Monday, November 27, 2006

عيد ميلاد الانسه ماما




النهرده عيد ميلاد مامتى,حبيبتى.والراجل بتاع الورد لسه مجاش

يخرب بيته,شكله تاه ف العنوان

موش هقعد اقولكو الست دى امى وفلذه كبدى واقرع عليكو انتو موش غرب,بس العلاقه بينى وبين امى وابويا غريبه جدا

لحد فتره قريبه اوى كنت بكرههم جدا جدا اوى يعنى وكنت بعتبرهم هما السبب الاوحد لأى نكد بيحصلى ف حياتى

وأذ فجاءه كده-متعرفش حد دعالى بالهدايه وربنا استجاب له ولا ايه- حسيت بقيمتهم بجد هما ساعات -كتير- بيبقو فعلا نكد ,بس انا بقيت احبهم اوى.وفهمتهم جدااااااااااااا وفهمت حاجات تانيه كتير

دايما علاقتى بيهم بوصفها بمشهد فيلم "قصر الشوق" لما صلاح قابيل وعبد المنعم ابراهيم كانو مروحين ف الشارع بالليل ويايسن بيشتكى لفهمى من قسوه ابوه وان هو السبب اللى بوظله حياته بالقسوه بتاعته,هو فاكر نفسه ايه,كل قوى ف اللى اقوى منه.واذا بيهم يلاقهم ابوهم بيتكدر م العساكر الانجليز و بشيل رمل,ايه ده يااياسين الحق ابوك.هنسيبه كده

-ايوه عشان يحس بالذل اللى هو ذال اللى هو ذاللهنا

وبعدين........بابا ياحبيبى يابابا

ويجرى يشيل الشوال من ابوه

مشهد عبقرى بيقول كل حاجه

المهم,امى بقى عندها 48 سنه لو شوفتوها والله هتقولو اختى موش ممكن ماما حلوه اوى -موش عشان امى- وشكلها صغير موت وهيه بتنبسط اوى بده وبتفرح اوى لما حد يفتكرها لسه "انسه" وده احسن لقب بتحبه ف حياتها-هيه قالتهالى صراحه النهرده بس انا كنت عارفه عشان كده لما البنت بتاعت محل الورد الله يخرب بيتهم سألتنى باسم مين,قولتها الانسه"بسمه"-,اما عن أسوا لحظات حياته بقى لما تطلع وحده شحطه ادى تندهلها تقولها ياماما يامامااااااااااااااا ,ادام اللى فاكرها انسه ده

وعن امنياتها للسنه الجايه ان عيد ميلادها الجاى مكونش بحتفل معاها بيه ف البيت,عشان على حد قولها كفايه كده

انا كنت بكتب عشان امنع نفسى انى اتصل بمحل الورد اخرب بيته,يعنى اول عيد ميلاد لأمى مكونش متخانقه معاها فيه واجيب لها ورد وأول مره يجيلها ورد ف حياتها اصلا

الواد ميجيش

16 comments:

شيمـــــاء said...

كل سنة وهى طيبة
وسلامتى للانسة ماما
و يا رب ما تتخانقوا ابدا
جبتى التورتة ولا لا ؟

Anonymous said...

كل سنه و الانسه بسمه طيبه وصللها بوسه كبييييييييره اوي مني و ان شاء الله ان شاء الله السنه الجايه ماتكونيش معاها في البيت

مُصْعَب إِبْرَاهِيم said...

كل سنة و الآنسة بخير هي و .... وأختها :)

MahmoudHashem said...

انا دعيتلك بجد

SaSo said...

شيماء
وانتى طيبه
تورته ايه؟ انتى هتفتحى علينا فتحه,السنه دى ورد ,السنه الجايه تورته

مدونتك حلوه اوى انا بدخلها عشان اسمع عمر خيرت

نسيم
ميرسى,ويارب مكونش معاها ياااااااااااااااارب

مصعب
وانت بخير,شرفتنا بالزياره

SaSo said...

اه صحيح
الورد جه وفرحت بيه اوى,دى هتاخده معاها الشغل بكره

Anonymous said...

النبى حارسك وصاينك
ايه الزوء ده كله :)

الســـاحر said...

وكل سنه وهى طيبه ويارب ربنا يخليهالك علطول
وانا تشرفت بزيارتك ومنتظر زيارتك ليه
وفى النهايه سلامى
وربنا يوفقك

أُكتب بالرصاص said...

كل سنة وهي بخير !!

والعيال بتوع الورد الله يخرب بيتهم بخير برضه

واللمبي بخير

ويا ريت تعملي فكرة مفتكسة السنة دي
وتعملي معاها حوار
وتنشريه في البلوج

وصورة للواد بتاع الورد الله يخرب بيوتهم وهو جايب الورد

على كل حال
من عندي بوكيه ورد الله يخرب بيته

وتحياتي

محمد عبد الغفار said...

مشاعرك جميله تجاه ماما رغم التقصير الواضح منك ، وكل سنة وانت وهى طيبة وربنا يفرحك ويفرحها دائماً

ياريت تحاولى تعالجى التقصير قبل ميمر العمر بيكى وبيها

اتمنى اكون متجاوزتش حدودى فى النصيحه

abu lara said...

الله يخليها و يحفظها يا رب .
بس يا سوسو بدي احكيلك شغله انا و للاسف ما عرفتش قدرهم الا لما فقدت واحد منهم ( ابوي) و بعديها صارت امي هي كل حياتي .

SaSo said...

انونيمس
ميرسى,طول عمرى والله

الساحر
ميرسى ع الزياره

اكتب بالرصاص
حوار؟ لا امى مبتظهرش حصريا غير مع هاله سرحان
يخربيتها

محمد جعفر
ربنا يخليك,خد راحتك انت زى بابا بردو

ابو لارا
فعلا الواحد موش بيعرف قيمه الحاجه الا بعد الفقد
ربنا يخليلك مامتك وتسعدها

محمد عبد الغفار said...

تعقيب بسيط خالص انا اسمى محمد عبد الغفار مش محمد جعفر

abu lara said...

اهداء خاص جدا لكي يا سوسو ..
ولكن ارجوا ان تتقبليه حتى النهاية
اذا سمحتي اتبعي الرباط التالي
http://www.youtube.com/watch?v=UJ1KGcvollE

SaSo said...

محمد عبد الغفار
لامؤخذه, تعمليمى على ادى

ابو لارا
ميرسى اوى ع الاغنيه الحلوه

abu lara said...

الحمد لله انها عجبتك يا سوسو