دنيا..نصيحه بلاش

موش عارفه يامنير لحد امتى هتفضل تراهن على جمهورك وانك بتعمل حاجات زى الخره وبردو هتنجح

الفيلم زباله بكل المقاييس

لاقصه

ولا مناظر

ولا سيناريو ولااخراج ولاحتى افيهات

بصراحه الفيلم يستحق -بجداره- جايزه اسوء فيلم ف 2006

قالولنا ان الفيلم عن الختان وموش عارف ايه بيسىء لسمعه مصر,طب ايه اللى جاب الرقص الشرقى,والحب وحريه الستات والجوازوالجنس واللذه والعادات والتقاليد والصوفيه والشعر ف الموضوع؟ايه الوليه اللى ماصدقت عملت فيلم حطت فيه كل اللى تعرفه دى

فيلم مبتور وواضح ان فيه مشاهد ومواقف كامله محذوفه-حتى لو مكنتش اتحذفت بردو الفيلم زباله-كل الممثلين قبل العرض كرهوا الفيلم ماعدا الوليه المجنونه اللى اسمها جوسلين دى"النصر له الف أب والهزيمه يتيمه"

والفيلم نازل ف دور عرض لاتتعدى اصابع اليد الواحده ومن غير دعايه

الموسيقى الصوفيه كانت حلوه وتلقائيه الكاميرا ف الحركه فيماعدا ذلك نيله

حنان ترك طول الفيلم لابسه احمر وبتلف حوالين نفسها ف رقصات دائريه ,وفتحى عبد الوهاب كنت حاسه انه شبهه "سعد الصغير".ازاى معرفش؟

ومحدش فاهم حاجه عن الابطال دول,ناس غريبه عنك وهتفضل غريبه لحد مالفيلم يخلص

المشهد اللى كانت حنان بتتصور فيه على كوبرى قصر النيل بفستان الفرح الورق اللى كانت لابساهولنا ده,افتكرت الفيلم خلص اصل خد

بالك ان الفيلم ده م النوعيه اللى بتخلص كده فجاءه ف اى وقت بدون اى مقدمات

مشهد الختان:اللى كان معمول عليه بالو عشان ميتحطش ف الفيلم,اطمنو اتحط بس محدش هيقدر يشوفه فضلت مدوره وشى لحد ماالعمليه خلصت

كانت امنيتى انى اشوف منير على شاشه السينما بدلا منها صدمت من شكل رجليه المقرف,هو جاى م الصومال؟ على راى محمد ده مينفعش يطلع حافى ابدا ف اى كليبات ولاحتى حفلات,محمد اللى كان تاعبه أوى ان فتحى عبد الوهاب ف الاخر بيطلع مهندس معمارى "زيه" الواد صوت وجاله الهسهس ولم علينا السينما-اللى كانت فاضيه اصلا- ده .ده معمارى؟

لأجدنى ارد عليه باقتباس من الفيلم عن شغلانه الرقاصه "وماله شغلانه شريفه"

____________________________

ملحوزه:اخر مره يامنير,بجد اخر مره

جمال مبارك..مدونا

قعده من يومين ع النت-لابيه ولا عليا- سايتات تشيلنى وسايتات تحطنى فى فضاء الله -السيبرى- الواسع واذ فجاءه الاقيلكو ايه,مدونه بس موش اى مدونه ياباشا دى مدونه جمال مبارك اه اتسرعت كده ليه بقولك مدونه جمال مبارك شخصيا..اه والله(يعنى الحزب الوطنى,يعنى أمانه السياسات,يعنى الشباب الوطنى,يعنى الفكر الجديد... نقول كمان) انا كنت قربت انام ع الكى بورد بس طبعا
الخبر\السايت نفض كل أثر للنوم من عينى (ايه يابت ياساسو التعبيرات الجامده دى)
البلوج اسمه "الوريث" جنبها سوره اسم النبى حارسه
أول بوست وف لفته انسانيه تاريخيه غير مسبوقه من نوعها تبرئه ذمه من اللى حصل لمحمد الشرقاوى وان الراجل زعل اوى اوى وعيط اه والله عيط,اومال موش بنى ادم وله مشاعير زينا,وقاله:ليه ليه ياعادلى تعمل كده,وقعد مخاصمه يجى تلات ايام
والبوستين اللى بعد كده-موش بوستين يعنى بوسه وبوسه لا بوست وبوست- حوار هادى جدا,وطنى جدا جدا عن الحوار الحضارى والمعارضه اللى موش عارفه هيه عايزه ايه وفكره التوريث.حوار يتميز بسئاله منقطعه النظير مما عزز لدى فكره ان السئيل ده اكيد هو .مفيش ف ال70 مليون سئاله زى سئالته,الراجل بيلعب على وتر"ربما اكون هو وربما اكون موش هو"
طبعا لحد هنا الموضوع بقى فوق احتمالى البشرى لازم اشوف اى حد ادبسه معايا ف الحوار احسن نافوخى هيتلحس بس ده الساعه 4 صباحا
طب ايه ندبس مين معانا؟فتحت الماسينجر لقيته اونلاين "عادل" روحى روحى روحىىىىىىىىىى-هيه فعلا طالبه عادل-

-عادل

-ايه ياحبى

-انت فايق ولامسطول؟

-فايق

ليه

-اصل عندى خبر لو انت فايق هيسطلك ولو انت مسطول هيفوقك

-قولى ياجلابه الخير

-تخيل مين عمل بلوجر؟

-مين؟

جمال مبارك

-ايه ده انت عرفت منين

-ا*ا

انا خبطتها كده,هو عمل بجد؟

-اه

-موش هو طبعا

-ماهو موش هو بس تلاقيه واحد م العصافير بتوع امن الدوله بس نبيه شويه,شوفت الافكار المفتكسه عشان يعرف رد فعل الشارع

فاكر نفسه هياخد دبوره زياده بس ده كده هياخد فيها عشان جابله الشتيمه

-او يمكن واحد بيروش مالوش دعوه اصلا بأى حاجه

-بيروش؟ ايه الساديه دى

-مازوخيه بقى .فيه كده

-لاموش مازوخيه ,المازوخيه حب تعذيب الذات,دى ساديزم

-لامازوخيه ماهو ذاته هتتعذب بالكونتس اللى هيقراها

-لا موش هتتخيل الكومنتس اللى محطوطه مؤدبه جدا,تقريبا الناس خايفه ليطلع هو,موش دول المدونين ولا الفاظ المدونين ليس كعهدى بهم خالص

الكلام اغلبه من عينه السيد\جمال مبارك,ونفتح صفحه حوار هادى

تخيل؟ دول هما هما اللى لو لقو حد بيلمح لسيره تعاطف مع النظام يطلعو عين امه شتايم

تخيل والنبى ياعادل لو انت ادامك جمال مبارك شخصيا كده هتقولو ايه؟

-** ام سيادتك يافندم

-بالظبط كده

-ادينى اللينك انا هكتبله تعليق حلو

-لا لا ياعادل,خليك انت بره عشان لو انا اتمسكت تعرف تجيبلى محامى

وبعدين انا هعترف بعد اول قفا,اه احسن يكون العشم واكلك ولا حاجه

-................

-للاسف مانع تعليقات الانومنيس

-طبعا لازم اللى يعلق بيقى عنده مدونه,امال هيجيبه ازاى

الراجل معندوش مانع انه يتشتم من المدونين,لكن من بره لا

-طب منتى كمان مشتميتهوش كما ينبغى

-عشان انا مؤدبه اصلا وده اخرى ف الشتيمه

-انتى هتقوليلى

-نعم

-طب انت كنت هتقول ايه؟

هنشرهولك على نفقتى,قصدى على مسئوليتى

-كنت هقوله

"لو انت واحد داخل تروش احسن تنتحل شخصيه انا دانا.انا دندن

ع الاقل الناس تتكلم مع شرموطه موش خول"

اسيبكم مع المدونه بقى

http://gamalmobarak.blogspot.com/

عيد ميلاد الانسه ماما

النهرده عيد ميلاد مامتى,حبيبتى.والراجل بتاع الورد لسه مجاش

يخرب بيته,شكله تاه ف العنوان

موش هقعد اقولكو الست دى امى وفلذه كبدى واقرع عليكو انتو موش غرب,بس العلاقه بينى وبين امى وابويا غريبه جدا

لحد فتره قريبه اوى كنت بكرههم جدا جدا اوى يعنى وكنت بعتبرهم هما السبب الاوحد لأى نكد بيحصلى ف حياتى

وأذ فجاءه كده-متعرفش حد دعالى بالهدايه وربنا استجاب له ولا ايه- حسيت بقيمتهم بجد هما ساعات -كتير- بيبقو فعلا نكد ,بس انا بقيت احبهم اوى.وفهمتهم جدااااااااااااا وفهمت حاجات تانيه كتير

دايما علاقتى بيهم بوصفها بمشهد فيلم "قصر الشوق" لما صلاح قابيل وعبد المنعم ابراهيم كانو مروحين ف الشارع بالليل ويايسن بيشتكى لفهمى من قسوه ابوه وان هو السبب اللى بوظله حياته بالقسوه بتاعته,هو فاكر نفسه ايه,كل قوى ف اللى اقوى منه.واذا بيهم يلاقهم ابوهم بيتكدر م العساكر الانجليز و بشيل رمل,ايه ده يااياسين الحق ابوك.هنسيبه كده

-ايوه عشان يحس بالذل اللى هو ذال اللى هو ذاللهنا

وبعدين........بابا ياحبيبى يابابا

ويجرى يشيل الشوال من ابوه

مشهد عبقرى بيقول كل حاجه

المهم,امى بقى عندها 48 سنه لو شوفتوها والله هتقولو اختى موش ممكن ماما حلوه اوى -موش عشان امى- وشكلها صغير موت وهيه بتنبسط اوى بده وبتفرح اوى لما حد يفتكرها لسه "انسه" وده احسن لقب بتحبه ف حياتها-هيه قالتهالى صراحه النهرده بس انا كنت عارفه عشان كده لما البنت بتاعت محل الورد الله يخرب بيتهم سألتنى باسم مين,قولتها الانسه"بسمه"-,اما عن أسوا لحظات حياته بقى لما تطلع وحده شحطه ادى تندهلها تقولها ياماما يامامااااااااااااااا ,ادام اللى فاكرها انسه ده

وعن امنياتها للسنه الجايه ان عيد ميلادها الجاى مكونش بحتفل معاها بيه ف البيت,عشان على حد قولها كفايه كده

انا كنت بكتب عشان امنع نفسى انى اتصل بمحل الورد اخرب بيته,يعنى اول عيد ميلاد لأمى مكونش متخانقه معاها فيه واجيب لها ورد وأول مره يجيلها ورد ف حياتها اصلا

الواد ميجيش

م الاخر...ماأحلى الرجوع اليه

على فكره,انتى اتغيرتى ومبقتيش زى اول ماعرفتك-

"كده احسن م الاول"-

:) موش عارفه تقوليها زى منا بقولها-

اتغيرت ازاى يامان؟-

احلويتى-

شوفلك غيرها-

حاسس انك هاديه اوى ف كلامك-

يمكن عشان هديت فعلا,انا كنت محتاجه الفتره دى اهدى فيها-

4 شهور,موش حرام عليكى-

تؤ موش 4-

3؟-

ونص-

يعنى فاكره اهوه-

بس انت كنت عارف انى هرجع-

معرفش,موش فارقه منا كنت على طول بفكر فيكى بس مصدقتش نفسى لما شوفتك ادامى كنت متأكد انى لسه بحلم-

:) كان شكلك موش ممكن,اكيد العيال قالو عليك عبيط-

بقيتى قليله الادب كده ليه,شكلك يابت موش راكب على الكلام اللى بتقوليه خالص-

ارجع مؤدبه يعنى زى اول ماعرفتنى,بص انا موش بهزأ غير الناس اللى بعزهم,وطول منا بهزأك ده مؤشر كويس على فكره-

ده على اساس ان انا مهزأ يعنى-

انت فايق ولا مسطول؟-

فايق طبعا-

يعنى معملتش الاستمورننج بتاعك,عشان كده دم امك تقيل-

وحشينى-

كداب-

وحشتنى اوى-

كداب اوى-

كده موش حلو-

اكدب عليك يعنى,فاكر اخر مره اتقابلنا,كان هنا ولا عندنا؟-

كان ع البحر-

انتى ناسيه؟-

للاسف لآ-

كنا حلوين اوى يومها,عارفه لو قولتى اى كلمه اولها "ك"-

خلاص laiiiiiiiiiiiiir-

بص انت عارف احنا اد ايه قربنا من بعض,بلاش نرجع للى ف دماغك ده ,انسى بقى عارف "عواطف الانسان اضعف حاجه فيه" لو مشى وراها موش هيبقى كويس-

صحيح ياولاد التعليم بينور الدماغ بردو,ريحى نفسك انتى,اجيبهالك م الاخر احنا عمرنا ماكنا اصحاب ولا هنبقى جربنا ومنفعش-

احنا موش متفقين اننا عمرنا ماهنخسر بعض؟-

متفقين بس بردو احنا موش اصحاب-

لعلمك احنا اصحاب جامدين اوى غصبن عنك-

مش هينفع,انا عايز ابوسك-

هيه دى مشكله اهلك-

لا ده جزء م المشكلها-

انتى جايه النهرده بقى الاف الاميال عشان تثبتى لنفسك موضوع "اصحاب" ده-

طب خلاص ياستى احنا اصحاب-

!!!!-

-هو اخيه عليه نفسى فيه؟

انتى مجنونه؟

بقالك 3 شهور ومش عارفه انتى عايزه ايه

لاعارفه بس مينفعش-

انشالله مانفع,خلاص حياتك كلها هيه اللى نافعه؟-

.......-

ماتجيبى بوسه بقى-

ان تكون مستفزا

أول مره أعرف ان عندنا وزير ف الحكومه بيفهم

تحيه للوزير "فاروق حسنى"

لامؤخذه لغيت التعليقات ع البوست ده,انا عارفه مقدما هيتقال ايه

بس كنت عايزه ابدى تعاطفى مع الراجل اللى كل جريمته انه قال رأيه

كلام بنات

-سفله..سفله,الراجله بقوا سفله.كلهم

موش عايزين غير حاجه وحده بس

-الرجاله بردو؟

-احترمى نفسك,انا والله مابيبقى ف نيتى حاجه

نفسى احب واحد باحترام,الحب العذرى اللى كنا بنسمع عنه زمان ده

امال هو فين الحب العذرى ده يابت؟ ولااحنا اللى حظنا مبيجيش غير ف المسخره

-"الحب العذرى:هو ان الراجل بعد ماينام مع واحده يحافظ عليها عذراء"

الدستور تحت السرير

-ايه اللى تحت السرير ده؟

-الدستور يابت بتاع الاسبوع اللى فات

-بتاع التحرشات؟

-اه هو

-طب وانتى رمياه كده ليه؟

-مخبياه من ابويا

-على اساس انه جورنان سكس يعنى؟

-لا على اساس ان ابويا ميصحش يقرى الكلام ده,موش اى حاجه تسيبها ف متناول ايديهم كده موش كويس عليهم انتى عارفه ان لازم يبقى فيه رقابه ع اللى هما بيقروه

موش ناقصين وجع قلب,ابويا يقرى تفاصيل المليطه اللى حصلت موش هينزلنى من باب البيت تانى

______________________________

اخويا الصغير بعد ماقرى الجورنان

"ياخساره..والله كنت عايز انا انزل مصر اول العيد"-

-اتنيل ده هما اللى هيتحرشو بيك

اما لو طلع اللى ف دماغى صح

سأضمك لصدرى الليله ايضا وسأسمح لحضنك ان يحتوينى-عوضا عن الحائط البارد- حتى يأتى النوم,فمازلت لم أتأكد من شكى بعد

استطلاع رأى عن تحرشات وسط البلد

مكنتش عايزه اتكلم ف الموضوع -رغم انى متابعه من اوله- ولكن الموضوع قتل كلاما واتقال فيه كل حاجه
بس لقيت استطلاع رأى على موقع مصراوى

ماسبب الانتهاكات الفاضحه التى وقعت فى وسط القاهره

1.الفقر والبطاله

2.الكبت الجنسى مع تعدد اسباب الاثاره

3.ملابس الفتيات المثيره

4.غياب الرادع القوى

5.تدنى اخلاقيات الجيل الجديد

6.اسباب اخرى

تعالى بقى لنتائج الاستطلاع -اللى مكننتش مفاجأه بصراحه- اللى رد عليه لحد اللحظه دى 13318 بنى ادم

المرتبه الاولى بنسبه 27.7% الكبت الجنسى مع تعدد اسباب الاثاره

يليها على طول بنسبه 23.11% -اسم النبى حارسهم-دول شايفين ان سبب المليطه اللى حصلت كان ملابس الفتيات المثيره,أمتنع عن التعليق لان اى كلام هيتقال بعد ده هيبقى كلام ابيح

22.9% تدنى اخلاق الجيل

15.1% البطاله والفقر

8.2% غياب الرادع القوى

2.7% اسباب اخرى

ملحوزه: المفروض ان اللى جاوب ع الاستطلاع الناس المثقفين بتوع النت,يعنى

مصيبـــــــــــــــــــــــــه

بكل المقاييس

وفيه بتاع 9 صفحات تعليقات بتانقش الموضوع,مليش خلق اقراهم بصراحه اقراهم انت ولخصهملى

فليذهب الى الجحيم شعب يفكر بهذه الطريقه الوسخه

أحلى بلد ... وأحلى ذكريات

"السيد البدوى"

"شارع النحاس"

"برج النحاس,اللى ف شارع البحر"

"المحـــــطه"



"لو لم أكن مصريا,لوددت ان اكون طنطاويا"

ف حلقه عمرو خالد النهرده كان بيتكلم على اسم الله "العفو" -اه اصل امى بتحب عمرو خالد اوى-

المهم كان بيتكلم ع العذاب اللى احنا هنشوفه ف جهنم انشالله وامى تعييييييييييييييييط -وانا قاعده جنبها- وبعدين اتكلم على شفاعه سيدنا محمد (عليه الصلاه والسلام)وازاى هيتحايل على ربنا "امتى ..امتى"

ماما-يالهوى ده احنا هنتبهدل,ده احنا هنشوف عذااااااااااااب

انا-متخايفييييييييييش ياماما احنا معانا نبى كدهِ

نفسى اتجوز راجل

"تجمــــــــــــــــــــــــــــيع"

فيه حاجه من كل واحد أعرفه

امثله توضيحيه:

مثقف زى "هيثم"

صايع و وسيم زى "حماده"

دمه خفيف زى "عادل"

طيب وبيحبنى زى "محمود"

راجل زى "محمد"

عسول زى "اسلام اخويا"

رجاء للاهميه: من يجد ف نفسه المواصفات السابق ذكرها يسيب اميله ف الكومنتس وسنعيد الاتصال به لاحقا

الريس يلمع أكثر بياضا

-ايه ده هو المعرض خلاص هيخلص؟

-أحسن خليهم يريحونا من صوره الريس اللى هما حاطينها ف وشنا بقالهم شهر دى(بوستر بالحجم الطبيعى لسياده الريس)

-ليه ياميسو حد يقول كده ع البراءه دى,شايفه الابتسامه الملائكيه

عارفه كل اما ابص لصورته احسن انه بيبتسلمى بزاويه فمه بسخريه

-اه ياحبيبيتى بيقولك على قلبك غصبن عنك

-طب طالما هو غايظك اوى كده هاتى موس وقطعيه

-ياريت ياحبيبتى دول بيعاملوها معامله خاصه

-؟

-اه والله كل يوم وانا رايحه الكليه الاقى واحد متشعلق وبيحسس عليها بحته,بينضفها ياختى

-ياراجل :,بيلمع الريس

-اه والله

-باعتينله واحد من لجنه السياسات يلمعه واتارينى بقول الراجل بيبرق كده ليه

"اللهم لاتؤاخذنا بما فعل السفهاء منا"

تانى يوم كنت هحقق لصاحبتى امنيتها ف الحياه لاقيتهم فردينه ع الارض ف الشارع -الصوره طبعا امال انتو افتكرتوا ايه- قولت مصلحه هروح استهبل واعدى من فوقيه,اه تصوروا مخدتش بالى ان مقر امن الدوله ادام المعرض ب20 متر غير لما روحت البيت,مختارينله مكان استراتيجى ولاد اللذين- المهم قربت منه لقيتهم جايبين خرطوم كبيييييييييييير وجردل وبيغسلوه بالصابون!!

بيحموه ف الشارع

فأنا خفت اقرب منه اتزحلق رجلى تتكسر

تحديث

دول مكانوش بيحموه عشان يشيلوه,سابوه ينشف بعدين علقوه وهو نضيف

بوسه وظابط

-ادخل يابنى اغسل بقك,كله بتاع م اللى بيلمع اللى كان على شفايفى

-اغسل بقى مطرح بوستك يعنى ولا ايه ,ده انا لما بسلم عليكى مبغسلش ايدى اسبوع

*****************

-واسمه ايه بقى النبى حارسه العريس اللى جاى بكره ده

-..... معرفش

-متعرفيش ,جميل.طب ايه المعلومات المتوفره عنه؟

-ظابط

-هـــــــــــــــا

؟

-حربيه

-زغرطى يامه

كعبه مانهاتن

"Apple Mecca" will be the company's first retail outlet open 24 hours a day.

http://news.com.com/2061-10793_3-6061531.html

حكمه الريس ياغجررررررر

لما شوفت اللى حصل ف لبنان و اللى هيحصل ف سوريا

عرفت ليه الريس كان واخد الموضوع ايزى كل ماعسكرى لينا يتقتل -بطريق الخطأ طبعا-ع الحدود

يحيا التطبيع

يحيا الريس

لا كده كتير موش قادره اصدق

القاهرة (رويترز) - أصدرت محكمة مصرية يوم الاثنين حكما بحبس مواطن أقام دعوى قضائية لمحاكمة الرئيس حسني مبارك وتضمن الحكم حبس رئيس تحرير صحيفة نشرت عن الدعوى وصحفية بها.وأصدرت الحكم محكمة الجنح ببلدة وراق العرب احدى ضواحي القاهرة الكبرى وقضى بحبس المواطن سعيد محمد عبد الله ورئيس تحرير صحيفة الدستور الاسبوعية المستقلة ابراهيم عيسى والصحفية سحر زكي

ويحق لثلاثتهم استئناف الحكم اذا دفع كل منهم عشرة الاف جنيه (1700 دولارا) كفالة لوقف تنفيذ الحكم
وأقام الدعوى أمام محكمة جنح وراق العرب أربعة محامين ورجل أعمال وصاحب ورشة وعامل طالبين أقصى عقوبة ضد مبارك والصحفي والصحفية اللذين نشرا أنه أقامها أمام محكمة القضاء الاداري طالبا محاكمة مبارك وأفراد أسرته بزعم أنهم باعوا شركات القطاع العام بثمن بخس وبددوا المعونات الاجنبية التي حصلت عليها مصر في السنوات الماضية.

ونشرت الدستور موضوعا عن الدعوه في أبريل نيسان موضحة أن مقيم الدعوى يطالب أسرة مبارك برد 500 مليار

جنيه قيمة شركات القطاع العام والمعونات الاجنبية.

ووجه المدعون للصحفيين ومقيم الدعوى ضد مبارك تهم السب والقذف والتحريض ضد الرئيس المصري والتطاوعليه واهانته.وقال قاضي محكمة الجنح أسامة صلاح قبل النطق بالحكم ان ما نشر هو مما "الت اليه القيم والاخلاق واندثارها بين بعض الاقلام الصحفية التي ارتبطت بنشر كل ما هو هدام لمجتمع يخطو نحو الحرية بخطى ثابتة في ظل مناخ ديمقراطي."وأضاف "القلة من أصحاب الاقلام والنفوس الضعيفة تستغل حرية النشر للاساءة للغير مثلما جاء في تلك الدعوى من اساءة واستغلال لحرية الكلمة... هذه الاقلام تعود كالسهام نحو صدر من كفل لها حرية الكلمة."

ويشير القاضي الى مبارك الذي يقول انه يؤيد حرية التعبير

ومنذ سنوات تبذل نقابة الصحفيين جهودا لالغاء عقوبة الحبس في قضايا النشر. وقال نقيب الصحفيين جلال عارف عام 2004 ان مبارك وعده بالعمل على الغاء العقوبة وتقول الحكومة انها تستعد لاحالة مشروع قانون الى مجلس الشعب بالغائها.

ويرأس عيسى وهو في الاربعينيات من عمره صحيفة صوت الامة وهي أيضا صحيفة أسبوعية مستقلة تصدر عن الدار الصحفية نفسها التي تصدر الدستور. وعادة ما ينتقد عيسى الرئيس المصري في مقالاته في الصحيفتين.
وقال عيسى لرويترز في اتصال هاتفي معلقا على الحكم عليه "هذه قضية سياسية مطلوب منها الترويع والتنكيل... هذا شيء غريب ومدهش أن يكون في الوقت الذي يدعي فيه النظام أنه يؤيد حرية الرأي والتعبير."وأضاف "القضية دليل على ضيق صدر النظام بحرية الكلمة."

وتعقيبا على أن مواطنين أقاموا الدعوى وليس مبارك أو أحد أفراد أسرته قال عيسى "هذا يسقط القضية من أساسها
لان من أقاموها ليسوا أصحاب مصلحة فيها."

نقلا عن مصراوى

عماره يعقوبيان

شوفت الفيلم يوم الخميس مع مجموعه من صحابى,طبعا لازم اشوفه اول مانزل بصفتى من صفوه مثقفى المجتمع,ولازم بردو اقول رأى لزوم الثقافه والفزلكه -ان شئت-

الفيلم زى الروايه وليس نقد او تقديم من وجهه نظر المخرج ولا السيناريست ,اكيد بيختلف عن الروايه ولكن ليست الاختلافات الجوهريه والاختلافات تضيف الى الفيلم مساحات للتمثيل واحيانا لوضع "الافيه"

طبعا اتحذف رأى علاء الاسوانى عن ثوره يوليو- اللى كان ف القصه على لسان موش عارفه مين م الابطال- وهو ان دى موش ثوره ده انقلاب عسكرى

الاخراج كويس جدا -الصرف باين صراحه:)- عجبنى مشهد المظاهره والمطارده اللى بعدها ,اثر فيا اوى

الموسيقى متوظفه صح وبتقول حاجات كتير ودى غالبا مبتحصلش ف فيلم عربى

"هند صبرى كانت بتمثل ويسرا كانت بتتصور"

هند صبرى كانت انفعالاتها over اوى ,مفيش انفاعلات حقيقيه اوى كده ياختى,و يسرا كانت عايشه ف دور النجمه ضيفه الشرف كانت جايه على انها "الممثله يسرا" خنقتنى الكام مشهد اللى ظهرت فيهم

طبعا جمال القصه والفيلم انك بتتعاطف مع كل الشخصيات وبتشوف ان هو ده المسار اللى لازم يمشوا فيه وده التطور الطبيعى للاحداث والحاجه الساقعه,عرض البشر باخطائهم واقرار حقيقه انهم موش ملايكه ده شىء رائع وحقيقى طبعا,وان موش لازم البطل والبطله يتجوزا ف الاخر وكل الشخصيات تعيش ف سلام نفسى وده اللى بيحصل ان محدش من الشخصيات بيخرج من العالم بتاعه ويقابل التانين .

صحيح هو موش احمد راتب ف الروايه كان اسمه "ابسخرون" موش فانوس؟*

و نهايه حاتم رشيد كانت مختلفه عن الفيلم بيتهىءلى عبد ربه بيرجع له ويتخانق معاه ويقتله؟

انا فعلا موش فاكره

بالمناسبه خالد الصاوى ف دور "حاتم رشيد" كان تحفه*.

الاسقاط ابو تلاته تعريفه عند موت "طه" ف حضن الظابط اللى كان بيعذبه ,مالوش اى لازمه*

كتير ومهمه "Quotes" الفيلم فيه كميه *

التمشيه بعد الفيلم ف وسط البلد تساعدك انك تفضل ف المود اطول فتره ممكنه*

حكمه الاسبوع الماضى*- محدش فاهم حاجه

الناس بقت غبيه

اه بجد محدش فاهم حاجه ,حاسه بمشكله فظيعه ف الcommunication skills

كل شويه واحد يتوهنى اكلمه ف موضوع ,ياخدنى ف حته تانيه خالص ويقعد يتكلم..يتكلم..يتكلم,كلام موش مفهوم بالمره ,نوع من الهرتله موش عارفه مين اللى قالهم انهم كده هيبقى غامضين, لا انا فاهمه منه حاجه ولا هو فاهم هو عايز ايه اساسا

اللى بيخلينى على طول بسأل "ايوه انت ,انت عايز ايه دلوقتى؟" -بقولها بطريقه عسل جدا بالمناسبه

الاقى اللى ادامى تنح وتاه بزياده واكتشف الحقيقه المؤلمه وانه واكل دماغى بالصبح بكلام مالوش اى معنى

دى حاله عامه؟ولا انا اللى بقيت غبيه فجاءه؟

بعد ماصارحتهم بحقيقتهم وانى موش فاهمه حاجه م اللف والدوران ده- وياريت نجيب م الاخر بقى عشان صدعت- جتنى الاجابات كالاتى

1. معلش اثر الحادثه انتى عارفه,والله من بعد الحادثه حاسس انى بقيت غريب اوى

2. موش مركز بصراحه انتى عارفه انى مبطل سجاير وحشيش وبتعاطى نعناع وبنبونى دلوقتى بس موش قادرين يعملوا معايا دماغ صراحه

3. الشغل واكل دماغى يابتنى ,انا عارف ان ده مأثر على تركيزى معاكى

لا موش قادره اصدق ان كل دى صدف

العنوان من عند ابليس

بجد ولا اشتغاله؟

مكتب مكافحه المدونين قامت مباحث أمن الدوله ، بإفتتاح مكتب مكافحه جديد ، هذا المكتب يختص بالمدونين ، نعم المدونين ، إسمه مكتب مكافحه المدونين ، وقائده هو وليد الدسوقي ، سمعوني زغروطه وسلام كبير لأمن الدوله ووليد الدسوقي وحبيب العادلي .وسيكون التهم الموجهه للمدونين تقريبا كما تأتي :وضع بنرات للدعايه لمظاهرات ومسيرات وإعتصامات بدون أخذ تصريح ، التحريض علي قلب نظام الحكم في مصر ، إهانه رئيس الجمهوريه عن طريق كتابات علي الشبكه العنكبوتيه ، ترديد معلومات ومقالات وبانرات من شأنها تكدير الشأن العام ، إن شاء مواقع تهدف إلي الإضرار بالحاله الأمنيه داخل البلاد ، وفيه حاجه خاصه بالهاكرز المدونين ” الإعتداء علي أجهزه أمن الدوله أثناء متابعه هذه المواقع “.

عموما لو الكلام ده بجد,فياريت ياجماعه متخدوش على كلامى ف اى حاجه قولتها ف المدونه الهبابه دى

ده انا كنت بهزر:)))))

"ربنا يخليك لينا ياريس,ربنا يخليك لينا ولكل الناس ,ولمصر كلها ياريس,وكل سنه وانت طيب"

واللى يحبنا ميضربش نار

ياما صادفت صحاب و ما صاحبتهمش"
و كاسات خمور و شراب و ما شربتهمش
أندم علي الفرص اللي انا سبتهم
"و الا علي الفرص اللي ما سبتهمش

رباعيتى المفضله كانت تعليقى على رفضى تجربه الحشيش لأول مره,بصراحه استغربت نفسى اوى

طفى النور يا بهــــــــــــيه

حفل المدونون الاول.....DISAPPOINTED

هيه دى الكلمه اللى ممكن اوصفه بيها

قررت انى اروح وقطعت مئات الاميال وعملت على ماما حوار -كالعاده- ومروحه بيتنا بعد منتصف الليل

مكنتش مبسوطه خالص,مع انى مكنش عندى اى نوايا سيئه مسبقه تجاه الحفل,لم اشك ف التمويل زى ماناس كانت بتقول ولا الهبل بتاع حزب المدونين والكلام الفاضى ده وان خلاص لازم يتعملهم حركه تلمهم بدل ماهم متبعترين كده

المهم,الحفله محستش بالحميمه فيها خالص وده اخر حاجه كنت اتوقعها

موش عارفه لازمته ايه الفيلم التسجيلى بتاع الجزيره والمصحف الشريف كلنا شوفناه,لازمته يضيع اول نص ساعه ولا النشيد بتاع الاخوان اللى قبله ده

مفيش نظام خالص

واداء الفقرات هزييييييييييييل ,العالم دى مسمتعش عن حاجه اسمها ديكور ولا ايه؟

انا عارفه ان اهم اهداف الحفله لفت الانتباه للأفراج عن المعتقلين,لكن لما يبقى حصر المعتقلين ف علاء و شرقاوى

ده اسمه .....

فيه ناس كتير محدش حاسس بيها -مع الاحترام طبعا لعلاء والشرقاوى- بس ع الاقل دول صوتهم وصل والناس عرفت خلاص,ننقل بقى ع اللى بعده

روحت ب "بافلنت" و"بورشورات" كتير لما بصيت فيهم ف البيت لقيت ان كلهم دعايا عن كتب وندوات ومواقع,موش دى اعلانات بردو؟,انا ضد ان حاجه زى دى تستخدم استخدام تجارى اعلانى مغلفه بطابع الحفله,اتضايقت جدا

الحسنه الوحيده اللى بسطتنى بجد انى قابلت منار و محمد اللى كانو بجد واحشينى موووووووووووت

أنا وبابا والمدونه

الخميس 12:00 بالليل

انا :عايزه اتفرج ع الجزيره

بابا:اشمعنى؟

(متستغربوش ف الوقت ده من السنه-قبل امتحانات الثانويه العامه بشهر تصبح الفرجه على التليفزيون بأذن مسبق ومفيش مفر غير انى اتفرج ع التليفزيون اللى ف اوده بابا مع انى مبحبش اشوف حاجه عنده ,هه يلا)

-هشوف "تحت المجهر"

-ليه؟

واخدين بالكو م التحقيق ده

-حلقه عن "المدونات"

-مين؟

-ناشطى الانترنت

-احنا موش قولنا مالناش دعوه بيهم

"دى بقى من ماما"

المهم تم المراد من رب العباد وخدت تصريح فرجه لمده ساعه

بعد ربع ساعه من الحلقه,

لاقيت بابا راشق فيها -هو على الرغم من معارضاته الظاهريه على اختيارتى الا انى متاكده انه يثق فيها-,ليسألنى السؤال اللى انا مستنياه -يعنى ايه "مدونه"

بعد ان سمع الكلمه تتردد كثيرا

ارد ف اقتضاب:موقع شخصى

يبصلى من تحت لتحت وانا ابتسم وانا اشاهد لقطات الفيديو او كل مايظهر علاء او اى من الوجوه المالوفه على الشاشه

يسأل تانى:هما سايبنهم عادى؟

لا والله ابويا راجل مثقف جدا بس خوااااااااااااااااااف

-ربنا يفك حبسهم

ييرمى سؤال اعرف مغزاه تمام:هو ممكن ان تتعرف شخصايتهم الحقيقه

-الموضوع موش سهل غير لو كانوا هما اللى عايزين يوروا نفسهم للناس

الحلقه خلصت,ابويا مازال منبهر باللى شافه ,اه ومش بعيد كمان تكون وجهه نظره اتغيرت وعرف ان لسه فيه رجاله ف البلد

يسألنى ف ملاوعه:وانتى المدونه بتاعتك اسمها ايه؟

ابتسم ف استعباط:يعنى ايه "مدونه"؟

قاعد ف قصره,يحلف بنصره

طب واحنا مالنا .دى مصر مصره

أبو ضربه أولى ,رمز البطوله

منذ الكافوله داعياله مامته

رقت بيجامته,تسلم عيونه,تسلم حمامته

وكمان مدامته رمز الامومه

ام الطفوله ,عرفت تربى

عجبا ياربى,تقولش فوله!!

طبعا ماهو ابنه

وهيبقى ابونا

يجيب يمينا ... مكان شمالنا

طب واحنا مالنا!! ماكنش مالنا ولا مال ابونا

خدنا الصابونه

عادل سلامه

18-4-2006

التاريخ بيعيد نفسه

كل اللى حصل امبارح,حصل تانى النهرده

اعتصامات القضاه,اعتصموا واتضربوا امبارح والامن ضربهم تانى النهرده-وحشين مبيحرموش-

تفجيرات سينا امبارح وكلاكيت تانى مره النهرده

معقوله,ديجا فو ,بس يوصل للدرجه دى؟

من لم يمت بالعباره مات بدهب,مات بالفراخ,مات ف كنيسه,ف اعتصام...مات بحسرته

لما حصلت تفجيرات طابا

اسرائيل حذرت قبلها

ولما حصلت تفجيرات شرم

اسرائيل حذرت

وف دهب

بردو اسرائيل حذرت

يا جماااااااااااااااعه

خلى عنيكوا على بتوع تل أبيب

احنا موش عايزين نلزق بلاوينا لاسرائيل ولا حاجه عشان دول ناس كمل ومحترمين وجهزوا عربيات اسعاف قبل ماحنا نفكر نتحرك تقريبا -اه ماهم عارفين ساعه الصفر كمان- وموقفينها ع الحدود عشان يشيلو الميتين,طمرت فيهم الجيره والله

انا رأيى المتواضع ان وزير الداخليه بتاعنا يقعد يصيف ف جمصه و المعلومات هتجيلنا لحد عندنا رأسا من تل ابيب,بس يعمل حسابه من دلوقتى ع الضربه الكبيره

يوم 6 اكتوبر

اه منا كمان بقيت اعرف ميعاد ساعه الصفر

******************************

طبعا بسلامته هطير النهرده على شرم الشيخ يحي ذكرى تحرير سينا ويشجب الحادث الاثيم -بيفكرنى باللمبى والله Absultly دى ظاهره عالميه ف الديزه,ميدان عابدين,عتبه- ويتوعد الجناه قتله الابرياء-عايزين تلغوا الطوارىء ابقوا قابلونى- ويستعبط عادى خالص ويدعو لعقد مؤتمر شرم الشيخ

والوليه ترمى بوكيه ورد ف النيل..نيل ايه قصدى البحر اللى هناك

*******************************

عجبنى تعليق "ضياء رشوان" على الحادث لما قال المقصود بالحادث

"جتكوا خيبه احموا نفسكوا الاول,ده انتوا موش عارفين تأمنوا شرم الشيخ اللى هيه بيت الريس"

ونفى ان ينسب الحادث الى اسلامين او مختلين طبعا ,ربما تكون عناصر غاضبه من جراء اعتقالات طابا استغلتها أيد خفيه

موش ده أوقع من بتوع الجهاد فى مصر والشام؟مع عدم ايمانى بنظريه الموءامره عموما

"طز في مصر.. وأبو مصر.. واللي في مصر"

القاهرة- تفاقمت ازمة تصريحات محمد مهدى عاكف مرشد الاخوان التى نشرتها جريدة روزاليوسف ,حيث اثارت التصريحات غضب واستياء كثير من اعضاء البرلمان.

وحسبما قالت وكالة انباء الشرق الاوسط فقد طالب نائب مجلس الشورى محمد فريد زكريا محاكمة مهدى عاكف حال ثبوت اطلاقه تصريحات تسىء الى مصر.

ورفض النائب ان تمر كلمات مهدى عاكف وتصريحاته مرور الكرام معلنا رفضه أى مساس بمصر أو التطاول عليها.

وفجر الكاتب الصحفي عبد الله كمال رئيس تحرير روزاليوسف مفاجأة مدوية عندما إذاع مقاطع من الحوار بصوت عاكف في برنامج البيت بيتك الذي يبثه التلفزيون المصري على قناته الثانية يومياً على الهواء مباشرة.

يذكر ان الحوار الذى نشرته روزاليوسف وردت فيه عبارات قال المرشد فيها "طز في مصر.. وأبو مصر.. واللي في مصر".

ضاق خلقى

-بجد دى موش طريقه,موش ملاحظ حاجه,المكان الوحيد اللى بتفق فيه هو "السرييييييييييييير"

-:)))

-انا موش بهزر دلوقتى

-ياحبى مادى اهم حاجه لازم نتفق عليها ,الباقى يهون

......

بلد دمها مباح

-يابنتى هدى الميه شويه

-ايه يابابا يعنى مغسلش سنانى

-اغسلى بس حرام الميه دى

-لآ موش حرام ,ماالشوارع طول عمرها غرقانه ميه ,جت على شويه الميه اللى هوفرهم وانا بغسل سنانى

,وبعدين ده نصيبى من المياه الاقليميه وانا حره فيه وانا موش هسيب نصيبى لحد

عارف انا استبحت اموال البلد دى واللى هيقع تحت ايدى موش هسيبه وهحط موس ف شنطتى واقطع الكراسى بتاعت الاتوبيسات -بتاعه الحكومه-

-ملقيتش غير الاتوبيسات

-هعمل ايه يعنى هختلس من العهده ولا اخد قرض واسافر اهو اللى يقع تحت ايدنا ياحاج

مصرية تنجب خمسة توائم يحملون اسماء الرئيس المصري وزوجته

القاهرة (ا ف ب) - وضعت مصرية خمسة توائم اسمتهم محمد وحسني ومبارك وسوزان وهانم تيمنا بالرئيس المصري وزوجته كما افادت صحيفة الجمهورية المصرية الاربعاء.
وقالت الصحيفة ان عزيزة عثمان ثابت (35 عاما) انجبت في مستشفى خاص في محافظة الوادي الجديد شمال شرق مصر ثلاثة صبية حمل كل منهم جزءا من اسم الرئيس المصري وابنتين حملتا اسمي هانم وسوزان.
وقال الطبيب يوسف جبالي ان التوائم الخمسة في صحة جيدة موضحا ان الوضع تم بسرعة.
ولدى الام ثلاثة اطفال اخرين من زوجها المزارع محمد مرتضى ثابت.

على ضمانتى

قرص اليرجكس (كافيين) + قرص فلورست

لنزلات البرد فعال جدا بيتهىءلى قادرعلى شفاء انفلوانزا الطيور نفسها

التجربه الدنماركيه

قريت امبارح ف شريط اخبار الجزيره عن فصل رئيس تحرير اردنى بسبب مانتشرته صحيفته من رسوم مسيئه للرسول -صلى الله عليه وسلم- نقلا عن الصحيفه الدنماركيه

عايزه افهم يعنى هما موش قادرين على حته صحفى عندهم بوظلهم سياستهم الخارجيه وخسرهم فلوس ااااااااد كده واحنا بكل سهوله "فصل رئيس تحرير" ,سهله يعنى للدرجه دى

ينفع كده يعنى؟ و سلملى ع الديموقراطيه

بصراحه انا اتفقعت خلاص ,ايه مفيش سيره غير عملت الدنمارك وحيات ابوكو ارحمونا

ارحمونااااااااااااااااااااااااااااااااااااااااااا بقى وبطلوا تمثيل

كنت فين من شهر اكتوبر-ولا مكنتوش تعرفوا زى ماامى بتقول؟- كب احب اقولكوا علة حاجه تانيه لو متعرفوهاش عشان متيجوش كمان 9 شهور وتشغلوا المظاهرات

"أمريكا داست ع المصحف ف جامونتنامو"

خلاص ادينى قولت اهو عشان محدش يجى يقول مكناش نعرف

وخلصت حكايه

النهارده نهيت قصه حب دامت لأكتر من 4 سنين

موش زعلانه,موش فرحانه... مرتااااااااااااااحه

وبالمناسبه دى أحب اسمع اغنيه "ازيك حبيبى" لمصطفى كامل

حبيبى اهوه

الزعيم بيشخ زينا

سورى للأرف اللى سببه لكم العنوان لكن ده رد على معجبين الزعيم -اللى هو بيحكى عنهم- اللى بيلمسوه عشان يحسوا اذا كان حقيقى بشر ماشى وسط ويسالوه "هو انت بتدخل الحمام زينا؟"

حبيت ارد على السائل -اللى هو اكيد موش هيقرى البلوجر ده

الحكايه ومافيها ان وانا قاعده عند تيته امبارح -اه عارفه انى كنت قاعده عند خالتى واحيانا بردو بلجأ عند تيته اللى لاأوجهه لها اى شكر ,اول ماهتشوفوا تيته ياجماعه هتعرفوا محمد سعد استوحى شخصيه أطاطا منين- المهم, تيته طبعا معندهاش الاختراع اللى اسمه (دش) لانه بيجيب جاجات وسخه -على حد قولها طبعا- فكنت مضطره لانى اتفرج على التليفزيون الارضى والقناه السابعه اللى اكتشتفت انها مبقتش تيجى غير للمحظوظين بتوع الدش بس

كان بتذاع البرنامج الخنيق "سكوت هنغنى" والضيف الزعيم عادل امام ,ياسلام ع اللقاء هوه ده بجد الاعلام المصرى اللى متعود طول عمره على تأليه الحاكم ,أفتكرت كلمه "ابراهيم عيسى" نحن نعيش عصر الحاكم الاوحد والنجم الاوحد والبتاع الاوحد

الحديث كله عن نجوميه الزعيم والتزام الزعيم وثقافه الزعيم وتواضع الزعيم

تصوروا ياأخوانا انه لما بيسافر تبع مفوضيه اللاجئين بيصر انه يسافر على حسابه وبهذه المناسبه احب أسال الزعيم "قضيت رأس السنه فين يانجم؟"

اكيد قضيتها ف حته بعيد عن المهندسيييييييييييييييييييييييين

و لما بيروح الشهر العقارى ويصر ويتمسك بحقه الطبيعى كأى مواطن انه يقف ف الطابور بس الشهر العقارى اللى مبيرضاش

ولا ولاده اللى مبيرضوش يقولوا ف اى حته انهم ولاد الزعيم

ولا ثقافه الزعيم ياسلام ياولاد على ثقافه الزعيم وأننا لازم نبقى عارفين "اللى بيحصل الناحيه التانيه ف البحر الابيض" استخدم نفس المصطلح,وانه كان لما بيروح يشترى بتعريفه طعميه كان بيقرى القرطاس ولما القرطاس يخلص كان بيرجع لبتاع القرطايس عشان يكمل الموضوع -اه والله قال كده-

ولا التزام الزعيم وانه راجل بيتوتى

لا واتكلم ف حاجات تانيه بقى,العمق الثقافى-عمق ياابن الكلب- ورحلته كفاحه ف الفن من ايام ماكان بينضرب على قفاه لحد مابقى يضربنا على قفانا,وبعدين اتكلم ع الرياده الاعلاميه و الارهاب والمقاومه الفلسطينيه والانتخابات بس نسى يبايع الريس

ف اخر الحديث ...المذيعه تشكر الزعيم على وقته الثمين وأنا اترحم على أحمد زكى

أول قلم ف 2006

مقولتلكوش بقى ع اللى حصل يوم رأس السنه ف رحله العوده -اه بعد الحفله- وانا بعيد عندكوا راكبه الميكروباص أنا والواد بتاعى ومروحين بلدنا وش الفجر

أول ماركبنا الواد -بتاعى- حط راسه ع الكرسى ونااااااااااااااااااااااام -مكنتش أعرف أنه مرتاح الضميركده

الميكروباص كان كله شباب نص سكرانين والسواق كمان عامل دماغ والاخ نايم جنبى وأنا البنت الوحيده ف القعده

المهم,على نص المسافه كده كانت العربيه فضيت ماعدا 4 شباب شله وحده ,2 قاعدين ورايا و2 مرزيين ادام خالص جنب السواق

شويه وبدأت حاجات غريبه تحصل وكلام غريب يتقال واستظراف من عينه

"ها قضيت سهره حلوه ياأحمد"

"بس ايه الحلاوده دى يااحمد,هو الناس بتحلو ف البرد كده"

"هو الجو عندكو ورا ساقعه بردو ياجماعه ولا شكل العمليه دفا؟ العمليه دفا مش كده"

أنا مصدرهلهم عبدو العبيط ع الاخر ولا كأن الكلام ليه بس حسيت من كلامهم انهم بيئه

شويه واتهيئلى ان حد بيلعب ف شعرى والكابيتشو وبعدين أيد أو رجل تتمد عبر المقعد الخلفى لتلامس قدمى -حظ امه انى كنت قالعه الكوتشى- هنا قلت ف تأفف واضح "اووووووووووووووووووووف بقى,ايه الارف ده"

لأجد -الايد او الرجل- تراجعت مكانها

كل ده وانا لم احاول ان انظر ورايا حتى

لا يمكنكم ان وانتم مسترخيين امام شاشاتكم ان تتخيلو موقفى أو احساسى وقتها

الجو بررررررررررررررررررررررررررررد جدا وشابوره كثيفه جدا جدا لا يمكن معها ان ترى كف ايدك ساهمت بالطبع فى بطء السير وبالتالى طول رحله العوده

وفى الداخل 4 حيوانات لن يتورعوا عن فعل اى دناءه

وانا مرهقه جداااااااااااااااااااااااااااااااااا ,بردانه,وحييييييييييييييده -باستثناء النائم جوارى طبعا- ,خائفه م الظلام ,قلقه على انكشاف مخططى من قبل ماما

طب ماصحيتيش النايم -ف العسل- ليه؟ خفت لو صحيته وقلتله انا خايفه م الضلمه و الشابوره وأشفقت عليه لانه لم ينام منذ ليتلين عشان يودينى الحفله اللى انا عايزاها

اخذت اتشاغل بتقليب محتويات حقيبتى واللعب ف الموبايل وانا ارتعش

مرعووووووووووووووووووبه ,ياولاد الجزمه طب انزلولى راجل لراجل ف النور وانا افرجكوا

اخيرااااااااااااااااااااااااا,عند مدخل المدينه هززته ف عصبيه يمكن يصحى

_مين؟ انا فين؟

-صباح الخييييييييييييييييير,احضرلك الفطار ياحبيبى

وطبعا محكيتلوش على ماحدث اثناء نومه على اساس اننا وصلنا خلاص

أن أن أأأأأأأن ,الموسيقى التصويريه تتسارع

حانت اللحظه,لحظه النزول

لم اكن اتوقع ابدا تلامس بالايدى ولكن ده اللى حصل

ثم

طااااااااااااااااااااااااااااااااااخ

لا "طاخ" دى من عندى انا نزلت على وشه بحته قلم هو الاعنف فى تاريخى

فعلها بدون أى تفكير ,لو كنت فكرت ماكان اختلف رد فعلى

لأجده يصرخ بكل بجاحه "ايه حد كلملك؟"

حد كلمنى ياابن الوسخه التى استبدلها الرقيب اللغوى لدى وجعلنى انطقها "ياسافل"

وقلت بعدها كلمتين لا أذكرهم

لاجد المستيقظ حديثا بجوارى يصرخ "ايه مالك ؟حد ضايقك"

نظرت له فى غل

لاجده يصعد مره اخرى الى الميكروباص ويغلق الباب خلقه واسمعه يصرخ -كأى واحد ابوه ظابط شرطه فى هذا البلد- ودين امى لأبيتكوا ف القسم ,أشده من كتفه لنرحل عملا بمدا الكتره تغلب الشجاعه ,مين هيحس بينا ف والموقف خالى تماما من البشر

أخذ يصرخ مصحيتنيش ليييييييييييييييييييييه ,ثم ابتسم بزاويه فمه وقال لى "يلا ياستى اللى اتحرمتى منه ف الحفله لقيتيه ف الميكروباص"

وانا اقول لنفسى "اللى ميسمعش كلام امه عمره مايكسب"

وأفكر ف اللمسه اياها ومدى استفادته منها ,هل حققت له اى اشباع ,وكيف جرؤ اصلا على لمس وحده لم يجد منها الا الاشمئزاز وعدم القبول م الاول

؟

سامحينى ياماما

أنا مقضيتش رأس السنه ف فرح بنت خاله "هبه" زى ماقلتلك,أنا كنت ف حفله منير ف الاوبرا,منا عارفه أن لو قلتلك مكنتيش هتوافقى وأنا كان لازم أروح