اخر هدايا هذا العام

البوم اليسا,اواخر الشتا

موش قادره ابطل اسمع الأغنيه

اسمعها واعيييييييييييييييط

سمعتها بتاع 500 مره,وكل مره اعيط واقعد اقول لنفسى عرفت منين دى,ده ولا كأنها عايشه معايا

الست دى موش عمرها ماكانت بتغنى,دى بتتكلم جد وبتوصف احاسيس الست صح.انا بحبها اوى عشان على طول حاسه بيها

بتصعب عليا اوى عشان بتفكرنى بخيبتى,قصدى بتفكرنى بنفسى

المهم اللأغنيه جامده وهتعجبكو

Download

عدنــــــــــــــــــــا

يبدو ان من اعتاد ان يدخل صفحتى تفاعل مع حزنى اللذيذ,وتولدت لدية النزعة الساديه التى تميل اكثر الى السمو

.....

ههههههههههههههههه ايه الكلام اللى انا بكتبه دة,لا اية ده بجد

كلام كبييييييييييييير موش كدة

انا قصدى أن الحزن لذه خفية دفينه تحس معاها بالسمو فوق مشاعر الاخرين التافهة وان ازاى انت جواك كل طاقة الحزن النبيل دى والدنيا لسة ماشيه حواليك عادى زى ماهية,وتوصل لدرجة انك تستعذب الألم !!!,وان اللى حواليك دول كلهم كلاب و مبيحسوش بحزنك السامي اللى المفروض -اقل واجب- يعنى يتعمله نصب تذكارى

واضح بقا انى نقلت حالة النكد الأزلى -بطريق غير مقصود- لمتابعى البلوج.لدرجة انهم يدخلون كل يوم بحثا عن نكد يومى جديد

أعتذر بشدة لكل من حرموا من لعنة النكد المتجدد :))) واحيهم على المازوخية اللى هما عايشين فيها

أما عن السبب فى غيابى عن منحكم قبسا من روحى السوداء هو انى كنت بعمل جراحة بسيطه

لا موش عايزين قلق

جراحة بسييييييييييييييييييييييطة

جراحة لما قررت اعملها الدكتور سألنى تحبى تخدير كلى ولا موضعي؟

على الفور اخترت الثانى-منصحش حد بية الصراحة- ولكن فى سبيل ان لا تأتى كل هرتلاتى ف التخدير الكلى تتعلق بك

.....

اثناء العملية وجدتنى أقول لطبيبى و هو منهمك بالعمل ف منطقه قريبه من القلب

كيف شفت قلبي و النبي يا طبيــــــــــــب
همد و مات و الا سامع له دبيـــــــــــــب
قاللي لقيته مختنق بالدمـــــــــــــــــــــوع
و ما لوش دوا غير لمسه من إيد حبيب
عجبي !!!!


يا مشرط الجراح أمانة علـــــــــــيك
و انت ف حشايا تبص من حواليــك
فيه نقطة سوده في قلبي بدأت تبان
شيلها كمان .. و الفضل يرجع إليك
عجبي !!!

بالأمس حلمت بك

صحيت من النوم واحساس بالراحه والرضا يغمرنى,لم لا الراحه لانى قضيت معك للتو اوقات ممتعة

والرضا لأنى تعلمت معك أن اكتفى بالأحلام

العنوان مجموعة قصصية لبهاء طاهر *

انا و هم و الأماكن

"الاماكن كلها مشتقالك

والعيون اللى انرسم فيها خيالك

والحنين اللى سرى بروح وجالك"

اثمن الاوقات هى التى تعرف وانت تعيشها انها ستصبح من ذكرياتك الغاليه

"كل شىء حولى يذكرنى بشىء

حتى صوتى وضحكتى لك فيها شىء"

-مين اللى مشغل الاغنية؟

يتساؤلون,فلا اجد طاقه-ولا رغبة- ف الرد

أعدك ابدا انى سأحفظ الذكرى

أضمن لك انك ستكون حالة عذاب ابدى تتكرر و تعيد نفسها تلقائيا كل لحظة

لن تنتهى

ولن تتبدل

فأنا -وحدى- أعلم انى لن أشفى من لعنتك ولن تطالنى ابدا نعمة النسيان

"اه لو تدرى حبيبى كيف ايامى بدونك

الامان وين الامان؟

وانا قلبى من رحلت ماعرف طعم الامان

اااااااااااااااااااااااه,اه"

قمة الذروة فى المشاعر,قمة الحب و قمة الألم

هكذا احببتنى

لم يكفو عن السؤال فقرروا ان يجربو الاحتمال الوحيد-الغير منطقى الباقى

-انتى؟؟

اؤمى برأسى ان نعم دون أن ارفع عينى عن الشاشه

فألمس كل نظرات الدهشة حولى

"جيت قبل العطر يبرد

قبل حتى يدوب فى صمتى الكلام

واحتريتك

كنت اظن الريح جابت عطرك يسلم علي

كنت أظن الشوق جابك تجلس بجنبى شوى"

ليست المشكلة ابدا فى ان عطرك عمره ماهيجى يسلم على و لا ان الشوق عمره ماهيجيبك تجلس بجنبى

المصيبه انى لن أسأم ان "اظن" طول الوقت

"كنت أظن

و كنت أظن وخااااااااااااب ظنى

ومابقى بالعمر شي"

تاج بايت

التاج ده قديم,كل المدونين عملوه تقريبا وكان متمررلى ساعتها من كذا حد

بعتذر عن التأخير

ـ اسم مدونتك؟

عايشه وخلاص

لماذا اخترته وماهي نيتك من وراء اختياره؟

انا اصلى زعلان شويه

قلقان شويه

زهقان شويه

"ليه كل ماأمسك هيه تسيب"

انا اصلى زى بقيت الناس,ماشى كده عايش وخلاص

ساعات ببقا كده فعلا

ـ هل فكرت في اغلاق مدونتك؟ والسبب؟

تؤ

ـ صورتك في المدونة رمزيتها؟

مين رمزيه دى,دى صورة حديثة ليا

ـ لماذا دخلت عالم التدوين من الأساس؟

عشان كنت عايزه اعمل اكونت عشان اعرف اعمل ريبلاى ف المدونات

ـ أحلى جملة قيلت لك في وصف مدونتك؟

حد قالى مره :انا برتاح اوى لما بجى عندك

و"على سلامه" قالى انتى استحاله تكونى عايشه وخلاص انى صاحيه ووخده بالك من كل حاجه

وبحبه بردو لما يكلمنى لما اكتب حاجه جديده تعجبه ويقولى "مجرمه كالعاده"

ـ التعليقات بالنسبة لك أهميتها؟

والله ماتفرق معانا الحاجات دى

ـ أحلى بوست كتبته مع اللينك ولماذا؟

لسه مكتبتوش

ـ أفضل مدونة قرأتها؟

احلامى المبعثرة

ـ أفضل بوست قرأته وضع لينكه؟

لقطات من حياتى

انا من هذا الجيل

اقراه وانت هتعرف ليه

ـ لو حد قل أدبه في التعليقات إيه رد فعلك؟

حسب

ـ أسوأ مدونة؟

المدونات النضيفه اللى مغسوله باريال

ـ أسوأ بوست أسوأ مدون؟

احمد ناجى الشهر ب"ابليس"

ـ اسمك المشهور بيه وسط أصحابك؟

ساسوووو

ـ عمرك؟

24

ـ برجك؟

عذراء وميزان

ايوه,مركبه برجين مع بعض يامعلم

ـ مجال دراستك؟

حسابات

ـ شخصيتك نوعها إيه؟

متمرده

ـ السفر بالنسبة لك؟

حاجه حلوه اوى

الصفات اللى خدتها من بابا؟-

حب القرايه

ـ الصفات اللي أخدتها من ماما؟

الجمال

ـ أكتر 6 حاجات بتكرهها؟

النكد

جرح القلب

الهيافه

الغباء

قعدة البيت

المرور لما يبقا واقف

كفتة الرز

ـ أكتر ست حاجات بتحبها؟

الضحك م القلب

اللمة الحلوه

صوت محمد منير

الشيكولاته

شيشه التفاح

فيلم/اغنية/قصيدة/كتاب حلو.دى حاجه بتقتلنى

اسكندريه طبعا

ـ الانترنت بالنسبة لك؟

موش هتقدر تغمض عنيك

باى باى ... هتوحشنى

مع انى كنت متعلقه بالموبايل بتاعى اوى

بس التكنولوجيا حلوة بردو

صاحبتى العاقلة...جدا

-عارفه انتى طلعتى هبلة اوى

-ماشى ياستى متشكره

-لابجد هبله هبله يعنى

-هو ايه حكايه هبله اللى انتو ماسكينهالى من ساعة اللى حصل.انا قربت اقتنع

-اصل المفروض يعنى وحده لامؤخذه ف الكلمه "صايعة" زيك متبقاش كده

تعليم واتعلمتى طول عمرك ف مدارس لغات

خروج وخرجتى

سفر وسافرتى

حب وحبيتى

صحاب وصاحبتى

نااااااااااااااااااااااااااااااااااااااس وعرفتى

كتب وقريتى

ده انتى قريتى كتب انا معرفش اساميها,بتقولى كلام حكم بس موش بتنفذى منه غير كلام "فرويد" و"اوسكار وايلد"

يعنى عندك كل مقومات الصياعه,يعنى موش المفروض تبقى كده خالص

يابت اجمدى متضحكيش الناس علينا بقا

-عارفه حاسة ان مفيش حد عرفته الا وخد حته منى....ومشى

ومش برجع تانى زى ماكنت ابدا

بقيت مليانة تعاوير

-ياااااااااااااااااااه انتى ازاى عايشة بالاحساس ده!!

.......

تحديث

"البنت اللى قلبها مصدى"

تدوينه وجدتها فى مدونه MoSaic,البنت دى حسيتها انا

فسمحت لنفسى ارفق اللينك

ميرسى يا محمود

بقالى كتير اوى -ده انا حتى نسيت من امتى بالظبط- بعمل حاجات حلوه عشان ناس بحبهم

بس موش دايما بلاقى المثل

وخلاص مبقتش مستنية ان حد يعمل لى حاجه خالص

خصوصا لو حاجه مجنونة اوى كده وموش ع البال

بجد ميرسى اوى يا محمود

الحركة دى فعلا فرقت معايا جامد

عايزين تعرفو طبعا عمل ايه

>

>

>

>

>

>

>

>

>

>

>

>

>

>

>

>

>

>

>

>>>>>>>

هأهأهأأأأأوو موش هقولكو

BROKEN HEART

المدونه مغلقه مؤقتا لمرور صاحبتها -اه اللى هو انا- بأزمه عاطفيه من العيار الثقيل

-----------------

ملحوظة:ابوس ايدين ورجلين اى حد هيعلق موش عايزه تعليقات من نوعيه,كله نصيب وهو الخسران وبكره اجوزك سيد سيده

البوست المئوى

ده البوست المئوى

مكنتش متخيله انى هكتبه ف يوم م الايام

اول بوست كتبته بتاريخ 11 مايو 2005 و مكنتش متخيله انى هكمل ف التدوين فتره طويله لأنى بزهق وملوله بطبعى بس اللى مكنتش أعرفه ان المدونه هتبقى من أهم أهم الحاجات ف حياتى

اكبر بكتير م الهدف اللى كانت معموله عشانه وانها تبقى مجرد "طق حنك"

ومن هذا المكان الطاهر احيكم فى هذا اليوم المبارك وأحب اشكر كل واحد دخل المدونه واعجب بيها واضاف ليها اى حاجه حتى لو كلمه,او حتى مااضافش

واحب اهزأ بردو اى واحد قالى اى كلمه وسخه ومامرمتطوش عليها

وكل سنه وانتم طيبين

الله .. الوطن .. المدونة

شاى والمسا Vs لمون والدستور

امبارح بعد الشغل كنت ارفانه اوى,ارفانه جدا

وبما انى ارفانه فميصحش أأرف حد معايا,فبعد ماخلصت شغلى طلعت على وسط البلد-لوحدى- ضربت فول بالزيت الحار من عند قزاز واشتريت الدستور وقعدت ف البورصه

وطلبت شيشه تفاح ولمون

وقعدت اقرا ف الجورنان

اللى رايح واللى جاى مسابنيش ف حالى سيبت الجورنان وبصيت حواليا لقيت الراجل اللى جمبى قاعد لوحده بردو,بيقرا المسا وبيشرب شاى وشيشه تفاح

ومحدش بيبص عليه

كل ده عشان انا بشرب لمون وبقرا الدستور!!!

مروه و منار

حبايبى الحلوين,حكايتنا النهرده عن بنتين-على طريقه ابله فضيله التى اسمعها كل يوم على موجات البرنامج العام اوان ف طريقى للشغل-الشغل المقرف المعفن الحمار,اللى عايزه ابقا اكتب عنه ف يوم.انتظروها تدوينه مليئه بالسباب البذىء -ان كتبت-

تدوينه اليوم ايضا تتعلق ب"الشغل" بطريقه او بأخرى فهمى كما قلنا عن بنتين كان الشغل سبب معرفتى بيهم أو بالاحرى القطر-اللى بيودينى الشغل,منا بروح شغلى بقطر عقبال امتلك- كما ذكرت انفا انى اعشق ركوب القطارات ومش عارفه مين اللى بيحبنى اوى ودعالى ف ساعه اجابه انى اركبه كل يوم وقد كان.ذكرت فى نفس البوست انى بحب البنات,بحبهم وانا اجتماعيه بطبعى ولكن كان لدى من الصداقات مايكفى,ولكن نظرنا لظروف شغلى الجديده فحتما سأحتاج دائره معارف جديده

نبدأ

مــــــــــــــــــــــــــــروه

كانت تقف وحيده على المحطه وانا طالعه سلالم المحطه بسرعه لاجدها خاويه-المحطه لا مروه- ظننت انى فقدت القطار بلانجليزى Miss the train,لم اكن اعلم بعد ان اليوم هو السبت ويوم السبت بتكون الرجل خفيفه ع المحطه لان معظم الناس-المحظوظين بالطبع- ياخذون يوم السبت اجازه من الزفت,فسألتها بلهفه -مروه بقا المره دى لا المحطه- :902 مشى؟

-لا لسه

لسه امممممم اذن امامى الوقت الكافى لأتملها على مهل,بيضاء رفيعه جدا -مثلى- احسست انها تشبهنى ف شىء ما ,حتى الاسم فلا يفصل سوانا سوى حرف واحد متغير ف بدايته.رفعت موبايلها لتتحدث فيه,انها "العده" المفضله لدى من كل ما أنتجته نوكيا بصرف النظر عن ان امكانايتها موش عاليه اوى,واضح انها تمتلك "ّذوق" لابأس به

ماشدنى أكثر من الموبايل ونضاره الشمس الجامده اللى كانت لابساها,كتاب ذى غلاف اسود مكتوب عليه بحروف فوشيا" شيكاغو" اذن هي من الفتيات اللواتى يندر ان تقابلهم خارج المحميات الطبيعه-فهذا النوع من الفتيات اللاتى يقرأن نادر جدا ومهدد بالانقراض- ,لأميل عليها واسالها-نسيت ساعتها انى نادرا جدا ماأكون البادئه بالكلام فهذا يتنافى مع الانطباع الذى يعطيه وجهى لكل من يرانى بأنى "تنكه"-:حلوه؟

لترد بتأثر شديد:اه حلوه,حلوه اوى

أعرف اننا سنصبح صديقتين وأخبرها انى ابتعتها من المعرض ولكن لم يحن دورها ف القراءه بعد

تخلع نظارتها الانيقه,وهنا اهاااااااااااا عرفتها,انها اخت "ساره" اللى كانت معايا ف الفصل ف ثانوى

اسألها

لترد بالايجاب ويتواصل الكلام بيننا ليأتى القطار واتوماتيكا نركب ف مقعدين متجاوريين تخبرنى بانها اكبر منى بسنه وانها خريجه فنون جميله الاسكندريه وتعمل ف مكتب ديكورف المهندسين وانها عائده من دبى لانها كانت تعمل هناك,استغربت جدا أين الاسر التى تترك بناتها تعمل ف دبى اليومين دول؟

تخبرنى عن باقى شقيقاتها الأخريات وأبوهم الذى نعتنه بلفظ "بابى" مرتين وصححته ف الثانيه بارتباك الى "بابا"-ربما بعد ان بدا منى نظره استنكار- دليل على انها فعلا معتاده على منادته ب"بابى" وليست من محدثين اليومين دول

حسيتها متحفظه فى بدايه الحديث عكسى كنت اتحدث بتلقائيه مرحه

سألتها ان كانت ستركب القطار يوميا؟ فاجابت انه ليس بالضروره وانها كثيرا ماتأخذ الميكروباص الى القاهره

افترقنا بلا تبادل ارقام موبايلات تاركين اللقاء القادم للصدفه وحدها

____________________________________________

منـــــــــــــــــــــــــــــــار

اليوم انا عصبيه ومضغوطه تماما,اركب القطار لأجد رجل فى العقد الخامس يجلس مكانى-لا أرحم سنه- وأطالبه بمكانى أجلس بعصبيه وأضع سماعات الام بى فور,عصبيه تماما اعبث فى محتويات شنطتى بلا هدف سوى اخراج عصبيتى اخرج تذاكر القطار والاشتراك اكتشف ان هذا ليس مكانى اصلا وانى قومت الرجل دون وجهه حق بس موش مهم هو كده كده مكنش حاجز.اتسلى بتمزيق التذاكر المستعمله والقائها على أرضيه القطار فأنا كما ترون غير مهتمه كثيرا بنظافه مدينتى ,او تلك التى فات موعدها دون ان اسافر بها - تغظينى جدا جدا هذه الحركه فكثيرا ما اقطع التذاكر ولا استقل القطارات - العن السكه الحديد ف سرى , بالبقعه العمياء للرؤيه الاحظ الجالسه بجوارى تحدق فيا, لا اهتم فأنا أشعر بالملل.

أنزع سماعات الام بى فور لا اذكر لما ربما لأفعل شىء ما وربما لا لشىء الا لانى لا اجد شىْ اخر افعله,تسألنى بسرعه قبل ان أهم بوضعها ثانيه:هو انتى كنتى تجاره انجلش؟

أهز راسى أن "نعم"

-اصل انا كمان تجاره انجلش بس اكبر منك بسنه؟

-2003؟

-لا 2005

-يبقى انتى الدفعه اللى بعدى

-موش عارفه بس انا كنت بشوفك ف الكليه وفاكراكى أصغر منى

وانا لا بشوفك ولاأعرفك اساسا.كعاده المشاهير دائما الكثير جدا يعرفونى على الرغم من انهم مجهولين كليا بالنسبه لى كما اعتدت ان اقول لأمى ف هذه المواقف التى تخبرنى فيها عن اشخاص كثر يعرفونى ويشاهدونى باستمرار"من الطبيعى ان يكون معك صوره موقعه من الفيس بريسلى ولكن من غير الطبيعى ان يكون مع الفس صور موقعه منك"

تسألنى فى حذر:انتى مخطوبه؟

افرد لها يمناى بلا خواتم

فتعاود السؤال:متخطبتيش قبل كده؟

-NEVER

بارتباك:اصل انا سمعت انك اتخطبتى

كشأن جميع المشاهيربردو,الاشاعات موش سايبانى

أقرر انها ستكون مسليه أكثر من الام بى فور فأطفئه بهدوء

يتطرق الحديث الى مشاكل خاصه جدا, يبدو اننى كنت ف حاجه الى "غريب عنى" لأحكيله فالموضوع فى طى الكتمان عن كل من أعرفهم بالفعل,وجدت انها مرت بظروف مشابهه فكان حديثى معها مفيدا,لا لنصائحها اللوذعيه ولكن لأنى كنت بحاجه الى الفضفضه

محطه مصر تأتى سريعا ,أرى اللافته من نافذتى "القاهــــــــــــــــــــره" فتجدد فيا رغبتى ان اكتب بجوارها "قاهره المعز المذله لأهلها"

تتجه هى الى "مكرم عبيد" وأأخذ انا طريقى الى "مصر الجديده" فنفترق فى "أحمد حلمى" وانا اسئلها هو انتى اسمك ايه؟

للحديث بقيه واللى هيجى بكره هيسمع الغنوه وهيسلى بالحدوته وتوته توته

وحشتنا يارجل,ابقى تعالى كل يوم

"اصل المنجه انواع,فيه فنص وفيه هندى فيه سكرى,انا مراتى بقا كل الانواع دى مضروبين بالشبشب...قصدى ف الخلاط"
-الراجل ده كانو بيعذبوه بالكهربا ف المعتقل ولا ايه؟
-لا,ليه؟
-اصله بيهرتل اوى
-لا مهو طول عمره كده

انا والاستطلاع والاستهبال الحكومى

كشف استطلاع للرأي أشرفت عليه مؤسسة أمريكية بارزة وتم إجراءه في 47 دولة حول العالم أن المصريين هم أكثر شعوب العالم المستطلعة آراؤهم سخطا على حكومتهم.
وقال الاستطلاع إن 13% فقط من الشعب المصري أجاب بالإيجاب على سؤال "هل أنت راضٍ عن حكومتك؟.
وقالت مؤسسة بيو بول الأمريكية الشهيرة التي أجرت الاستطلاع عن الاتجاهات العالمية في العالم، وكشف عنه مساء الأربعاء إنها استطلعت آراء 1000 شخص في مصر للوصول إلى هذه النتيجة، حسبما ذكرت وكالة أمريكا إن أرابيك.
وفي المرتبة الثانية في السخط على الحكومات جاءت إسرائيل التي قال 23% فقط من مواطنيها إنهم راضون عن حكومتهم، بمعنى أن اثنين فقط من كل عشرة إسرائيليين راضون عن حكومتهم.
وكانت أعلى نسبة رضا بين الشعوب في العالم عن حكومتها في العالم في ماليزيا، إذ قال 92 % منهم إنهم راضون عن حكومتهم، وجاء رضا الشعب الصيني في المرتبة الثانية بنسبة 89 بالمائة، ثم بنجلاديش بنسبة 87 بالمائة، ثم تنزانيا بنسبة 86 بالمائة.
وأما عن باقي شعوب منطقة الشرق الأوسط التي شملها الاستطلاع فجاء الشعب الكويتي في المقدمة على الدول العربية المستطلعة إذ قال 79% من الكويتيين إنهم راضون عن حكومتهم، ثم لبنان بنسبة 61% ثم 52% في فلسطين، ثم 47% في المغرب، ثم 45% في الأردن، ثم 23% في إسرائيل، وأخيرا 13% في مصر.
الجدير بالذكر أن هذا الاستطلاع لم يتم إجراءه في باقي دول العالم العربي.
ورغم أن النسبة في مصر كانت هي الأسوأ من ناحية الرضا عن الحكومة، فإن مصر كانت ثاني أعلى دولة قال فيها السكان إنهم يشعرون بالأمان وإنهم لا يخافون من السير ليلا بمفردهم في أماكن مظلمة قريبة من مساكنهم.
إذ جاءت مصر بنسبة خوف بلغت 16% فقط بعد فلسطين التي شعر 8% منهم بالخوف فقط لتكون فلسطين أكثر شعوب العالم شعورا بالأمن من الجريمة تليها مصر.
المصريون ثاني أكثر الشعوب تشاؤما
وتناول الاستطلاع جوانب أخرى حيث كشف أن الكويتيون والفلسطينيون ثم المصريون – على التوالي – هم أكثر الشعوب تشاؤما في المنطقة العربية بشأن مستقبل الأجيال القادمة.
وقال 44% من الفلسطينيين إن مستقبل أبنائهم سيكون أسوأ، وهي نفس النسبة في الكويت لتشترك الكويت وفلسطين في المركز الأول في العالم العربي في القلق على مستقبل الأبناء.
وجاءت مصر في المرتبة الثانية حيث توقع 43% من المصريين أن يكون مستقبل أبنائهم أسوأ.
وجاء اللبنانيون في المركز الثالث بنسبة 35% ثم الأردن بنسبة 27%.
وجاء المغاربة كأفضل شعوب المنطقة تفاؤلا إذ توقع 13% فقط منهم مستقبلا أسوأ لأولادهم.
وعن صورة أمريكا في العالم أكد الاستطلاع أن ازدادت سوءا بنسبة كبيرة عن مستوياتها المنخفضة أصلا في كل مناطق العالم ما عدا إسرائيل والمناطق الفقيرة في إفريقيا.
وأظهر الاستطلاع نتائج مثيرة منها أن أكثر شعوب الأرض اطمئنانا للولايات المتحدة وعدم الخوف منها هو الشعب الإسرائيلي على عكس معظم مناطق العالم.
كما حمل الاستطلاع مفاجأة، إذ أظهر أن الفلسطينيون هم الأقل شعورا بين الدول العربية أن إسرائيل تمثل تهديدا لها بنسبة 60% فقط، في حين كان نسبة القلق من إسرائيل الأكبر في مصر إذ قال 86% من المصريين و81% من الأردنيين و74% من اللبنانيين إن إسرائيل "تمثل تهديدا جادا في المستقبل".
وعن مقدار رضا الشعوب عن قادتهم الدينيين وعن تأثيرهم على المجتمعات، سجلت الدول الغنية الغربية سخطا كبيرا على أوضاعها الدينية وعلى دور رجال الدين هناك.
وافاد الاستطلاع المطول ان نسبة الرضا عن علماء الدين والقادة الدينيين في المنطقة العربية عالية أيضا وخصوصا في مصر، إذ بلغت النسبة 77% من المصريين الراضين عن علماء الدين و69% في الأردن ثم 66% في الكويت، و64% في لبنان و56% في فلسطين، بينما جاءت المغرب في المرتبة الأخيرة بنسبة رضا بلغت 43%فقط.
وكانت نسبة الرضا عن تأثير القادة الدينين وعلماء الدين في أمريكا 58% وفي كندا 49% وفي ألمانيا 53% وفي فرنسا 52% وفي إيطاليا 48%وفي بريطانيا 39% وفي أسبانيا 33%، في حين كان 46% من الإسرائيليين راضين عن قيادتهم الدينية، وفي السويد 16% وفي اليابان 14% فقط، وهي النسبة الأقل في العالم

------------------------------------------------------------------------

حلو اوى الاستطلاع ده,حسيته استطلاع عليه القيمه كده غير انه طبعا لاقى هوا ف نفسى

الناس خلاص ارفت بقا,كفايه ارحمونا

الناس فعلا عمرها ماكانت ارفانه اد ماهى ارفانه دلوقتى,والعالم دى سايقه ف الهبل خالص وعامله نفسها موش هنا اساسا.زده احسن لانهم لما يبفكرو يتكلمو بيضحكو الناس عليهم,تلاقيك ف الظروف اللى احنا فيها دى رئيس وزراء اهبل راح فاقعلك تصريح "ابشروا انخفاض الاسعار وتراجع التضخم" لا احاااا بقا هو فيه حاجه بتغلى وترجع تنخفض تانى,اتحداك اساسا لو انت عارف شكل العمله المصرى ايه ولا بنتزل تشترى بيها حاجه اساسا -احد الخبثاء بيعلق ويقولى لا عارفاه امال بياخد عمولاته والذى منه ازاى,مشيها الذى منه.اقوله لا حضرتك ده بيتنقط بالدولار متبقاش غبى-,وجاى تكلمنى دلوقتى على الاسعار ومحدودى الدخل,ده عبيط ده ولاايه؟

عديها ماشى,واحنا موش مصريين لا هنود وبنركب الافيل,موش بناكلها وطبعا بنصدق الحكومه الشفافه بتاعتنا التصريح-الاهبل اعلاه بتاريخ 25-6 حلو الكلام؟

خد ده بقا قبليه ب6 ايام بس؟

استهبال حكومى رسمى

ومازال الاستهبال مستمر ومازالت الزياده مستمره ف مرافق حيويه وحساسه جدا جدا

وبردو منسيش يقولك "لامساس بمحدودى الدخل" والله ماقصرت

مما لايتناسب ابدا ابدا مع مستوى الخدمه المقدمه

ليصبح صيف ساخن جدااااااااا

واحب اقول للراجل العبيط ده ان الناس ف البلد اللى هو رئيس وزرائها موش لاقيه تاكل,-لا دى قديمه حضرتك- دى موش لاقيه تشرب ومصر هبه النيل اللى هيردويت 2007 غير اسمها ل"مصر هبه الجراكن" بيصلو صلاه استسقاء ,صلاه استسقاء ف 2007

موش كفايه الخيبه اللى احنا فيها لا,ربنا يزوده بلاءه بمسئول- اهبل غير الاولانى- من اللى بيحمو كلابهم بالميه المعدنيه خوفا على صحه الكلاب والناس بتشرب ميه -لامؤخذه صرف صحى- ربنا فتح عليه وعرف السر-لاموش سر شويبس- سر الازمه,ازمه الميه,السر ايه بقا قولتلى.زياده استحمام المواطنين هيه اللى ادت للازمه

ياحومتىىىىىىىىىىى

استحمام؟ ده اخر سبب ممكن يتصدق لان زى ماكلنا عارفين الشعب المصرى معفن بطبعه.استحمام ايه اللى انت جاى تقول عليه؟

بس الحكومه بتطمنهم بيتقولهم هتشربو كمان 5 سنين

موش عارفه الناس دى محبكاها ليه,5 سنين ويشربو هو الدنيا طارت

و لا الوليه مرات اللطخ صاحب العزبه اللى عماله تطلع ف التلافزيونات وتقولك "القراءه للجميع" ومغرقه الشوارع يفط,النبى تتنيلى الاول وتقولى "الميه للجميع",يشربو الاول وبعدين نفكر معاهم ف موضوع القرايه ده بعدين

لا وياجدع ربنا فاتحه عليهم من كل ناحيه حتى ف دى.

حاجه تانيه قصدى تالته م الحاجات الكتير اللى فقعت مراره الشعب المصرى ف الفتره الاخرانيه ومرارتى انا شخصيا,موضوع الدى اس ال ده,انا لحد فتره قريبه مكنتش متخيله ان العمليه هتبقى كده,متخيلتش ان الشر والتفكير الشيطانى ممكن يوصلهم لكده,ال كل جيجا ب10 جنيه يااخى احه تريبل دى بقا

ده انا لو فتحت الماسينجر وكحيت كحتين ف المدونه هعملى ب50 جنيه

.....

كفايه كده مع ان بلاوى الحكومه متتعدش بس انا حاسه انى موش هتقفل اساسا

وضحكنا عليهم

يسسسسسسسسسسسسسسسسسسس

انا سعييييييييده

وضحكت عليكو

اصلهم عندنا ف الشغل عاملين فيها ناصحين وعاملين فايروول للماسينجر شات,لا موش عشان الموظفين متنشغلش عن شغلها

ياريييييييييييييت

دول عاملينه عشان السرعه متقلش لو كل واحد فتح الشات وقعد-زىه زى الداونلود اللى مانعينه كده بالظبط-,موش فاهمه دول جايبن للشركه كلها خط 512 ولا ايه

عالم معفنه اوى اوى يعنى

المهم انا بروح الشركه دى مبعملش اى حاجه ولا بكلم اى حد مبعملش غير انى اقعد ع النت وانا اصلا مبحبش الشات اوى يعنى-بس شكلى لازم احبه ف الفضا اللى انا قاعده فيه ده- ولقيت كل الموظفين بيشيتو من مواقع بتدخل على اميل الهوتميل بس من غير مايتستب ع الجهاز,اه انا عارفه انه موش اختراع ولاحاجه

بس انا مكنتش عايزه اسال حد فيهم,عشان هما ولاد وسخه اساسا ومعاملتهم خره ومش عايزه احسسهم بقيمتهم خالص

وانا مكانتش فارقه معايا ومدروتش,بس دلوقتى من كتر الملل دورت ع السايت ولقيته

بسهوله طبعا

وقلت احطه لأى حد ممكن يحتاجه

http://wwwl.meebo.com/

ام اس ان,ياهو...اى حاجه شغال

اديله الجزمه

من مذكرتى

(1)

أحبه كما لم احب من قبل

أحبه بكل "بكاره" هذه الكلمه -نعم هذه هى الكلمه-

بكاره الاحاسيس كلها

احسبها اللمسه الاولى والقبله الاولى وكلمه العشق

احبه بدون قيود

ولاشروطى السخيفه التى اضعها فى بدايه قصص حبى

ليصبح حبه هو الشرط الوحيد

والقيد الازلى

فضلا لا,من قال "الازل" او "الابد"

لااهتم لهذه السخافات

ولاأومن الابالخلود الالهى

ولا اريده لأبد

ولا حتى خلود حبك له؟

بل خاصه حبى له,حبى لا يعرف القيود

فلماذا يعرف الابديه؟

احبك وكفى

احبك...فى هذه اللحظه

هذا ماأعرفه...وأعنيه

انا لم اسالك البقاء والموت هنا

فلماذا تطلب صكا بالابديه

(2)

الاتخافين ياصغيرتى؟

مم أخاف؟

سأعتبر انك لم تفهمى القصد من سؤالى

الاتخافى "الاخريات"؟

لا...كففت عن خوفى منذ زمن

رحلوا جميعهن وبقى هذا القلب ملكى

احم...لا أرى ماضى يوحى بكل هذه الثقه

لكنى المس -وحدى- كل الحب

كامل حنانه فى كامل رجولته

أين لأخرى ان تبقى ؟!

أين لها من مكان فى هذا القلب!

أين لها من نصيب -استنفزته كل- من حبه؟

(3)

رجاء لاتسألينى لماذا؟

لماذا هذا العشق الاستثنائى؟

لانى ببساطه:لا أعرف

ان كنتى تتوقعين اجابات المراهقات المعلبه

فعذرا ليست لدى واحدى

احبه لانه: طويل

احبه لانه: وسيم

او حتى لانه: يفهمنى

لا...

احبه لانه "هو"

هو بكل سخافاته

هو بملمس ذقنه النابته

هو بدخان سجائره

هو بكل هذه القذاره

هو بكل معنى جديد اكتشفته معه فقط

لمفردات الحياه المعتاده

أحبــــــــــــــــــــــــــــــــــــــــــــــــــــــــــــــه

كما لم احب سواه...

تاج...تانى

اتمررلى التاج ده من عند "احمد سمير" الصراحه هو تاج رخم ,وانا هجاوبه عشان مكسفوش بس وعشان ميبقاش على وش المدونه سونتينات واندريات حرمى والشغل اللى تحت ده

انت مين؟

انا احسن واحده ف الدنيا

سؤال غبى,لازم اجابته تبقى غبيه

مين اكتر 6 اشخاص بتحبهم؟

اشمعنى 6؟

انت سعيد؟

ساعات ساعات

بس ساعات السعاده بخليها "سعاده اوى"

لو اجتمعت انا وحسني مبارك في غرفة واحدة؟

هدخل عصايه مقشه ف مؤخرته

لو معاك مليون ونص جنيه......تعمل بيهم ايه؟

هدلع نفسى بقى

بتحب مصر؟

مبحبش الحكومه ولا الشعب

اى حاجه تانيه معاك

بتحب البنات؟

اه اوى,بيصعبوا عليا جدااااااااااااااااااا

ولو الصيغه الحريمى للسؤال"بتحبى الرجاله؟"

يبقى بحبهم شرط ان يكونو فعلا "رجاله,واكتر حاجه بتعجبنى ف الراجل دمااااااااااااااااغه

انت مسلم؟
أه.....الحمد لله
ليه؟

عشان لما كبرت حسيت ان الدين بتاعنا -لما يتفهم صح- مفيهوش تناقضات

مين اكتر شخصية ما تقدرش تستغنى عنها في حياتك؟وليه؟

TOP SECRET

ايه اكتر موقف محرج اتعرضت ليه في حياتك؟واتصرفت ازاي؟

امممممممممممم المواقف المحرجه كتيييييييير بس غالبا بعد ماتمر الواحد بيعمل منها افيهات بعد كده ويضحك على نفسه

بس فيه موقف بيغظنى اوى كل ماافتكره,واحنا ف الجامعه كان فيه سور عالى دايما نقعد عليه.كل اصحابى كانو قاعدين وانا واقفه تحت وبنتكلم بصيت لقيت انتيمى قالتلى تعالى اما اقولك حاجه وميلت عليا وقالتلى ف ودنى

-ابقى البسى بادى تحت البلوزه دى,عشان كل حاجه باااااينه

-لاياراجل

-اه بجد

-يابنتى قولى كلام غير ده

-يابت بقولك انا شايفه كل حاجه

-يادى الفضيحه,ولاانتى بتشغلينى

الاقيك واحد لا صاحبنا ولانيله معرفش ايه اللى كان مقعده معانا اساسا يقولى"اه عندها حق"

-والله انت عارف احنا بنتكلم على ايه اصلا؟

-اه وكنت عايز اقولك كده بس احرجت

ايه الأمنية اللي بتدعي ربنا دايما انه يحققها لك؟

انى اتجوز اللى بحبه,امنيه عيالى اوى.عارفه

تمرر التاج لمين؟

موش همرره وميرسى يابوحميد ع التدبيسه

نو كومنت

كترت اوى الايام دى الصور الطريفه,اللى ملقوطه بعدسات عبقريه مجهوله لطرائف بلدنا

انا موش هحط غير دى

لانها جديده و بتاكد كلامى ف البوست اللى قبل كده

انا موش عندى كومنت,اللى عندة يتفضل

باتنين ونص

ليه كل مااروح سوق\معرض\موول الاقى اكتر حاجه بتتباع الاندرات الحريمى؟

احد الاسئله الكونيه اللى تحتاج فعلا الى اجابه

كل 5 يونيو وانتى طيبه يامصر

نهار داخلى

اوضه السفره عندنا ف البيت

انا وبابا ونشوى بنت خالتى بنتغدى

بابا:عارفين ياولاد ان"شريفه ماهر" كانت بتغير هدومها ف غرفه قياده العمليات الجويه فجر يوم 5يونيو67

انا:مين "شريفه ماهر" دى يابابا؟

نشوى:مين" 5 يونيو" ده ياعمو؟قصدى ايه اللى حصل 5يونيو 67 ده؟

مـــــــــــــــــــش هاننسى

تاج وداااااااااير

حان الان وقت التاج,شتمنا ف الرجاله وابحنا زى محنا عايزين وحطينا صوره الريس ع المشنقه بدل صدام .نجاوب ام التاج بقى قبل مايحمض

أحب شخص لقلبك في الدنيا؟إنسان مستعد تضحي بحياتك - ركز فى كلمة حياتك - عشانه؟

عشان كلمه حياتك دى بالذات يبقى محدش

إنسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

أحمد ابو عرب

ما هو:اسم أجمل كتاب كتبه بشر قرأته ومحتفظ به حتى الان؟

ايه ده موش عارفين مين أحمد ابو عرب,ده كان مديرى ف الشغل .لاموش بكرهه عشان مجرد مديرى ف الشغل

عشان استحاله ممكن تلاقى بنى ادم فيه كل العيوب اللى ربنا خلقها الا ده,انا اول ماهو اتنقل عندنا كان كل الناس بيكلمونا ويعزونا,قولت اكيد الناس دى ظالماه مفيش حد كده اصلا.ومع انى كنت عامله حاجز جامد اوى بس صعب عليا-ودى غلطه عمرى اللى بندم عليها لحد دلوقتى-وكلمته

الباقى ابقى احكيلكو عليه ف بوست لوحد,بس على فكره مصيره مختلفش كتير عن المذكور اعلاه.مقتول ومش عارف ايه الكلاب تنهش الجثه,ودى جزات اللى يجى عليا طبعا

اسم كتاب - كتبه بشر برضه - انت متعلق بيه وبتقرأه كل فترة؟

الاجابه ع السؤال ده واللى قبله "رباعيات جاهين"

أهم جهاز منزلى أنت متعلق بيه أو بتستخدمه كتير؟

الكمبيوتر,اشمعنى انا يعنى اللى هشذ عن القاعده

مكان تحس بالراحة عندما تدخله؟

اقولكو بس متضحكوش,القطر(المكيف طبعا)

اه برتاح راحه فظيعه اول مااركب القطر,موش مهم رايحه فين بس ببقى مرتاحه اوى.ولو انا واقفه على كوبرى او مزلقان ومستنيه القطر يعدى ببقى نفسى اوى ابقى فيه واقعد افكر ياترى الناس اللى مسافرين دول رايحيين فين وجايين منين

ياااااه القطر

مكان تحس فيه بالحنين الى شيء لا تدرى ماهو و ذكريات جارفة الى لاشيء؟

امممممممممم عندى حنين مابعرف لمين

بلكونه واحد صديق,اكيد لما يقرى هيعرف نفسه.بدخلها واشوف الView الروعه للقاهره من فوق

بحس ان الحنين مبهدلنى

اجمل مدينة زرتها داخل مصر ؟

طنطا ببقى مبسوطه اوى وانا رايحاها تقولش رايحه اسكندريه

أجمل مكان طبيعي رأيته داخل مصر ؟

النيل ف اسواااااااااااااااااان

شخصية كارتونية بتحبها؟

كعبول والقط مشاكس

نوع هاتفك المحمول؟

نوكيا 3200

سرعة بروسيسور جهازك؟

3.2 دويل كوور,خد بالك

بس مكنتش اعرف انكو كده بتحكمو ع الواحد من موبايله وبروسيروره

حجم ذاكرة -هارد- جهازك؟

120 جيجا

المساحة التى تشغلها المواد الاسلامية على جهازك؟

معرفش بس هو المصحف بصوت العجمى

نفس المساحة السالف ذكرها فى قلبك -الإجابة لنفسك عشان الرياء يا اخواننا -

محدش جواب ع السؤال ده اشمعنى انا

أهم هدف انت واضعه لحياتك الآن؟

يااااااااااااااااااااااه مبحبش ام السؤال ده

معنديش,بطلت من زمااااااااااااان

مواصفات فتى \فتاة الأحلام بالنسبة لك؟

اهم حاجه يكون فاهمنى وفاهم دماغى

رقيق وحنين وبيهتم بيا

مثقف

صف ما يأتى:شعورك لما بتسمع كلمة مصر ؟

بقول ف سرى"ليه كده يامصر.ده انا بحبك"

شعورك لما بتسمع كلام عن اليهود؟

بفتكر مرات عمى,اه مرات عمى على طول

لا هيه موش يهوديه بس امى طول عمرها بتقول"جيهان دى يهووووديه" لحد مااقترنت صورتها ف دماغى بسيره اليهود

شعورك لما بتشوف ظابط شرطة؟

ببقى عايزه اضربه على قفاه

شعورك لما بتشوف الكناس العجوز فى الطريق؟

بيصعب عليا اوى

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

كلك حركاااااااااااااااااااااات

إحساس يراودك فى إشارة مرور مغلقة بسبب مسئول كبير؟

بتبضن........قصدى بتخنق عشان محدش يزعل

امرر التاج ل

محمد فكرى,اخر من الاخرين

محمود,ابن فطومه

Alexandrian far away

ابــــــــــــــــــــــــــــــو لارا

واتوجه بالشكر ل محمد ياسر اللى مررهولى اصلا

والسلام عليك ورحمه الله وبركاته