشان لما تشوفى حاجه تتكتمى,لا ارى لا اسمع لا اتكلم"
وسلملى على تغييييير المنكرومشيها "فبقلبه" ,ده بردو من رحمه الجين بتاعنا اللى عارف ان هيجيلنا يوم يبقى كله ماشى "بقلبه"

With Myself said...

هي جت عليها يا ساسو؟!

ما احنا عايشين عيشة الكلاب اهو ، يمكن هي استريحت !

وبعد كده واحد يقولي: عايز تسافر بلاد الكفرة ، ياخي ***!

هشام علاء said...

عزيزتى..

لا تحزنى عليها كثيرل فلو انها قتلت فعلا بسبب كلمة حق فاكيد ربنا هيكرمها و هيجازيها خير

اما بانسبة لمجتمعنا الفاسد اللى اصبح الفساد فيه القاعدة و الشرف هو الاستثناء و عينى عينك فالواحد مايقدرش يقول حاجة غير لا حول ولا قوة الا بالله

لان المشكلة ان الفساد اصبح ثقافة و يتستر تحت عبارات و تعبيرات اخرى كثيرة و الموضوع مستشرى من اعلى الحكومة و البلد الى اصغر موظف او عامل و الويل كل الويل لمن يحاول مواجهة هذا الفساد او يقف فى طريقه قربما يتم قتله مثل هذه الشابة و يتم تلفيق تهمة ليه فيدخل الشريف السجن على ايدى اللصوص


ملحوظة اخيرة:
اسجل اعجابى بمدونتك التى ازورها للمرة الاولى و اسجل اعجابى ايضا بذوقك فى اختيار الاغانى

abu lara said...

بتعرفي ..لما سألت عن احساسها قبل ما يقتلوها ..قفز امامي صوت الشيخ امام و هو يغني جيفارا مات ..
" يمكن سرخ من الالم ... من لسعة النار في الحشى....يمكن ضحك او ابتسم او انتعش او انتشى ...يمكن صرخ آخر نفس كلمة وداع للاجل الجياع "

و كذلك حبيبتنا الفقيده رحمها الله و حسبها شهيده عنده . لعن الله من اخرس صوتها و لم يترك الكلمة تخرج لتفضح الفاسدين والمفسدين

admelmasry said...

يااااااااااااااه
للدرجة دي البني ادم رخيص قوي كدا
.
.
يارب ارحمنا بقي

Anonymous said...

حقيقى ..أنا أول مرة أسمع خبر زى ده !!!
توصل ان البنت تموت !!!ا

ربنا مع البلد ده
:(

تيجيب أكتئاب
:(





الأغنية !حلوة موت !!قولى لى اسمها ؟ أو منين أجيبها ؟؟

bastokka طهقانة said...

ياااه
فعلا احساس صعب
الله يرحمها و ياخد كل مختلس سفاح


اوروفوار

Anonymous said...

احكيلك على منظر شفته
عيل جرى من ايد امه
كانت هتخبطه عربية
ربنا ستر
امه بعد كدة مسكته
"يا واد عايز تموتنى ناقصة عمر"
و نزلت فيه باللكميات و الصفعات لما الواد جاب دم
ولا كأن العربية خبطته
(ده افتكرته بمناسبة ان البنت اللى اتقتلت مش محترمة)
.............
بوست رائع
تحياتى

Bassma said...

الله يرحمها و يرحمنا برحمته الواسعة

SaSo said...

with myself
ابتسم انت فعلا فى بلد الكفره :)

hesham
لا انت فهمتنى غلط انا موش زعلانه م الفساد ولا الفسادين خالص,Abusltly بس الاحساس انه قريب ده اللى مرعب

ميرسى ويارب متكونش الاخيره

abu lara
اولا:منورنى جدا جدا
جدا
ثانيا:انت عبقرى انا من اول ماسمعت الحادثه ومفيش على دماغى غير اغنيه الشيخ امام ,بتوصف لحظات الموت الاخيره والرعب بدقه فظيعه

ادم المصرى
تعاطفك لوحده موش كفايه,اتبرع بربع جنيه

noraan
الاغنيه اسمها "لشو التغيير"
شربل روحانا وتلحين زياد الرحبانى
هيه عندى ممكن تضيفى اميلى وابعتهالك,بس موش فاكره انا عملتلها داونلوود منين


basstoka
ياالف خطوه عزيزه,البلوج منور

عاشور
موش فاهمه الربط بين الموقفين الصراحه
وعموما ميرسى ع الكومنت :)

bassma
الله يرحمها ويرحمنا معاها بقى عشان احنا تعبنا

Anonymous said...

ههههههههه
ولا أنا

Anonymous said...

طبعا انا بهزر فى الكومنت التانى
و قصدى هو
ان المجتمع اللى المفروض يداوى البنت المجروحة هو اللى للأسف بيكمل دبحها
و يكون القتل بعد الوفاة أحيانا
........
تحياتى

SaSo said...

وربنا هعيط