Friday, June 09, 2006

طفى النور يا بهــــــــــــيه

حفل المدونون الاول.....DISAPPOINTED
هيه دى الكلمه اللى ممكن اوصفه بيها
قررت انى اروح وقطعت مئات الاميال وعملت على ماما حوار -كالعاده- ومروحه بيتنا بعد منتصف الليل
مكنتش مبسوطه خالص,مع انى مكنش عندى اى نوايا سيئه مسبقه تجاه الحفل,لم اشك ف التمويل زى ماناس كانت بتقول ولا الهبل بتاع حزب المدونين والكلام الفاضى ده وان خلاص لازم يتعملهم حركه تلمهم بدل ماهم متبعترين كده
المهم,الحفله محستش بالحميمه فيها خالص وده اخر حاجه كنت اتوقعها
موش عارفه لازمته ايه الفيلم التسجيلى بتاع الجزيره والمصحف الشريف كلنا شوفناه,لازمته يضيع اول نص ساعه ولا النشيد بتاع الاخوان اللى قبله ده
مفيش نظام خالص
واداء الفقرات هزييييييييييييل ,العالم دى مسمتعش عن حاجه اسمها ديكور ولا ايه؟
انا عارفه ان اهم اهداف الحفله لفت الانتباه للأفراج عن المعتقلين,لكن لما يبقى حصر المعتقلين ف علاء و شرقاوى
ده اسمه .....
فيه ناس كتير محدش حاسس بيها -مع الاحترام طبعا لعلاء والشرقاوى- بس ع الاقل دول صوتهم وصل والناس عرفت خلاص,ننقل بقى ع اللى بعده
روحت ب "بافلنت" و"بورشورات" كتير لما بصيت فيهم ف البيت لقيت ان كلهم دعايا عن كتب وندوات ومواقع,موش دى اعلانات بردو؟,انا ضد ان حاجه زى دى تستخدم استخدام تجارى اعلانى مغلفه بطابع الحفله,اتضايقت جدا
الحسنه الوحيده اللى بسطتنى بجد انى قابلت منار و محمد اللى كانو بجد واحشينى موووووووووووت

13 comments:

Manora said...

والله يا ثروة انتى كنتى وحشااااانا كتير جدا
بس زى ما قولتلك انتى حظك وحــش
لانه انتى مشيتى من هنا و بجد الفرقتين الى بعد كده كانوا جااااااااامدين بجد
وضحكنا بجد
وبعدين يابنت عيب عليكى ده الواحد طلع فى الجزيرة و اتشهر
فاكره
هههههههههه
عموما يعنى لو كانت حفلاات المدونين الى هتخلينا نشوفك فانا عايزاهم عيملوا حفله كل يوم يعنى

SaSo said...

والله يابنتى انتى سكره
الواحد طلع ف الجزيره واتفضح,الحمدلله ان بابا مشافنيش
لا انا هاجى من غير حفلات والنبى

Anonymous said...

ثروة انت كنت هناااااك
طبعا لأزم تحسي بغربة
لأنك محاولتيش تدوري علي حد ,أنا بقالي يومين عمال أكتشف في المدونين اللي حضروا الحفل وأأل نفسي هم الناس ديه كانت قاعدة فين
مكنش في أغنية للأخوان بس حبينا نعمل عرض يعرف الناس بالمعتقلين كلهم..وملقناش غير الأغنية ديه جهزة..كنا حبين ان الناس تتعرف لي الناس ديه كبشر مش مجرد رقم أو أسم أو خبر في جرنال
عرض فيلم الجزيرة كان قرار لحظي لأن أغلب الناس قعدت تسأل هو يعني ايه مدونين!!؟
طبعا الحفلة مكنش فيها ديكور لأننا مش البيت الفني للمسرح والموضوع كله تمويل ذاتي من جيب الناس المتطوعة
منكرش ان كان فيها طبعا أخطاء ..بس غير مقصودة اطلاقا ووقعت في زحمة الوقت القصير للتحضير
لكن شخصيا مبسوط من اليوم..
ومبسوط انك كنت موجودة..
أتمني اني مش أشوفك في حفلة

Bahz.Baih said...

و اللخ كان نفسى اروح الحفله بس انت كده ثقلتيها يلا الحمد لله انى مانزلتش من الاسكندريه
بتفق مغاكى فى حكايه أن لازم نتكلم عن بقيه المعتقلين زى ما اتكلمنا عن الشرقاوى و علاء
يلا ما علينا

يا مصر اكتب إليكي رسائلي said...

طبعاً انا دورت عليكي تاني عشان كنت متوقع انك ها تزوري الحفل ... طبعا انا ما كنتش هنناك لأسباب خارجه عن جمهورية مصر العربيه .. لكن رأييك يهمني .. ، والحمدلله همني كتير .. لأني مش عارف ليه كان عندي احساس زي احساس جدتي بتاع زمان انه كله بلح .. صحيح فيه أخضر واصفر واحمر وأمهات ورطب وما شابة .. بس كله بلح ورأييك أكيد ها يكون الرأي الوحيد في الهوجه دي اللي محايد .. احيي فيكي ا لحياد يا واحد ياللي عايشة كده انتي عافيه .

bluestone said...

اولا انا لم اشارك في تنظيم الحفل . ولم اعرف اي من منظميه من قبل .. ولم اراهم الا يوم الحفل ,,,
ولكن لي تعليق بسيط ..

كونك محستيش بحميمية ربما لان اغلبنا لا يعرف الوجوده الحاضرة .. ولا تعرف بعض بشكل شخصي .. ممكن تكوني توقعتي بالحميمية دي عشان الحضور فيهم مدونين انت تعرفيهم عبر مدوناتهم لكن الوجوده مختلفة ..

-الحفل اتبذل فيه مجهود كبير جدا ..كون ان الفيلم لم يعجبك ..فانا اتفق معاكي انه مكانش ليه لازمة لكن كان فيه ناس كتير مش عارفة يعني ايه اصلا مدونين .. حتى من بتوع وسائل الاعلام ..
مصور كان داخل القاعة قبل الحفلة ما تبدأ وسألني عن الحفلة فقلت ايو فقاللي (أيه بقى المدونيين دي .. يعني هما مين ؟ )
مالك والشرقاوي مش هما كل المعتقلين صحيح .. والفيلم عرض صور باقي المدونين المعتقلين زي مالك ومحمد ..
طبعا فيه معتقلين كتير جدا .. لكن الهدف من الحفلة زي ما قال منظموها هي مساندة المعتقلين من المدونين الغير منتمين لاي جهة سياسية او حزبية تدعمهم ..

وبعدين ليه حكمتي على الحفلة مع ان من الردود اخدت بالي انك حتى مكملتيهاش .. ازاي تحكمي على بدون ما تشوفيها للاخر

اكيد الحفلة كان فيها اخطاء .. مش عارفة ليه احنا نسينا ان اللي نظموا اصلا مش محترفين .. لا محترفين تنظيم ولا محترفين فن ..
ومكانش الهدف ابدا نطلع حفلة توزيع جوايز اوسكار .. الحفلة كانت عشان نقول ان فيه بدائل لحرية التعبير عن الرأي وان الفن وسيلة للحرية ونفكر الناس ان فيه معتقلين محتاجين مساندة .. من غير ما نخرج الشارع ونخسر ناس تانية ..

لو كملتي الحفلة للاخر كنتي هتشوفي مخرج فرقة حالة لما طلع على المسرح وقال يا جماعة احنا كان معانا ديكور بس مانفعش نحطه لان المسؤولين عن القاعة رفضوا الديكور اصلا .. حتى لما جه ينده على اسم مصمم الديكور معاهم قال ده (فلان) مش فاكره الاسم .. مصمم الديكور اللي ماتعملش ..
مفتكرش ابدا ان المحتوى الفني كان هزيل ..
فرقة حالة مثلا دي اول فرقة مصرية في مسرح الشارع عرضوا في اماكن كتير وليهم شهرة وعرضوا في الاوبرا في مهرجان المسرح .. لكن لو قصدك البيجامات ؟؟؟؟ المرة اللي جاية يلبسوا ترينينج سوووت .. عشان يبقى شكلهم كويس ..

كمان الفرق اللي ادت بعد كده مكانتش محتاجة لديكور لانهم فرق غنائية صغيرة ..
ملاحظة بسيطة هتلاقيها مذكورة في مدونة بنت مصرية او شيماء على ما اذكر .. وهي ان كان فيه شخص مدون منظم معاهم كان مسؤول عن الفقرات الفنية كلها .. والشخص ده اختفى لاسباب ما .. ولم يظهر سوى يوم الحفل .. يعني كان فيه مشاكل تعامل معاها الناس دي .. وهما اصلا غير محترفين ..

واعتقد ان النتيجة مقارنة بما سبق كانت هايلة جدا ..

هم فكروا وكانوا عايزين يعملوا حاجة .. يعبروا بيها عن رأيهم .. وده حصل فعلا

She said...

والله احنا لو نعرف كده انك مش هتحسي فيها بالحميميه وانها هتصيبك بالاحباط كنا لاغيناها خالص

احنا مش عاوزين حد يزعل

Veeeva said...

انا نفسي يتعمل قعدات نتكلم فيها مع بعض.. هتكون حاجة تحفة أصلا

ياسر خاطر said...

المهم عشان مارغيش كتير برضو
في المصانع الاوروبية زاد تمن الايد العاملة ففكرو انهم ينقلو مصانعهم لدول تانية تمن الايد العاملة فيها اقل والدول كان منها باكستان والهند ودول شرق اسيا وطبعا مصر
ازاي؟ بانهم يبعتو للحكومات فلوس يطورو المكن ويدربو الايد العاملة عشان تكون بمستوى الشغل الاوروبي
الناس في البلاد اللي برة اخدت الفلوس وطورو بيها المكن بتاعهم ودربو العاملين واخر تمام
في بلدنا العزيز بقى
المسؤلين الحلوين اخدو الفلوس راحت فين؟ طبعا احنا اعرفين ان جزء من الفلوس ياعيني دخل جيوبهم من غير مايقصدو دة مش موضوعنا دلوقتي لكن باقي الفلوس اتدرب بيه عمال؟لا طيب اتطور بيه مكن؟ برضو لا امال راح فين؟؟؟
اتعمل بيه ندوات وحفلات واحتفاليات بمناسبة الطفرة القادمة في مجال الصناعة في مصر واللي واضح انها مش ناوية تيجي ابدا
طيب انا بقول دة ليه وايه علاقته ببهية وهي بتغني؟
يعني بالذمة ايه الفرق بين دول وبين دول
يعني بدل مانعمل حاجة مفيدة بالفلوس دي نعمل بيها مشروع صغير مثلا ممكن انه يشيل بطالة 3 شباب من شبابنا المحتاسين على القهاوي لا رايحين نعمل حفلة ونشتري سيديهات ونوزع السيديهات على الناس اللي هما عارفين اصلا بالمشاكل اللي في البلد يعني حتى على الاقل ماجابوش في الحفلة حد نعرفه باللي بيحصل لا دول جابو بعض وجابو من يعرف بجميع جوانب القضية
طيب ايه الفايدة انا عاوز واحد يقول لي فايدة واحدة بس اي حاجة اي نوع من اي حاجة -طبعا سيبكو من الصحافة لانهم جايين يعملو شغل لجرايدهم مش عشان القضية ولا يحزنون
من الاخر اللي حصل دة هباءا منثورا

SaSo said...

يحى
ياريتنى كنت قابلتك

بهظ بيه
يلا اى خدمه بث واقعى مباشر اهوه

اللى بيكتب مراسيل لمصر
ميرسى بس المره الجايه روح واحكم بنفسك

الصخره الزرقا
متشكرين ياستى على المجهودات الفظيعه اللى اتبذلت,بس "بطر" بقى تقولى ايه
معجبتنيييييييييييييييش اعمل ايه
اه شوفت المخرج لما ندهه على بتاع الديكور اللى ماركبش
اه ياريت تلبسوهم سموكن المره الجايه

شيماء
اعملوا حفلات وغنوا وانبسطوا ياستى
وبلاش اجى
اولع انا

مازال يتنفس
فكره بردو,كنت فاكره انا الموضوع هيبقى شبيه بكده

ياسر
انت زعلان ليه؟

شجن said...

انا ما رحتش الحفله بس بعد الى قريته وشوفته كانت حاجه جميله بعمل تطوعى بححححت.
الموضوع مش لازم يكون كله مظاهرات وهتافات لازم الناس تتغير تتريق تضحك تغنى.
زى ماالنظام ما غير من أسلوب تعامله مع المتظاهرين لازم المتظاهرين يبتكروا حاجات جديده يعكننوا بيها على النظام .
أسف للأطاله.

Ahmed Shokeir said...

معلش ياثروة .. أنا بهية .. هاولع النور بس هاجيب حاجة من الدرج وأطفيه على طوول

هوششششششش

خلاص هاطفي النور أهوه

Forsannet said...

روعه وجمبله القصة

http://www.forsannet.com